გემანგარით ნდობა იეჰოვაშ ორგანიზაციაშ მიმართ!

1. მუჭო ხემძღვანელენდჷ იეჰოვა მუშ ხალხის პირველ საუკუნეს?

ᲘᲔᲰᲝᲕᲐ წესრიგიშ ღორონთ რე დო მუჟამსით მუშ ხალხის მუდგაინს ავალენს, ოკო, ირფელ ორგანიზებულო გაკეთან (1 კორ. 14:33). მაგალთო, ღორონთიშ ნება რე, სახიოლო ამბექ მთელ მსოფლიოს ქექადაგას (მათ. 24:14). იეჰოვაქ თე საქმეშ ხემძღვანელო იესო დარინუ, ნამდგაქ ირფელ გაკეთ, ნამდა თე დავალებაქ ორგანიზებულო შისრულას. პირველ საუკუნეს კრებეფს იერუსალიმშე ხემძღვანელენდჷ ჯიმალეფიშ ჭიჭე ჯგუფ, ნამდგაშა მოციქულეფ დო შხვა უხუცესეფ მიშეშეს (საქ. 15:2; 16:4). კრებეფიშ ჩამოყალიბება შხვადოშხვა ადგილეფს ხოლო მიშჷ, სოდეთ უხუცესეფ ინიშნებუდეს, ნამდა იერუსალიმს ჯიმალეფიშ მეღებულ გადაწყვეტილებეფ კრებეფს გეგნოჩესკო (საქ. 14:23). თე მითითებეფიშ მეჸუნაშ შედეგო „კრებეფ რწმენას იმანგარებუდ დო მოწაფეეფიშ რიცხვის ირდღას აძინუდ“ (საქ. 16:5).

2. მუჭო ხემძღვანელენს იეჰოვა მუშ ხალხის 1919 წანაშე მოჸუნაფილ დო მუჭო არზენს სულიერ საზრდოს?

² იეჰოვა ამდღა ხოლო ხემძღვანელენს მუშ ხალხის. 1919 წანაშე მოჸუნაფილ იესო ცხებულეფიშ ჭიჭე ჯგუფიშ ხეთ ხემძღვანელენს ქადაგებაშ საქმეს დო მუშ მიმაჸუნალეფს სულიერ საზრდოს ვარკენსa (ლუკ. 12:42). ჩქინ თოლო ვორწყეთ, ნამდა იეჰოვა ხვამას ვარკენს თე ჯიმალეფიშ ხანდას (ეს. 60:22; 65:13, 14).

3, 4. ა) მაგალითით გენწყით, მუშენ რე ჯგირ, ნამდა ჩქინ ორგანიზაცია თეშმაჯგირას რე გენწყილ. ბ) მუს გუვარჩიენთ თე სტატიას?

³ ჩქინ ორგანიზაცია თეშმაჯგირას გენწყილ ვა რდასინ, ვეშმალებედეს იესოშ დავალებურ საქმეშ კეთება (მათ. 28:19, 20). ართ წუთის წერმიდგინით, ნამდა ოქადაგებელ ტერიტორიეფ უბანეფო ვა რდასჷ გორთილ დო არძა სო ოკონ თექ ქადაგენდას. თაშ ქორდასინ, მინ დიხას ოშშა იჸიდ ნაქადაგებ დო მინ დიხას — შურო ვარ. დეფიქრით შხვა მიზეზეფშე ხოლო, მუშენ რე ჯგირ, ნამდა ჩქინ ორგანიზაცია თეშნერო რე გენწყილ.

⁴ იესო, მუჭოთ პირველ საუკუნეს, თეშ ამდღა ხოლო ხემძღვანელენს ღორონთიშ ხალხის, ნამდა ირფელ ორგანიზებულო ხვადუდას. თე სტატიას გუვარჩიენთ, მუ მაგალით დომტუეს იესოქ დო მუჭო მეჸუნს ჩქინ ორგანიზაცია თიშ მაგალითის. თის ხოლო ქობძირუნთ, მუჭო შემლებუნა ხოლო უმოსო მივენდათ იეჰოვაშ ორგანიზაციას.

ᲩᲥᲘᲜ ᲝᲠᲒᲐᲜᲘᲖᲐᲪᲘᲐ ᲛᲔᲸᲣᲜᲡ ᲘᲔᲡᲝᲨ ᲛᲐᲒᲐᲚᲘᲗᲘᲡ

5. მუ რე ართ-ართ საკითხ, მუდგას ჩქინ ორგანიზაცია მეჸუნს იესოშ მაგალითის? (იოან. 8:28).

