იეჰოვაქ ქიმირჩქილუ ჩქიმ ლოცვეფ

ᲛᲝᲬᲛᲔᲔᲤᲘᲨ ᲛᲝᲣᲚᲐᲥ ᲩᲥᲘმ ᲪᲮᲝᲕᲠᲔᲑᲐ ᲓᲝᲗᲘᲠᲣ

დებაბდჷ 1929 წანაშ 22 დეკემბერს, ბელგიაშ არდენეფიშ ჭიჭე სოფელს ნოვილს, ნამუთ ქალაქ ბასტონიშ ხოლოს რდჷ. თე სოფელს გვალო ჩხორო ოჯახ ვოხორანდით. ბაღანობა ჯგირო გუმაშინე. მა დო ჩქიმ უკლაშ ჯიმა, რეიმონდ, სოფელიშ საქმეეფს ირო ვოხვარუდით ჩქინ მშობლეფს. ქოთ ჩხოულეფს პჭვალუნდით დო ქოთ მოსავალს ეპჭოფუნდით. რახანს თე სოფელს ბრელ ვა ვოხორანდით, არძა ართიანს ვოხვარუდით.

ჩქიმ მშობლეფ, ემილ დო ალის, დუდგინოდვალირ კათოლიკეეფ რდესჷ დო ირ ჟეშხას ოსწრუდეს წირვას. 1939 წანაშო ინგლისშე ჩქინ სოფელშა პიონერეფქ ქუმორთეს დო მუაჩქიმს შეთავაზეს, გეგშეჭარუკო ჟურნალ „ნუგეშ“ (ასე ჯოხო „გეგშაკურცხით!“). მუაჩქიმქ ხეთეშე ქიმეხვად, ნამდა თენა ჭეშმარიტება რდჷ დო ბიბლიაშ კითხირ ქიდიჭყჷ. ჭიჭე ხანშა წირვეფშა გილულა მიოტუ. ათეშენ, მეზობელეფქ, მიდგაწკუმა აიშახ ჯგირო ვორდით, თიშ წინააღმდეგ მიდართეს. თინეფ ონირზუდეს მუაჩქიმს დო ირნერო ოცადუდეს, მიოტებაფუესკო ჭეშმარიტებაშ გურაფა.

გურს მიჭუანდჷ თიშ ძირაფა, მუ დღაშა გეურდეს მეზობელეფს მუაჩქიმ. ზუსტას თექ გინმოჭყვიდირაფუ, ლოცვათ ქუდურაგადეკო ღორონთის, ნამუთ ახალ გაჩინებაფილ მაფუდ დო ქოფთხიკო მუაჩქიმიშ მოხვარა. მეზობელეფქ ჭიე-ჭიეთ მიოტუეს მუაჩქიმწკუმა ნირზ, მუთ მანგარო მოხიოლუდ. თე შემთხვევაქ დუმარწმუნ, ნამდა იეჰოვა „ლოცვეფიშ მარჩქილე“ ღორონთ რე.

ᲪᲮᲝᲕᲠᲔᲑᲐ ᲛᲐᲟᲘᲐ ᲛᲡᲝᲤᲚᲘᲝ ᲝᲛᲘᲨ ᲓᲠᲝᲡ

ნაცისტურ გერმანიაქ ბელგიას 1940 წანაშ 10 მესის გიანთხჷ, მუდგაშ გურშენ თე ქიანაქ ბრელს აჸუ დატებელქ. ჩქი საფრანგეთიშ სამხრეთ ნაწილშა იმნტით. შარას ბრელშა მოფხვადით ოშქურანჯ სიტუაციას, მუშენდა გერმანია დო საფრანგეთ შქას ხოლო ჩხუპ მიშჷ.

ჭიჭე ხანშა შემალებუეს ჸუდეშა დორთაქ, მარა დორთელს ჸუდექ გოჩოლერქ დოფხვადეს; მუთ ქუმაპალუდეს, ირფელ მიდუღალუნა; აკა ჩქინ ჯოღორ ბობიქ დოფხვადეს. თე ირფელიშ უკულ ირო თიშე ფიფქრენდჷ, მუშენ ხვადუდ ომეფ დო მუშენ იტანჯებუდ ხალხ.

თიმ პერიოდის მუსხირენშა მიძირუეს ჯიმა ემილ შრანციქ, ნამუთ პიონერო დო უხუცესო მსახურენდჷ. თიშ მოულა მანგარო ელამკინანდეს გურშა. თიქ ბიბლიაშე გემინწყჷ, მუშენ იტანჯებუდ ხალხ დო ჩქიმ შხვა კითხვეფს ხოლო ქუპასუხ. თექ მიმეხვარ, იეჰოვაწკუმა ხოლოშიან ურთიერთობა გუვავითარკო დო დებრწმუნკო, ნამდა თინა მოჸოროფე ღორონთ რე.

