იეჰოვა მიგეხვარებ, მუჟამსით ველუქინ ფერ სირთულეეფს შეხვადუქ

1. მუშა ვორეთ დარწმუნებულ?

ᲩᲥᲘ, მუჭოთ იეჰოვაშ ხალხის ბჯერა, ნამდა თის მანგარო ვუჸორთ დო ჩქინო არძაშ უჯგუშ ოკო (რომ. 8:35—39). თეს გეძინელ, დარწმუნებულ ვორეთ, ბიბლიურ პრინციპეფიშ გიმორნაფას ირიათო ჯგირობუა მოუღ ჩქინდა (ეს. 48:17, 18). მარა მუ ოკო ვაკეთათ, მუჟამსით ვეველუდითინ ფერ სირთულეს შეფხვადუთ?

2. მუ სირთულეეფს შილებე შეფხვადათ დო მუ კითხვეფქ შილებე გომრჩქინდან?

² ვა არსებენს იეჰოვაშ თიცალ მსახურ, მიდგას პრობლემა ვა უღჷ, სირთულეეფს არძა ფხვადუთ. მაგალთო, შილებე ოჯახიშ წევრიქ ჩქინ იმენდ ვა გამართლას ვარდა სერიოზულო დებლახათ დო იეჰოვაშ მსახურებას ისხიქ ვა მაკეთებუან, მუზმათ მოკონა. თეს გეძინელ, შილებე სტიქიურ უბედრობეფიშ შედეგო დებზარალათ ვარდა რწმენაშ გურშენ თხოზინ ქუდომჭყან. მუჟამსით თე გიმოკოროცხილ სირთულეეფს ფხვადუთ, გასაკვირ ვა რე, თეცალ კითხვეფ მირჩქინდუდან: „მუშენ მოჭირ თენა იშენდოიშენ მა? მეფჩირთიო მუთუნს? ეგება იეჰოვაშე ვა მიღჷ კურთხევა?“. თეცალ კითხვეფ თქვა ხოლო დღას ქუნორღვენან-და, გურ ვეგიტახათ. იეჰოვაშ ბრელ ართგურ მსახურს ურჩქინდუდ თეცალ გრძნობეფ (ფსალმ. 22:1, 2; აბაკ. 1:2, 3).

3. მუს ბგებულენთ ფსალმუნიშ 34:19-შე?

³ წეკითხით ფსალმუნიშ 34:19. ყურადღება ქიმიაქცით, მუ ჟირ მნიშვნელოვან მხარე იძირე თე ფსალმუნშე: 1) მართალ ადამიანეფ სირთულეეფს ხვადუნა დო 2) იეჰოვა მირსხენა არძანერ ოწუხებელშე. მუჭო ორთჷ იეჰოვა თეს? ართ-ართ საშვალება თინა რე, ნამდა იეჰოვა მოხვარნა, თე ქვეყნიერებას ცხოვრებას, რეალურ თოლით ვუჯინათ. მართალ რე, ღორონთ მოპირნა, თიშ მსახურება ხიოლს მომღანა, მარა ვა მარზენა თიშ გარანტიას, ნამდა მუთუნნერ სირთულეს ვა შეფხვადუთ (ეს. 66:14). თინა ელამჩანა, ყურადღება მომავალშა გეგნიბღათ, მუჟამსით მაღვენუნა ულიებ, ბედნერ ცხოვრება, ზუსტას თიცალ, მუნერით იეჰოვას ოკო ჩქინო (2 კორ. 4:16—18). მარა, ონდო თე დრო დოდირთუდას, იეჰოვა ირდღას მოხვარნა, გივორჯგინათ სირთულეეფს დო გუვაგრძელათ თიშ მსახურება (გოდ. 3:22—24).

4. მუს გუვარჩიენთ თე სტატიას?