⁵ იესო მუშ ზეციერ მუმაშე გურაფლენდჷ, მუ თქუკო დო მუჭო მიქცუკო. ამდღა იეჰოვაშ ორგანიზაცია მეჸუნს იესოშ მაგალითის დო არძა გურაფას დო მითითებას ღორონთიშ სიტყვაშა გიორსხუანს (წეკითხით იოანეშ 8:28; 2 ტიმ. 3:16, 17). ჩქინ ორგანიზაცია ირიათო გუმოშინანა, ნამდა წებკითხათ დო გეგმიბრინუათ ღორონთიშ სიტყვა. მორთჷ ქიგებგათ, მუ ჯგირობუა მოუღ თე რჩევაშ მეჸუნას.

6. მუ ჯგირობუა მოუღ ბიბლიაშ გიმორკვიებას?

⁶ პუბლიკაციეფიშ საშვალებათ ბიბლიაშ გიმორკვიებას ჯგირ შედეგეფ მოუღ. მაგალთო, თე დროს ჩქინ თოლო ვორწყეთ, მუჭო მეურე ართიანს ბიბლიურ გურაფეფ დო თინა, მუდგას ორგანიზაცია მოგურუანა. მუჟამსით ვორწყეთ, ნამდა ჩქინ არძა გურაფა წმინდა წერილეფშა რე გერსხილ, ხოლო უმოს ნდობა მირჩქინდუნა იეჰოვაშ ორგანიზაციაშ მიმართ (რომ. 12:2).

7. მუ ამბეს აცხადენდჷ იესო დო მუჭო მეჸუნს იეჰოვაშ ორგანიზაცია თიშ მაგალითის?

⁷ იესო ქადაგენდჷ „სახიოლო ამბეს ღორონთიშ სამეფოშ გურშენ“ (ლუკ. 4:43, 44). თიქ მუშ მოწაფეეფს ხოლო დავალ, სამეფოშ გურშენ იქადაგესკო (ლუკ. 9:1, 2; 10:8, 9). ამდღა არძა, მით იეჰოვაშ ორგანიზაციას რე, სოდგა ვა ცხოვრენდას დო მუდგა პასუხიშმგებლობა ვა უღუდასინ, ქადაგენს სახიოლო ამბეს სამეფოშ გურშენ.

8. მუ პატი მიღუნა?

⁸ ჩქინო მანგარ დიდ პატი რე, გეგნოფჩათ ხალხის სახიოლო ამბე ღორონთიშ სამეფოშ გურშენ! თე დიდ პატი ირკოჩის ვერზიებ. მაგალთო, დედამიწას რდუნჷ, იესოქ უფლება ვემეჩ დემონეფს, გაცხადესკო, ნამდა თინა ღორონთიშ სქუა რდჷ (ლუკ. 4:41). ამდღა ხოლო, პიროვნებაქ სახიოლო ამბეშ ქადაგებაშ უფლება მიღასინ, იეჰოვაშ მოსაწონო ოკო ცხოვრენდას. იესოცალო ჩქინ მიზან რე, ადამიანეფიშ გურეფს დოფთასათ დო დობწყარათ ჭეშმარიტებაშ თას (მათ. 13:3, 23; 1 კორ. 3:6). მუჟამსით თეშო ნამ შემლებუნან ირფელს ვორთუთ, ვოძირანთ, ნამდა ვაფასენთ თე პატის.

9. მუჭო აცხადენს ჩქინ ორგანიზაცია ღორონთიშ სახელს?

⁹ იესოქ ღორონთიშ სახელ გუცხად ადამიანეფს. თიქ ლოცვას მუშ ზეციერ მუმას უწუ: „სქან სახელ გუცხად თინეფს“ (იოან. 17:26). იეჰოვაშ ორგანიზაცია მეჸუნს იესოშ მაგალითის დო ირფელს ორთჷ, ნამდა ხალხის ღორონთიშ სახელ ქუგაგებაფუას. თე მიზანიშ მიოჭირნაფალო მანგარ საქმეს ორთჷ „წმინდა წერილეფიშ ახალ ქვეყნიერებაშ თარგმან“, ნამდგას დორთინაფილ რე ღორონთიშ სახელ ირდიხას, სოდეთ ორიგინალს ჭარუდ. ამდღა „ახალ ქვეყნიერებაშ თარგმანიშ“ მთლიან ვარდა მუდგაინ ნაწილ გიშაშქუმალირ რე 270-შე უმოს ნინაშა. თე თარგმანიშ Ა4 დო Ა5 დანართეფს დეტალურო რე ენწყუმილ, მუშენ დო მუჭო იჸუ დორთინაფილქ ღორონთიშ სახელქ ბიბლიას. დანართ Ა5-ის თინა ხოლო რე ენწყუმილ, მუშენ ოკო რდუკო ღორონთიშ სახელ 237-შა მოშინაფილ „ქრისტიანულ-ბერძნულ წერილეფს“.

