თქვა შეილებნა ქიმიოჭირინუათ სულიერ მიზნეფს

1. მუშ კეთება უჭირს ნამთინეს?

ᲓᲦᲐᲡ ქუნორღვენანო თიცალ სულიერ მიზან, ნამდგაშ მენჭირნაფაქ მანგარო გაიჭირდეს?b თაშ ქორენ-და, ვეფიქრათ, ნამდა ხვალე თქვა გაღოლეს თექ. ართ ჯიმას, ფილიპის, მიზანო უღუდ, გაუჯგუშკო ლოცვეფ დო უმოს ხშირას ილოცკო, მარა უჭირდჷ, დრო გეგმურთუკო თეს. ართ დას, ერიკას, მიზანო უღუდ, უმოს ადრე ქიმერთკო სამქადაგებლო შეხვალამეფშა, მარა იშენით ხშირას ოგვიანუანდჷ. ხოლო ართ ჯიმა, ტომაშიქ, მუსხირენშა ეცად, დუდშე ბოლოშა წეკითხკო ბიბლია. თინა იჩიებ: «ბიბლიაშ კითხირშა გურ დღას ვეგმადვინედ, სუმშა ვეცად ჩქიმ მიზანიშ მენჭირნაფას, მარა „ლევიანეფიშ“ იშო ვა მალინ».

2. მუშენ ოკო ვეგიბტახათ გურ მიზანშა დიო ხოლო ვემმაჭირინეს-და?

² მუდგარენ მიზან ქოიღნა დო თიშა დიო ხოლო ვემგაჭირინეს-და, გურ ვეგიტახათ. რშუდან, არძაშ უმოს მარტივ მიზანიშ მენჭირნაფა ხოლო ხანდას დო დროს ითხინს. თი ფაქტ, ნამდა დუდის ვა დვანთ დო ირნერო ოცადუთ მიზანიშ მენჭირნაფას, ოძირანს, ნამდა იეჰოვაწკუმა ურთიერთობა თქვანო ძვირფას რე დო გოკონა, არძაშ უჯგუშ აკეთათ თიშო. დღას ვაგგოჭყორდან, იეჰოვა აფასენს თქვან მონდომას. მუშო ოკო რაგად, თინა თქვანდე თიშე უმოსის ველჷ, ვინემ შეილებნა (ფსალმ. 103:14; მიქ. 6:8). თაშ ნამდა, დესახით რეალურ მიზან. მორთ გუვარჩუათ მუსხირენ რჩევა, მუთ მიგეხვარებნა თიშ მენჭირნაფას.

ᲫᲐᲚᲘᲔᲠ ᲡᲣᲠᲕᲘᲚ ᲛᲜᲘᲨᲕᲜᲔᲚᲝᲕᲐᲜ ᲠᲔ ᲛᲘᲖᲐᲜᲘᲨ ᲛᲘᲝᲭᲘᲠᲜᲐᲤᲐᲚᲝ

3. მუშენ რე მნიშვნელოვან ძალიერ სურვილ?

³ სულიერ მიზნეფს ქიმვოჭირინუათინ მთავარ რე, მიღდან თეშ ძალიერ სურვილ. მუჟამსით პიროვნებას ძალიერ სურვილ უღჷ, თინა ირფელს ორთჷ დო ბრელს ხანდენს მიზანიშ მიოჭირნაფალო. ძალიერ სურვილ შემლებნა შევადარათ ბორიას, ნამუთ ოხვარ ნავს, ქიმერთას დანიშნულებაშ ადგილშა. მუჟამსით ბორია მანგარო უმბარს, ნავქ შილებე დანიშნულებაშ ადგილშა უმოს მალას ქიმერთას. თეშნერო, მუთ უმოს ძალიერ რე ჩქინ სურვილ, თით უმოსო რე შეიოლებერ, ქიმვოჭირინუათ ჩქინ მიზნეფს. სალვადორს მახორუ ართ ჯიმა, დავიდ იჩიებ: „მუჟამსით ძალიერ სურვილ გიღჷ, ქიმიოჭირინუე სქან მიზანს, ბრელს ხანდენქ თეშო დო მუთუნს ვარზენქ თიშ უფლებას, გეცილას თეშ კეთებას“. თაშ ნამდა, მუშ კეთება შეილებნა, ნამდა უმოსო გიღდან მიზანიშ მენჭირნაფაშ სურვილ?

