თეშ გეჩინებაფეთ ართიან, ნამდა ჭკვერულ გადაწყვეტილება მიღათ

1, 2. მუს იჩიებ ნამთინე ჸოროფილობაშ პერიოდშენ?

ᲸᲝᲠᲝᲤᲘᲚᲝᲑᲐ მანგარ ჯგირ დო სასიამოვნო პერიოდ რე. მიდგაინწკუმა ურთიერთობა სი ხოლო ქოიღ-და, მუშო ოკო რაგად, გოკოდას იჸი, თენა ჟირხოლოშო სასიამოვნო დრო რდასჷ. ართ ეთიოპიელ და, სიანa იჩიებ: „მანგარ ჯგირო გუმაშინე ჩქიმ დო ჩქიმ ქომონჯიშ ჸოროფილობაშ პერიოდ. ქოთ სერიოზულ საკითხეფშე იფჩიებუდით დო ქოთ ფციგანენდით. მანგარ ბედნერ ვორდჷ, ნამდა ქეშეფხვად თიცალ ადამიანს, ნამუთ მიჸორდჷ დო თის ხოლო უჸორდჷ“.

² მარა მაჟია მხარე ხოლო რე. დეკვირით, მუს იჩიებ ართ ჰოლანდიელ ჯიმა, ალესიო: „ჩქიმო დო ჩქიმ მეუღლეშო ჸოროფილობაშ პერიოდ მანგარ სასიამოვნო რდჷ, მარა ჩქინ ურთიერთობას მუდგარენ სირთულეეფ ხოლო ქორდჷ“. ათეშენ თე სტატიას გუვარჩიენთ, მუ სირთულეეფს შილებე შეხვადან წყვილეფქ გაჩინებაფაშ პერიოდის დო ნამ ბიბლიურ პრინციპეფ მეხვარებ თინეფს სწორ გადაწყვეტილებაშ მეღებას. ჩიება მაღვენუნა თიშე ხოლო, მუჭო შეულებუნა თანაქრისტიანეფს, მეხვარან თი და დო ჯიმალეფს, მიდგას რომანტიკულ ურთიერთობა უღუნა.

ᲛᲣ ᲛᲘᲖᲐᲜ ᲣᲦᲷ ᲒᲐᲩᲘᲜᲔᲑᲐᲤᲐᲨ ᲞᲔᲠᲘᲝᲓᲘᲡ?

3. მუ მიზან უღჷ გაჩინებაფაშ პერიოდის? (იგავ. 20:25).

³ მუჭოთ ფთქვით, ძღაბ დო ბოშშო ართიანიშ გაჩინებაფაშ პერიოდ სასიამოვნო რე. მარა თეცალ ურთიერთობაშ დოჭყაფა მანგარ სერიოზულ ნაბიჯ რე, მუშენდა საქმე მნიშვნელოვან საკითხის ოხუ. მუჭოთ ბიბლიაშე მიჩქუნა, ნებისმიერ აღთქმაშ დოდვალაშახ ჯგირო დაფიქრება რე საჭირო (წეკითხით იგავეფიშ 20:25). მუშო ოკო რაგად, თაშ რე ქორწინებაშ აღთქმაშ დოდვალაშ დროს ხოლო, მუშენდა თე დროს ქომოლკოჩ დო ოსურკოჩ სიტყვას დვანსჷ იეჰოვაშ წოხოლე, ნამდა, ონდო ცოცხალეფ იჸუაფუნა, უჸორდან იჸი დო პატის ცენდან იჸი ართმაჟიას. ათეშენ რე მნიშვნელოვან ჸოროფილობაშ პერიოდ, მუშენდა თე დროს ძღაბ დო ბოშ ჯგირო იჩინებაფუანს ართიანს, მუთ თე სერიოზულ გადაწყვეტილებაშ მეღებას ოხვარ თინეფს. შილებე გაჩინებაფაშ პერიოდიქ ქორწინებათ გეთუას ვარდა ისხუნუან, მიოტუან ურთიერთობა. ართიანს ჩეთხუანინ ხოლო, გაჩინებაფაშ პერიოდის მეჭირნაფილ აჸი მუშ მიზანშა — თიქ ქიმეხვარ ძღაბ დო ბოშის, გეგნოჭყვიდესკო, დექორწინესკო დო ვარ.

