ჩქიმ სისუსტეეფიშ ჭყოლოფათ სრულას ქიბგინ ღორონთიშ ძალა

ᲐᲮᲐᲚᲒᲐᲖᲠᲓᲝᲑᲐ

დებაბდჷ 1955 წანას. სუმ ჯიმაშე არძაშ უკლაშ მა ვორდჷ. იბრდჷ ფინეთიშ სამხრეთ სანაპიროშ ქალაქის, ნამდგას ასე ვანტაა ჯოხო.

დიაჩქიმქ ჩქიმ დაბადებაშახ მუსხირენ წანათ ადრე ინათ. მუაჩქიმ მანგარ მოწინააღმდეგე რდჷ დო უფლებას ვარზენდჷ დიაჩქიმს, ბიბლია ქუდმოგურუესკო დო კრებაშა გილამიჸონესკო. ათეშენ, თინა მუაჩქიმიშ ტყობაშე მოგურუანდეს.

ბაღანობაშე ვოცადუდ, იეჰოვაშ მოსაწონო მიფქციკო. ართშა, მუჟამსით შქვით წანერ ვორდჷ, ვარია ფთქვი სკოლას ფინურ ბლინეფიშ ჭკუმუაშე, ნამდგას ზისხირ ოკათუდ. მასწავლებერქ გეჸალ, პიჯ გაკომიჸოთ დო ოცადუდ, ძალით ქიმლამჭკუმუკო, მარა მა ვილკა ქუდვოჸოთნაფე.

12 წანერ ვორდინ თეშ, მუმაქ დომღურ. თეშ უკულ კრებაშა ულაშ მოვარიე მითინ ვა პჸუნდჷ. კრებას ჯიმალეფ ირიათო ყურადღებას მაქციენდეს დო მოხვარუდეს სულიერო წიმი ულას. ქიდიპჭყჷ ბიბლიაშ ირდღას კითხირ დო პუბლიკაციეფიშ გურგედვალირო გიმორკვიება. თეშ ჭყოლოფათ 1969 წანაშ 8 არგუსოს, 14 წანერ ვორდინ თეშ, დიმნათ.

სკოლაშ თებაშ უკულ ხეთეშე პიონერო მსახურება ქიდიბჭყჷ. გვალო მუსხირენ მარაშა გეგნოფრთჷ პიელავესშა, ნამუთ ფინეთიშ შქაგურწკუმა ხოლოს რე. თექ მაქადაგებელეფიშ საჭიროება რდჷ.

პიელავისის გეფჩინებაფე ართ ძღაბ, ზირკა, ნამუთ ამდღა ჩქიმ ძვირფას მეუღლე რე. თინა ფარა დო სახელს ვა გორუნდჷ, თანდაბალ რდჷ დო იეჰოვა მანგარო უჸორდჷ, ათეშენ ქალამიოლ გურშა. ჟირხოლოს მოკოდეს, მუთ შემლებუდეს, ირფელ გუვაკეთითკო იეჰოვაშო დო სოდგა ვა გომტესკონ, მზათ ვორდით ოულარო. 1974 წანაშ 23 მარტის დეფქორწინით. ქორწინებაშ უკულ სოთინ ვამლინუნან თეშ, კარტულაშა გეგნოფრთით ომსახურებშა, სოდეთ ხოლო უმოს საჭიროება რდჷ.

ᲘᲔᲰᲝᲕᲐ ᲖᲠᲣᲜᲔᲜᲓᲷ ᲩᲥᲘᲜᲓᲔ

ჩქინ ქორწინებაშ პირველ დღაშე მოჸუნაფილ იეჰოვა ირიათო მოძირანდეს, ნამდა თიშ სამეფოს პირველ ადგილს ქიგვორინუანდით-და, აუცილებერ მუთუნ ვემმოკორდუდეს (მათ. 6:33). მაგალთო, მუჟამსით კარტულას მსახურენდით, მანქანა ვა პჸუნდეს, ველისპეტით გილეფშით. ვარინ თექ მანგარ ზოთონჯ უჩქუდ დო კრებას თიშმადიდა ტერიტორია უღუდ, მანქანაშ უმშო მუთუნით ვებრგუდით, მარა ოჸიდე ფარა ვამღუდეს.