4. მუშ გურშენ შემლებნა იბლოცათ? (ფილ. 2:13; ქოძირით სურათ).

⁴ ლოცვას ქოთხით ღორონთის, გაიმანგარან სურვილ. იეჰოვას მუშ წმინდა შურიშ ჭყოლოფათ შეულებ გაიმანგარან თიშ სურვილ, ნამდა მიოჭირინუათ თქვან მიზანს (წეკითხით ფილიპელეფიშ 2:13). მინშა შილებე მიზან ხვალე თიშ გურშენ დეფსახათ, ნამდა მარჩქილენა თენა თაშ ოკო რდას, მუთ შუროთ ვა რე გლახა, მარა შილებე იშენდოიშენ სურვილ ვა მიღდან, ქიმვოჭირინუათ თის. ზუსტას თაშ მოხვად ართ უგანდელ დაშ, ნორინაშ შემთხვევას ხოლო. თის მიზანო უღუდ, ქიდიჭყუკო ბიბლიაშ გურაფა, მარა მოტივაცია ორკუდ, მუშენდა ფიქრენდჷ, ნამდა ჯგირ მასწავლებერ ვა რდჷ. ნორინა იჩიებ, მუქ მეხვარ თის: „იეჰოვას ირ დღას ფთხინდჷ ლოცვას, გამიმანგარუკო თიშ სურვილ, ნამდა ქიმვოჭირნეკო ჩქიმ მიზანს დო ქიდიბჭყიკო ბიბლიაშ გურაფა. მუშო ოკო რაგად, ვოცადუდ, ლოცვაშ თანახმას იმოფქმედკო დო გუვაუჯგუშკო გურაფაშ უნარეფ. მუსხირენ თუთაშა ქობძირ, ნამდა გემემანგარ თიშ სურვილქ, ქიმვოჭირნეკო ჩქიმ მიზანს. შედეგო, თიმ წანას ჟირ ბიბლიაშ გურაფა ქიდიბჭყჷ“.

5. მუშე შემლებნა იფიფქრათ, ნამდა უმოსო გემემანგარან მიზანიშ მენჭირნაფაშ სურვილქ?

⁵ იფიქრით თი ირფელშე, მუთ იეჰოვაქ თქვანო აკეთ (ფსალმ. 143:5). მოციქულ პავლე ხშირას ფიქრენდჷ, მუშმადიდა ჭყოლოფა გიმირჩქინ იეჰოვაქ თიშ მიმართ დო თენა ოხვარუდ, უღუდკო ძალიერ სურვილ, ნამდა დუდ ვადაზოგუკო დო უმოს გაკეთკო იეჰოვაშო (1 კორ. 15:9, 10; 1 ტიმ. 1:12—14). თაშ რე ჩქინ შემთხვევას ხოლო. მუთ უმოსის ფიფქრენთ თიშე, მუ აკეთ იეჰოვაქ ჩქინო, თით უმოსო მემანგარებნა სურვილ, ქიმვოჭირინუათ ჩქინ მიზნეფს (ფსალმ. 116:12). გუვარჩუათ, მუქ მეხვარ ჰონდურასის მახორუ დას, ქიმიოჭირინუკო მუშ მიზანს დო დიჭყუკო სრულ დროთ პიონერობა. თინა იჩიებ: „ხშირას ფიფქრენდჷ, მუჭო ვუჸორქ იეჰოვას. თიქ მუშ ხალხშა მომიჸონ, ფთხილანს დო ზრუნენს ჩქიმდე. თე ირფელიშ შედეგო, გემემანგარ იეჰოვაშ მიმართ ჸოროფაქ დო თიშ სურვილქ ხოლო, ნამდა ბრელ იფხანდკო დო ქიმვოჭირნეკო ჩქიმ მიზანს“.

6. ხოლო მუ მიმეხვარებნა სურვილიშ გამანგარებას?