4. მუშენ ოკო უჯინედათ სწორას გაჩინებაფაშ პერიოდის?

⁴ მუშენ რე მნიშვნელოვან, დაუქორწინებელ ქრისტიანეფქ სწორას უჯინან გაჩინებაფაშ პერიოდის? თიშენ, ნამდა მითინწკუმა ვედიჭყან თეცალ ურთიერთობა, მიზანო დაქორწინება ვა უღუნან-და. მარა ხვალე დაუქორწინებელეფქ ვარინ, არძა სწორას ოკო უჯინედათ თე საკთიხის. მუშენ იფჩიებუთ თეს? მაგალთო, ნამთინე ფიქრენს, ნამდა ძღაბ დო ბოშიქ ურთიერთობა ქიდიჭყ-და, თინეფქ აუცილებერო ოკო დექორწინან. მუჭო ოცილ შხვეფიშ თეცალ არასწორ დამოკიდებულება დაუქორწინებელ ქრისტიანეფს? ართ დაუქორწინებელ და, მელისა, ნამუთ შეერთებულ შტატეფს ცხოვრენს, იჩიებ: „მუჟამსით ძღაბ დო ბოშ ურთიერთობას იჭყანს, ნამთინე ჩქინ და დო ჯიმა ფიქრენს, ნამდა თინეფქ აუცილებერო ოკო დექორწინან. შედეგო, ნამთინე წყვილ შხვა საშველ ვა უღუნ თიშენ აგრძელენს ურთიერთობას, თიშ უმკუჯინუო, ნამდა ორწყენა, ართიანიშ შესაფერის ვა რენან. ნამთინე ხოლო, თეშ შიშით შურო ვეჭყანს მითინწკუმა ურთიერთობას. თაშ ნამდა, თეცალ დამოკიდებულება მართალო პრობლემა რე“.

ᲯᲒᲘᲠᲝ ᲒᲔᲩᲘᲜᲔᲑᲐᲤᲔᲗ ᲐᲠᲗᲘᲐᲜ

5, 6. მუ ოკო გეგას ძღაბ დო ბოშიქ ართიანიშ გურშენ გაჩინებაფაშ პერიოდის? (1 პეტ. 3:4).

⁵ მიდგაინწკუმა რომანტიკულ ურთიერთობა ქოიღუნ-და, მუ მიგეხვარებ თიშ გინოჭყვიდუას, დექორწინე დო ვარ? ჯგირო გეჩინებაფეთ ართმაჟია. რახანს ურთიერთობა დოჭყაფილ გაფჷ, ალბათ მუდგარენეფ უკვე გიჩქჷ თე ადამიანიშ გურშენ, მარა ასე საშვალება გიღჷ, თიშ „შინაგან პიროვნება“ გეჩინებაფუე (წეკითხით 1 პეტრეშ 3:4). თენა ნიშნენს, უმოს ქიგეგე თე ადამიანიშ სულიერობაშ, ხასიათიშ დო აზროვნებაშ გურშენ. დროშ მიკულაწკუმა ართო, სი ოკო გარაგადედას: ქიჸინო თე პიროვნება სქანო ჯგირ მეუღლე? (იგავ. 31:26, 27, 30; ეფეს. 5:33; 1 ტიმ. 5:8). ქეშგალებენანო ჟირხოლოს ართიანწკუმა თიცალ ჸოროფა დო მზრუნველობა გეგმირჩქინათ, მუნერით გოსაჭირუნა? გეგაჭოფენო თიშ გლახა თვისებეფ?b (რომ. 3:23). გაჩინებაფაშ დროს ართ მუდგარენ ჯგირო ქორშუდან: შესაფერის ქორეთ დო ვარ ართიანშო, თიშა ვა რე დამოკიდებულ, მუსხი საერთო გიღუნა, თიშა რე დამოკიდებულ, მუსხით შეგალებენა ართმაჟიაშ განსხვავებულ მხარეეფიშ მეღება.

