გურს მუდგა ვაიტახუნდანინ, ვემიოტუათ იეჰოვაშ მსახურება

1. მუ კურთხევეფ მოუღ ჩქინდა თის, ნამდა იეჰოვაშ ორგანიზაციას ვორეთ?

ᲛᲐᲠᲗᲐᲚᲝ დიდ კურთხევა რე, ნამდა თე ძნელო გარზებელ ბოლო დღალეფს იეჰოვაშ ორგანიზაციას ვორეთ. მსოფლიოს მდგომარეობა ირდღას უმოსო იუფრაშებ, მარა იეჰოვა და დო ჯიმალეფიშ საშვალებათ მამანგარენა (ფსალმ. 133:1). თეს გეძინელ, თინა მოხვარუნა, მიღუდან ბედნერ ოჯახურ ცხოვრება დო მარზენა სიბრძნეს, ნამდა ვა ვოდინუათ შინაგან სიმშვიდე (ეფეს. 5:​33—6:1).

2. მუ ოკო ვაკეთათ დო მუშენ?

² მარა ირო ვა რე ადვილ, გუაგრძელათ იეჰოვაშ ართგურო მსახურება, მუშენდა მინშა შხვეფიშ არასრულყოფილება მოცილუნა დო მინშა ჩქინ შეცდომეფ მიტახუნა გურს, განსაკუთრებულო თიმწკუმა, მუჟამსით ართ დო იგივე შეცდომა ბრელშა მაღოლენა. ათეშენ თე სტატიას გუარჩიენთ, მუ მიმეხვარებუნა, ვემვოტუათ იეჰოვაშ ართგურო მსახურება, მუჟამსით 1) თანაქრისტიან მოწყინებაფუანა, 2) მეუღლეშ საქციელ გურს მიტახუნა დო 3) შეცდომეფ მუმალენა. თითოულ შემთხვევაშ გარჩიებაშ დროს ქობძირუნთ თიცალ ბიბლიურ პერსონაჟეფიშ მაგალითეფს, მით ზუსტას იგივე მდგომარეობას რდესჷ.

ᲛᲣᲟᲐᲛᲡᲘᲗ ᲗᲐᲜᲐᲥᲠᲘᲡᲢᲘᲐᲜ ᲒᲝᲬᲧᲘᲜᲔᲑᲐᲤᲣᲐᲜᲐ

3. მუ სირთულეს ხვადუ იეჰოვაშ ხალხ?

³ სირთულე. ნამთინე თანაქრისტიანს შილებე უღუდას თიცალ თვისება ვარდა ჩვევა, მუთ მაღიზიანენა. ნამთინექ შილებე გურუგუჩამუო თიცალ მუდგარენ მიწუან ვარდა თეშ მიმექცუან, ნამდა გურ ქელმოჭუან. მინშა პასუხიშმგებელ ჯიმალეფ ხოლო ჩირთუნა დო თინეფიშ საქციელქ ხოლო შილებე გურ გომტახან. თეცალ დროს პიროვნებაქ შილებე იფიქრას, ნამდა თენა ღორონთიშ ორგანიზაცია ქორდასინ, თეცალ მუდგარენ ვა მოხვადუდ. ათეშენ თიშ მანგიორო, ნამდა და დო ჯიმალეფწკუმა ართო გაგრძელას ღორონთიშ მსახურება, შილებე დენდურას თანაქრისტიანს, მიდგაქ ოწყინებაფუ, ვარდა გვალო მიოტუას შეხვალამეფშა გილულა (სოფ. 3:9). ქიჸუაფუნო თეშ კეთება ჭკვერულ? მორთჷ გუარჩუათ ართ ბიბლიურ პერსონაჟიშ მაგალით, მით ზუსტას თეცალ პრობლემაშ წოხოლე გერდჷ.

4. მუ სირთულეეფს შეხვად მოციქულ პავლექ?