⁴ თე სტატიას გუვარჩიენთ, მუშ გურაფა შემლებნა, მუჭოთ ბიბლიურ, თეშ თანამედროვე დროს მახორუ ართგურ მსახურეფიშ მაგალითეფშე. თის ხოლო ქობძირუნთ, ნამდა შილებე შეფხვადათ ვეველუთინ ფერ პრობლემეფს, მარა იეჰოვას ქიმვენდებუთ-და, თინა დღას ვემმოტენა (ფსალმ. 55:22). იეჰოვაშ ართგურ მსახურეფიშ მაგალითეფიშ გარჩიებაშ დროს, ქოკითხით თქვან დუდის: „მა მუჭო მიფქციებუდ თეცალ სიტუაციას ქუვორდიკონ? მუჭო მიმანგარენს თინეფიშ მაგალითეფ იეჰოვაშ მიმართ ნდობას? მუჭო შემლებ ცხოვრებას თიშ გიმორნაფა, მუდგას თინეფიშ მაგალითეფშე ბგურაფლენქ?“.

ᲑᲘᲑᲚᲘᲣᲠ ᲓᲠᲝᲨ ᲛᲐᲒᲐᲚᲘᲗᲔᲤ

5. მუ სირთულეეფს შეხვად იაკობიქ ლაბანიშ გურშენ? (ქოძირით სურათ გალენ გვერდის).

⁵ ბიბლიურ დროს იეჰოვაშ მსახურეფ ხვადუდეს თიცალ სირთულეეფს ნამდგას ველდეს. გუვარჩუათ იაკობიშ შემთხვევა. თის მუამუშიქ უწუ, მიდართკო მუშ ბიძიაშა ლაბანშა, ნამუთ ღორონთიშ მსახურ რდჷ, დო თიშ ართ-ართ ცირასქუა ოსურო ქიმიჸონკო. თიშა ხოლო დარწმუნ, ნამდა თაშ ქიმიქციებუდ-და, ღორონთ აკურთხენდჷ თის (დაბ. 28:1—4). იაკობიქ ზუსტას თეშ მიქცუ, მუჭოთ მუამუშიქ უწუ, ქიდიტუ ქანაან დო მიდართჷ თი ადგილშა, სოდეთ ლაბან დო თიშ ჟირ ცირასქუა — ლეა დო რახელ ოხორანდეს. იაკობის, უკლაშ ცირასქუაქ, რახელქ ქეჸოროფ დო ლაბანს უწუ, ნამდა თიშ გურშენ შქვით წანას ემსახურებუდ თის (დაბ. 29:18). მარა ირფელქ შუროთ ვა მოხვად თეშ, მუჭოთ იაკობ ელუდ. ლაბანქ დაღორ თინა დო რახელიშ მანგიორო, უნჩაშ ცირასქუა, ლეა ქიმიათხუ დო უწუ, ნამდა ხოლო შქვით წანას ქემსახურებუდ-და, ართ მარაშა რახელს ხოლო ქიმიათხინდჷ (დაბ. 29:25—27). ხვალე თენა ვარინ, ლაბან საქმიან ურთიერთობაშ დროს ხოლო უპატიოსნოთ იქციებუდ იაკობწკუმა. ირფელ ართო გაკობძინათინ, იაკობის ლაბანშა უსამართლოთ 20 წანას აჸუ ომსახურებელქ (დაბ. 31:41, 42).

6. ხოლო მუ სირთულეეფს შეხვად იაკობიქ?