ართ დღას, ვეველუდითინ თეშ, ჩქიმ უნჩაშ ჯიმაქ ქუმმაკითხეს. თიქ მუშ მანქანა ქუმაჩუქეს, ნამდგაშ დაზღვევაშ ფარა ხოლო გაფილ რდჷ; ჩქი ბენზინიშ ენობუნაშ მეტ მუთუნშე ვა მაჸიდეს ოფიქრებელ. თაშ ნამდა, ტრანსპორტიშ პრობლემაქ ხოლო მუმანწყეს.

ფაქტიურო იეჰოვა მოძირანდეს, ნამდა ოღონც ჩქი სამეფო პირველ ადგილს ქიგვორინეთკო დო მატერიალურ საჭიროებეფშო ზრუნვას ვამჭირუანდეს.

ᲡᲙᲝᲚᲐ „ᲒᲐᲚᲐᲐᲓ“

მუჟამსით 1978 წანას პიონერულ სკოლას მიკიფშით, ართ-ართ მასწავლებერქ, რაიმო კუოკანენქ,a ელამჩეს, ნამდა ბლანკ შევავსითკო „სკოლა გალაადშო“. ხეთეშე ქიდიპჭყით ინგლისურიშ გურაფა, ნამდა სკოლაშ მიკულაქ შემალებუესკო. მარა, ონდო ბლანკის შევავსენდით, 1980 წანას, ფინეთიშ ფილიალშა მემწვის. თიმ დროს ბეთელელეფ ვემკიშეს გალაადის, მარა ჩქი მოკოდეს, თექ ვემსახურითკო იეჰოვას, სოდეთ მუ გინოჭყვიდუნდ. ათეშენ, ვარია ვამთქუალუნა ბეთელს მსახურებაშე, მარა ინგლისურიშ გურაფა იშენ ვემემტებუნა, მუშენდა ფიფქრენდით, მუდგაინ დროს ეგებ მუმაჩანია გალაადიშ მიკულაშ საშვალებაქ.

მუსხირენ წანაშა ხემძღვანელ საბჭოქ გეგნოჭყვიდ, ბეთელელეფს ხოლო შეიალებუესკო გალაადიშ მიკულაქ. ხეთეშე შევავსით განცხადება, მარა თიშ გურშენ ვარ, ნამდა ბეთელს მსახურება ვა მოპწონდეს; უბრალოთ მოკოდეს, იეჰოვაქ თექ გეგმომრინუესკო, სოდეთ უმოსო იპჸიდით საჭირო. თაშ ნამდა, მემწვიეს გალაადშა დო 1985 წანას 79-ა კლას მიკიბლით. სკოლაშ უკულ კოლუმბიას დებნიშნით.

ᲩᲥᲘᲜ ᲞᲘᲠᲕᲔᲚ ᲓᲐᲜᲘᲨᲜᲣᲚᲔᲑᲐ ᲛᲘᲡᲘᲝᲜᲔᲠᲣᲚ ᲛᲡᲐᲮᲣᲠᲔᲑᲐᲡ

კოლუმბიას დიო ფილიალს დუმანიშნეს. ვოცადუდ, მუთ შემლებუდ ირფელ გუვაკეთიკო ჩქიმ დანიშნულებას. მარა თექ ართ წანაშ მსახურებაშ უკულ ქიმეფხვად, ნამდა მუდგარენიშ თირუა მოსაჭირუდეს. ცხოვრებას პირველო დო უკანასკნელო იფთხი დანიშნულებაშ თირუა. თეშ უკულ ჰუილაშ რეგიონს, ქალაქ ნეივას დუმანიშნეს მისიონერეფო.

ირო მიჸორდჷ მსახურება. ოსურიშ მოჸუნაფაშახ, მუჟამსით ფინეთის პიონერ ვორდჷ, ოჭმარეშე აკოსერუაშახ მსახურენდჷ. დაქორწინებაშ უკულ ხოლო მა დო ზირკა ხშირას მთელ დღას მსახურენდით. შორ უბანეფს მსახურებაშ დროს მინშა მანქანას მითობლურდეს, ნამდა შარას დროქ ვამდინესკო დო ოჭმარეშე გევაჸუნითკო მსახურებას.

