„კურცხას რდათ!“

1. მუ უწუ იესოქ მუშ მოწაფეეფს „აღსასრულწკუმა“ დაკავშირებით დო მუ გაფრთხილება მეჩჷ თინეფს?

ᲘᲔᲡᲝᲨ ღურაშახ მუსხირენ დღა რდჷ დოსქილადირ, მუჟამსით ოთხ მოწაფექ მერთჷ თიშა დო კითხჷ: „მუ იჸუაფ თიშ ნიშან, ნამდა ქვეყნიერებაშ ბოლოქ ქუდოდირთჷ?“ (მათ. 24:3). მუჭოთ იძირე, მოწაფეეფს ოინტერესდეს, მუჭო ოკო მეხვადესკო, მუჟამ დოდირთუდ იერუსალიმიშ დო ტაძარიშ მოსპუალაშ დრო. მუშ პასუხის, იესოქ მიშინუ ხვალე იერუსალიმიშ ვარინ თი ქვეყნიერებაშ განადგურება, ნამდგას ასე ფცხოვრენთ. თე დროშ მოულაწკუმა დაკავშირებით იესოქ თქუ: „მუმაშ მეტ მითინს ვა უჩქჷ, მუჟამ დოდირთუ თი დღა დო საათ, ვართ ანგელოზეფს ზეცას დო ვართ სქუას“. უკულ თიქ გაფრთხილ მუშ მოწაფეეფ დო უწუ „კურცხას რდათ“ (მარ. 13:32—37).

2. მუშენ რდჷ მნიშვნელოვან, ნამდა პირველ საუკუნეშ ქრისტიანეფ კურცხას ჸოფედესკო?

² პირველ საუკუნეშ იუდეველ ქრისტიანეფ კურცხას ოკო ჸოფედესკო, მუშენდა ზუსტას თეშა რდჷ დამოკიდებულ გინუსქიდუდეს დო ვარ განადგურებას. იესოქ მუშ მიმაჸუნალეფს უწუ, მუშა ოკო დუკვირებდესკო, ნამდა ქოძირესკო იერუსალიმიშ აღსასრულ მონჭაფილ რდუნ. თიქ უწუ: „მუჟამსით ქოძირუნთ, იერუსალიმს დაბანაკებულ ჯარ გოჸურდას იჸინ, გიჩქუდან, ნამდა თიშ აკოცუმა მონჭაფილ რე“. თეშ შესრულებას ქოძირუნდესინ, ოკო დემორჩილესკო იესოშ გაფრთხილებას, ნამდა ინტესკო გვალეფშა (ლუკ. 21:20, 21). მით თეს გაკეთენდჷ გინასქიდუდ, მუჟამსით რომაელეფ იერუსალიმს განადგურენდეს.

3. მუს გუვარჩიენთ თე სტატიას?

³ ამდღა თე უბადო ქვეყნიერებაშ ბოლო დღალეფს ფცხოვრენთ, ათეშენ, პირველ საუკუნეშ ქრისტიანეფცალო, ჩქი ხოლო მოსაჭირნა, ნამდა კურცხას ვორდათ. თე სტატიას გუვარჩიენთ, მუჭო შემლებნა მიღდან სწორ დამოკიდებულება, მუჟამსით ვორწყეთ თი მოვლენეფს, ნამუთ მსოფლიოს ხვადუ. თეს გეძინელ, ქობძირუნთ, მუჭო შემლებნა დევეკვირათ ჩქინ დუდის დო მუჭო გიმიბრინუათ გონივრულო აღსასრულშახ დოსქილადირ დრო.

ᲒᲘᲦᲓᲐᲜ ᲡᲬᲝᲠ ᲓᲐᲛᲝᲙᲘᲓᲔᲑᲣᲚᲔᲑᲐ ᲗᲘ ᲛᲝᲕᲚᲔᲜᲔᲤᲘᲨ ᲛᲘᲛᲐᲠᲗ, ᲜᲐᲛᲣᲗ ᲛᲡᲝᲤᲚᲘᲝᲡ ᲮᲕᲐᲓᲣ

4. მუშენ ოკო მოინტერესდან, მუჭო ისრულებ მსოფლიოს ხვადუნ თი მოვლენეფით ბიბლიურ წინასწარმეტყველებეფ?