⁴ ბიბლიურ მაგალით. მუჟამსით მოციქულ პავლექ იერუსალიმშა ენორთჷ, თანაქრისტიანეფს ოშქურუდეს თიშა დო ვა ჯერდეს, ნამდა თინა ხოლო იესოშ მოწაფე რდჷ (საქ. 9:26). ჭიჭე ხანშა ნამთინექ თის ეკორაგად ხოლო ქუდუჭყჷ, ნამდა სახელ გოუტახესკო (2 კორ. 10:10). პავლექ თინა ხოლო ძირჷ, ნამდა ართ უხუცესიქ თიცალ არასწორ გადაწყვეტილება მიღჷ, ნამდგაქ შილებედ ბრელ დაბრკოლუკო (გალ. 2:​11, 12). თეს გეძინელ, მარკოზიქ, ნამუთ პავლეწკუმა ართო მსახურენდჷ, ხუჯ ქელასოფ თის დო საქმეშა ვაჸუნ (საქ. 15:​37, 38). თე გიმოკოროცხილ სიტუაციეფს პავლეს შეულებუდ დენდურუკო თინეფს, მიდგაქ ოწყინებაფუ. მარა თის ჯგირო არჩქილედ, ნამდა და დო ჯიმალეფ არასრულყოფილეფ რდესჷ. ათეშენ, ირფელიშ უმკუჯინუო, იშენით ჯგირ თოლით უჯინედ და დო ჯიმალეფს დო იეჰოვაშ ართგურო მსახურება ხოლო ვემუტებ. მუქ მეხვარ პავლეს თეშ კეთებას?

5. მუქ მეხვარ პავლეს, ვადინუკო ჯგირ ურთიერთობა და დო ჯიმალეფწკუმა? (კოლ. 3:​13, 14; ქოძირით სურათ).

⁵ პავლეს უჸორდჷ და დო ჯიმალეფ დო ზუსტას თენა ოხვარუდ, ყურადღება თინეფიშ არასრულყოფილებაშა ვარინ, ჯგირ თვისებეფშა გეგნიღუკო. და დო ჯიმალეფიშ ჸოროფა პავლეს თის ხოლო ოხვარუდ, ნამდა მუქ ხოლო გაკეთუკო თინა, მუდგაშ კეთებას ჩქი ელამჩანა კოლოსელეფიშ 3:​13, 14-ის (წეკითხით). ქობძირათ, მუჭო მიქცუ თიქ მარკოზიშ შემთხვევას. თიშ უმკუჯინუო, ნამდა მარკოზიქ მიოტუ თინა პირველ მისიონერულ მოგზაურობას, პავლეს გურშა ჟღამ ველუტებ. ჭიჭე ხანშა, მუჟამსით პავლექ კოლოსეშ კრებას წერილ მეჭარ, თიქ მარკოზშე თქუ, ნამდა თინა ძვირფას თანამშრომელ აფუდ, ნამუთ გურშა ეუქექუანდჷ (კოლ. 4:​10, 11). მუჟამსით რომს ციხეს ხედჷ, ტიმოთეს უწუ, მარკოზ მოლეჸუნუკო, ნამუთ ქიმეხვარებუდ თის (2 ტიმ. 4:11). მუჭოთ ვორწყეთ, პავლე პატიენდჷ თანაქრისტიანეფს დო თინეფწკუმა კინ ჯგირ ურთიერთობა უღუდ. მუშ გურაფა შემლებუნა თიშ მაგალითშე?

6, 7. მუ მიმეხვარებუნა და დო ჯიმალეფიშ არასრულყოფილებაშ უმკუჯინუო, გეგმიფრჩქინათ ჸოროფა თინეფიშ მიმართ? (1 იოან. 4:7).

