მშვიდობა რთულ სიტუაციეფიშ დროს

1. მუ რე „ღორონთიშ მშვიდობა“ დო მუ ჯგირობუას მარზენა თინა? (ფილ. 4:6, 7)

ᲗᲔ ᲡᲢᲐᲢᲘᲐᲡ ჩიება მეურს თი მშვიდობაშ გურშენ, ნამდგაშეთ ქვეყნიერებას მუთუნ ვა უჩქჷ. თენა რე „ღორონთიშ მშვიდობა“, მუდგას ჩქინ ზეციერ მუმაწკუმა ურთიერთობათ ბღებულენთ. „ღორონთიშ მშვიდობა“ ქომღუნან-და, დუდის თხილერო ბგინაფლენთ (წეკითხით ფილიპელეფიშ 4:6, 7). ფხარენთ „მშვიდობაშ ღორონთწკუმა“ პირად, ხოლოშიან ურთიერთობათ დო თიშ მოჸოროფეეფწკუმა მეგობრობათ (1 თეს. 5:23). მუჟამსით იფჩინენთ, ვონდუთ დო ვომორჩილუთ ჩქინ ზეციერ მუმას, ღორონთიშ მშვიდობას შეულებ ქომჩან შინაგან სიმშვიდე, მუჟამსით რთულ სიტუაციას ფხვადუთ დო გურ აკოჭირებულ მაფნა.

2. მუშენ შემლებნა ვორდათ დარწმუნებულ, ნამდა შეიოლებერ რე, მიღდან ღორონთიშ მშვიდობა?

² მართალო ქორენო შეიოლებერ, მიღდან ღორონთიშ მშვიდობა, მუჟამსით დუდის გიმოტირხუნა თიცალ რთულ სიტუაციეფ, მუნერით რე ეპიდემია, სტიქიურ უბედრობა, სამოქალაქო არეულობა ვარდა თხოზინ? თითოულს შეულებ შიშის ქენმოჸოთან, მარა იესოქ მუშ მიმაჸუნალეფს ელუჩ: „ვა გაშქურნან დო ვართ შიშის ინოლათ“ (იოან. 14:27). საბედნეროთ, და დო ჯიმალეფ მეჸუნა იესოშ რჩევას. იეჰოვაშ მოხვარათ თინეფს შეიალებუეს, სერიოზულ სირთულეეფიშ უმკუჯინუო, უღდან მშვიდობა.

ᲛᲨᲕᲘᲓᲝᲑᲐ ᲔᲞᲘᲓᲔᲛᲘᲐᲨ ᲓᲠᲝᲡ

3. მუჭო შილებე ეპიდემიაქ ვარდა პანდემიაქ მშვიდობა მიდამღან?

³ ეპიდემიას ვარდა პანდემიას შეულებ მანგარო დოთირუას ჩქინ ცხოვრება. გუვარჩუათ, მუჭო იმოქმედ კოვიდ-19 პანდემიაქ ბრელ ადამიანშა. ართ გიმორკვიებაქ ოძირუ, ნამდა ადამიანეფიშ გვერდშე უმოსის, პანდემიაშ პერიოდის გლახათ ლურდჷ. თე პანდემიაქ ხალხის მოუძინ ოწუხებელ დო დეპრესია. მიძინ ალკოჰოლიშ დო ნარკოტიკეფიშ უბადოთ გიმორნაფაშ შემთხვევეფქ, ოჯახურ ძალადობაქ დო დუდიშ ჸვილუაშ მცდელობეფქ. ეპიდემია თქვან ტერიტორიას ხოლო გავრცელებურ ქორენ-და, მუჭო შეილებნა, ვეგნაჸუნათ ოწუხებელს დო გეხარათ ღორონთიშ მშვიდობათ?

4. მუშენ მოუღ ჩქინდა სიმშვიდე ბოლო დღალეფიშ გურშენ იესოშ წინასწარმეტყველებაშ რჩქინას?

⁴ იესოქ იწინასწარმეტყველ, ნამდა ბოლო დღალეფს იჸუაფუდ ეპიდემიეფ „მინ ართ დო მინ მაჟია ადგილს“ (ლუკ. 21:11). მუჭო მოუღ თეშ რჩქინას ჩქინო სიმშვიდე? ჩქი ვამკვენა ეპიდემიეფ ხვადუნ დო მარჩქილენა, ნამდა, მუჭოთ იესოქ თქუ, თე ირფელქ ოკო მოხვადას. თაშ ნამდა, ნამდვილო მიღნა მიზეზ, მივაჸუნათ იესოშ რჩევას, ნამუთ თინეფს მეჩჷ, მით ბოლო დროს იცხოვრენდჷ: „ვა დოშქურდათ“ (მათ. 24:6).

