მუს მოგებაფუანა ბიბლია თიშ ავტორშენ?

1. მუშენ რეთ ბიბლიაშ მარდულეფ?

ᲛᲣᲨᲝ ოკო რაგად, მანგარ მარდულეფ ვორეთ იეჰოვაშ, ნამდა მუჩეს ბიბლია! თექ მოჩამილ პრაქტიკულ რჩევეფ მოხვარნა, გივორჯგინათ თი პრობლემეფს, ნამდგას ამდღა ფხვადუთ. თეს გეძინელ, ბიბლია მოგებაფუანა თი დიდებულ მომავალიშ გურშენ, ნამუთ მელნა. მუთ არძაშ უმოს მნიშვნელოვან რე, თე წიგნიშ საშვალებათ იეჰოვა მუშ დუდის მოჩინებაფუანა. ღორონთიშ ძვირფას თვისებეფშე დაფიქრება გინმოჭყვიდირაფუანა, დევეახლოვათ თის დო გინიფრთათ თიშ მეგობრეფო (ფსალმ. 25:14).

2. მუ საშვალებეფით ოჩინებაფუანდჷ იეჰოვა მუშ დუდის ადამიანეფს?

² იეჰოვას ოკო, ხალხიქ გეჩინებაფუას თინა, მუდგაშ გურშენ ჯვეშო სიზმარეფს, ხილუეფს დო ანგელოზეფს ირინუანდჷ (რიცხ. 12:6; საქ. 10:3, 4). თინეფ ბიბლიას ვენოჭარუდკონ, ალბათ ვართ დღას გებგენდით. მარა იეჰოვაქ ართგურ ქომოლკათას, მუშ სიტყვას ინაჭარაფუ თი ირფელ, მუთ ოკოდ, ნამდა ჩქი ხოლო გუმოგებაფესკო (იერ. 30:2). ჩქი მიჩქნა, ნამდა „სრულყოფილ რე ღორონთიშ შარა“, ათეშენ დარწმუნებულ ვორეთ, ნამდა თიწკუმა ურთიერთობა მიღდესკონ თიშო, არძაშ უჯგუშ შარა გიშეგორ, მუდგას ჯგირობუა მოუღ ჩქინდა (ფსალმ. 18:30).

3. მუ აკეთ იეჰოვაქ თიშო, ნამდა ბიბლიაქ ამდღარშახ ქუმაჭირინუკო? (ეს. 40:8)

³ წეკითხით ესაიაშ 40:8. ანთასობით წანაშ დინახალე, ღორონთიშ ართგურ მსახურეფ თიშ სიტყვას ინოჭარილ ბრძნულ ხემძღვანელობას მეჸუნდეს. მუჭო იჸუ თექ შეიოლებერქ თი ირფელიშ უკულ, მუთ წმინდა წერილეფქ, მალას გილმელებუდუნ ფერ მასალას იჭარ დო თიშ არძა ორიგინალქ ბრელ ხანიშ წოხოლე გენადგურ? იეჰოვაქ ქიზრუნ, ნამდა თი ხეშნაჭარეფიშ ასლეფქ ქიჸუკო კეთებულქ. მართალ რე, გინმაჭარალეფ არასრულყოფილეფ რდეს, მარა გინოჭარუაშ დროს სიფრთხილეს გიმირჩქინანდეს. თენა ჯგირო იძირე ართ მარკვიებელიშ სიტყვეფშე, ნამდგაქ ებრაულ წერილეფიშ გურშენ თეცალ მუდგარენ თქუ: „თამამას შილებე ირაგადუას, ნამდა თეცალ ზუსტას ნამთინ უჯვეშაშ ხეშ ნაჭარაშ ასლეფ ვა რე კეთებულ“. მართალ რე, წმინდა წერილეფიშ ჭარუაშე ქიანაშ დროქ მიკორთჷ, მალას გილმელებუდუნ ფერ მასალას ჭარუნდეს დო არასრულყოფილ ადამიანეფქ გინოჭარეს, მარა, თეშ უმკუჯინუო, შემლებნა ბჯერდან, ნამდა თი სიტყვეფს, ნამდგას ამდღა ბიბლიას ბკითხულენთ, თიშ ავტორიშ, იეჰოვაშ აზრეფ რე.

4. მუს გუვარჩიენთ თე სტატიას?