⁶ მუს ბგურაფლენთ? იეჰოვას ოკო, მუდგაქ ვა მოხვადასინ, გუაგრძელათ ჸოროფაშ გიმორჩქინა და დო ჯიმალეფიშ მიმართ (წეკითხით 1 იოანეშ 4:7). მიდგაინქ ქრისტიანს ვასქვანსინ თეშ ქიმმექცის-და, ოკო ვეფიფქრათ, ნამდა თიქ გარძახ გინურთჷ ბიბლიურ პრინციპეფს დო სპეციალურო მიკეთეს თენა (იგავ. 12:18). შეცდომეფიშ უმკუჯინუო, იეჰოვას უჸორს მუშ ართგურ მსახურეფ, ოჭიშის ვა ურთინუანს თინეფს დო ვართ ირიათო სქიდუ ნაწყენ (ფსალმ. 103:9). მუ მოხვარუდეს, თეცალ მოჭყოლოფე მუმა ვა პჸუნდანინ?! თექ ოკო აღბძრან, ნამდა ჩქი ხოლო ვაპატუათ შხვეფს (ეფეს. 4:​32—5:1).

⁷ ვართ თიქ გუმოჭყორდან, ნამდა მუთ უმოს ხოლოს იპჸით აღსასრულწკუმა, თით უმოს ხოლოს ოკო ვორდათ და დო ჯიმალეფწკუმა, მუშენდა ჩქი თხოზინიშ მოძინას ველუთ. შილებე ნამთინექ რწმენაშ გურშენ ციხეს ხოლო ქუმოფხვადათ. დღას ვეგეფხვილუთ და დო ჯიმალეფიშ ელარნას თეშ, მუჭოთ თიმწკუმა დემესაჭირებუნა (იგავ. 17:17). დეფიქრით ართ უხუცესიშ, ჯოზეფიშa შემთხვევაშე, ნამუთ ესპანეთშე რე. თინა დო მუსხირენ ჯიმა ჯარიშ გურშენ ციხეს ქუდახუნუეს. ჯოზეფ იჩიებ: „ციხეს ამდღა დო ამსერ ართო ვორდით. ათეშენ მეტ რდჷ თიშ შანს, ნამდა ართიანს ქუოწყინეთკო. ოკო გაუგითკო დო ვაპატითკო ართიანს, შხვანერო ვეგშეშ. თექ მიმეხვარეს, ართობა მიღუდესკო დო დოფთხილეთკო ართიან შხვეფშე. ფშჷ, ნამდა ართშა ხე გიფსშა ინომხედ დო დუდშა ვამკმალუედ, მარა ართ ჯიმა ბარგის მინახუნდჷ დო ზრუნენდჷ ჩქიმდე. ჯიმალურ ჸოროფა ზუსტას თიმწკუმა გიმოფცად, მუჟამსით არძაშ უმოსო მოსაჭირუდ“. თაშ ნამდა, და დო ჯიმალეფწკუმა უთანხმოება ქომღუნან-და, მანგარ მნიშვნელოვან რე, თეს ამდღარშე ქიმკვოჯინათ.

ᲛᲣᲟᲐᲛᲡᲘᲗ ᲛᲔᲣᲦᲚᲔᲨ ᲒᲣᲠᲨᲔᲜ ᲒᲣᲠ ᲒᲘᲢᲘᲠᲮᲣᲜᲐ

8. მუ სირთულეეფ უღუნა დაქორწინებულეფს?

⁸ სირთულე. უპრობლემე ოჯახ ვა არსებენს. ბიბლია პირდაპირ იჩიებ, ნამდა დაქორწინებულეფს „ოწუხებელ აღვენუნა“ (1 კორ. 7:28). თეშ მიზეზ თინა რე, ნამდა ქოთ ქომონჯ დო ქოთ ოსურ არასრულყოფილ რე, შხვადოშხვანერ ხასიათ უღუნა, შხვადოშხვა მუდგარენ მოწონა ვარდა ვა მოწონა. შილებე მეუღლეეფ შხვადოშხვა კულტურაშე მიშან ვარდა შხვადოშხვა გარემოს ირდეს. ქორწინებაშ უკულ შილებე ართიანს თიცალ ჩვევეფ დო თვისებეფ ქახვილუან, მუთ აიშახ ვა უჩქუდეს. გიმოკოროცხილშე ნებისმიერს შეულებ ჩილ დო ქომონჯ შქას პრობლემა გარჩქინას. თეცალ დროს შილებე პიროვნება ხვალე მეუღლეშ დაშებულს ორწყედას დო ვაკვირუდას, მუქ მუს ჩირთჷ. პრობლემაშ ართო მოგვარებაშ მანგიორო, თინეფქ შილებე იფიქრან, ნამდა უჯგუშ იჸი, ცალ-ცალკე იცხოვრან ვარდა გვალო ჩეთხუან ართმაჟიას. მარა ქახვარუნო თენა საქმეს?b მორთჷ გუარჩუათ ართ ბიბლიურ პერსონაჟიშ შემთხვევა, ნამდგაქ იეჰოვაშ ართგურქ დოსქიდ, თიშ უმკუჯინუო, ნამდა მუშ ქომონჯწკუმა ცხოვრება მანგარ ძნელ რდჷ.