⁶ იაკობიქ შხვა სირთულეეფს ხოლო ქეშეხვად. თის ბრელ სქუა ჸუნდჷ, მარა თიშ ქომოლსქუალეფს იშენდოიშენ ჯგირ ურთიერთობა ვა უღდეს ართ მაჟია შქას. წერმიდგინით, თინეფქ მუნეფიშ უკლაშ ჯიმა, იოსებ მონათ გეგმოჩეს. ხვალე თენა ვარინ, იაკობიშ ჟირ ქომოლსქუაქ, სიმონქ დო ლევიქ, ონჯღორე ქაძირეს ოჯახის დო შეურაცხყოფა მიორინეს იეჰოვაშ სახელს. თეს გეძინელ, იაკობიშ საჸოროფო ოსურქ, რახელქ მაჟია ბაღანაშ მშობიარობაშ დროს დოღურ. თე ირფელ დასაბაღ ვარდუკონ თეშ, მუჟამსით უკვე ხანშამიშულირ რდჷ, შქირენაშ გურშენ იაკობის მუშ ქიანაქ აჸუ დატებელქ დო ეგვიპტეშა იდჷ (დაბ. 34:30; 35:16—19; 37:28; 45:9—11, 28).

7. მუჭო ოძირუ იეჰოვაქ, ნამდა ჭყოლოფას გიმირჩქინანდჷ იაკობიშ მიმართ?

⁷ მართალ რე, იაკობის ქიანაშ პრობლემა უღუდ, მარა იეჰოვაშ დო თიშ დუნაპირებუეფიშ მიმართ რწმენა დღას ვა უდინუაფ. იეჰოვაქ ხოლო ბრელშა ოძირუ, ნამდა ჭყოლოფას ვარკენდჷ თის. მაგალთო, თიშ უმკუჯინუო, ნამდა ლაბან ირიათო უსამართლოთ ოქცუდ, იეჰოვაშ ჭყოლოფათ იაკობიქ მანგარ ქონებიერო გინირთჷ. ხვალე თენა ვარინ, ართ წუთის წერმიდგინით, მუნერ მარდულ იჸუაფუდ თინა იეჰოვაშ, მუჟამსით მუშ სქუას, იოსების, ნამუთ წანეფიშ დინახალე ღურელ მიორჩქუდ, ქოძირუნდჷ დო გურშა ქიხუტოლუანდჷ. თე ართგურ მსახურს, ხოლოშიან ურთიერთობა უღუდ ღორონთწკუმა, მუთ არზენდჷ ძალას, გიორჯგინკო სირთულეეფს (დაბ. 30:43; 32:9, 10; 46:28—30). მუჟამსით იაკობცალო ჩქი ხოლო ხოლოშიან ურთიერთობას გუვავითარენთ იეჰოვაწკუმა, შემალებენა გივორჯგინათ ნებისმიერ სირთულეს.

8. მუშ კეთებაშ სურვილ უღუდ მეფე დავითის?

⁸ გუვარჩუათ მეფე დავითიშ მაგალით ხოლო. თის იეჰოვაშ მსახურებას ბრელ მუდგარენიშ კეთებაშ სურვილ უღუდ, მარა მინშა სიტუაცია ითირუდ. მაგალთო, თის მთელ გურით ოკოდ, აშენკო ტაძარ იეჰოვაშო, მუდგაშ გურშენ წინასწარმეტყველ ნათანს ხოლო ქეჩუ. ნათანქ უწუ: „გაკეთ, მუთ გურით გოკო, მუშენდა სქანწკუმა რე ღორონთ!“ (1 მატ. 17:1, 2). წერმიდგინით, მუჭო ახიოლედ დავითის თე სიტყვეფიშ მორჩქილაფა. ალბათ ხეთეშე ქეშუდირთუდ თი ირფელიშ მომზადებას, მუთ ტაძარიშ ოშენებელო რდჷ საჭირო.

9. მუჭო მიქცუ დავითიქ, მუჟამსით ნათანშე ახალ ამბე გეგჷ?

⁹ თიმ სერს იეჰოვაქ წინასწარმეტყველ ნათანს უწუ, ნამდა ტაძარს დავითიშ მანგიორო, თიშ ქომოლსქუა, სოლომონ აშენენდჷ. თეშ უკულ ხეთეშე ნათანქ ქიმერთჷ დავითშა დო თე ამბე ქეჩუ, მუთ ალბათ, იშენდოიშენ სასიამოვნო მარჩქილაფარ ვეჸუაფუდ თიშო (1 მატ. 17:3, 4, 11, 12). მუ რეაქცია უღუდ დავითის იეჰოვაშ გადაწყვეტილებაშე? თიქ ქუდაჸუნ ღორონთიშ ნებას დო მთელ ყურადღება გეგნიღ ფარაშ დო თი საჭირო ნივთეფიშ შაყარუაშა, მუთ სოლომონს თე გრანდიოზულ საქმეშ შეიოსრულებერო დესაჭირებუდ (1 მატ. 29:1—5).