10. მუს ბგურაფლენთ მიანმას მოხვალამირ შემთხვევაშე?

¹⁰ იესოცალო ჩქი ხოლო მოკონა, მუთ შილებენ მეტ ადამიანს ქუგვოგებაფუათ ღორონთიშ სახელ. მიანმას მახორუ ართ 67 წანერ ოსურს თოლს ჩილამურქ ქალაჸუნ, მუჟამსით პირველო გეგჷ ღორონთიშ სახელ. თიქ ჩქინ დას უწუ: „პირველო გებგჷ, ღორონთის იეჰოვა ნოჯოხობუენ . . . თეცალ მნიშვნელოვან ამბე დღას მითინს ვა უთქუალ ჩქიმდა“. თე შემთხვევა ჯგირო ოძირანს, ნამდა ღორონთიშ სახელიშ გაგება მანგარო მოქმედენს ალალგურიშ კათაშა.

ᲒᲘᲦᲣᲓᲐᲜ ᲩᲥᲘᲜ ᲝᲠᲒᲐᲜᲘᲖᲐᲪᲘᲐᲨ ᲜᲓᲝᲑᲐ

11. მუჭო ოძირანა უხუცესეფ, ნამდა ონდუნა იეჰოვაშ ორგანიზაციას? (ქოძირით სურათ).

¹¹ მუჭო ოძირანა უხუცესეფ, ნამდა უღუნა იეჰოვაშ ორგანიზაციაშ ნდობა? ართ-ართ რე ორგანიზაციაშე მეღებულ მითითებეფიშ გურგედვალირო კითხირ დო მუთ შილებე ჯგირო გიმორნაფა. მაგალთო, თინეფ ღებულენა მითითებეფს, მუჭო ოკო ჩეტარინას შეხვალამეფქ დო მუნერ ოკო რდასჷ კრებას რაგადებულ ლოცვეფ. მარა, თეწკუმა ართო, ორგანიზაცია თის ხოლო ოგურუანს, მუჭო იზრუნან ქრისტეშ შხურშე. მუჟამსით უხუცესეფ მეჸუნა ორგანიზაციაშე მეღებულ არძა მითითებას, და დო ჯიმალეფ დუდის თხილერო გინაფლენა დო ორწყენა იეჰოვაშ ჸოროფას.

12. ა) მუშენ ოკო დევემორჩილათ თინეფს, მიდგას ხემძღვანელობა ოვალ? (ებრ. 13:7, 17). ბ) მუშენ ოკო გინიბღათ ყურადღება უხუცესეფიშ ჯგირ თვისებეფშა?

¹² ღორონთიშ სიტყვა მირაგადუნა, ნამდა დევემორჩილათ თინეფს, მიდგას „ხემძღვანელობა ოვალ“. ათეშენ, მზათ ოკო ვორდათ, ხეთეშე მივაჸუნათ უხუცესეფშე მეღებულ მითითებეფს. თაშ ქიმიფქციებუთ-და, თინეფს უმოს ადვილ აჸინა მუნეფიშ დავალებას შესრულება (წეკითხით ებრაელეფიშ 13:7, 17). თეშ კეთება ირო ვა რე ადვილ, მუშენდა უხუცესეფ ხოლო არასრულყოფილეფ რენა. მარა, ართ წუთის დეფიქრით, თინეფიშ ჯგირ თვისებეფიშ მანგიორო, მთელ ყურადღებას გლახაშა გეგნიბღანთ-და, ჩქინ ნტერეფიშ სამოგებოთ მიფქციებუთ. მუშენ იფჩიებუთ თეს? მუშენდა ჩქინ ნტერეფიშ მიზან რე, მემდინუან ნდობა იეჰოვაშ ორგანიზაციაშ მიმართ. მუჟამსით ჯიმალეფიშ გურშენ ირიათო გლახას იფიფქრენთ, ეჭვეფ გომრჩქინდუნა. გვალო თენა ოკონა ჩქინ ნტერეფს ხოლო! ასე თიშე ქიფჩუათ, მუ ოკო ვაკეთათ, ნამდა გეგშეფჩინათ ჩქინ ნტერეფიშ გოსიმაფილ ტყურეფ დო ვედებჯერათ თინეფ.