5. ა) ფილიპელეფიშ 4:8, 9 თანახმას, მუშ გურშენ ოკო იბლოცათ, მუჟამსით ჩქინ ტერიტორიას ეპიდემია რე? ბ) მუჭო შეულებ ბიბლიაშ აუდიო ჩანაწერეფიშ რჩქილას თქვან მოხვარა?

⁵ ეპიდემიაშ დროს ადამიანქ შილებე ადვილო ქინოლას პანიკას. თაშ მოხვად და დესიშb შემთხვევას. თიშ უკულ, მუთ თიშ ექიმქ, ბიძიაქ დო ბიძისქუაქ კოვიდით დოღურეს, ოშქურუდ, თე ვირუსიქ მუს ხოლო ვაღოლკო დო ხანშამიშულირ დიდას ვეგნოდვუკო. პანდემიაშ გურშენ თის სამუშაშ დინაფაშა ხოლო ოშქურუდ დო ნერვიანენდჷ, მუჭო შეიალებედ ოჭკუმალიშ დო შხვა აუცილებერ მუდგარენეფიშ ჸიდირ. თე ირფელქ თის სვანჯ მეუდინუ დო ლურ ხოლო გუტახ. მარა დესიქ დირთინუ შინაგან სიმშვიდე. მუჭო შეიალებუ თექ? თინა კონკრეტულო ლოცულენდჷ დო იეჰოვას თხინდჷ, ქიმეჩკო შინაგან სიმშვიდე დო დადებითშე იფიქრუკო (წეკითხით ფილიპელეფიშ 4:8, 9). დესი ბიბლიაშ აუდიო ჩანაწერეფიშ საშვალებათ „ურჩქილედ“ იეჰოვას. თინა იჩიებ: „თი მშვიდ ხონარეფ, ნამდგას აუდიოშე იფრჩქილედ, მამშვიდენდჷ დო გუმოშინანდჷ, ნამდა იეჰოვა ზრუნენს ჩქიმდე“ (ფსალმ. 94:19).

6. მუჭო მიგეხვარებნა პირად გურაფა დო კრებაშ შეხვალამეფ?

⁶ ეპიდემიაქ შილებე თქვან ირდღაშიან განრიგიშ მეჸუნას გეცილან, მარა ვემეჩათ საშვალება, ქიმოქმედას თქვან პირად გურაფაშა დო შეხვალამეფიშ დასწრებაშა. და დო ჯიმალეფიშ შემთხვევეფ, ნამუთ ჩქინ პუბლიკაციეფს დო ვიდეოეფს რე მოჩამილ, ქუგგოშინანა, ნამდა თინეფს შეიალებუეს, ვადინუესკო ართგურობა, თიცალ სირთულეეფიშ დროს, მუნერით თქვა გიღნა (1 პეტ. 5:9). შეხვალამეფ მიგეხვარებნა, გონება ეიფშათ გურიშემაკინალ ბიბლიურ აზრეფით. თეწკუმა ართო, თინეფ საშვალებას მერჩანა, გურშაელუკინათ შხვეფს დო თქვა ხოლო თაშ იგინათ დუდ (რომ. 1:11, 12). თიშე ფიქრ, მუჭო ელურდჷ იეჰოვა მუშ მსახურეფს, მუჟამსით თინეფ ობრძოლდეს ლახალას, შიშის ვარდა ხვალახეობას, გაიმანგარენა რწმენას დო რჯერდან იჸი, ნამდა თინა თქვა ხოლო ქალაიდირთუნა.

7. მუშ გურაფა შეილებნა მოციქულ იოანეშ მაგალითშე?

⁷ ირნერო ეცადით, ვადინუათ და დო ჯიმალეფწკუმა ურთიერთობა. ლახალაშ გავრცელებაშ დროს შილებე აუცილებერ რდას, დეფცვათ ფიზიკურ დისტანცია, მუჟამსით ვორეთ შხვეფწკუმა, თინეფ შქას თანამორწმუნეეფწკუმა ხოლო. თეცალ დროს შილებე დუდ მოციქულ იოანეცალო იგინათ. თის მუშ მეგობარიშ, გაიუსიშ, პირისპირ ძირაფა ოკოდ (3 იოან. 13, 14). მართალ რე, იოანეს ჯგირო არჩქილედ, ნამდა ჭიჭეხანს ვეშიალებედ გაიუსიშ ძირაფა, მარა გაკეთ თინა, მუთ თი მომენტის შეულებუდ — წერილ ქიმეჭარ გაიუსის. და დო ჯიმალეფიშ ძირაფა ფიზიკურო ირო შეიოლებერ ვა რენ-და, ქეცადით, დეკავშირათ თინეფს ტელეფონით, ვიდეოზარით ვარდა წერილეფიშ საშვალებათ. თანაქრისტიანეფწკუმა კონტაქტის ვადინუანთ-და, დუდის უმოს თხილერო ქიგინანთ დო გაღვენუნა შინაგან სიმშვიდე. მანგარო ქოწუხენთ-და, ქოთხით მოხვარა უხუცესეფს, დო მიღით თინეფშე ჸოროფიან გურიშელაკინა (ეს. 32:1, 2).