⁶ ხოლო მუ ოკო გეგე გაჩინებაფაშ პერიოდის? ონდო სერიოზულ გრძნობეფ გოირჩქინდუ, შილებე გოკოდას თე პიროვნებაწკუმა შხვადოშხვა საკითხშე ჩიება, მაგალთო, თიშ მიზნეფშე. მარა მუშ რაგად შილებე თიცალ პირადულ საკითხეფშე, მუნერით რე ჯამრთელობა, ფინანსურ პრობლემეფ ვარდა ულირს მეღებულ ემოციურ ტრავმა? ურთიერთობა ახალ დოჭყაფილ რენ თიმწკუმა, ვა რე აუცილებერ არძა საკითხშე ჩიება (ქეშუდარით იოანეშ 16:12). პიროვნებას სქან გურშენ მანგარ პირადულ საკითხეფ ქაინტერეს დო თეშენ ჩიება დიო ვაისხუნუნ-და, ქოუწი თენა. მარა რშუდას, მუდგაინ დროს თეცალ საკითხეფიშ გურშენ აუცილებერო გაჸი ოჩიებელ, მუშენდა თე ირფელიშ რჩქინა დესაჭირებ თის გადაწყვეტილებაშ მეღებაშ დროს.

7. მუ მეხვარებ ჸოროფილეფს ართიანიშ გაჩინებაფას? (ქოძირით ჩარჩო „მუჟამსით ართიანშე შორს ცხოვრენთ“; ქოძირით სურათეფ).

⁷ მუჭო შეილებ ჯგირო გეჩინებაფუე თი ადამიანიშ შინაგან პიროვნება, მიდგაწკუმა რომანტიკულ ურთიერთობა გიღჷ? არძაშ უჯგუშ რე ალალას ჩიება. ათეშენ ქოკითხ, მუთ გოინტერეს დო შურ დო გურით ქოურჩქილ (იგავ. 20:5; იაკ. 1:19). თეცალ ურთიერთობაშ საშვალებაქ შილებე ქუმგაჩან ართო ქადაგებაშ, ჭკუმუაშ, საჯარო ადგილეფს სეირნობაშ ვარდა შხვა თიცალ საქმეეფიშ კეთებაშ დროს, მუთ ჩიებას ქიმიღანს. ართიანიშ უჯგუშო გაჩინებაფაშ საშვალებას მეგობრეფწკუმა დო ოჯახიშ წევრეფწკუმა ურთიერთობა ხოლო ქიმერჩანა. ქიდეკვირით, მუნერო იქციებ პიროვნება შხვადოშხვა სიტუაციას დო შხვადოშხვა ხალხწკუმა. დეკვირით, მუჭო იშინანს ნიდერლანდელ ეშვინ ალისიაწკუმა ჸოროფილობაშ პერიოდის: „ვოცადუდით თიცალ სიტუაციეფს ვორდითკო ართო, სოდეთ უჯგუშო შემალებედეს ართმაჟიაშ გაჩინებაფა. მაგალთო, მინშა ოჭკუმალს ვამზადენდით ვარდა შხვა საქმეეფს ვორთუდით ართო. თეცალ დროს ვორწყედით ართიანიშ მუჭოთ ჯგირ თვისებეფს, თეშ სისუსტეეფს ხოლო“.

8. მუჭო მეხვარებ წყვილეფს სულიერ საკითხეფიშ ართო გარჩიება?