მისიონერულ მსახურებას კინ დუმართეს თი ენთუზიაზმიქ, ნამუთ ულირს მიღუდეს. კრებაქ მირდჷ დო და დო ჯიმალეფ ხოლო ჸოროფათ დო პატიცემათ მოქცუდეს.

ᲚᲝᲪᲕᲐᲨ ᲫᲐᲚᲐ

ჩქინ დანიშნულებაშ ქალაქიშ გოხოლუას რდჷ თიცალ ქალაქეფ ხოლო, სოდეთ ნამთინ იეჰოვაშ მოწმე ვახორანდჷ. ირიათო თიშე მაფიქრუაფუდ, მუჭო ოკო გეგესკო თექიანეფქ ჭეშმარიტება. მეულირ კოჩშო არეულობაშ გურშენ თექ რინა ოშქურანჯ რდჷ. ბლოცულენდჷ, ნოტე თიცალ მიდგაინ გამკორჩქინდუდას, მით ნეივას ცხოვრენს, ჭეშმარიტებას ქიგეგენს, მოწიფულ ქრისტიანო გინირთუ დო მუშ ქალაქშა ოქადაგებშა დირთუ-მაქ. მარა ინა ვამფიქრებ, ნამდა იეჰოვას უჯგუშ გეგმა უღუდ.

ჭიჭე ხანშა ბიბლიაშ გურაფა ქიდიბჭყჷ ართ ახალგაზრდაწკუმა, ფერნდანდო გონსალესწკუმა, ნამუთ ცხოვრენდჷ ალგესირას — თი ქალაქეფშე ართ-ართის, სოდეთ ნამთინ იეჰოვაშ მოწმე ვა რდჷ. ფერნანდო ირ მარას 50 კილომეტრის მიკიშ ნეივაშა სამუშაშა მაულარო. თინა ირიათო ჯგირო ემზადებუდ ბიბლიაშ გურაფაშო დო ხეთეშე ქიდიჭყჷ შეხვალამეფშა დასწრება ხოლო. ბიბლიაშ გურაფაშ დოჭყაფაშ პირველ მარაშე, დუნორთის თინა თექიანეფს აკოშაყარანდჷ დო ეჩიებუდ თი ირფელს, მუდგას გურაფაშ დროს გებულენდჷ.

ფერნანდოქ 1990 წანაშ იანარს, გურაფაშ დოჭყაფაშე ამშვ თუთაშა, დინათ. უკულ პიონერობა ქიდიჭყჷ. თაშ ნამდა, ალგესირას უკვე რდჷ ართ იეჰოვაშ მოწმე, ათეშენ ფილიალს შეულებუდ თექ სპეციალურ პიონერეფ დანიშნუკო. 1992 წანაშ ფრევალს თე ქალაქის კრებაქ ხოლო ჩემეყალიბ.

ფერნანდოქ ხვალე მუშ ქალაქის მსახურებას ვეგეჯერდჷ. თიქ ოსურიშ მოჸუნაფაშ უკულ სან ვისენტე დელ კაგუანშა გინორთჷ. იეჰოვაშ მოწმეეფ თე ქალაქის ხოლო ვა რდესჷ. ფერნანდო დო მუშ მეუღლექ ბრელ იხანდეს, ნამდა თექ კრებაქ ჩემეყალიბუკო. 2002 წანას ფერნანდოქ რაიონულ ზედამხედველო დენიშნჷ დო მუშ მეუღლე ოლგაწკუმა ართო ამდღარშახ აგრძელენს გილმალ მსახურებას.

თე შემთხვევაშე ქიდიბგურე, მუსხით მნიშვნელოვან რე კონკრეტულ საკითხეფშე ლოცვა. იეჰოვაქ თინა გაკეთ, მუდგაშ კეთება ჩქი ვეშემლებუდეს. მუ გასაკვირ რე, ბოლო-ბოლო თენა ჩქინ ვარინ, იეჰოვაშ მოსავალ რე (მათ. 9:38).