⁴ ჩვეულებრივ მუდგარენ რე, მოინტერესდან, ამდღა მსოფლიოს ხვადუნ თი მოვლენეფით, მუჭო ისრულებ ბიბლიურ წინასწარმეტყველებეფ. იესოქ გიმოკოროცხჷ მუსხირენ კონკრეტულ მოვლენა, მუთ მიმოხვამლუანდეს, ნამდა სატანაშ ქვეყნიერებაშ აღსასრულ მონჭაფილ რე (მათ. 24:3—14). ხვალე თენა ვარინ, პეტრე მოციქულქ ხოლო ელამჩეს, დევეკვირითკო წინასწარმეტყველებეფიშ შესრულებას, მუთ ჩქინ რწმენას გამანგარენდჷ (2 პეტ. 1:19—21). ბიბლიაშ ბოლო წიგნ თეცალ სიტყვეფით იჭყაფუ: „იესო ქრისტეშ გამოცხადება, ნამუთ თიქ ღორონთშე მიღჷ, მუშენდა მუშ მონეფს გუცხადკო თინა, მუდგაქ მალას ოკო მოხვადას“ (გამოცხ. 1:1). ათეშენ, ვა რე გასაკვირ მოინტერესდან, მუჭო რე დაკავშირებულ ართიანწკუმა, მსოფლიოს ხვადუნ თი მოვლენეფ დო ბიბლიურ წინასწარმეტყველებეფიშ შესრულება, დო ვართ თინა რე გასაკვირ, მოკოდან ართიანწკუმა იფჩუათ თე მოვლენეფიშ გურშენ.

5. მუს ოკო ევუჩილითუათ დუდ დო მუშ კეთება იჸუაფ უჯგუშ? (ქოძირით სურათეფ).

⁵ მუჟამსით ბიბლიურ წინასწარმეტყველებეფიშ გურშენ იფჩიებუთ, დუდ ოკო ევუჩილითუათ დასკვნეფიშ ჩქინით გიშაღალას. მუშენდა ვამკონა, თიცალ მუდგარენ ქოფთქუათ, მუდგათ კრებაშ ართობას ვეცილებუთ. მაგალთო, მუჟამსით მარჩქილენა, პოლიტიკურ ლიდერეფ კონფლიქტეფიშ მოგვარებაშე დო მშვიდობა დო უსაფრთხოებაშე იჩიებნან, ვა მოკონა, ჩქინით გიშებღათ დასკვნა დო ფთქუათ, ნამდა თეთ 1 თესალონიკელეფიშ 5:3-ს ინოჭარილ სიტყვეფ ისრულებ. თეშ მანგიორო, უჯგუშ იჸუაფ, იფხემძღვანელათ თი უახალაშ ინფორმაციათ, ნამდგას იეჰოვაშ ორგანიზაციაშე ბღებულენთ. თეშნერო, მუჟამსით ბიბლიურ წინასწარმეტყველებეფშენ შხვეფწკუმა ჩქინ ჩიება პუბლიკაციეფშა იჸუაფ გერსხილ, ხეს შევუნწყუნთ, ნამდა კრებას არძას ართ აზრ მიღდან (1 კორ. 1:10; 4:6).

6. მუშ გურაფა შემლებნა 2 პეტრეშ 3:11—13-შე?

⁶ წეკითხით 2 პეტრეშ 3:11—13. მოციქულ პეტრე მოხვარნა, მიღდან გაწონასწორებულ დამოკიდებულება, მუჟამსით ბიბლიურ წინასწარმეტყველებეფშე შხვეფწკუმა იფჩიებუთ. თინა ელამჩანა, ირიათო ფშუდან „იეჰოვაშ დღა“, მარა თიშენ ვარ, ნამდა გეგშეფჩინათ არმაგედონიშ მოულაშ „დღა დო საათ“, თეშ გინაწონს, მოკონა, „იეჰოვაშ დღა“ ფშუდან თიშენ, ნამდა აღსასრულშახ დოსკილადირ დრო, გეგმიბრინუათ, ნამდა დეფცვათ სიწმინდე დო ღორონთიშ მოსაწონო მიფქცუათ (მათ. 24:36; ლუკ. 12:40). შხვა სიტყვეფით ქოფთქუათინ, მოკონა სწორას მიფქცუათ დო დებრწმუნათ, ნამდა ირფელს, მუდგას იეჰოვაშ მსახურებაშო ვორთუთ, თიშ ჸოროფათ ვორთუთ. თეშო საჭირო რე, ირიათო დევეკვირათ ჩქინ დუდის.