⁴ „არძანერ ჯგირ დო სრულყოფილ ძღვინ“ იეჰოვაშე რე (იაკ. 1:17). საჩუქარ ბრელ მუდგარენს მოგებაფუანა თი პიროვნებაშ გურშენ, მიდგაქ თინა მუჩეს. მაგალითო, მუსხით ჯგირო მიჩინენა დო ქუჩქუნ დო ვარ, მუ მოსაჭირნა. ზუსტას იგივეშ რაგად შემლებნა ბიბლიაშ გურშენ ხოლო. მუჟამსით იბრკვიენთ თის, ბრელ მუდგარენს ბგებულენთ თიშ მუმაჩამალიშ, იეჰოვაშ გურშენ. ვორწყეთ, ნამდა ჯგირო მიჩინენა დო არძაშ უჯგუშო უჩქჷ, მუ მოსაჭირნა. თე სტატიას გუვარჩიენთ, მუჭო ოძირანს ბიბლია იეჰოვაშ სუმ თვისებას: თიშ სიბრძნეს, სამართლიანობას დო ჸოროფას. მორთ დუდშე გუვარჩუათ, მუჭო იძირე ბიბლიაშე იეჰოვაშ სიბრძნე.

ᲑᲘᲑᲚᲘᲐ ᲝᲫᲘᲠᲐᲜᲡ ᲦᲝᲠᲝᲜᲗᲘᲨ ᲡᲘᲑᲠᲫᲜᲔᲡ

5. მუჭო ოძირანს ბიბლია ღორონთიშ სიბრძნეს?

⁵ იეჰოვას უჩქჷ, ნამდა მოსაჭირნა თიშ ბრძნულ რჩევეფ. ათეშენ, მუშ სიტყვა, ბიბლია, ეფშა რე თეცალ რჩევეფით. თინეფიშ გიმორნაფა დადებითო მოქმედენს ადამიანეფშა დო ბრელიშ ცხოვრება უჯგუშობაშა დოთირუ. მუჟამსით მოსე ბიბლიაშ პირველ წიგნეფს ჭარუნდჷ, ისრაელეფს თეცალ მუდგარენ უწუ: „თენა უბრალო სიტყვეფ ვა რე, თინა თქვან სიცოცხლეს ნიშნენს“ (კან. 32:47). თინეფ, მით წმინდა წერილეფს მოჩამილ ხემძღვანელობას მიაჸუნუდეს, ხეგომორძგვილ იჸუაფდეს დო ბედნერ ცხოვრება აღვენუდეს (ფსალმ. 1:2, 3). დროშ მიკულას ვაცილებუ ბიბლიაშა, თის ამდღა ხოლო უღჷ ძალა, უჯგუშობაშა დოთირუას ადამიანეფიშ ცხოვრება. მაგალთო, jw.org-ის მოჩამილ სტატიეფიშ სერიას „ბიბლია ხალხიშ ცხოვრებას თირანს“, შეილებნა ქოძირათ 50-შე უმოს ადამიანიშ შემთხვევა, მიდგაშ ცხოვრება ბიბლიაქ უჯგუშობაშა დოთირუ (1 თეს. 2:13).

6. მუშენ შემლებნა თიშ რაგად, ნამდა ბიბლიაშა ნამთინ წიგნის ვემიართე?

⁶ ბიბლიაშა შხვა ნამთინ წიგნის ვემიართე, მუშენდა თიშ ავტორ იეჰოვა რე, ირფელიშ შემალებე ღორონთ, ნამუთ მარადიულო რე დო ნამდგას არძაშე უმოს სიბრძნე უღჷ. ბრელ წიგნის ადამიანეფ თინეფიშ ავტორიშ ღურაშ უკულ ხოლო კითხულენა. მარა დროშ მიკულაწკუმა ართო, თექ მოჩამილ რჩევეფ გიმარნაფალო პრაქტიკულ ვა რე. თეშ გინაწონს, ბიბლიას მოჩამილ ბრძნულ პრინციპეფს ირიათო მოუღ ჯგირობუა, დროშ ნებისმიერ პერიოდის მახორუ ადამიანეფშო. მუჟამსით ბკითხულენთ თე წმინდა წიგნის დო ნაკითხირშე ფიფქრენთ, თიშ ავტორ მუშ დიდებულ წმინდა შურიშ ჭყოლოფათ მოხვარნა, ქინვანჭათ, მუჭო შემლებნა ბიბლიურ პრინციპეფიშ ცხოვრებას გიმორნაფა (ფსალმ. 119:27; მალ. 3:16; ებრ. 4:12). ბიბლიაშ ავტორ, ნამუთ მარადიულ რე, მზათ რე მიგეხვარან. თეშ რჩქინა გინმოჭყვიდრაფუანა, რეგულარულო იბკითხათ ბიბლია.