10. მუჭო აკურთხჷ იეჰოვაქ დავით?

¹⁰ თიშ უკულ ხეთეშე, მუთ დავითიქ გეგჷ, ნამდა ტაძარს სოლომონ აშენენდჷ, იეჰოვაქ თიწკუმა შეთანხმება დოდვჷ დო პირობა მეჩჷ, ნამდა თიშ ართ-ართ გამნარყ მარადიულო იმართველენდჷ (2 სამ. 7:16). წერმიდგინით, მუნერ ბედნერ იჸუაფ დავით, მუჟამსით ახალ ქვეყნიერებას ანთასწანიან მართველობაშ დროს ქიგეგენს, ნამდა იესო, ნამუთ ღორონთიშ სამეფოშ მეფე რე, თიშ გამნარყშე რდჷ! დავითიშ შემთხვევაშე ვორწყეთ, ნამდა შილებე იეჰოვაშ მსახურებას ირიათო ვა მაკეთებუან თიქ, მუთ მოკოდეს, მარა ღორონთის ჩქინო თიცალ კურთხევა აფდას კინოჩუალირ, ნამდგაშეთ დღას ვეფიფქრენდით.

11. მუ კურთხევეფ მიღეს პირველ საუკუნეშ ქრისტიანეფქ თიშ უმკუჯინუო, ნამდა გაურკვევლობას რდეს? (საქ. 6:7).

¹¹ პირველ საუკუნეშ ქრისტიანეფ ხოლო ხვადუდეს სირთულეეფს. მაგალთო, თინეფს შურ ოლდეს ღორონთიშ სამეფოშ მოულაშა, მარა ვა უჩქუდეს, მუჟამ მოხვადუდ თენა. ათეშენ, გაურკვევლობას რდეს (საქ. 1:6, 7). მუთ უმოს ბრელ ადგილს ქადაგენდეს, თით უმოსო ორწყედეს, ნამდა იეჰოვა კურთხევას ვარკენდჷ თინეფიშ მონდომას დო სახიოლო ამბე ირდიხას ივრცელებუდ (წეკითხით საქმეეფიშ 6:7).

12. მუს ორთუდეს პირველ საუკუნეშ ქრისტიანეფ, მუჟამსით მთელ ქიანას შქირენა რდჷ?

¹² პირველ საუკუნეშ ქრისტიანეფქ სირთულეშ წოხოლე ქიგედირთეს, მუჟამსით „მთელ ქიანას“ შქირენაქ იჸუ (საქ. 11:28). წერმიდგინით, მუნერ რთულ მდგომარეობას იჸუაფდეს თინეფ. მუშო ოკო რაგად, ოჯახიშ დუდეფ თიშე წუხენდესკონ იჸიდ, მუჭო ეიჯუმუესკო ოჯახ. თეს გეძინელ, თი ახალგაზრდეფ, მიდგას მსახურებაშ გაფართოებაშ სურვილ უღდეს, ალბათ ფიქრენდესკონ იჸიდ, ნამდა ასე თეშ დრო ვა რდჷ დო მუნეფიშ გეგმეფ ოკო გეგნოდვესკო. მუჭოდგა ვა რდუკონ, პირველ საუკუნეშ ქრისტიანეფქ ქუდუხუჯუეს თე სიტუაციას. თინეფ მუნეფიშ შესაძლებლობეფიშ მაქსიმუმს ორთუდეს — აგრძელენდეს ქადაგებას დო მუთ შეულებდეს, ირფელით ოხვარდეს იუდეას მახორუ და დო ჯიმალეფს (საქ. 11:29, 30).