9. მუ სირთულე უღუდ აბიგაილს?

⁹ ბიბლიურ მაგალით. ბიბლიაშე ბგებულენთ, ნამდა აბიგაილიშ ქომონჯ, ნაბალ, „უხეშ დო უბადოშ მაკეთებელ კოჩ რდჷ“ (1 სამ. 25:3). თეცალ კოჩწკუმა ცხოვრება ადვილ ვეჸუაფუდ, მარა აბიგაილ მუშ ქომონჯშე დუდიშ დარსხებელო მომენტის ვა გორუნდჷ. სოვრეშე მიჩქუნა თენა? ართშა ნაბალქ ისრაელიშ მომავალ მეფე დავითის დო თიშ ხალხის შეურაცხყოფა ქიმიორინუ. გურმულირ დავით თიშ ოჸვილშა მიშჷ. აბიგაილს შეულებუდ, დუდის ეცადუკო, ინტუკო დო ვეცილუკო დავითის ნაბალიშ ჸვილუას. მარა თეშ მანგიორო, აბიგაილქ გეგნაფიქრებაფუ დავითის თეშ კეთება დო გინატუ მუშ ქომონჯ (1 სამ. 25:​9—13; 25:​23—27). საინტერესო რე, მუშენ მიქცუ აბიგაილქ თაშ?

10. საეგებიოთ, მუშენ დოსქიდ აბიგაილქ ოჯახის, თიშ უმკუჯინუო, ნამდა მუშ ქომონჯწკუმა ცხოვრება მანგარ ძნელ რდჷ?

¹⁰ აბიგაილს უჸორდჷ იეჰოვა დო პატის ცენდჷ ქორწინებაწკუმა დაკავშირებულ თიშ დოდგინელ ნორმეფს. თის არჩქვენუდ, მუ უწუ ღორონთიქ პირველ ჩილ დო ქომონჯის, ადამ დო ევას (დაბ. 2:24). აბიგაილს უჩქუდ, ნამდა იეჰოვაშ თოლს ქორწინება წმინდა რდჷ. თის ოკოდ, გურ გაუხარუკო ღორონთის, ათეშენ, მუთ შეულებუდუნ ირფელ გაკეთ, ნამდა ირსხუკო მუშ ჸუდეშარეფ, თინეფ შქას მუშ ქომონჯ. თიქ დრო ვა უღალუნ თეშ, ხეთეშე, იმოქმედ, ნამდა დავითის გეგნაფიქრებაფუკო ნაბალიშ ჸვილუა. მართალ რე, აბიგაილ მუთუნ შქას ვა რდჷ, მარა თინა მზათ რდჷ, თიცალ მუდგარენშე ხოლო ქოთქუკო ბოდიშ, მუთ მუს ვა დუშებ. ბჯერა, ნამდა იეჰოვას მანგარო უჸორდჷ თე გაბედულ დო დუდგინოდვალირ ოსურ. მუშ გურაფა შეულებუნა, მუჭოთ ოსურეფს, თეშ ქომონჯეფს აბიგაილშე?

11. ა) მუს ელჷ იეჰოვა ჩილ დო ქომონჯშე? (ეფეს. 5:33). ბ) მუ დიგურეთ კარმენიშ მაგალითშე? (ქოძირით სურათ).