⁶ დეფიქრით, მუ კურთხევეფ მაჸუნუ თქვან მიზანიშ მენჭირნაფას. ქიდეკვირით, მუქ მეხვარ სტატიაშ დაჭყაფუს მოშინაფილ ერიკას, ქიმიოჭირინუკო მუშ მიზანს დო უმოს ადრე ქიმერთკო სამქადაგებლო შეხვალამეფშა. თინა იჩიებ: „ქიმეფხვად, ნამდა სამქადაგებლო შეხვალამეფშა დაგვიანებათ ბრელ მუდგარენს ვოდინუანდჷ, მარა ადრე ქიმიფშ-და, ქუმმაჩამუდ შესაძლებლობა, ქიფჩიკო და დო ჯიმალეფწკუმა დო დრო გეგმურთიკო თინეფს. თეს გეძინელ, ქიმიფრჩქილუანდჷ პრაქტიკულ რჩევეფს, მუთ მიმეხვარებუდ, მიღუდკო ხიოლ მსახურებას დო გუვაუჯგუშკო ქადაგებაშ უნარეფ“. ერიკას შეიალებუ მუშ მიზანიშ მენჭირნაფაქ, მუშენდა ყურადღება თი ჯგირ შედეგეფშა გეგნიღ, მუთ თე მიზანიშ მენჭირნაფას მაჸუნუდ. თქვა მუშე შეილებნა დეფიქრათ? მაგალთო, თქვან მიზან ბიბლიაშ კითხირიშ ვარდა ლოცვაშ გაუჯგუშება ქორენ-და, დეფიქრით, მუჭო გამანგარენს თე მიზანიშ მენჭირნაფა იეჰოვაწკუმა თქვან ურთიერთობას (ფსალმ. 145:18, 19). ვარდა თქვან მიზან ნამდგაინ ქრისტიანულ თვისებაშ გავითარება ქორენ-და, დეფიქრით, მუ ჯგირო იმოქმედენს თენა შხვეფწკუმა თქვან ურთიერთობაშა (კოლ. 3:14). ჯგირ იჸუაფ, გეგმოჭარათ თიშ მიზეზეფ, მუშენ გოკონა მიოჭირინუათ თქვან მიზანს დო უკულ ირიათო გეგნაჯინათ თის. ჟიშე მოშინაფილ ტომაშ იჩიებ: „მუჟამსით მიზანიშ მიონიჭრნაფალო ქიანაშ მიზეზ მიღჷ, უმოს მონდომებულ ვორექ დო ბრელს ფხანდენქ, თეშო“.

7. მუქ მეხვარ ართ წყვილს, ქიმიოჭირინუესკო მუნეფიშ მიზანს?

⁷ გიღდან თინეფწკუმა ურთიერთობა, მით გაიმანგარენა სურვილს, მიოჭირინუათ თქვან მიზანს (იგავ. 13:20). ქიდეკვირით, მუქ მეხვარ ართ ჩილ დო ქომონჯის, ქიმიოჭირინუესკო მუნეფიშ მიზანს დო გაფართოვესკო მსახურება. ქომონჯ იჩიებ: „ჩქი თიცალ მეგობრეფ პჸუნდეს, მით ირნერო მოხვარდეს, ქიმვოჭირინეთკო ჩქინ მიზანს. ჩქინ მიზანიშ გურშენ ხშირას იფჩიებუდით თინეფწკუმა. თინეფშე ბრელს უკვე მენჭირნაფილ აფუდ თეცალ მიზნეფშა. ათეშენ, შეულებდეს პრაქტიკულ რჩევეფიშ მოჩამა. თეს გეძინელ, ჩქინ მეგობრეფ ხშირას მოკითხუდეს, მუჭო მიშჷ ჩქინ გეგმეფიშ ამბე დო მუჟამსით მოსაჭირდეს გურშა ელამკინანდეს“.

ᲛᲣᲟᲐᲛᲡᲘᲗ ᲫᲐᲚᲘᲔᲠ ᲡᲣᲠᲕᲘᲚ ᲕᲐ ᲛᲘᲦᲜᲐ

8. მუქ შილებე მოხვადას, მუჟამსით ხვალე თიმწკუმა იმჭუაფუთ მიზანშა, მუჟამსით თეშ სურვილ მიღნა? (ქოძირით სურათ).