13. მუ კურთხევეფ მიღეს პირველ საუკუნეს მახორუ ქრისტიანეფქ შქირენაშ დროს?

¹³ მუ კურთხევეფ მიღეს პირველ საუკუნეშ ქრისტიანეფქ შქირენაშ დროს? თი თანაქრისტიანეფქ, მიდგაქ და დო ჯიმალეფშე მოხვარა მიღეს, თე ირფელს იეჰოვაშ ხე ქოძირეს (მათ. 6:31—33). თინეფ, მუშო ოკო რაგად, უმოსო დეახლოებდეს თი და დო ჯიმალეფს, მიდგაქ გაჭირებაშ დროს ელუდირთეს. თი ქრისტიანეფ, მიდგაქ გაჭირებას რდესინ ფერ თანამორწმუნეეფს, მუთ უღდესინ თინა გუნაწილეს ვარდა შხვანერო მეხვარეს, მუნეფიშ დუდშე გეგმოცადეს თი ხიოლ, ნამუთ „შხვაშა ჯგირიშ კეთებას“ მოჸუნს (საქ. 20:35). იეჰოვაქ აკურთხჷ არძა თე ქრისტიანეფ, მუშენდა თინეფქ დუდ ვემუდვეს დო ქუდუხუჯუეს სიტუაციას.

14. მუ სირთულეს შეხვადეს პავლე დო ბარნაბაქ დო მუ რდჷ შედეგ? (საქ. 14:21 22).

¹⁴ პირველ საუკუნეშ ქრისტიანეფ ხშირას ხვადუდეს თხოზინს დო მინშა თენა ველდესინ თეშ ხვადუდ. ქიგიფშინათ მუქ მოხვად, მუჟამსით პავლე დო ბარნაბა ლისტრას ქადაგენდეს. თე ქალაქიშ მახორუეფქ თინეფს დუდშე ჯგირო დოხვადეს დო მსახურებას ხოლო ურჩქილედეს. მარა თე ხალხ პავლე დო ბარნაბაშ მოწინააღმდეგეეფქ ახნარეს დო მუჭოთ ბიბლიაშე ბგებულენთ, თინეფშე ნამთინექ „პავლეს ქუალეფ მოუნჭჷ დო ქალაქშე გეგშასერგელუ, მუშენდა ღურელ მიორჩქუდეს“ (საქ. 14:19). მარა თე ირფელიშ უმკუჯინუო პავლე დო ბარნაბაქ შხვადო გაგრძელეს ქადაგებაშ საქმე. მუქ მაჸუნ თეს შედეგო? თინეფქ „ბრელ გინართინეს მოწაფეთ“ დო მუნეფიშ სიტყვეფით დო საქმეეფით, გამანგარეს თანაქრისტიანეფ (წეკითხით საქმეეფიშ 14:21, 22). ბრელშო ჯგირ მაგალითიქ იჸუ თიქ, ნამდა პავლე დო ბარნაბაქ თხოზინიშ უმკუჯინუო ქადაგება ვემიოტუეს. შემლებნა დარწმუნებულ ვორდათ, იეჰოვა ჩქი ხოლო ვამმარკენა კურთხევეფს, მუჟამსით სირთულეეფიშ უმკუჯინუო გუვაგრძელენთ თიშ კეთებას, მუთ დუმავალეს.

ᲗᲐᲜᲐᲛᲔᲓᲠᲝᲕᲔ ᲓᲠᲝᲨ ᲛᲐᲒᲐᲚᲘᲗᲔᲤ

15. მუს ბგურაფლენთ ჯიმა მაკმილანიშ მაგალითშე?