⁸ ართიანიშ უჯგუშო გაჩინებაფას სულიერ საკითხეფიშ ართო გიმორკვიება ხოლო მიგეხვარებუნა. დაქორწინება გეგნოჭყვიდით-და, ხომ ოკო ქუგაღვენუან ოჯახურ თაყვანიშცემაქ, ნამდა ღორონთის თქვან ოჯახის მთავარ ადგილ უკინებუდას?! (ეკლ. 4:12). ათეშენ გვალო ჯგირ იჸი, ართო გურაფას ასეშე ქიდიჭყანთ-და. მართალ რე, თქვა დიო ოჯახ ვა რეთჷ დო რომანტიკულ ურთიერთობაშ დროს ვართ ჯიმა რე დაშ დუდ, მარა ართო გიმორკვიება ქიმგეხვარებუნა, უჯგუშო ქოძირათ ართიანიშ სულიერობა. ართ წყვილს ამერიკაშე, მაქს დო ლიზას, შხვანერო ხოლო გიმადირთჷ ჸოროფილობაშ პერიოდის სულიერ საკითხეფიშ ართო გიმორკვიებაქ. მაქს იჩიებ: „ურთიერთობაშ დოჭყაფაშე მალას ქიდიპჭყით პუბლიკაციეფიშ გიმორკვიება თიცალ საკითხეფშე, მუნერით რე რომანტიკულ ურთიერთობა, ქორწინება დო ოჯახურ ცხოვრება. თე პუბლიკაციეფიშ გიმორკვიებაქ თიცალ საკითხეფშე ჩიებას ქიმმეხვარეს, ნამდგას ალბათ ჩქინით დღას ვემწიპჭყანდით“.

ᲨᲮᲕᲐ ᲛᲮᲐᲠᲔᲔᲤ ᲮᲝᲚᲝ, ᲜᲐᲛᲓᲒᲐᲨᲔ ᲝᲙᲝ ᲓᲔᲤᲘᲥᲠᲔ

9. მუშე ოკო დეფიქრას წყვილქ, მუჟამსით გინოჭყვიდუნს, მის უწუას ურთიერთობაშ ამბე?

⁹ მის ოკო უჩქუდას თქვან ურთიერთობაშ ამბე? თენა თქვან გინაჭყვიდირალ რე. მუჟამსით ურთიერთობა ახალ დოჭყაფილ რე, შილებე ისხუნუათ, ნამდა იშენდოიშენ ბრელს ვა გაგებაფუათ თე ამბე (იგავ. 17:27). თეთ შილებე ზედმეტ კითხვეფ ეიჩილითუათ შხვეფშე. მარა თქვან ურთიერთობაშ ამბეს შურო მითინს ვა უწინთ-და, შილებე შხვეფქ ვეგეგანინ თიშ შიშით ხშირას ხვალე ქუდოსქიდათ დო თეს გლახაქ ქუმაჸუნას. ათეშენ ჭკვერულ იჸი, მუსხირენ კოჩის ვარა ქოუწუათ თე ამბე, მიდგას შეიალებე ჯგირ რჩევეფ ქიმერჩან დო ქიმგეხვარან. მაგალთო, ნამდგაინ ოჯახიშ წევრის, ჯგირ მეგობარს ვარდა კრებაშ უხუცესეფს (იგავ. 15:22).

10. მუ მეხვარებ ჸოროფილეფს სიწმინდეშ დაცვებას? (იგავ. 22:3).

¹⁰ მუ მიგეხვარებუნა სიწმინდეშ დაცვებას? მუთ უმოსო გეჸოროფებუნა ართიან, ბუნებრივ რე, ართიანწკუმა უმოს სიახლოვეშ სურვილქ გოირჩქინდან. მუ მიგეხვარებუნა, მუთუნ თიცალ ვა გაკეთათ, მუთ იეჰოვას ვემეწონებუდ? (1 კორ. 6:18). ვეჩუათ უზნეო საკითხეფშე, ვა დოსქიდათ ხვალე დო ნაბეტან ვა შვათჷ, მუშენდა თე ირფელქ შილებე ვნება გოირჩქინან დო გაიჭირდან დუდიშ ჭოფუაქ (ეფეს. 5:3). ათეშენ ჯგირ იჸუაფ, ხშირას ქიჩუათ ართიანწკუმა, მუ მიგეხვარებუნა, თქვან ურთიერთობაქ იეჰოვაშ თოლს წმინდაქ ქიჸუას (წეკითხით იგავეფიშ 22:3). დეკვირით, მუქ მეხვარ ეთიოპიას მახორუ დავითის დო ალმაზის: „დღას ვა ფსქიდუდით ხვალე მანქანას ვარდა ჸუდეს. ირო თიცალ ადგილეფს შეფხვადუდით ართიანს, სოდეთ ხალხ რდჷ ვარდა ვოცადუდით, ჩქინწკუმა ართო მეგობრეფ ხოლო რდესკო. თე ირფელქ მიმეხვარეს, თიცალ სიტუაციეფს ვა მოფხვადითკო, სოდეთ ცდუნებაშ წოხოლე გებდირთუდით“.