ᲛᲘᲗᲘᲜᲡ ᲕᲔᲛᲔᲩᲐᲗ ᲣᲤᲚᲔᲑᲐ, ᲛᲔᲘᲓᲘᲜᲣᲐᲜ ᲘᲔᲰᲝᲕᲐᲨ ᲝᲠᲒᲐᲜᲘᲖᲐᲪᲘᲐᲨ ᲜᲓᲝᲑᲐ

13. მუჭო ოცადუნა ღორონთიშ ნტერეფ, სახელ გუტახან თიშ ორგანიზაციას?

¹³ ღორონთიშ მოწინააღმდეგეეფ დღაშ დო სერით თის ოცადუნა, ნამდა ორგანიზაციაშ ჯგირ მხარეეფ გლახათ გემკართინუან. მაგალთო, მუჭოთ წმინდა წერილეფშე დიბგურეთ, იეჰოვა მუშ მსახურეფშე ითხინს, ფიზიკურო, ზნეობრივო დო სულიერო წმინდეფ რდანჷ. იეჰოვა თის ხოლო იჩიებ, ნამდა პიროვნებაქ, მით ვა ნარღენს დო აგრძელენს ღორონთიშ თოლს დაშებას, ოკო გერიცხას კრებაშე (1 კორ. 5:11—13; 6:9, 10). თეს ბიბლია არგამათ იჩიებ დო ჩქი ხოლო ვომორჩილუთ თე მითითებას. წერმიდგინით, თეს ჩქინ მოწინააღმდეგეეფ კვარჩხულო მიკართინუანა დო ეკმაწამენა, ნამდა ვა მიჸორა დო ვა მოცოდუნა ადამიანეფ.

14. მი რე ჩქინ გურშენ გოსიმაფილ ტყურეფიშ დუდ?

¹⁴ გეგშეჩინით, მი რე დუდ. ჩქინ გურშენ გოსიმაფილ ტყურეფიშ უკახალე „ტყურაშ მუმა“, სატანა მიკორე (იოან. 8:44; დაბ. 3:1—5). ათეშენ, მუ გასაკვირ რე, ნამდა მუშიანეფს მუშ საქმე ოკეთებაფუას დო იეჰოვაშ ორგანიზაციაშ გურშენ ტყურეფ გასიმუას. ზუსტას თაშ რდჷ პირველ საუკუნეს ხოლო.

15. მუჭო ოქცუდეს რელიგიურ წინამძღოლეფ იესოს დო თიშ მიმაჸუნალეფს?

¹⁵ პირველ საუკუნეს სატანაშ ხალხ ტყურეფს უსიმუანდჷ ღორონთიშ სქუას ხოლო, ნამუთ სრულყოფილ რდჷ დო ბრელ სასწაულს ორთუდ. მაგალთო, რელიგიურ წინამძღოლეფ ხალხის ურაგადუდეს, ნამდა იესოს დემონეფიშ გიშარაჸუაშ ძალა „დემონეფიშ მართველშე“ უღუდ (მარ. 3:22). მუჟამსით იესო ოჭოფეს, რელიგიურ წინამძღოლეფქ თის ეკაწამეს ღორონთის შეურაცხყოფას მიორინუანსია დო ხალხ ახნარეს, თიშ ჸვილუა მითხისკო (მათ. 27:20). უმოს გვიანო, მუჟამსით ქრისტეშ მიმაჸუნალეფ სახიოლო ამბეს ქადაგენდეს, თინეფიშ მოწინააღმდეგეეფქ ქათარაგადუეს ხალხის დო ჯიმალეფიშ წინააღმდეგ ახნარეს, ნამდა თინეფიშ თხოზინ ქიდიჭყესკო (საქ. 14:2, 19). საქმეეფიშ 14:2-იშ გურშენ 1998 წანაშ 1 დეკემბერიშ „გინაჯინალ კოშკის“ ენწყუმილ რე: „იუდეველ მოწინააღმდეგეეფ თის ვეგეჯერდუდეს, ნამდა მუნეფ ვა ღებულენდეს სახიოლო ამბეს; თინეფ ტყურეფს ეკაწამენდეს ქრისტიანეფს, ნამდა ხალხ ახნარესკო თინეფიშ წინააღმდეგ“.