¹⁵ 1914 წანაშახ ღორონთიშ ხალხის მიორჩქუდ, ნამდა მალას ზეციურ ჯილდოს მიღენდეს. თინეფ შქას რდჷ, ჯიმა ალექსანდრე მაკმილან. გუვარჩუათ თიშ შემთხვევა. თინა ზეციურ ჯილდოს მალას მიღენდუნ თიშა თიშმანწარას რდჷ დარწმუნებულ, ნამდა 1914 წანაშ სექტემბერს რაგადებულ მოხსენებას თეცალ სიტყვეფ თქუ: „ალბათ თენა ჩქიმ ბოლო მოხსენება რე“. მუშო ოკო რაგად, თენა მაკმილანიშ ბოლო მოხსენება ვა ჸოფე. უმოს გვიანო, თიქ თეცალ მუდგარენ ხოლო თქუ: „ჩქინდე ნამთინექ ალბათ იფჩქარით, მუჟამსით იფიფქრით, ზეცაშა მალას ეშურდითინ. მთავარ თინა რდჷ, ნამდა სრულაშო მიბღითკო მონაწილება, უფალიშ საქმეს.“ ჯიმა მაკმილან მართალო სრულას რდჷ დაკავებულ მსახურებათ დო გიმირჩქინანდჷ მონდომას. თეს გეძინელ, თინა გურშა ელუკინანდჷ თი და დო ჯიმალეფს, მით ნეიტრალიტეტიშ გურშენ ციხეს ხედეს. ჯიმა მაკმილან სიცოცხლეშ ბოლო წანეფს ხოლო ირიათო გილეშ კრებაშ შეხვალამეფშა დო ვაჩილითუანდჷ თინეფს. ონდო ზეციურ ჯილდოს მიღენდკო, გონივრულო ირინუანდჷ დროს, მუდგაშ შედეგო რწმენაქ გემანგარ. 1966 წანას ღურაშ წოხოლე თიქ თეცალ სიტყვეფ ჭარჷ: „ასე უმოს ძალიერ რწმენა მიღჷ ვინემ დღას ნობღვე.“ ჯიმა მაკმილანიშ თეცალ განწყობა მართალო ჯგირ მაგალით რე ჩქინო. განსაკუთრებულო თი დროს, მუჟამსით სირთულე თიშე უმოს მეტ ხანს იგრძელებ, ვინემ ველუდით (ებრ. 13:7).

16. მუ სირთულეს შეხვადეს ჯიმა ჰერბერტ დო თიშ მეუღლექ? (იაკ. 4:14).

¹⁶ ამდღა იეჰოვაშ ბრელ მსახურ შუროთ ველუნ თეშ შეხვადუ ჯამრთელობაშ პრობლემეფს. მაგალთო, ჯიმა ჰერბერტ ჯენინგზb მუშ ბიოგრაფიას იშინანს, მუნერ ბედნერეფ რდეს მუ დო მუშ ოსურ, მუჟამსით მისიონერეფო მსახურენდეს განას. მარა მუსხირენ ხანშა თის ემოციურ პრობლემეფქ ქუდაჭყჷ დო ბიპოლარულ აშლილობაშ დიაგნოზ გეუშქვეს. თიქ მუშ მდგომარეობაშ ეიოჭარალო იაკობიშ 4:14-ის ენოჭარილ სიტყვეფ გიმირინუ (წეკითხით) დო თქუ, ნამდა „მითინს ვა მიჩქნა მუ მოხვადუ ჭუმან“. ჯიმა ჰერბერტიქ თეცალ მუდგარენ ჭარჷ: „საჭირო რდჷ მა დო ჩქიმ ოსურქ სიტუაციას რეალურ თოლით ვუჯინითკო დო მიბღითკო თეშ, მუჭოთ რდჷ. ათეშენ, განა დო ჩქინ ხოლოშიან მეგობრეფ ქიდიბტეთ დო კანადაშა დიფრთით [ომკურნალებერო]“. იეჰოვაქ თე ჯიმას დო მუშ მეუღლეს მეხვარ გაგრძელესკო ართგურო მსახურება თი სირთულეშ უმკუჯინუო, მუდგას შეხვადეს.