7. მუჭო უნწყუნდჷ ხეს ბიბლია ღორონთიშ ხალხიშ ართობას ულირს?

⁷ ბიბლიაშე ღორონთიშ სიბრძნე თით ხოლო იძირე, ნამდა თინა ოხვარ ხალხის, უღდან ართობა. მაგალთო, მუჟამსით ისრაელეფქ აღთქმულ დიხაშა გენორთეს, თინეფქ შხვადოშხვა ადგილს ქიდიხორეს. ნამთინე მეჩხომე რდჷ, ნამთინეს ორინჯ ჸუნდჷ დო ნამთინე დიხას ამუშენდჷ. ათეშენ, შხვადოშხვა დიხას მახორუ ისრაელეფქ, შილებედ ართიანიშ მოკითხირ დო ართმაჟიაწკუმა ურთიერთობა მიოტუესკო. მარა იეჰოვაქ ირფელ თეშ მანწყუ, ნამდა ისრაელეფქ კანკალეშა ართო გეკიშაყარესკო, ნამდა ქიმირჩქილუესკო დო გარჩუესკო ღორონთიშ სიტყვა (კან. 31:10—13; ნეემ. 8:2, 8, 18). წერმიდგინით, მუშმადიდა ხიოლს იგინანდეს იერუსალიმშა ენულირ ართგურ ისრაელეფ, მუჟამსით შხვადოშხვა კუნთხუშე მოულირ მილიონობით თანაქრისტიანს ქოძირუნდეს. თეცალ მოქმედებათ იეჰოვაქ მუშ ხალხიშ ართობას შეუნწყუ ხე. უმოს გვიანო, მუჟამსით ქრისტიანულ კრებაქ ჩემეყალიბ, თექ გეკიშაყარ შხვადოშხვა ნინაშა მორაგადე ხალხიქ, მიდგას განსხვავებულ სოციალურ დო ეკონომიკურ მდგომარეობა უღუდ. თინეფს უჸორდეს წმინდა წერილეფ, ათეშენ გაერთიანებულო ცენდეს თაყვანს ღორონთის. თინეფს, მით დეინტერესებდეს ჭეშმარიტებათ, თანაქრისტიანეფიშ მოხვარაშ დო თინეფწკუმა აკოშაყარუაშ უმშო ვეშიალებედეს, ქინანჭესკო წმინდა წერილეფს (საქ. 2:42; 8:30, 31).

8. მუჭო ოხვარ ბიბლია ღორონთიშ ხალხის, უღდან ართობა?

⁸ ჩქინ ბრძენ ღორონთ, ამდღა ხოლო, მუშ სიტყვაშ საშვალებათ მოგურუანა დო მოხვარნა, მიღდან ართობა. ჩქი ზუსტას ბიბლიაშე ბღებულენთ სულიერ საზრდოს. თეს გეძინელ, რეგულარულო აკიფშაყარუთ კრებაშ შეხვალამეფს დო კონგრესეფს, ნამდა წებკითხათ, გემნწყათ დო გუვარჩუათ წმინდა წერილეფ. ბიბლიას მნიშვნელოვან როლ უღჷ ღორონთიშ განზრახვაშ შესრულებას, ნამდა თიშ ხალხიქ „გაერთიანებულო ემსახურან თის“ (სოფ. 3:9).

9. ნამ თვისება მოსაჭირნა, ნამდა ქინვანჭათ ბიბლიას? (ლუკ. 10:21)

⁹ გუვარჩუათ ხოლო სოვრეშე იძირე იეჰოვაშ სიბრძნე. თიქ წმინდა წერილეფს ბრელ თიცალ აზრჷ ინაჭარაფუ, ნამდგაშ ინონჭაფა ხვალე თანდაბლეფს შეულებნა (წეკითხით ლუკაშ 10:21). ამდღა ადამიანეფ ბიბლიას მთელ მსოფლიოს კითხულენა. ართ მარკვიებელქ თე ძვირფას წიგნიშ გურშენ, თეცალ მუდგარენ თქუ: „შხვა ნამთინ წიგნის ვა კითხულენს თესხი ადამიან დო თეცალ ყურადღებათ, მუჭოთ ბიბლიას“. მარა ხვალე თანდაბალ ადამიან ინანჭუ დო ირინუანს ცხოვრებას თის, მუდგას ბიბლიაშე გურაფლენს (2 კორ. 3:15, 16).