11. მუ მხარეეფშე ოკო დეფიქრან ჸოროფილეფქ, მუჟამსით გინოჭყვიდუნა, მუ ფორმეფით გიმოხანტან ჸოროფა ართიანიშ მიმართ?

¹¹ მუთ უმოს სერიოზულო გინირთუ თქვან ურთიერთობა, შილებე გინოჭყვიდათ, ნამდა ზომიერო გეგმოხანტათ ართიანიშ მიმართ გრძნობეფ (ქებ. 1:2; 2:6). მარა გურიშ გოჩამა რე საჭირო, მუშენდა თექ შილებე საღას აზროვნებას გეცილან. თეწკუმა ართო, გრძნობეფიშ გიმოხანტუაშ დროს შილებე დუდიშ აწოჭოფუაქ გაიჭირდან დო თიცალ მუდგაინ გაკეთათ, მუთ ვემეწონებ ღორონთის (იგავ. 6:27). ათეშენ ურთიერთობაშ დაჭყაფშე ქიმირაგადეთ, მუშ კეთებაშ ნებას მეჩანთ ვარდა ვემეჩანთ თქვან დუდის, ნამდა ვეგნურთათ ბიბლიურ პრინციპეფსc (1 თეს. 4:3—7). ჟირხოლოქ დეფიქრით: მუჭო შილებე მიღან შხვეფქ ჩქინწკუმა ჸოროფაშ გიმოხანტუაშ თეცალ ფორმეფ? ჩქინდე ნამდგაინს დუდიშ ჭოფუა ხომ ვა გუჭირდუ?

12. მუ ოკო არჩქილედან ჸოროფილეფს, მუჟამსით ურთიერთობას პრობლემეფ რჩქინდუ?

¹² მუ ოკო აკეთათ, ურთიერთობას პრობლემეფ ქორჩქინდუნ-და? მინშა ართიანიშ გაგება ქოიჭირან-და, ვეფიქრათ, ნამდა თქვან ურთიერთობაშე მუთუნ ვეგშურს. თეცალ მომენტეფ არძა წყვილს უღჷ. ჯგირ ქორწინებაშო, ირფელშე ართ აზრ გიღუდანინ თენა ვარინ, საჭირო რე, ართიანს პატი ცათჷ დო ირნერო ეცადათ ართმაჟიაშ მეხუჯაფას. თაშ ნამდა, ჯგირ ოჯახ ქუგაღვენუნან დო ვარ, თიშა რე დამოკიდებულ, მუჭო ოცადუთ პრობლემეფიშ მოგვარებას. ათეშენ დეფიქრით: ქეშემლებუნანო მშვიდას დო პატიცემათ ჩიება, მუჟამსით შხვადოშხვა აზრ მიღუნა? ქეშემლებუნანო შეცდომეფიშ ხეთეშე აღიარება დო ქუვოცადუთო გაუჯგუშებას? ხომ ვამჭირა დათმება, ბოდიშიშ რაგად დო პატიება? (ეფეს. 4:31, 32). მარა, მუჟამსით ორწყეთ, ნამდა შურო ვა უგენთ ართიანს დო ირიათო ჩხუპენთ, ოკო ვეფიქრათ, ნამდა ქორწინებაშ უკულ შხვანერო იჸუაფ. ართიანშო შესაფერის ვა რეთინ ქარწყეთ-და, ჟირხოლოშო უჯგუშ იჸუაფ, თე ურთიერთობა დასრულათ.d

13. მუ მეხვარებ წყვილეფს თიშ გინოჭყვიდუას, მუზმა ხანს გაგრძელან გაჩინებაფაშ პერიოდ?