17. მუჭო ელუკინ გურშა ჩქინ ნამთინე თანაქრისტიანს ჯიმა ჰერბერტიშ ბიოგრაფიაქ?

¹⁷ ჯიმა Ჰერბერტიშ ბიოგრაფიაქ, სოდეთ თიქ ალალას იჩუ მუშ ამბე, ბრელს ელუკინ გურშა. ართ და იჩიებ: „ჯიმა ჰერბერტიშ ბიოგრაფიაქ, მანგარო შეხუ ჩქიმ გურს. თაშ ნამთინ სტატიაშ კითხირს ვა უმოქმედებ ჩქიმდა. მუჟამსით წებკითხჷ, ნამდა თე ჯიმას მუშ ლახალაშ გურშენ მისიონერობაქ მიოტებელქ აჸუ, თექ მიმეხვარ, გაწონასწორებულ დამოკიდებულება მიღუდკო ჩქიმ სიტუაციაშ მიმართ“. ართ ჯიმა ხოლო თაშ გინაფლენს დუდის დო იჩიებ: „კრებას ვით წანას მსახურენდჷ უხუცესო, მარა ფსიქიკურ ლახალაშ გურშენ თე პასუხიშმგებლობაშე ვარიაქ მაჸუ ორაგადექ. მინშა თიცალ გლახათ ვორდჷ, მანგარო ვა მოსიამოვნუდ და დო ჯიმალეფიშ ბიოგრაფიეფიშ კითხირ. მარა თიშ კითხირქ, ნამდა ჯიმა ჰერბერტ მუშ ლახალაშ უმკუჯინუო დუდის ვა დვანდჷ, მანგარო იმოქმედ ჩქიმდა“. ჯიმა ჰერბერტიშ შემთხვევა გუმოშინანა, ნამდა მუჟამსით მოთვინებათ ვურზუთ ვეველუდითინ ფერ სირთულეეფს, თენა შხვეფს გურშა ელუკინანს. შილებე ცხოვრებას ირფელქ თეშ ვა მოხვადას, მუჭოთ მოკოდეს, მარა შემლებნა შხვეფშო რწმენაშ დო მოთვინებაშ ჯგირ მაგალით ვორდათ (1 პეტ. 5:9).

18. მუს ბგურაფლენთ ნიგერიელ ქომონჯღურელ ოსურიშ მაგალითშე? (ქოძირით სურათ).

¹⁸ კოვიდ-19 პანდემიაქ იეჰოვაშ ბრელ მსახურშა იმოქმედ. მაგალთო, ნიგერიას მახორუ ართ ქომონჯღურელ დას, თიმ პერიოდის მანგარო გუჭირდჷ. ართ ოჭმარეს თის მუშ ჭიჭე ძღაბიქ კითხჷ, მუ ოკო აკეთესკო, მუჟამსით ბოლო ჭირქა ბრინჯის გათენდეს, ნამუთ ხვალე ართ ჭკუმუას უბაღდეს. თე დაქ მუშ სქუას უწუ, ნამდა მართალ რე, ფარა ხოლო ვა უღდეს ოჭკუმალიშ ოჸიდეთ, მარა შეულებდეს მიაჸუნესკო სარეფთელ ქომონჯღურელ ოსურიშ მაგალითის — დოსქილადირ ბრინჯ მამზადესკო დო მიენდესკო იეჰოვას (1 მეფ. 17:8—16). ონდო ფიქრის თიშე დიჭყანდეს, ანწ მუ ოკო ჭკუმესკო, ზუსტას თიმ დღას, თანაქრისტიანეფქ ქიანაშ პროდუქტ ქიმუღეს, მუთ ჟირ მარაშე უმოს ხანს უბაღდეს. თე დაქ თქუ, ნამდა წარმოდგენილ ხოლო ვაფუდ, იეჰოვა თეცალ ყურადღებათ ურჩქილედ, მუჟამსით მუშ სქუას ურაგადუდ. მუშო ოკო რაგად, მუჟამსით იეჰოვას ბოლოშა ქიმვენდებუთ, სირთულეეფ, ნამდგას ცხოვრებას შეფხვადუთ უმოსო დუმაახლოვენა თიწკუმა (1 პეტ. 5:6, 7).