16. მუ ოკო ფშუდან, მუჟამსით ტყურეფს ბგებულენთ?

¹⁶ სატანას ტყურეფიშ რაგად პირველ საუკუნეს ვა უთებ. თინა ამდღა ხოლო „ოჩილითუანს მთელ მსოფლიოს“ (გამოცხ. 12:9). მუჟამსით ორგანიზაციაშ ვარდა ხემძღვანელ ჯიმალეფიშ გურშენ გლახას ქიგეგენთ, ქიგიშინით, ნამდა ზუსტას თაშ ოქცუდეს იესოს დო თიშ მოწაფეეფს ხოლო ღორონთიშ ნტერეფ. მუჭოთ იესოქ თქუ, ღორონთიშ მსახურეფს თხოზუდესკონ იჸიდ დო ოშნერ გლახას გუსიმუანდეს. თე წინასწარმეტყველებაშ შესრულებას ვორწყეთ ამდღა (მათ. 5:11, 12). თეცალ ტყურეფ ვადმაღორენა, მუჟამსით ფშუდან იჸი, მი მიკურე თინეფს დო ხეთეშე იმოფქმედენთ. მუს ნიშნენს ხეთეშე მოქმედება?

17. მუ ოკო ვაკეთათ, ნამდა ტყურეფქ ვემმოჩილითუან? (2 ტიმ. 1:13; ქოძირით ჩარჩო „მუჭო ოკო მიფქცუათ, მუჟამსით ორგანიზაციაშ გურშენ ტყურეფს იფრჩქილუაფუთ?“).

¹⁷ ვედეჯერათ ტყურეფ. პავლე მოციქულქ კონკრეტულ მითითებეფ მუჩეს, მუ ოკო ვაკეთათ, მუჟამსით ტყურეფს გებგენთ. თიქ ტიმოთეს უწუ, მკაცრას გაფრთხილუკო ნამთინე თანაქრისტიან, ნამდა თეშით ხოლო ველერჩქილუესკო ტყურეფ, ნამუთ „შეურაცხყოფას მიორინუანდჷ წმინდას“ (1 ტიმ. 1:3, 4; 4:7). ჭიჭე ბაღანას ირფელ პიჯშა მეუღ. შილებე თუდო დოლაფირ ტვერამ მუდგარენ ხოლო ქიმლედვას, მარა ძინათებულ კოჩ თეს დღას ვაკეთენს, მუშენდა ოგინ, ნამდა თენა მოცილე რე. თეშნერო, ჩქი ხოლო ველეფრჩქილუანთ ტყურეფს, მუშენდა მარჩქილენა, სოვრეშე მოურს თინა. თეშ გინაწონს, ხვალე ჭეშმარიტებაშ „ჯანსაღ“ გურაფას ურჩქილეთ (წეკითხით 2 ტიმოთეშ 1:13).

18. მუჭო ვოძირათ, ნამდა ვონდუთ იეჰოვაშ ორგანიზაციას?

¹⁸ მოკონა, დევეკვირათ, მუჭო მეჸუნს იეჰოვაშ ორგანიზაცია იესოშ მაგალითის. თე სტატიას თეცალ გვალო სუმ მხარე გუვარჩით, ათეშენ ჯგირ იჸუაფ, ბიბლიაშ კითხირიშ დროს შხვა მხარეეფს ხოლო დევეკვირათ. კრებას შხვეფს ხოლო ქიმეხვარით, ხოლო უმოსო მიენდან იეჰოვაშ ორგანიზაციას. გაგრძელით იეჰოვაშ ართგურო მსახურება დო მიაჸუნით ორგანიზაციას, ნამდგას ღორონთ მუშ ნებაშ შეიოსრულებერო ირინუანს. თეშნერო ქაძირით, ნამდა ონდუთ იეჰოვაშ ორგანიზაციას (ფსალმ. 37:28). მორთჷ ირიათო დუვაფასათ პატი, ნამდა ვორეთ იეჰოვაშ ართგურ დო მოჸოროფე ხალხ შქას!