მართალ რე, ომ დიო ხოლო ვა რდჷ თებულ, მარა და დო ჯიმალეფწკუმა ურთიერთობაშ საშვალება იშენით მიღუდეს. 1943 წანაშ არგუსოს ჩქინდა ჯიმა ჯოზე ნიკოლას მინაქ ქუმორთჷ დო მოხსენება წამკითხეს. თიქ პკითხეს: „მის გოკონა ნათუა?“. მა დო მუაჩქიმქ ხე გეპჭოფით დო დიმნათით წყარს, ნამუთ ჩქინ ჸუდეწკუმა ხოლოს მიკიშ.

1944 წანაშ დეკემბერს დასავლეთ ევროპაქ გერმანიაშე ხოლო ართ შეტევა მიღჷ, ნამდგას „არდენეფიშ ოპერაციაქ“ გიადვჷ. ფრონტიშ ხაზწკუმა ხოლოს ფცხოვრენდით, ათეშენ დახე ართ თუთას ჸუდეშ პადვალს ბტყობუდით. ართ დღას საქონელიშ დადიარაფშა პადვალშე გეშაფრთჷ. თე დროს ბომბუაქ ქიდიჭყჷ დო ბომბაქ ჩქინ მაღაზას ხოლო ქიგიანთხჷ. ამერიკელ ჯარიშკოჩიქ, ნამუთ ჩქიმ ხოლოს ჸოფე, გემღვარუ: „ქაშენჯირ!“. მა ხოლო ქიმიბრულ დო თიშ ხასლას ქაშემჯირ დიხას. მუთუნქ ვა მაღოლუკონ თიშენ, თიქ მუშ კასკა ქუგმორთვჷ დუდის. თენა გერმანიაშ ბოლო დიდ შეტევა რდჷ დასავლეთ ფრონტის.

ᲡᲣᲚᲘᲔᲠ ᲠᲓᲣᲐᲚᲐ

ომიშ უკულ ირიათო მიღუდეს ურთიერთობა ქალაქ ლიეჟიშ კრებაშ და დო ჯიმალეფწკუმა, ნამუთ ჩქინდე სოდგარენ 90 კილომეტრიშ მაშორას რდჷ. უკულ ბასტონს ხოლო ქიჸუ ჭიჭე ჯგუფიქ. ჭიჭე ხანშა საგადასახადოს ქიდიპჭყჷ მუშობა დო იურიდიულს ხოლო ბგურაფლენდჷ. უკულ, სანოტარო ბიუროს სტაჟიორო გეპჭოფეს. 1951 წანას ბასტონს რაიონულ კონგრეს ჩუვატარით, ნამდგას სოდგარენ 100 კოჩიქ დესწრჷ, თინეფ შქას ართ მონდომებულ პიონერ დაქ ელი როიტერქ. თიქ კონგრესშა 50 კილომეტრიშ მაშორაშე მორთჷ ველისპეტით. მალას ართიანქ ქიმეჸოროფეს დო დებნიშნით. ელიშა სკოლა „გალაადიშ“ მოწვევა რდჷ მოულირ. თიქ მსოფლიო მთავარ სამართველოს წერილ ქიმეჭარ, ქუწუ, ნამდა ვემკართედ სკოლა დო მიზეზ ხოლო გეუნწყჷ. ჯიმა ნეითან ნორქ, მით თიმწკუმა ჩქინ ორგანიზაციას ხემძღვანელენდჷ, პასუხ დურთინუ დო უწუ, ეგება ართ დღასით სქან ქომონჯწკუმა ართო გემკორთევა თე სკოლა. მა დო ელიქ 1953 წანაშ ფრევალს დეფქორწინით.

თიმ წანას მა დო ელიქ ნიუ-იორკის, იანკიშ სტადიონს დევესწრით კონგრესის „ახალ ქვეყნიერებაშ საზოგადოება“. თექ ქეშეფხვად ართ ჯიმას, ნამდგაქ ამერიკაშა გინულა დო ჯგირ სამუშა შემოფთავაზ. მა დო ელიქ ქიბლოცით თე საკითხშე დო უკულ გეგნოპჭყვიდით, ვარია ქუწითკო თი ჯიმას დო დიფრთითკო ბელგიაშა, ნამდა ქიმვეხვარითკო ბასტონიშ ჭიჭე ჯგუფის, სოდეთ ვით მაუწყებელ რდჷ. უკულიან წანას ჩქინ ბოშიქ, სერჟიქ ქეშმეძინეს. მარა, სანარღოთ, შქვით თუთაშა თიქ დელახ დო დომღურეს. ჩქინ გურჭუაშენ ირიათო ვეჩიებუდით იეჰოვას ლოცვას დო გათელებაშ იმენდ მამანგარენდეს.