¹¹ მუს ბგურაფლენთ? იეჰოვას ოკო, ჩილ დო ქომონჯიქ ვაკარღვას ოჯახ, თიშ უმკუჯინუო, ნამდა შილებე ართო ცხოვრება ძნელ რდასჷ. წერმიდგინით, მუნერ გახარებულ რე იეჰოვა, მუჟამსით ორწყე, მუჭო ოცადუნა დაქორწინებულეფ პრობლემეფიშ მოგვარებას დო ართმაჟიაშ შქას დუდგინოდვალირ ჸოროფაშ დო პატიცემაშ გიმორჩქინას (წეკითხით ეფესოელეფიშ 5:33). დეფიფქრათ ართ დაშ, კარმენიშ, შემთხვევაშე. თინა ამშვ წანაშ დაქორწინებულ რდჷ, მუჟამსით ბიბლიაშ გურაფა დიჭყჷ დო ჭიჭე ხანშა დინათ. კარმენ იჩიებ: „ჩქიმ ქომონჯის ვემეწონ თე ამბექ. თინა ეჭვიანენდჷ, მუშენდა დროს იეჰოვას დო თიშ მსახურებას უთმენდჷ. გლახათ მოქცუდ დო მორცქინანდჷ, ნამდა მიმოტენდჷ“. მარა კარმენს იშენით ვეკურღვაფ ოჯახ დო 50 წანაშ დინახალე ირფელს ორთუდ, ნამდა მუშ ქომონჯის ჸოროფა დო პატიცემა ქაგინაფუკო. კარმენ გეუძინანს: „წანეფიშ მიკულაწკუმა ართო, ქიდიბგურე, უმოს გურგოჩამილ ვორდიკო დო გემუანო ვეჩიკო ჩქიმ ქომონჯის. მარჩქილედ, ნამდა ქორწინება იეჰოვაშ თოლს წმინდა რე, ათეშენ ირნერო ვოცადუდ, ვაკვორღვიკო ოჯახ. იეჰოვაშ ჸოროფათ დღას ვამფიქრებ ქომონჯიშ მეტება“.c პრობლემეფ თქვან ოჯახის ხოლო გორჩქინდუნ-და, რჯერდან, იეჰოვა ქიმგეხვარებუნა, გაგრძელათ თიშ მოსაწონო მოქციება.

ᲛᲣᲟᲐᲛᲡᲘᲗ ᲨᲔᲪᲓᲝᲛᲐᲨ ᲒᲣᲠᲨᲔᲜ ᲒᲣᲠ ᲒᲘᲢᲘᲠᲮᲣᲜᲐ

12. მუჭო შილებე იბგინათ დუდ, სერიოზულო ქუდვაშენთ-და?

¹² სირთულე. მუჟამსით სერიოზულო ვაშენთ, დუდის მანგარ გლახათ ბგინაფლენთ. ბიბლიას ხოლო ჭარჷ, ნამდა დაშებაშ უკულ ადამიან „გურგოტახილ დო შურგანწარებულ რე“ (ფსალმ. 34:18). ართ ჯიმა, რობერტ, წანეფიშ დინახალე ბრელს ორთუდ, ნამდა მომსახურეთ დენიშნუკო, მარა, მუჟამსით სერიოზულო ქუდაშუ, ქიმეხვად, ნამდა იეჰოვას მანგარო უწყუნუ გურ. რობერტ იჩიებ: „სინდის მანგარო მაწუხენდჷ დო დუდის თეშ ბგინაფლენდჷ, ითამ ოჭიშის ტონა ოღალ გებძუდ. ღურათებულ ვორდჷ. იეჰოვას ჩხე ჩილამურით ვეჩიებუდ ლოცვას. ფშჷ, ნამდა ფიფქრენდჷ, ანწ, თე ირფელიშ უკულ, იეჰოვა ქუმომრჩქილუანსო-მაქ?!“. სერიოზულო ქუდვაშეთ-და, შილებე გურ თეშ მაფუდან დამონკებულ, ნამდა იფიფქრათ, ანწ იეჰოვას ვართ ჩქი დო ვართ ჩქინ მსახურება მუთუნშა ვა უღირ (ფსალმ. 38:4). დუდის თაშ ქოგინაფლენთ-და, მანგარო მიგეხვარებუნა ართ ბიბლიურ პერსონაჟიშ მაგალითიშ გარჩიება, ნამდგაქ სერიოზულ შეცოდებაშ უმკუჯინუო, გაგრძელ იეჰოვაშ ართგურო მსახურება.