ᲛᲣᲡ ᲜᲘᲨᲜᲔᲜᲡ, ᲓᲔᲕᲔᲙᲕᲘᲠᲐᲗ ᲩᲥᲘᲜ ᲓᲣᲓᲘᲡ?

7. მუჭო ვოძირანთ, ნამდა ვოკვირუთ ჩქინ დუდის? (ლუკ. 21:34)

⁷ იესოქ მუშ მოწაფეეფს უწუ, ნამდა ხვალე მსოფლიო მოვლენეფს ვარინ, მუნეფიშ დუდის ხოლო დეკვირესკო. თენა არგამათ ირწყებე თი გაფრთხილებაშე, ნამუთ ლუკაშ 21:34-ის რე ინოჭარილ (წეკითხით). იესოქ თინეფს უწუ: „ქიდეკვირით თქვან დუდის“. მუშ დუდის ოკვირუნ თი პიროვნება ხეთეშე ორწყე ნებისმიერ საფრთხეს, მუდგაქ შილებე იეჰოვაწკუმა თიშ ურთიერთობას ეცილას დო ირფელს ორთჷ, ნამდა დუდ ეუჩილითუას თის. მუთ ოხვარ, ნამდა რდას „ღორონთიშ ჸოროფაშ ღირს“ (იგავ. 22:3; იუდ. 20, 21).

8. მუ ელუჩ პავლექ ქრისტიანეფს?

⁸ პავლე მოციქულქ ხოლო უწუ ქრისტიანეფს, ნამდა დეკვირესკო მუნეფიშ დუდის. თექ ქიძირ ეფესოელეფშა რაგადებულ სიტყვეფშე: „ჯგირო ქიდეკვირით, ნამდა თეშ ვეცხოვრათ, მუჭოთ უგუნურეფქ, იცხოვრით, მუჭოთ ბრძენეფქ“ (ეფეს. 5:15, 16). სატანა ირიათო ოცად, გილამლუან იეჰოვაწკუმა ურთიერთობა, ათეშენ ბიბლია ელამჩანა: ქინვანჭათ, „მუ რე იეჰოვაშ ნება“, ნამდა შემალებუან დუდ ევუჩილითუათ არძანერ საფრთხეს (ეფეს. 5:17).

9. მუჭო ინვანჭათ იეჰოვაშ ნებას?

⁹ ბიბლია ვამრაგადნა არძა საფრთხეშ გურშენ, მუდგაქ შილებე ეცილას იეჰოვაწკუმა ჩქინ ურთიერთობას. ჩქი ხშირას მიხვადუნა თიცალ გადაწყვეტილებეფიშ მეღება, ნამდგაშ გურშენ ბიბლია პირდაპირ მუთუნს ვეჩიებ. ათეშენ, გონივრულ გადაწყვეტილებეფ მიბღათინ, ოკო ქენვანჭათ, „მუ რე იეჰოვაშ ნება“. თენა შემალებენა ბიბლიაშ რეგულარულ გურაფათ დო თიშე დაფიქრებათ. მუთ უმოსო ვოცადუთ, ქენვანჭათ იეჰოვაშ ნებას დო გუვავითარათ თიცალ აზროვნება, მუნერით იესოს უღუდ, თით უმოსო შემალებენა მიფქცუათ, მუჭოთ ბრძენ პიროვნება, თიმწკუმა ხოლო, მუჟამსით კონკრეტულ წესეფ ვა მიღნა (1 კორ. 2:14—16). ნამთინე საფრთხეშ გიშაჩინება ადვილ რე, მარა მინშა თინა არგამათ ვეძირე.

10. ნამ რე თი ნამთინე საფრთხე, ნამდგას დუდ ოკო ევუჩილითუათ?