ᲘᲔᲰᲝᲕᲐ „ᲡᲣᲠᲕᲘᲚᲡ ᲮᲝᲚᲝ ᲛᲘᲠᲩᲥᲘᲜᲐᲜᲐ ᲓᲝ ᲛᲝᲥᲛᲔᲓᲔᲑᲐᲨ ᲫᲐᲚᲐᲡ ᲮᲝᲚᲝ ᲛᲐᲠᲖᲔᲜᲐ“

1990 წანას რაიონულ მსახურება ქუდმავალეს. ჩქინ პირველ რაიონ რდჷ კოლუმბიაშ დედაქალაქ ბოგოტა. ჭიჭეს ქუმოშქურუდეს თე დავალებაშა, მუშენდა მა დო ჩქიმ მეუღლე უბრალო ხალხ ვორდით დო მუთუნ განსაკუთრებულ უნარეფ ვამღუდეს. ვართ თეცალ დიდ ქალაქის ცხოვრებას ვორდით მერჩქვანელ. მარა იეჰოვაქ შეასრულ ფილიპელეფიშ 2:13-ს ენოჭარილ პირობა: „ღორონთ თეშ მოქმედენს თქვანწკუმა, მუჭოთ მუს ოკო; თინა სურვილს ხოლო გირჩქინანა დო მოქმედებაშ ძალას ხოლო გარზენა“.

ჭიჭე ხანშა მედელინს დუმანიშნეს, თი ქალაქის, ნამუთ ჟიშე მიფშინე. თექიანეფ არეულობას დო ჩხუპის მერჩქვანელ რდესჷ. მაგალთო, ართშა ბიბლიაშ გურაფას ვატარენდინ თეშ, გალე ჸოთამაქ გორჩქინდჷ. მა პროლს გენჯირა მილამუდ დო ავრე ჩქიმ ბიბლიაშ მაგურაფალქ, ითამ მუთუნ ვარინ თეშ, აბზაციშ კითხირ გაგრძელ. კითხირ გათუნ, მორდებავა დო გალე გიმილ. ჭიჭე ხანშა ბაღანეფწკუმა ართო დირთჷ დო მშვიდას მირაგად: „ქუმაპატი, ბაღანეფ ველმატებედ გალე“.

ართშა ხოლო, მუჟამსით კარდოკარ მსახურენდით, ზირკაქ ფერგინოლაფირქ ქიმირულ ჩქიმდა დო მიწუ, ნამდა მიდგარენ კოჩ ტყვიას მოჸოთანდუა. მანგარო გებნერვიან, მარა უკულ ქიმეფხვადით, ნამდა ჸოთამა ზირკაშა ვარინ, თი კოჩშა ნოკობუენა, მით იქილე მიშჷ.

ჭიჭე ხანშა თეცალ შემთხვევეფს ქიმვარჩქვანით. მანგარო მოხვარუდეს თი და დო ჯიმალეფ, მით თეშნერს ვარინ, უფრაშ სიტუაციეფს ხოლო ჸოფენა. მარჩქილედეს, ნამდა იეჰოვა თინეფს ქახვარუდ-და, ჩქი ხოლო აუცილებერო ქიმმეხვარებუდეს. ათეშენ, ირიათო მეპჸუნდით უხუცესეფიშ რჩევეფს, სიფრთხილეს გიმიფრჩქინანდით დო შხვა ირფელ იეჰოვაშა მაფუდეს მენდებულ.

ნამთინე სიტუაციაქ გვალო ველუდითინ თიცალ ოშქურანჯიქ ვეჸუ. ართშა, მუჟამსით მობინადრეს ვეჩიებუდ, ოზეშე თიცალ ხუმა გიმიშ, ითამ ჟირ ოსურ ართიანს ონირზუდუკო. თინეფიშ ნირზიშ გინოჯინა ქიანაშის ვა მოკოდ, მარა ჸუდეშ მინჯექ ფთხუ, დინახალე გემნოფრთიკო. გემნოფრთჷ დო მუს ვორწყექ — ჟირ თუთიყუშ მეზობელეფიშ ნირზის გინოძიცებუე.

ᲐᲮᲐᲚ ᲓᲐᲕᲐᲚᲔᲑᲔᲤ ᲓᲝ ᲡᲘᲠᲗᲣᲚᲔᲔᲤ

1997 წანას „დახელოვნებაშ სკოლაშ“ მასწავლებერო დუმანიშნეს.b ირიათო მიჸორდჷ თეოკრატიულ სკოლეფიშ მიკულა, მარა დღას ვეფიფქრენდჷ, ნამდა მა იპჸიდ მასწავლებერ.