13. მუ დაშუ პეტრექ დო მუ შეცდომეფქ მიჸუნ თინა თე სერიოზულ ცოდაშა?

¹³ ბიბლიურ მაგალით. იესოშ ღურაშ წოხოლენ სერს პეტრექ მუსხირენშა მეჩირთჷ, მუდგაქ თინა სერიოზულ ცოდაშა ქიმიჸუნ. დუდშე თიმწკუმა ჩირთჷ, მუჟამსით ნაბეტანო რდჷ მუშ დუდშა დარწმუნებულ დო იესოს უწუ, ნამდა შხვა მოციქულეფქ მიგოტუანინ ხოლო, მა მუთუნით ვემგოტენქია (მარ. 14:​27—29). ჭიჭე ხანშა, გეთსემანეშ ბაღის, მუჟამსით იესო ოლოცებშა რდჷ ულირ, პეტრეს ვეშიალებუ კურცხას ჸოფედუკო დო მუსხირენშა ქიმკარულ (მარ. 14:​32, 37—41). უკულ, იესოშ ოჭოფშა ხალხიქ ყამეფით დო კეტეფით ქუმორთუნ, ინტჷ დო იესო თინეფიშ ხეს ქიდიტუ (მარ. 14:50). ბოლოს პეტრექ იესოშ გურშენ სუმშა თქუ, ვეფჩინენქია დო მუშ სიტყვეფიშ დამტკიცებელო ფუჩაფა ხოლო ქიდიჭყჷ (მარ. 14:​66—71). მუ იგინ პეტრექ, მუჟამსით ქიმეხვად, მუშმაშხვა დაშუ? მუჭოთ ბიბლიაშე ბგებულენთ, თის „მეტიქ ვეშიალებუ დო ნგარაქ გეუოლ“. შილებე თინა ემოციურო განადგურებულ რდჷ თი ირფელიშ გურშენ, მუთ აკეთ (მარ. 14:72). წერმიდგინით, მუ მდგომარეობას იჸუაფუდ პეტრე, მუჟამსით თე ირფელს თინა ხოლო ქიგიაძინუდ, ნამდა მუსხირენ საათშა მუშ მეგობარ იესოს დოჸვილუნდეს. თის მუთუნო ვემიორჩქუდუკონ იჸიდ მუშ დუდ.

14. მუქ მეხვარ პეტრეს, გაგრძელუკო იეჰოვაშ მსახურება? (ქოძირით სურათ გვერდის).

¹⁴ თიშ მანგიორო, ნამდა პეტრექ შხვეფწკუმა ურთიერთობას დუდ აურიდუკო დო ხვალე ჸოფედუკო, შხვა მოწაფეეფშა ქიმერთჷ დო თინეფქ ხოლო გურშა ელუკინეს თის (ლუკ. 24:33). თეს გეძინელ, გათელებურ იესოქ თის პირადო ქაძირუ დუდ, შილებე თიშენ, ნამდა ოკოდ თეშნერო გურშა ეუქექუკო (ლუკ. 24:34; 1 კორ. 15:5). იესოქ ჭიჭე ხანშა, თიშ მანგიორო, ნამდა გაუდღანუკო მუშ მეგობარ პეტრეს თი ირფელშე, მუთ აკეთ, უმოს დიდ პასუხიშმგებლობეფ ქიმეჩ (იოან. 21:​15—17). მართალ რე, პეტრეს გვალო ჯგირო არჩქილედ, მუშმაშხვა დაშუ, მარა ვა უფიქრებ, ნამდა ანწ ვეშიალებედ სწორას მოქციება. თის ჯერდჷ, ნამდა ირფელიშ უმკუჯინუო, იესოს უჸორდჷ. ხვალე თენა ვარინ, და დო ჯიმალეფს ხოლო ვემუტებუნა პეტრე. მუშ გურაფა შემლებუნა თე მოციქულიშ მაგალითშე?