⁸ მინშა შილებე ვა მიღდან თიშ ძალიერ სურვილ, ნამდა ქიმვოჭირინუათ ჩქინ მიზანს. ნიშნენსო თენა თის, ნამდა მუთუნ ვა მაკეთებენა მიზანიშ მიოჭირნაფალო? მუშო ოკო რაგად, ვარ. მორთ დუვართათ სტატიაშ დაჭყაფუს მოშინაფილ ნავიშ მაგალითის. მუჭოთ მიფშინეთ, ნავქ დანიშნულებაშ ადგილშა ქიმერთასინ, ბორია ოკო უმბარდას. მარა მუშო ოკო რაგად, თინა ირო ართნერო ვეჸუაფ — მინშა შილებე მანგარ ძალიერ რდას დო მინშა შურო ვაუმბარდას. ნიშნენსო თენა თის, ნამდა მეზღვაურ ართ დიხას იჸუაფ გაჩერებულ დო ადგილშე ვა დაქანცე? მუშო ოკო რაგად, ვარ. მაგალთო, ნამთინე ნავს მატორ უღჷ, ნამთინეს — ნიჩაბეფ, მუდგაშ საშვალებათ მეზღვაურს შეულებ ქიმიოჭირინუას დანიშნულებაშ ადგილშა. ბორიაცალო ჩქინ მიზანიშ მენჭირნაფაშ სურვილ ართ დღას შილებე მანგარ ძალიერ რდას, მარა მაჟია დღას შურო ვა მიღდან. მიზანიშ მენჭირნაფას ხვალე ძალიერ სურვილ მიღნან თიმწკუმა ქივეცადებუთ-და, დღას ვემმაჭირინენა თიშა. მუჭოთ მეზღვაურ ირინუანს შხვადოშხვა საშვალებას, ნამდა ქიმიოჭირინუას დანიშნულებაშ ადგილშა, თეშნერო, ჩქი ხოლო ირფელ ოკო გუვაკეთათ მიზანიშ მიოჭირნაფალო, თიმწკუმა ხოლო, მუჟამსით შილებე თეშ სურვილ ვა მიღდან. მართალ რე, თეშ კეთება თვითდისციპლინას ითხინს, მარა თი შედეგეფ, ნამუთ თეს მოჸუნს, მონდომაშა ღირჷ. ონდო გუვარჩიენდათ, მუშ კეთება შემლებნა, თიშახ ქუპასუხათ ართ კითხვას.

9. ოკო იმჭუათო მიზანშა, თიმწკუმა ხოლო, მუჟამსით თეშ სურვილ ვა მიღნა? გენწყით.

⁹ იეჰოვას ოკო, ხიოლით ვემსახურათ დო ვართ ხოლო ნანძალუო (ფსალმ. 100:2; 2 კორ. 9:7). თაშ ნამდა, სურვილ ვამღუნან-და, იშენით ოკო იმჭუათო მიზანშა? მორთ გუვარჩუათ პავლე მოციქულიშ მაგალით. თიქ თქუ: „ვასაჯენქ დო მონათ გინვოშქვანქ ჩქიმ სხეულს“ (1 კორ. 9:25—27). პავლე მოციქულ ანძალენდჷ მუშ დუდის, გაკეთკო თინა, მუდგას იეჰოვა ითხინდჷ თიშე, თიმწკუმა ხოლო, მუჟამსით თეშ სურვილ ვა უღუდ. იწონუანდუო იეჰოვა თეს? მუშო ოკო რაგად, ქო. თიქ დაჯილდოვ პავლე მუშ მონდომაშენ (2 ტიმ. 4:7, 8).

10. მუ ჯგირობუას ბღებულენთ, მუჟამსით ვორთუთ თის, მუდგაშ კეთებაშ სურვილ იშენდოიშენ ვა მიღნა?