¹⁰ მუშო ოკო რაგად, ჩქი დუდ ოკო ევუჩილითუათ თიცალ საფრთხეეფს, მუნერით რე ფლირტ, გინოჸუნელ შუმა, უზომე ჭკუმუა, შხვეფშე გლახაშ ჩიება, თიცალ გართობა, სოდეთ ძალადობა რე, პორნოგრაფია დო შხვა თეცალ (ფსალმ. 101:3). მარა ყურადღებათ ვეპით-და, შილებე შურო ვეველუთინ თეშ სატანაქ ჩქინ გურს ქინათასას თიცალ თვისებეფ, მუნერით რე: მენჯარიშობა, უპატიოსნობა, ჰარამობა, ნტერალა, სიამაყე დო გურიშ მოულა (გალ. 5:19—21). ჩქინ ნტერ, სატანა, ირიათო ირნერ შესაძლებლობას ირინუანს, ნამდა გილამლუან იეჰოვაწკუმა ურთიერთობა (1 პეტ. 5:8). დუდშე შილებე ფიფქრენდათ, ნამდა თე თვისებეფს ჩქინდა ვა მარიებე, მარა თინეფიშ ჩათხინაფალო ხეთეშე ვემოფქმედით-და შილებე ჩქინ გურს თეშ მირდას, ნამდა უკულ მანგარო გამჭირდან თინეფიშ ჩათხინაფაქ (იაკ. 1:14, 15).

11. ნამ რე თი საფრთხე, ნამუთ არგამათ ვეძირე დო მუშენ ოკო ევუჩილითუათ დუდ?

¹¹ ართ-ართ არგამათ ვეძირენ ფერ საფრთხე გლახა საზოგადოება რე. ქიმიპჸონათ თეცალ მაგალით. წერმიდგინით, ნამდა რჸუნა თანამშრომელ, ნამუთ ვა რე იეჰოვაშ მოწმე. თქვა გოკონა, თე პიროვნებას ჯგირ წარმოდგენა უღდას იეჰოვაშ მოწმეეფშენ, ათეშენ მუდგარენეფს ოხვარუთ დო ჯგირო ოქცუთ. მინშა თიწკუმა ართო შესვენებას ოჭკუმალს ჭკუმუნთ. ჭიჭე ხანშა თე პიროვნებაწკუმა უმოს ხშირას ატარენთ დროს. მინშა თინა უზნეო მუდგარენეფშე იჩიებ, მუთ დუდშე ვა მორწონა, მარა დროშ მიკულაწკუმა ართო, თეცალ ჩიება თქვანო ჩვეულებრივ მუდგარენო გინირთუ დო მუთუნ პრობლემას ვარწყეთ. ართ დღასით, თქვან თანამშრომელ სამუშაშ უკულ ოშუმალშა გაპატიჟენა დო ვარიას ვა ურაგადუთ. საბოლათ, თქვა ხოლო თიცალ აზროვნება გევითარებნა, მუნერით თქვან თანამშრომელს უღჷ დო საქციელით ხოლო აგურუთ თის. მუშო ოკო რაგად, ჩქი არძას ჯგირო დო პატიცემათ ვოქცუთ, მარა ოკო ფშუდან, ნამდა ჩქინდა მანგარო მოქმედენა თინეფ, მიდგაწკუმა ურთიერთობას ბრელ დროს გიმურთუნთ (1 კორ. 15:33). ათეშენ საჭირო რე, მუჭოთ იესოქ ელამჩეს, ქიდვეკვირათ ჩქინ დუდის, ნამდა ვამღუდან თიცალ საზოგადოებაწკუმა ურთიერთობა, მით ვა ცხოვრენს იეჰოვაშ ნორმეფით (2 კორ. 6:15). თეშნერო შემალებენა ქობძირათ საფრთხე დო დუდ ევუჩილითუათ თის.

ᲒᲝᲜᲘᲕᲠᲣᲚᲝ ᲒᲔᲒᲛᲘᲠᲘᲜᲔᲗ ᲐᲦᲡᲐᲡᲠᲣᲚᲨᲐᲮ ᲓᲝᲡᲥᲘᲚᲐᲓᲘᲠ ᲓᲠᲝ

12. მუ ოკო აკეთან იესოშ მიმაჸუნალეფქ, ონდო თე ქვეყნიერებაშ აღსასრულ დოდირთუ?