10. ხოლო მუჭო ოძირანს ბიბლია ღორონთიშ სიბრძნეს?

¹⁰ ბიბლიაშ საშვალებათ იეჰოვა მუშ ხალხის ხვალე მუჭოთ ჯგუფის ვარინ, თითოულს ინდივიდუალურო ოგურუანს დო გურშა ელუკინანს. თავრეშე ხოლო იძირე ღორონთიშ დიდ სიბრძნე. ბიბლიაშ კითხირიშ დროს ბგინაფლენთ, ნამდა იეჰოვა დაინტერესებულ რე პირადო ჩქინით (ეს. 30:21). ქუნორღვენანო თიცალ შემთხვევა, მუჟამსით პრობლემა გიღდეს დო წაიკითხირნა თიცალ ბიბლიურ მუხლ, ნამუთ თქვან სიტუაციას მეურდჷ დო გიფიქრებნა, ნამდა გვალო თქვანო რდჷ ჭარილ? თქვანცალო მილიონობით კათას გიმუცადებ თენა. მუჭო შილებე ბიბლიას მოჩამილ ინფორმაცია მეურდას თქვან პირად საჭიროებეფს? თენა თიშ ჭყოლოფათ რე შეიოლებერ, ნამდა ბიბლიაშ ავტორ არძაშე უმოს ბრძენ რე მთელ სამყაროს (2 ტიმ. 3:16, 17).

ᲑᲘᲑᲚᲘᲐ ᲝᲫᲘᲠᲐᲜᲡ ᲦᲝᲠᲝᲜᲗᲘᲨ ᲡᲐᲛᲐᲠᲗᲚᲘᲐᲜᲝᲑᲐᲡ

11. მუჭო გიმირჩქინ ღორონთიქ მიუკერძოებლობა, მუჟამსით ბიბლია იჭარუდ?

¹¹ იეჰოვაშ ხოლო ართ თვისება სამართლიანობა რე (კან. 32:4). სამართლიანობა მანგარ ხოლოს რე ღორონთიშ ხოლო ართ თვისება, მიუკერძოებლობაწკუმა, ნამდგას იეჰოვა ირიათო გიმირჩქინანს (საქ. 10:34, 35; რომ. 2:11). იეჰოვაშ მიუკერძოებლობაქ ჯგირო ქიძირ, მუჟამსით მუშ სიტყვა შხვადოშხვა ნინაშა ოჭარაფუ. მაგალთო, ბიბლიაშ პირველ 39 წიგნიქ უმენტაშო ებრაულ ნინაშა იჭარ, ნამუთ თი პერიოდის ღორონთიშ ხალხშო ადვილო გასაგებ რდჷ. მარა პირველ საუკუნეს მახორუ ხალხ უმენტაშო ბერძნულო იჩიებუდ, ათეშენ ბიბლიაშ ბოლო 27 წიგნიქ ზუსტას თე ნინაშა იჭარ. ჩქინ მოჸოროფე ღორონთიქ ბიბლია ხვალე ართ ნინაშა ვაჭარაფუ ადამიანეფს. ამდღა მსოფლიოს სოდგარენ 8 მილიარდ ადამიან რე დო თინეფ შხვადოშხვა ნინეფშა იჩიებნა. მუჭო ოკო გეჩინებაფუას თეზმა ადამიანქ იეჰოვა?

12. მუჭო ისრულებ დანიელიშ 12:4-ს ინოჭარილ წინასწარმეტყველება ბოლო დღალეფს?