¹⁰ იეჰოვას ოხიოლ, მუჟამსით ორწყე, მუჭო ვოცადუთ თიცალ მუდგარენიშ კეთებას, მუდგაშ სურვილ იშენდოიშენ ვა მიღნა. მუშენდა ჯგირო უჩქჷ, მუდგარენ საქმეს ირიათო თიშ კეთებაშ სურვილით ვარინ, იეჰოვაშ ჸოროფათ ვორთუთ. იეჰოვა აუცილებერო აკურთხენს ჩქინ მონდომას, მუჭოთ თენა პავლეშ შემთხვევას აკეთ (ფსალმ. 126:5). მუჟამსით თეს ჩქინ დუდშა გეგმოფცადუნთ, უმოსო მაღვენუნა თიშ სურვილ, გუვაკეთათ თიცალ მუდგარენ, მუდგაშ კეთება კონკრეტულ მომენტის შილებე ვა მოსიამოვნუდან. პოლონეთის მახორუ ართ და, ლუცინა იჩიებ: „მინშა შურო ვა მოკო, მსახურებაშა იბდე, განსაკუთრებულო თიმწკუმა, მუჟამსით მანგარ შულადირ ვორექ. მარა ხიოლ, ნამდგას მსახურებაშ უკულ ბგინაფლენქ, მართალო ძღვინ რე იეჰოვაშე“. მორთ ასე ქობძირათ, მუშ კეთება შემლებნა, მუჟამსით ძალიერ სურვილ ვა მიღნა.

11. მუჭო შეულებ იეჰოვას მიმეხვარან, უმოსო გიმიფრჩქინათ დუდშეკება?

¹¹ ლოცვას ქოთხით ღორონთის, ქიმგეხვარან დუდშეკებაშ გიმორჩქინას. დუდშეკება რე გრძნობეფიშ დო მოქმედებეფიშ კონტროლიშ უნარ. მუჟამსით მარჩქილენა სიტყვა დუდშეკება, ხშირ შემთხვევას აზრშა მუმალენა, მუდგარენ გლახაშე დუდიშ არიდება. მარა, თე თვისება მოხვარნა ჯგირ მუდგარენეფიშ კეთებას ხოლო, განსაკუთრებულო თიმწკუმა, მუჟამსით თეშ კეთება ირო ვა მაფნა ადვილ ვარდა ვა მოსიამოვნუნა. დუდშეკება წმინდა შურიშ ნაყოფ რე, ათეშენ იეჰოვას ოკო ქოფთხუათ წმინდა შურ, ნამდა ქიმმეხვარან, უმოსო გიმიფრჩქინათ თე მნიშვნელოვან თვისება (ლუკ. 11:13; გალ. 5:22, 23). სტატიაშ დაჭყაფუს მოშინაფილ დავიდის ოკოდ, რეგულარულო ჩატარკო ბიბლიაშ პირად გურაფა. თინა ენწყუნს, მუჭო მეხვარ ლოცვაქ თე მიზანიშ მენჭირნაფას: „იეჰოვას ფთხინდჷ, ქიმმეხვარკო დუდშეკებაშ გავითარებას. თიშ ჭყოლოფათ, მიღჷ პირად გურაფაშ ჯგირ განრიგ დო რეგულარულო ვატარენქ თის“.

12. მუჭო რე დაკავშირებულ ეკლესიასტეშ 11:4-ის ინოჭარილ პრინციპ სულიერ მიზნეფიშ მენჭირნაფაწკუმა?

¹² ვა უჯინათ იდეალურ პირობეფს. თე ქვეყნიერებას ირფელ იდეალურო დღას ვეჸუაფ, ათეშენ თეცალ დროს ქუჯინეთ-და, შილებე დღას ვემმაჭირინუან ჩქინ მიზანშა (წეკითხით ეკლესიასტეშ 11:4). ართ ჯიმა, დანიელ იჩიებ: „იდეალურ პირობეფ ვა არსებენს, ათეშენ ვა ღირჷ, უჯინე თეცალ დროს. უბრალოთ, ოკო გედირთე დო ქიდიჭყე მოქმედება“. ართ უგანდელ ჯიმა პოლ, მიშინუანს ხოლო ართ მიზეზის, მუდგაშ გურშენ ოკო ვეგნობდვათ საქმეშ დოჭყაფა. თინა იჩიებ: „მუჟამსით სირთულეეფიშ უმკუჯინუო მოქმედებას იბჭყანთ, იეჰოვას ვარზენთ საშვალებას, მაკურთხან“ (მალ. 3:10).

13. მუშენ რე ჯგირ ჭიჭე მიზნეფით დოჭყაფა?