ᲡᲠᲣᲚ ᲓᲠᲝᲗ ᲛᲡᲐᲮᲣᲠᲔᲑᲐ

1961 წანაშ ოქტომბერს თიცალ სამუშა ქიფში, ნამუთ პიონერო მსახურებაშ საშვალებას ქომუჩანდჷ. გვალო თიმ დღას ბელგიაშ ფილიალშე ჯიმაქ დომრეკ დო პკითხჷ, რაიონულ მსახურებაშ დოჭყაფაშენ მუს თქუანქია. მა ფთხი, ქიშილებენ-და, დიო ჭიჭე ხანს პიონერო ქიმსახურენთ-მაქ, მუდგაშეთ დემეთანხმეს. ბრუო თუთას ქიმსახურით პიონერეფო დო 1962 წანაშ სექტემბერს ქიდიპჭყით რაიონულ მსახურება.

ჟირ წანას რაიონულ მსახურებაშ უკულ, ბეთელშა მემწვის, ნამუთ ბელგიაშ დედაქალაქ ბრიუსელს რდჷ. თექ მსახურება 1964 წანაშ ოქტომბერს დიპჭყით. თე ახალ დანიშნულებაქ ბრელ კურთხევა მომღეს. 1965 წანას ჯიმა ნორქ მორთჷ ჩქინ ბეთელიშ მონახულებაშა. მანგარო გამკვირდჷ, ფილიალიშ მსახურო დებნიშნინ. ჭიჭე ხანშა, ჯიმა ნორიშ 13 წანაშ წოხოლე ნარაგად სიტყვეფქ გემირთეს დო მა დო ელი სკოლა „გალაადიშ“ 41-ა კლასშა მემწვის. სკოლაშ თებაშ უკულ კინ ბელგიაშ ფილიალშა დუმორთინუეს.

ᲘᲔᲰᲝᲕᲐᲨ ᲮᲐᲚᲮᲘᲨ ᲣᲤᲚᲔᲑᲔᲤᲘᲨ ᲓᲐᲪᲕᲔᲑᲐ

წანეფიშ დინახალე მიღუდ პატი, ჩქიმ იურიდიულ რჩქინა გეგმიბრინეკო ევროპას დო შხვა ქიანეფს იეჰოვაშ ხალხიშ უფლებეფიშ დაცვებელო (ფილ. 1:7). თე საქმეშ გურშენ 55-შე უმოს ქიანაშ წარმომადგენელწკუმა მიღუდ ურთიერთობა. თენა თიცალ ქიანეფ რდჷ, სოდეთ ჩქინ საქმიანობა თავისფალო ვემიშ ვარდა გვალო აკრძალულ რდჷ. თინეფწკუმა შეხვალამაშ დროს, თიშ მანგიორო, ნამდა მითქუალუდუკო, მა იურისტ ვორექ-მაქ, ურაგადუდ: „მა ღორონთიშ მსახურ ვორექ“. ირიათო იეჰოვას ფთხინდჷ ხემძღვანელობას ლოცვას, მუშენდა მარჩქილედ, ნამდა „მეფეშ გურ იეჰოვაშ ხეს წყარიშ ნაკადეფცალო რე; სოვრე ოკონ, თევრე გუტენს“ (იგავ. 21:1).

ამდღა ხოლო ფშჷ თი დღა, მუჟამსით ევროპაშ პარლამენტიშ წევრის შეფხვად. თეიშახ ხოლო მუსხირენშა მიმნდომ თიწკუმა შეხვალამა დო მუთ იჸუ, დემეთანხმჷ. ქეშეფხვადითინ, თიქ მიწუ: „ოჩიებელო ხუთ წუთ გიღჷ, ართ წუთის ხოლო ვეგეიძინანქ!“. დუდის გეგმუკინ დო ლოცვა ქიდიპჭყჷ. თიქ გაკვირებულო ქინმოჯინ დო პკითხჷ, მუს ორთუქია. დუდის ეუკინ დო უპასუხ: „მადლობა გინუგ ღორონთის, ნამდა მუშ მსახურწკუმა ჩიებაშ საშვალება მუჩჷ“. თიქ გაკვირებულო პკითხჷ, მუშ რაგად გოკონია, მუდგაშ უკულ ქუვოძირე რომაელეფიშ 13:4. თე პარლამენტარ პროტესტანტ რდჷ დო აფასენდჷ ბიბლიას, ათეშენ თე მუხლიშ კითხირქ თიშო საინტერესოქ იჸუ. ვა გოინტერესუნანო, მუქ მოხვად უკულ? ხუთ წუთ ვარინ, გვერდ საათის ქიფჩით დო მანგარ ჯგირ ჩიება მიღუდეს. თინა ხოლო ქომწუ, ნამდა პატის ცენდჷ იეჰოვაშ მოწმეეფიშ საქმიანობას.