¹² წინასწარმეტყველ დანიელიშ საშვალებათ, იეჰოვაქ დემეპირეს, ნამდა ბოლო დღალეფს ქიმიძინანდჷ „ჭეშმარიტ რჩქინა“ დო ბრელ ქინანჭუდ თის (წეკითხით დანიელიშ 12:4). თე რჩქინაშ მოძინას ხეს უნწყუნს თინა, ნამდა ბიბლია დო თიშა გერსხილ პუბლიკაციეფ ითარგმნუ, გიშურს დო ივრცელებ მთელ მსოფლიოს. ბიბლია რე წიგნ, ნამუთ არძაშ უმოს მეტ ნინაშა ითარგმნუ დო ივრცელებ მთელ მსოფლიოს. ხშირ შემთხვევას, კომერციულ ორგანიზაციეფიშ გიშაშქუმალირ ბიბლიეფ მანგარ ძვირ რე, მარა თინეფიშ გინაწონს, ბიბლია, ნამუთ იეჰოვაშ მოწმეეფქ 240-შე მეტ ნინაშა, მთლიანო ვარდა ნაწილობრივ თარგმნეს, უფასო რე დო არძას შეულებ უღდას. შედეგო, მთელ მსოფლიოს, აღსასრულიშ მოულაშახ, არძა ადამიანს შეულებ მირჩქილუას სახიოლო ამბე სამეფოშ გურშენ (მათ. 24:14). ჩქინ სამართლიან ღორონთის ოკო, ნამდა მუთ შილებე მეტ ადამიანს ქიმიაჩას საშვალებაქ, მუშ სიტყვაშ, ბიბლიაშ ჭყოლოფათ გეჩინებაფუას თინა. მუშენდა ღორონთის არძა მანგარო ვუჸორთ.

ᲑᲘᲑᲚᲘᲐ ᲝᲫᲘᲠᲐᲜᲡ ᲦᲝᲠᲝᲜᲗᲘᲨ ᲸᲝᲠᲝᲤᲐᲡ

13. მუშენ შემლებნა თიშ რაგად ნამდა ბიბლია იეჰოვაშ ჸოროფას ოძირანს? (იოან. 21:25)

¹³ ბიბლია ღორონთიშ მთავარ თვისებაშე, ჸოროფაშე მოგებაფუანა (1 იოან. 4:8). ღორონთიშ ჸოროფა თევრეშე ხოლო იძირე მუ ინაჭარაფუ დო მუ ვანაჭარაფუ ბიბლიას. თიქ მუშ სიტყვას ადამიანეფს ხვალე თი ინფორმაცია ოჭარაფუ მუთ მიმეხვარებნა მიღდან ღორონთწკუმა ჯგირ ურთიერთობა, ბედნერ ცხოვრება ამდღა დო მომავალს მარადიულ სიცოცხლე. იეჰოვაშ ჸოროფაშ მაძირაფალ რე თინა, ნამდა თიქ ვეგნოფხარგეს თიცალ დეტალეფით მუთ რეალურო ვა მოსაჭირდეს (წეკითხით იოანეშ 21:25).

14. ხოლო მუჭო იძირე ბიბლიაშე ღორონთიშ ჸოროფა?

¹⁴ იეჰოვაშ ჸოროფას თით ხოლო ვორწყეთ, ნამდა ჩქინწკუმა ურთიერთობაშ დროს იძირე, ნამდა მაფასენა. მაგალთო, თიქ ბიბლიას ვენომჭარეს კანონეფიშ სია, ნამდგას ბოლო ვა უღჷ დო ვართ თის გინმომჭყვიდნა, მუჭო ოკო მიფქცუათ კონკრეტულ სიტუაციას. თეშ გინაწონს, თიქ რეალურ ისტორიეფ, წინასწარმეტყველებეფ დო პრაქტიკულ რჩევეფ ენაჭარაფუ, დო თეშნერო ქომჩეს საშვალება, აზროვნებაშ უნარიშ ჭყოლოფათ მიბღითკო სწორ გადაწყვეტილებეფ. შედეგო, ღორონთიშ სიტყვა გინმოჭყვიდრაფუანა, მთელ გურით მიჸორდან დო ვომორჩილდათ იეჰოვას.

15. ა) მუჭო ოძირანს ბიბლია, ნამდა ღორონთ დაინტერესებულ რე ჩქინით? ბ) მუჭოთ სურათშე იძირე, ნამ ბიბლიურ პერსონაჟეფშე ფიქრენა ბაღანა ძღაბ, ახალგაზრდა ჯიმა დო ხანშა მიშულირ და? (დაბ. 39:1, 10—12; 2 მეფ. 5:1—3; ლუკ. 2:25—38)