¹³ მუზმა ხანს ოკო გეგრძელას გაჩინებაფაშ პერიოდიქ? მუჟამსით მუდგაინიშ გინოჭყვიდუას ფჩქარენთ, ხშირას თეს გლახა შედეგეფ მოჸუნს (იგავ. 21:5). ათეშენ ჸოროფილობაშ პერიოდიქ თიზმა ხანს ოკო გეგრძელას, მუზმათ საჭირო რე, ნამდა ადამიან ჯგირო გეჩინებაფუე. მარა ნაბეტან დროშ გოზინდუა ხოლო ვერგჷ. ბიბლიას ჭარჷ: „ბრელ ხანიშ ჯინა გურს ალახენს“ (იგავ. 13:12). თეს გეძინელ, მუთ უმოს ხანს გეგრძელებ თქვან ურთიერთობა, თით უმოს ძნელ გაჸინა სექსუალურ სურვილეფშა გარზება (1 კორ. 7:9). თაშ ნამდა, მთავარ თინა ვა რე, მუსხი ხან რე გიღუნა ურთიერთობა, მთავარ რე, თეშ ქიჩინენთო ართიანს, ნამდა უკვე შეილებუდან გადაწყვეტილებაშ მეღება.

ᲛᲣᲭᲝ ᲨᲔᲣᲚᲔᲑᲣᲜᲐ ᲨᲮᲕᲔᲤᲡ, ᲛᲔᲮᲕᲐᲠᲐᲜ ᲬᲧᲕᲘᲚᲔᲤᲡ?

14. მუჭო შეულებუნა შხვეფს, მეხვარან წყვილეფს? (ქოძირით სურათ).

¹⁴ ურთიერთობა უღუნ ფერ წყვილს ქიჩინენთ-და, მუჭო შეილებუნა მეხვარათ თინეფს? შეილებუნა ქუდაპატიჟათ სადილშა, ოჯახურ თაყვანიშცემაშა ვარდა ართო მიდართათ ბუნებაშა (რომ. 12:13). შილებე თეცალ სიტუაციეფქ თინეფს ართიანიშ უჯგუშო გაჩინებაფას ქიმეხვარას. ხომ ვასაჭირუნა ჸუნა, მუჟამსით სოდგაინ მეულა? თენა ქორთხის-და, დიდ პატით მირჩქინით, ნამდა შეილებუნა თინეფიშ მოხვარა. შილებე სოდგაინ მანქანათ ჸუნაფა ოკოდან ვარდა თიცალ ადგილ ოსაჭირუდან, სოდეთ გემოშა დარაგადენა ართიანშა. ათეშენ შეილებუნა ჸუდეშა ქუდაპატიჟათ (გალ. 6:10). ჟიშე მოშინაფილ ალისია იშინანს, მუჭო ოხვარუდეს და დო ჯიმალეფ თის დო ეშვინს ჸოროფილობაშ დროს. თინა იჩიებ: „მანგარო მოხიოლუდეს, მუჟამსით და დო ჯიმალეფ მიწინდეს, ნამდა ართიანწკუმა გემუანო ოჩიებელო გვალო ხვალე ვეპჸიდითინ ფერ ადგილ ქუმოსაჭირუდეს-და, შემლებუდეს თინეფიშ ჸუდეშა ქიმეფრთითკო“. მუშო ოკო რაგად, ნებისმიერ სიტუაციას ფრთხილას ოკო რდათჷ, ნამდა წყვილ გვალო ხვალე ვედიტუათ. მარა თიშ საშველ ხოლო ქიმეჩით, ნამდა გემოშა ქიდირაგადუან (ფილ. 2:4).

15. ხოლო მუშ კეთება შეულებუნა ხოლოშიანეფს წყვილიშ მახვარებელო? (იგავ. 12:18).