წანეფიშ დინახალე იეჰოვაშ ხალხიქ ევროპას ბრელ საქმე მიგჷ, ნამუთ ოხუდ ქრისტიანულ ნეიტრალიტეტის, ბაღანეფიშ მეურვეობას, გინაგაფალეფს დო ხოლო შხვა საკითხეფს. მიღუდ პატი, თე საქმეეფშე ბრელს პირადო მიბღიკო მონაწილება დო ჩქიმ თოლო ქობძირიკო, მუჭო მეხვარ იეჰოვაქ მუშ ხალხის დო მაგებაფუ თე საქმეეფ. იეჰოვაშ მოწმეეფს ადამიანეფიშ უფლებეფიშ ევროპულ სასამართლოს 140-შე უმოს საქმე აფუნა მოგებულ.

ᲣᲛᲝᲡ ᲗᲐᲕᲘᲡᲣᲤᲚᲔᲑᲐ ᲛᲔᲠᲖᲘᲔᲑᲣᲜᲐ ᲙᲣᲑᲐᲡ

1990-იან წანეფს ჯიმა ფილიპ ბრამლიწკუმა (მთავარ სამართველოშე) დო ჯიმა ვალტერ ფარნეტიწკუმა (იტალიაშე) ფთანამშრომლენდჷ, ნამდა კუბას უმოს თავისუფლება მიბღითკო, მუშენდა თექ ჩქინ საქმიანობა აკრძალულ რდჷ. ბელგიას კუბაშ საელჩოს ქიმეპჭარ. უკულ ქეშეფხვად თინეფიშ წარმომადგენელს, ნამდა ქიფჩითკო თი გაუგებრობეფშე, მუდგაშ გურშენ ჩქინ საქმიანობა აკრძალულ რდჷ, დო ქუწიკო, მუს იფთხინდით. მარა ჩქინ პირველ შეხვალამაქ იშენდოიშენ ბრელ მუთუნ ვა თირუ.

ლოცვაშ დო იეჰოვაშე ხემძღვანელობაშ თხუალაშ უკულ, თინეფს ქოფთხით, კუბაშა 5, 000 ცალ ბიბლიაშ ინოღალაშ ნება ქომუჩესკო, მუდგაშათ ქუდმაჸუნეს. ბიბლიეფქ კოჩის ვა უცილებუნ თეშ გენორთჷ კუბაშა, მუდგაქ ქუმოძირუეს, ნამდა იეჰოვაქ აკურთხჷ თე საქმე. ათეშენ, უკულ 27 500 ბიბლიაშ ჯღონუაშ ნება ქიფთხით. მთავრობაქ თეშა ხოლო ქუდმაჸუნეს. მანგარო მოხიოლუდ, ნამდა ჩქიმ მხარეშე მუდგარენიშ კეთებაქ შემალებუ, კუბელ და დო ჯიმალეფს ბიბლია ქოუღუდესკონ.

ბრელშა ინოფრთჷ კუბაშა, ნამდა თე ქიანას და დო ჯიმალეფს უმოს თავისუფლებაქ ქიმიაჩესკო. თე დროშ დინახალე, თე ქიანაშ მთავრობაშ ბრელ წარმომადგენელწკუმა ჯგირ ურთიერთობაქ ქუმაშუ.

ᲓᲐ ᲓᲝ ᲯᲘᲛᲐᲚᲔᲤᲘᲨ ᲛᲝᲮᲕᲐᲠᲐ ᲠᲣᲐᲜᲓᲐᲡ

1994 წანას რუანდას მოხვალამირ ტუტსი ხალხიშ გენოციდიშ დროს 1 000 000-შე უმოს კოჩიქ ჭყორდჷ. სანარღოთ, ჩქინ და დო ჯიმალეფ ხოლო რდესჷ თინეფ შქას. მალას მუსხირენ ჯიმას ქოთხის, ქუხემძღვანელუკო თე ქიანაშა ჰუმანიტარულ დახმარებაშ ინოღალას.