¹⁵ ბიბლიაშე იძირე, ნამდა იეჰოვა დაინტერესებულ რე ჩქინით. მუშენ იფჩიებუთ თეს? მაგალთო, ბიბლია ეფშა რე თიცალ ისტორიეფით, სოდეთ ჯგირო რე ეჭარილ ადამიანეფიშ გრძნობეფ დო ემოციეფ. თეცალ მონაკვეთეფიშ კითხირიშ დროს, შემლებნა მიშაფრთათ ბიბლიურ პერსონაჟეფიშ მდგომარეობაშა, მუშენდა თინეფს ხოლო ჩქინცალ გრძნობეფ უღდეს (იაკ. 5:17). დო მუთ არძაშ უმოს მთავარ რე, მუჟამსით ბგებულენთ, მუჭო ოქცუდ ღორონთ ადამიანეფს, ჯგირო ინვანჭუთ, „მუნერ მოჭყოლოფე რე იეჰოვა დო მუჭო მეუღ გურშა შხვეფიშ გაჭირება“ (იაკ. 5:11).

16. მუს ბგურაფლენთ იეჰოვაშ გურშენ, მუჟამსით ბიბლიას ბკითხულენთ თინეფიშ შემთხვევეფშენ, მიდგაქ შეცოდეს (ეს. 55:7)

¹⁶ ღორონთის ვუჸორთინ თინა ბიბლიაშე თით ხოლო იძირე, ნამდა ოჭიშის ვამრთინუანა, მუჟამსით ფჩირთუთ. მართალ რე, ისრაელეფქ იეჰოვას ბრელშა შეცოდეს, მარა მუჟამსით მთელ გურით ნარღენდეს დაშებულს, იეჰოვა ხოლო პატიენდჷ თინეფს (წეკითხით ესაია 55:7). პირველ საუკუნეს მახორუ ქრისტიანეფ ხოლო გინაფლენდეს იეჰოვაშ ჸოროფას. მაგალთო, პავლე მოციქულქ ღორონთიშ შთაგონებათ თანამორწმუნეეფს ელუჩ, ნამდა ქაპატუესკო დო გურშა ელუკინესკო თის, მიდგაქ სერიოზულო შეცოდ, მარა უკულ მინანუ (2 კორ. 2:6, 7; 1 კორ. 5:1—5). გურშა ელამკინანა თიშ რჩქინა, ნამდა შეცდომეფიშ უმკუჯინუო, იეჰოვას ოჭიშ ვა ურთინუაფ მუშ თაყვანიშმცემელეფშა. თეშ გინაწონს, იეჰოვა თითოულ მუშ მსახურს ჸოროფათ ოხვარუდ, გეგშესწორესკო, დართესკო თის დო კინ თიშ მეგობრეფ ჸოფედესკო. თინა ამდღა ხოლო თაშ ოქცუ მუშ მსახურეფს, მით მთელ გურით ნარღენს დაშებულს (იაკ. 4:8—10).

ᲓᲐᲤᲐᲡᲘᲗ ᲦᲝᲠᲝᲜᲗᲘᲨ ᲫᲕᲘᲠᲤᲐᲡ ᲫᲦᲕᲘᲜ, ᲑᲘᲑᲚᲘᲐ

17. მუშენ რე ბიბლია ძვირფას საჩუქარ?

¹⁷ იეჰოვაქ დიდებულ საჩუქარ, ბიბლია მუჩეს. მუშენ რე თინა თეცალ ძვირფას ძღვინ? მუჭოთ თე სტატიაშე ბძირით, ბიბლია ღორონთიშ სამართლიანობას, სიბრძნეს დო ჸოროფას ოძირანს. თე წიგნ მოგებაფუანა, ნამდა იეჰოვას ოკო, გეფჩინებაფუათ თინა დო გინიფრთათ თიშ მეგობრეფო.

18. მუჭო შემლებნა გიმიფრჩქინათ მარდულობა იეჰოვაშ ძვირფას ძღვინიშ, ბიბლიაშ მიმართ?

¹⁸ ჩქი მოკონა ირიათო ფშუდან, ნამდა ბიბლია დიდებულ ძღვინ რე იეჰოვაშე (იაკ. 1:17). გინოჭყვიდილ მაფდან, მარდულობა გეგმიფრჩქინათ თე ძვირფას ძღვინიშ მიმართ. თეშ კეთება შემლებნა ბიბლიაშ გურგედვალირ კითხირით დო ნაკითხირშე დაფიქრებათ. შემლებნა დარწმუნებულ ვორდათ, ნამდა, მუჟამსით თაშ ქიმიფქციებუთ, ბიბლიაშ დიდებულ ავტორ აკურთხენს ჩქინ მონდომას დო „მიბღენთ რჩქინას ღორონთიშ გურშენ“ (იგავ. 2:5).