15. მუშა მარწმუნენა იეჰოვა? (ფსალმ. 86:5; რომ. 8:​38, 39; ქოძირით სურათ).

¹⁵ მუს ბგურაფლენთ? იეჰოვას ოკო, ბჯერდან, ნამდა თის უჸორთ დო ირო მზათ რე, მაპატუან (წეკითხით ფსალმუნიშ 86:5; რომაელეფიშ 8:​38, 39). ვა რე გასაკვირ, შეცოდებაშ უკულ გურ ბრალს გებდვანდან. მარა ოკო ვეფიფქრათ, ნამდა იეჰოვაქ გომჯოგუეს დო დღას ვა მაპატიენა. თეშ მანგიორო, ხეთეშე ოკო იფთხუათ მოხვარა. ჟიშე მოშინაფილ რობერტ იჩიებ: „ცოდაშა თიქ მემიჸონ, ნამდა ცდუნებაშა გერჯგინას ჩქიმით ვოცადუდ დო მითინშა ვამთხუ მოხვარა“. რობერტიქ ქიმეხვად, ნამდა უხუცესეფს ოკო ქუდურაგადუკო. თინა გეუძინანს: „მუჟამსით თე ნაბიჯ გეგნობდგჷ, ხეთეშე ქიბგინ იეჰოვაშ ხე დო თიშ ჸოროფა. უხუცესეფშე ხოლო ბგინაფლენდჷ ჸოროფას. თინეფქ დუმარწმუნეს, ნამდა იეჰოვას ვემუტებუქ დო ოჭიშ ვა ურთინუაფ ჩქიმდა“. შემლებუნა დარწმუნებულ ვორდათ, ნამდა იეჰოვას მანგარო უჸორთ დო მზათ რე, მაპატუან, მუჟამსით დაშებულს ბნარღენთ დო ირნერო ვოცადუთ, კინ ვეგემეობრათ შეცდომა (1 იოან. 1:​8, 9). თენა ბოლოშა ქობჯერან-და, სერიოზულო დუაშუათინ ხოლო, ვემვოტენთ იეჰოვაშ მსახურებას.

16. მუშენ გაფუნა გინოჭყვიდილ, ვემიოტუათ იეჰოვაშ მსახურება?

¹⁶ იეჰოვა მანგარო აფასენს მუშ ართგურ მსახურეფიშ ხანდას, მუშენდა ოცადუნა, თე ძნელო გინაღალარ ბოლო დღალეფს გაგრძელან თიშ ართგურო მსახურება. მუდგა გურიშგუმატახალ სიტუაციას ვეშეფხვადათინ, იეჰოვაშ მოხვარათ შემალებენა, ართგურო ვემსახურათ თის. ვა ვოდინუანთ და დო ჯიმალეფიშ ჸოროფას დო ვაპატიენთ, მუჟამსით მოწყინებაფუანა. თეს გეძინელ, შემალებენა იეჰოვაშ მიმართ ძალიერ ჸოროფა გეგმიფრჩქინათ დო ქუოძირათ, ნამდა ვაფასენთ ქორწინებას, მუჟამსით ოჯახის პრობლემეფიშ გინაჭკირალო ირფელს გუაკეთენთ. დო ბოლოს, სერიოზულო შეფცოდით-და, შემალებენა იეჰოვაშ იმენდ მიღუდან, ნამდა მაპატიენა დო ჸოროფათ ქიმმეხვარებუნა, კინ გუაგრძელათ თიშ ართგურო მსახურება. შემლებუნა დარწმუნებულ ვორდათ, ნამდა „ჯგირიშ კეთებას“ ვემვოტენთ-და, იეჰოვა ხვამათ ემოფშანა (გალ. 6:9).