რუანდაშ დედაქალაქშა, კიგალიშა გენოფრთითინ, ქობძირით, ნამდა მთარგმნელობით ოფის დო ლიტერატურაშ საწყობ ჸოთამათ აკოცხირილ რდჷ. საშინელ ისტორიეფ მიფრჩქილეთ, მუნერ უდუნდებელო ჸვილუნდეს ჩქინ და დო ჯიმალეფს ხამუეფით. მარა ქრისტიანულ ჸოროფაშ გიმორჩქინაშ სასწაულ მაგალითეფ ხოლო ქიანაშ გებგით. მაგალთო, შეფხვადით ართ ჯიმას ტუტსი ტომშე, ნამუთ 28 დღას უტყობუდ ნთხორილს ჩქინეფიშ ოჯახის, მით ჰუტუ ტომშე რდჷ. კიგალის სპეციალურ შეხვალამა მუვონწყით დო 900-შე უმოს და დო ჯიმას გურშა ელუკინით.

ბრელ რუანდელ და დო ჯიმა მეზობელ ქიანაშა, ზაირიშა (ამდღა კონგოშ დემოკრატიულ რესპუბლიკა ჯოხო) რდჷ ნტებულ დო თინეფ ქალაქ გომაშ ხოლოს, ლტოლვილეფიშ ბანაკის ჸოფენა. ათეშენ, გეგნოპკვათით საზღვარ დო მიდაფრთით თინეფიშ ოგორშა. ბგორუნდით, მარა სოთინ ვეგმაგორეს. ათეშენ, ბლოცულენდით დო იეჰოვას ფთხინდით, ქეშმოხვამილუესკო თე და დო ჯიმალეფს. უკულ ქობძირით, ჩქინჸურე მიდგარენ კოჩ მიშუნ დო ქოპკითხით, ხომ ვეჩინენდჷ იეჰოვაშ მოწმეეფს. თიქ მიპასუხეს: „ქო, მა ვორექ იეჰოვაშ მოწმე“. უკულ თიქ დაზარალებურეფიშ მოხვარაშ კომიტეტშა ქიმემიჸუნეს. თე ჯიმალეფწკუმა შეხვალამაშ უკულ, 1 600 ლტოლვილ და დო ჯიმას ხოლო ქეშეფხვადით, სულიერო გუვამანგარით დო გურშა ელუკინით. თე და დო ჯიმალეფს წუკითხით წერილ ხემძღვანელ საბჭოშე. თინეფს მანგარო ელუკინ გურშა თექ მოჩამილ სიტყვეფქ: „ირიათო ბლოცულენთ თქვანო. ბჯერა, იეჰოვა მუშ ხეს ვამგარკენა“. ქოთ თაშ ქიჸუ. ამდღა 30 000-შე უმოს იეჰოვაშ მოწმე მსახურენს რუანდას.

ᲒᲘᲜᲝᲭᲧᲕᲘᲓᲘᲚ ᲛᲐᲤᲷ, ᲑᲝᲚᲝᲨᲐ ᲐᲠᲗᲒᲣᲠᲥ ᲥᲣᲓᲝᲤᲡᲥᲘᲓᲔ

58 წანას ართო რინაშ უკულ, 2011 წანას ჩქიმ საჸოროფო მეუღლე ელიქ დომღურ. ლოცვას იეჰოვას ჩქიმ გურჭუაშენ ვეჩიებუდ დო თინა გურშა ელამკინანდჷ. გურშა ემქექუანდჷ შხვეფწკუმა სახიოლო ამბეშ ქადაგება ხოლო.

90 წანას გინოჩილათირ ვორექ, მარა ვეფქადაგენ თეშ, მარას ვემკიფშქვანქ. მანგარო მოხიოლ, ნამდა ამდღარშახ ვოხვარუქ დო ჩქიმ გამოცდილებას გინოფჩანქ ბელგიაშ ფილიალიშ იურიდიულ განყოფილებას. თეწკუმა ართო, მიღჷ საშვალება, ახალგაზრდა ბეთელელეფს გურშა ელუკინე.

84 წანაშ წოხოლე პირველო დურაგადე იეჰოვას ლოცვათ. თიმ დღას დიჭყჷ ღორონთწკუმა ჩქიმ მეგობრობაქ დო თევრეშე მოჸუნაფილ ირდღას უმოსო ვეახლოებუქ თის. ნინათ ვეკმარაგადე, მუნერ მარდულ ვაფუქ იეჰოვას, ნამდა ირო ურჩქილედ ჩქიმ ლოცვეფს (ფსალმ. 66:19).a