¹³ ქიდიჭყით ჭიჭე მიზანით. შილებე ჩქინ მიზანიშ მენჭირნაფა რთულო მაძირედან, ათეშენ თიშ მენჭირნაფაშ სურვილ იშენდოიშენ ვა მიღდან. თქვან შემთხვევას ხოლო თაშ ქორენ-და, დუდშე შეილებნა უმოს ჭიჭე მიზნეფით ქიდიჭყათ. მაგალთო, მიზანო ნამდგაინ თვისებაშ გავითარება ქოიღნან-და, დუდშე შეილებნა ჭიჭე მუდგარენეფს გეგმირჩქინათ თინა. ვარდა თქვან მიზან ბიბლიაშ დუდშე ბოლოშა კითხირ ქორენ-და, დაჭყაფუს შეილებნა ირდღას ჭიჭე დრო გეგმურთათ თიშ კითხირს. ჟიშე მოშინაფილ ტომაშის გუჭირდჷ, ქიმიოჭირინუკო მუშ მიზანს, ნამდა ართ წანაშ დინახალე წეკითხკო ბიბლია. თინა იჩიებ: „ქიმეფხვად, ნამდა ჩქიმ მიზანიშ მიოჭირნაფალო რთულ შარა მაფუდ გიშაგორილ. ათეშენ გეგნობჭყვიდ, ხოლო ართშა ქოფცადიკო დო მიზანიშ მიოჭირნაფალო გეგმა დოფთირე. ირდღას ჭიჭე მონაკვეთის ბკითხულენდჷ დო თიშე ფიფქრენდჷ. შედეგო, ბიბლიაშ კითხირქ უმოს სასიამოვნოთ გინირთჷ ჩქიმო“. მუჟამსით ტომაშშო სასიამოვნოქ გინირთჷ ბიბლიაშ კითხირქ, თინა უმოს დროს გიმურთუნდჷ თე საქმეს დო საბოლათ, ქოთ შეიალებუ მთლიან ბიბლია წეკითხკო.c

ᲒᲣᲠ ᲕᲔᲒᲘᲢᲐᲮᲐᲗ, ᲛᲣᲟᲐᲛᲡᲘᲗ ᲛᲘᲖᲐᲜᲘᲨ ᲛᲔᲜᲭᲘᲠᲜᲐᲤᲐᲡ ᲛᲣᲓᲒᲐᲘᲜ ᲒᲔᲪᲘᲚᲔᲑᲜᲐ

14. მუქ შილებე მეცილან ჩქინ მიზანიშ მენჭირნაფას?

¹⁴ მუსხით ძალიერ სურვილ ვა მიღდან დო მუსხით დისციპლინირებულ ვა ვორდათინ, იჸუაფ მომენტეფ, მუჟამსით ვემმაჭირინენა ჩქინ მიზანშა. მაგალთო, შილებე თიცალ მუდგარენქ ქუმოხვადას, მუდგას ვეველდით, თექ დრო მიდამღან დო გენკმოჸოთან ჩქინ მიზანშე (ეკლ. 9:11). ვარდა შილებე სირთულეეფქ გურ გომტახან დო ძალეფ მიდამღან (იგავ. 24:10). არასრულყოფილებაქ ხოლო შილებე მეცილან ჩქინ მიზანიშ მენჭირნაფას (რომ. 7:23). ვარდა მინშა შილებე მანგარო გეგნოფშურდათ დო ათეშენ, გამჭირდან მიზანიშ მენჭირნაფაქ (მათ. 26:43). მუ მიმეხვარებნა, გივორჯგინათ თე ირფელს?

15. მიზანიშ მენჭირნაფას მუდგარენქ მეცილეს-და, ნიშნენსო თენა, ნამდა დღას ვემმაჭირინენა თიშა? გენწყით (ფსალმ. 145:14).