ჭიჭე ხანშა საოლქო ზედამხედველო დებნიშნჷ, მარა თე დანიშნულებაშ გაუქმებაშ უკულ, კინ რაიონულ მსახურებას დუვართჷ. 30 წანაშე უმოს რე, მუთ სკოლეფიშ მასწავლებერო დო რაიონულ ზედამხედველო მსახურენქ. თე დანიშნულებეფქ ქიანა კურთხევეფ მომიღ, მარა ირფელ თაშ გემოშა ვა ჸოფე. გეჩიებუთ ასე, მუშენ.

მტკიცე ხასიათიშ კოჩ ვორექ დო სირთულეეფიშ დროს თენა მანგარო მოხვარ. მარა მინშა კრებაშ საკითხეფიშ გინოჭკირუაშ დროს ნაბეტან მაღოლედ. ართშა გენჭირელო უწი ნამთინეს, ნამდა ჸოროფა დო გონიერება გეგმირჩქინესკო შხვეფწკუმა. ოძიცე რე, მარა თე მომენტის კინ მა ვეგმიფრჩქინ თე თვისებეფ (რომ. 7:21—23).

თეცალ შემთხვევეფიშ გურშენ მინშა გურ მანგარო მიტირხუდ (რომ. 7:24). ართშა ლოცვას იეჰოვას თინა ხოლო უწი, ნამდა ქოუჯგუდ, მივოტეკო მისიონერო მსახურება დო ფინეთშა დიფრთიკო. თიმ დღას კრებაშ შეხვალამას მორჩქილაფირქ დუმარწმუნ, ნამდა ოკო დოფსქიდიკო ჩქიმ დანიშნულებას დო გუვაგრძელიკო ბრძოლა არასრულყოფილებაწკუმა. ამდღარშახ ბგინაფლენქ, მუჭო უპასუხ იეჰოვაქ ჩქიმ ლოცვას. თეს გეძინელ, მთელ გურით ვაფასენქ, ნამდა თიქ ჸოროფათ მიმეხვარ, გივორჯგინიკო ჩქიმ სისუსტეეფს.

ᲛᲝᲛᲐᲕᲐᲚᲡ ᲘᲛᲔᲜᲓᲘᲨ ᲗᲝᲚᲘᲗ ᲣᲯᲘᲜᲔᲥ

მა დო ზირკა მანგარ მარდულ ვორეთ იეჰოვაშ, ნამდა მუჩეს თეშმადიდა პატი — ცხოვრებაშ უმენტაშ ნაწილ სრულ დროთ მსახურებას მეუძღვინითკო. იეჰოვას თიშ გურშენ ხოლო უმარდუქ, ნამდა თეცალ მოჸოროფე დო ართგურ ოსურ მაჩუქ.

მალას 70 წანას ვათენქ დო მიოტებელ მაჸი ჩქიმ დანიშნულებეფ. მარა ვოცადუქ, გურ ვეგიბტახე, მუშენდა ბჯერსჷ, ნამდა იეჰოვას არძაშ უმოსო თიმწკუმა განვადიდენთ, მუჟამსით ჸოროფათ დო მარდულობათ ნამ შემლებუნან, თის ვორთუთ დო თეშო აუცილებერ ვა რე, მუდგაინ განსაკუთრებულ დანიშნულება გიღუდას (მიქ. 6:8; მარ. 12:32—34).

ჩქიმ ჯვეშ დანიშნულებეფს გინვოჯინექინ, ფხვადუქ, თინეფ თიშ გურშენ ვემემღებ, ნამდა თეშ ღირს ვორდჷ ვარდა მუდგაინ განსაკუთრებულ უნარ მიღუდ. ართ წუთით ხოლო ვა ფიფქრენქ თეს. თე დანიშნულებეფ საჩუქარ რდჷ იეჰოვაშე. თიქ მუჩჷ თე ირფელიშ პატი ჩქიმ სისუსტეეფიშ უმკუჯინუო. ბჯერსჷ, ნამდა თე დავალებეფიშ შესრულებაქ ხვალე იეჰოვაშ მოხვარათ შემალებუ. თეშნერო, ჩქიმ სისუსტეეფიშ ჭყოლოფათ სრულას ქიბგინ ღორონთიშ ძალა! (2 კორ. 12:9).