¹⁵ წყვილეფიშ მოხვარა ჩქინ რაგადიშ კონტროლით ხოლო შემლებუნა; რე მუდგარენეფ, მუთ ოკო ფთქუათ დო მუდგარენეფიშ რაგადშე დუდ ოკო იპჭოფათ (წეკითხით იგავეფიშ 12:18). მაგალთო, შილებე შურ გოლუდან, შხვეფს ხოლო ქოუწუათ, ნამდა ნამდგაინ და დო ჯიმას ურთიერთობა უღუნა. მარა შილებე თინეფს უსხუნუდან, მუნეფქ გაგებაფუან თე ახალ ამბე შხვეფს. თეწკუმა ართო, ოკო ვეპჭორავათ წყვილიშ გურშენ დო კრიტიკულო ოკო ვეფჩუათ თიცალ მუდგარენეფშე, მუთ მუნეფიშ ამბე რე (იგავ. 20:19; რომ. 14:10; 1 თეს. 4:11). წყვილს თინა ხოლო ვესიამოვნებ, მუჟამსით ქუწინთ, ნამდა ოკო დექორწინან ვარდა ქოპკითხენთ, მუჟამ გილამუნანია. და ელის დო მუშ ქომონჯ იშინანა: „მანგარ უხერხულს ინობლუდით, მუჟამსით კამპანიაშ გეგმეფიშ ამბეს მოკითხუდეს, ვარინ თეშ გურშენ დიო ართიანწკუმა ხოლო ვა ვორდით ნაჩიებინა“.

16. მუჭო ოკო მიფქცუათ, მუჟამსით ბგებულენთ, ნამდა წყვილქ ურთიერთობაშ მეტება გინოჭყვიდ?

¹⁶ მუჭო ოკო მიფქცუათ, მუჟამსით ბგებულენთ, ნამდა წყვილქ ურთიერთობაშ მეტება გინოჭყვიდ? ოკო ვედიპჭყათ თე ამბეშ გითოძიება ვარდა ნამდგაინიშ მხარეშ დაკინება (1 პეტ. 4:15). ართ და, ლეა იჩიებ: „იფრჩქილუაფუდ, ნამდა შხვეფ არჩიენდეს, მუ შილებედ ჸოფედუკო ჩქიმ დო ართ ჯიმაშ დაშორებაშ მიზეზ. თენა მანგარო მოწყინუდ“. ჟიშე ფთქვითინ თეშ, ურთიერთობაშ მეტება ვა ნიშნენს, ნამდა წყვილქ არასწორო მიქცუ. მუჭოთ წესინ, თენა ნიშნენს, ნამდა გაჩინებაფაშ პერიოდიქ ქიმიოჭირინუ მუშ მიზანს — ქიმეხვარ წყვილს, გეგნოჭყვიდესკო, დექორწინებუდეს დო ვარ. მარა თე ამბეშ უკულ გლახა გრძნობეფ შურო ვა გურჩქინდუნან თეშ ხოლო ვა რე. შილებე დუდის ხვალახეთ გინაფლენდან დო ემოციურო გაუჭირდან, ათეშენ ჯგირ იჸუაფ, ქელუდირთათ თეცალ დროს (იგავ. 17:17).

17. მუშ კეთებას ოკო ეცადან წყვილეფქ, მიდგას გაჩინებაფაშ პერიოდ უღუნა?

¹⁷ მუჭოთ ბძირით, გაჩინებაფაშ პერიოდის უღჷ მუშ სირთულეეფ, მარა თენა მანგარ სასიამოვნო პერიოდ ხოლო რე. ჯესიკა იჩიებ: „პირდაპირ ქოფთქუენ, გაჩინებაფაშ პერიოდ ვა რდჷ ადვილ, თაშ ქოფთქუათინ, ბრელქ მაჸის ოხანდებელქ. მარა შემლებ ფთქუე, ნამდა ართ წუთის ხოლო ვა ბნარღენქ თი დროს დო ენერგიას, ნამუთ ართიანიშ უჯგუშო გაჩინებაფას დაუთმით“. მიდგაინწკუმა ურთიერთობა ქოიღუნ-და, ირფელ გაკეთით, ნამდა ართიან უჯგუშო გეჩინებაფუათ. თაშ ქიმიქციებუთ-და, ქიმიოჭირინუანთ თქვან ურთიერთობაშ მიზანს — შეგალებენა ჭკვერულ გადაწყვეტილებაშ მეღება.