19. მუ განსაცდელს შეხვად ჯიმა ალექსეიქ?

¹⁹ ბოლო წანეფს შურო ველდესინ თეშ, ბრელ ჩქინ და დო ჯიმაქ შეხვად თხოზინს. გუვარჩუათ რუსეთის მახორუ ართ ჯიმაშ ალექსეი ერშოვიშ შემთხვევა. თიქ 1994 წანას ინათ. თიმ დროს იეჰოვაშ ხალხის რწმენაშ თავისუფლება უღუდ რუსეთის, მარა წანეფიშ უკულ თე ქიანას სიტუაციაქ დითირ. 2020 წანას ჯიმა ალექსეის ჸუდეშა პოლიციაქ გემნაკათ. ჩხრეკაშ უკულ თის ბრელ მუდგარენ გეგლაჭარეს. მუსხირენ თუთაშა სახელმწიფოქ ჯიმა ალექსეის ოფიციალურო ქიგედვჷ ბრალ თი ვიდეოჩანაწერიშ საფუძველშა, ნამუთ გინიღ ართ პიროვნებაქ, მით ართ წანაშე მეტ ხანს დაინტერესებულო ასაღენდჷ დუდის დო ბიბლიას გურაფლენდჷ. მუშმადიდა ღალატ რე!

20. მუჭო გემანგარ ჯიმა ალექსეიქ იეჰოვაწკუმა ურთიერთობა?

²⁰ მართალ რე, ჯიმა ალექსეიქ დიდ სირთულეეფს შეხვად, მარა კურთხევეფ ხოლო მიღჷ. იეჰოვაწკუმა თიშ ურთიერთობაქ უმოსო გემანგარ. თინა იჩიებ: „მა დო ჩქიმ ოსურ ასე უმოს ხშირას ბლოცულენთ ართო. ზუსტას მიჩქჷ, იეჰოვაშ მოხვარაშ უმშო ვაგმარზინე სირთულეეფშა. ბიბლიაშ პირად გურაფა მოხვარ, გივორჯგინე გურიშგოტახუას. თეს გეძინელ, ფიფქრენქ ულირს მახორუ იეჰოვაშ ართგურ მსახურეფიშ მაგალითეფშე. ბიბლიას ბრელ თიცალ შემთხვევა რე ინოჭარილ, ნამუთ ჯგირო ოძირანს, მუსხით მნიშვნელოვან რე, ვა ვოდინუათ სიმშვიდე დო მივენდათ იეჰოვას“.

21. მუ დიბგურეთ თე სტატიაშე?

²¹ მუ დიბგურეთ თე სტატიაშე? ცხოვრებას ბრელ თიცალ მუდგარენ მოხვადუ, მუდგას ვეველუდით, მარა იეჰოვას ქიმვენდებუთ-და, თინა ირიათო მიმეხვარებნა. მუჭოთ თე სტატიაშ მთავარ მუხლ იჩიებ: „ბრელ უბედრობა შეხვადუ მართალ კოჩის, მარა იეჰოვა ირფელშე ირსხენს თის“ (ფსალმ. 34:19). მორთ მთელ ყურადღება იეჰოვაშ მარსხებელ ძალაშა მაფდან გინოღალირ დო ვართ ხოლო ჩქინ სირთულეეფშა. თაშ ქიმიფქციებუთ-და, მოციქულ პავლეცალო ჩქი ხოლო მარაგადენა: „ირფელიშ კეთებაშ ძალა მიღჷ ჩქიმ გუმამანგარებელიშ მოხვარათ“ (ფილ. 4:13).