¹² იესოს ვაკოდ, მუშ მოწაფეეფქ ხეჭკურელო გედირთესკო დო უჯინესკო, მუჟამ მიშჷ აღსასრულ. ათეშენ თინეფს დავალება ქიმეჩჷ. თიქ უწუ, ნამდა იქადაგესკო სახიოლო ამბე „იერუსალიმს, მთელ იუდეას, სამარიას დო დედამიწაშ არძა კუნთხუს“ (საქ. 1:6—8). იესოშ მიმაჸუნალეფს თე დავალებაშ შეიოსრულებერო ბრელ აჸიდეს ოხანდებელ. მარა მუჟამსით თე საქმეშო ირფელს გაკეთენდეს, შეიალებედეს არძაშ უჯგუშო გეგმირინუესკო მუნეფიშ დრო.

13. მუშენ ოკო გიმიბრინუათ დრო გონივრულო? (კოლ. 4:5)

¹³ წეკითხით კოლოსელეფიშ 4:5. ჩქინ დუდის ქიდვეკვირათინ, საჭირო რე ჯგირო დეფიფქრათ, მუჭო იბრინუანთ დროს. არძა ადამიანშა „დრო დო შემთხვევა მოქმედენს“ (ეკლ. 9:11). შილებე შურო ვეველუთინ თეშ სიცოცხლე ხოლო მივოდინუათ.

14, 15. მუჭო შემლებნა დროშ გონივრულო გიმორნაფა? (ებრ. 6:11, 12; ქოძირით სურათ).

¹⁴ ჩქი გონივრულო იბრინუანთ დროს, მუჟამსით იეჰოვაშ ნებას ვასრულენთ დო თიწკუმა მეგობრობას ვამანგარენთ (იოან. 14:21). საჭირო რე, მტკიცას, მანგარო ქიგებდირთათ დო ირო ბრელ იფხანდათ უფალშო (1 კორ. 15:58). თაშ მოქციებაშ შედეგო, მუჟამსით თე ქვეყნიერებაშ აღსასრულ ქუდოდირთუ ვარდა სიცოცხლეს მივოდინუანთ, გურს ვეფთაკილენთ, ნამდა იეჰოვაშო ხოლო უმოსის კეთება შემლებდეს (მათ. 24:13; რომ. 14:8).

¹⁵ იესო ამდღა ხოლო ხემძღვანელენს მუშ მიმაჸუნალეფს, ნამდა იქადაგან სამეფოშ გურშენ სახიოლო ამბე მთელ დედამიწას. თე დავალება შევასრულათინ, იესო მუშ მხარეშე ირფელს ორთჷ. მაგალთო, იეჰოვაშ ორგანიზაციაშ საშვალებათ, თინა მოგურუანა მუჭო იფქადაგათ დო მარზენა თი ირფელს მუთ თე საქმეშ შეიოსრულებერო მოსაჭირნა (მათ. 28:18—20). ჩქი ხოლო შემლებნა ჩქინ მხარეშე ირფელ გუვაკეთათ, ნამდა დუდ ვა დაბზოგათ შხვეფშა ქადაგებაშ დო გურაფაშ საქმეს, დო ვორდათ კურცხას, ონდო ველუთ თი დროს, მუჟამსით იეჰოვა განადგურენს თე ქვეყნიერებას. მუჟამსით მივაჸუნუთ ებრაელეფიშ 6:11, 12-ს (წეკითხით) ინოჭარილ რჩევას, აღსასრულიშ მონჭაფაშახ შემალებენა ვა ვოდინუათ ჩქინ იმენდ.

16. მუ ოკო მაფდან გინოჭყვიდილ?

¹⁶ იეჰოვას მერჩქინელ აფჷ დღა დო საათ სატანაშ სისტემაშ განადგურებელო. მუჟამსით თე დრო ქუდოდირთუ, იეჰოვა მუშ სიტყვას ენოჭარილ არძა წინასწარმეტყველებას შეასრულენს. შილებე თეშ მაძირუაფდან, ნამდა აღსასრულიშ მოულა იგვიანუანს, მარა არგამა რე, იეჰოვაშ დღა „ვედეგვიანუანს“ (აბაკ. 2:3). ათეშენ გინოჭყვიდილ მაფდან, კინ იეჰოვაჸურე მიღდან თოლ დო მოთვინებათ ქუჯინათ ჩქინ „რსხებაშ ღორონთის“ (მიქ. 7:7).