¹⁵ რშუდან, მიზანიშ მენჭირნაფას მუდგარენქ გეცილეს-და, თენა ვა ნიშნენს, ნამდა დღას ვემგაჭირინენა თიშა. ბიბლია მირაგადნა, ნამდა თე ქვეყნიერებას ირიათო შეფხვადუთ პრობლემეფს დო სირთულეეფს, მარა თიშა ხოლო მარწმუნენა, ნამდა იეჰოვაშ მოხვარათ შემალებენა გემწობდირთათ დო იმჭუათ ჩქინ მიზანშა (წეკითხით ფსალმუნიშ 145:14). თე სტატიას მოშინაფილ ფილიპ იჩიებ, მუ ოხვარ, მიოჭირინუას მუშ მიზანს: „ყურადღება თიშა ვეგნომიღ, მუსხიშა ვემმაჭირინუ ჩქიმ მიზანშა. თეშ მანგიორო, ირიათო თიშე ფიფქრენქ, მუსხიშა შემალებუ გემწობდირთკო დო გუვაგრძელკო დოჭყაფილ საქმე“. დავიდ ხოლო თეცალ მუდგარენს იჩიებ: „თი ირფელ, მუთ მიზანიშ მენჭირნაფას მოცილ, ჩქიმო დაბრკოლება ვარინ შესაძლებლობა რე, იეჰოვას ჸოროფა დუმტკიცე“. მუჟამსით სირთულეეფიშ უმკუჯინუო, გაგრძელენთ თქვან მიზანიშ მენჭირნაფას, თეშნერო ოძირანთ, ნამდა გოკონა გურ გუხარათ იეჰოვას. წერმიდგინით, მუნერ ბედნერ რე თინა, მუჟამსით ორწყე თქვან მონდომას, ნამდგას მიზანიშ მიონჭირნაფალო გიმირჩქინანთ.

16. მუშ გურაფა შემლებნა თიშე, მუდგაქ მეცილეს მიზანიშ მენჭირნაფას?

¹⁶ ქიდიგურეთ თი ირფელშე, მუდგაქ გეცილეს მიზანიშ მენჭირნაფას. დეფიქრით, მუ რდჷ თი სირთულეშ მიზეზ, მუდგაქ გეცილეს მიზანიშ მენჭირნაფას დო ქოკითხით თქვან დუდის: „მუშ კეთება შემლებ, ნამდა თექ კინ ვა მოხვადას?“ (იგავ. 27:12). მიზანშა ვემმაჭირინესინ თინა, მინშა აარგამენს, ნამდა თი მიზან, ნამდგაშათ იმჭუაფუდით ჩქინო არარეალურ ჸოფე. თქვან შემთხვევას ხოლო თაშ ქორენ-და, ხოლო ართშა გეგნაჯინით თქვან მიზანს, ქორენო თინა რეალურ დო ქიმგაჭირინენანო თიშა.d ვეფიქრათ, ნამდა იეჰოვაშ თოლს დამარცხებულ რეთ, მუჟამსით თი მიზანშა ვემგაჭირინეს, ნამუთ თქვანო არარეალურ რდჷ (2 კორ. 8:12).

17. მუშენ ოკო იფიფქრათ თიშე, მუდგას უკვე მივოჭირინეთ?

¹⁷ იფიქრით თიშე, მუდგას უკვე მიოჭირინეთ. ბიბლია იჩიებ: „ღორონთ უსამართლო ვა რე, ნამდა გიჭყოლიდუას . . . თქვან ხანდა“ (ებრ. 6:10). ათეშენ, თქვა ხოლო ვეგიჭყოლიდუათ თინა, მუდგას მიოჭირინეთ. დეფიქრით, თქვა შეგალებეს იეჰოვაწკუმა მეგობრულ ურთიერთობაშ გავითარებაქ, თიშ გურშენ შხვეფწკუმა ჩიებაქ დო ნათუაქ. რშუდან, მუჭოთ ულირს შეგალებეს თქვან სულიერ მიზნეფიშ მენჭირნაფაქ, თეშ ანწ ხოლო შეგალებენა თეშ კეთება (ფილ. 3:16).

18. მუ ოკო ფშუდან, მუჟამსით მიზანშა იმჭუაფუთ? (ქოძირით სურათ).

¹⁸ იეჰოვაშ მოხვარათ, თქვა ხოლო შეგალებენა მიოჭირინუათ მიზანს. მართალ რე, მეზღვაურს ოხიოლ დანიშნულებაშ ადგილშა მეულა, მარა თიშა მგზავრობას ხოლო მოუღ სიამოვნება. თეშნერო, ჩქინდა ხიოლ ხვალე მიზანიშ მენჭირნაფას ვარინ, თის ხოლო მოუღ, მუჭო მოხვარნა დო მაკურთხენა იეჰოვა ონდო თე მიზანშა იმჭუაფუთ (2 კორ. 4:7). სულიერ მიზნეფიშ მიოჭირნაფალო ირფელს გაკეთენთ-და, ხოლო უმოს კურთხევეფს მიღენთ (გალ. 6:9).