ᲛᲨᲕᲘᲓᲝᲑᲐ ᲡᲢᲘᲥᲘᲣᲠ ᲣᲑᲔᲓᲠᲝᲑᲔᲤᲘᲨ ᲓᲠᲝᲡ

8. მუჭო შილებე სტიქიურ უბედრობეფქ აკარღვას თქვან მშვიდობა?

⁸ შილებე თქვან დუდშა გიმოიცადებნა სტიქიურ უბედრობაშ შედეგეფ. მაგალთო, მუნერით რე წყალდიდობა, მიწისძვრა ვარდა დაჩხირ დო შილებე თეშ გურშენ ბრელ ხანს წუხენდით. თე დროს საჸოროფო ადამიანქ დოიღურეს ვარდა ჸუდექ აკოიცის-და, შილებე მანგარო გენიცადენდით, დუდის უიმენდოთ გინაფლენდით დო გურმულირ ხოლო რდით. თენა ვა ნიშნენს, ნამდა მატერიალისტ რეთ ვარდა სუსტ რწმენა გიღნა. რთულ სიტუაციეფიშ უკულ თეცალ რეაქცია ბუნებრივ რე დო ვართ შხვეფს გაუკვირდუნა (იობ. 1:11). მარა სტრესულ სიტუაციეფიშ უმკუჯინუო, შეილებნა გიღდან შინაგან სიმშვიდე. მუჭო რე თენა შეიოლებერ?

9. მუჭო მუმამზადეს იესოქ სტიქიურ უბედრობეფშო?

⁹ ქიგიშინით, მუ იწინასწარმეტყველ იესოქ. ნამთინე შილებე ფიქრენდას, ნამდა სტიქიურ უბედრობეფ პირადო თინეფს დღას ვეშეხებ, მარა ჩქი მიჩქნა, ნამდა თეცალ უბედრობეფ ჩქინ დროს უმოსო ქიმიძინანს დო თინეფშე ნამთინე შილებე ჩქინ დუდშა გეგმოფცადათ. იესოქ მუშ მიმაჸუნალეფს უწუ, ნამდა „დიდ მიწისძვრეფ“ დო შხვა სტიქიურ უბედრობეფ ქუმოხვადუდ აღსასრულიშ მულაშახ (ლუკ. 21:11). თეს გეძინელ, იესოქ იწინასწარმეტყველ, ნამდა უკანონობა მიძინანდჷ, მუდგაშ შედეგ რე დამნაშავეობა, ძალადობა დო ტერორისტულ თავდასხმეფ (მათ. 24:12). იესოს დღას ვა უთქუალ, ნამდა თეცალ უბედრობეფ ხვალე თინეფშა იმოქმედენდჷ, მიდგაშა იეჰოვას ოჭიშ აფჷ რთინაფილ. არგამა რე, იეჰოვაშ ბრელ ართგურ მსახურ ხვადუ თეცალ უბედრობეფს (ეს. 57:1; 2 კორ. 11:25). მართალ რე, იეჰოვა თე არძა სტიქიურ უბედრობაშე სასწაულებრივო ვა დოფთხილანა, მარა ქომჩანა ირფელს, მუთ მოსაჭირნა, ნამდა ვა ვოდინუათ სიმშვიდე.

10. მუშენ ოძირანს ასეშე სტიქიურ უბედრობეფშო მომზადება, ნამდა მიღნა რწმენა? (იგავ. 22:3)

¹⁰ რთულ სიტუაციეფშო წინასწარ მივემზადებუთ-და, უმოს ადვილო შემალებენა ვა ვოდინუათ სიმშვიდე. მარა თეცალ მომზადება თის ოძირანსო, ნამდა იეჰოვაშ მიმართ სუსტ რწმენა მიღნა? შუროთ ვარ! არგამა რე, მუჟამსით სტიქიურ უბედრობეფშო ვემზადებუთ, თეთ ვოძირანთ, ნამდა მიღნა თიშ რწმენა, იეჰოვას შეულებ იზრუნას ჩქინდე. მუშენ შემლებნა თეშ რაგად? მუშენდა ღორონთიშ სიტყვა ელამჩანა, მივემზადათ თი სტიქიურ უბედრობეფშო, ნამდგაქ შილებე ჩქინ ტერიტორიას ქუმოხვადას (წეკითხით იგავეფიშ 22:3). პუბლიკაციეფს მოჩამილ სტატიეფით, შეხვალამეფით დო დროულ ანგარიშეფით ღორონთიშ ორგანიზაცია ირიათო მაფრთხილენა, ნამდა მივემზადათ თეცალ სიტუაციეფშო.c ქუვონდუთო იეჰოვას? თაშ ქორენ-და, მივაჸუნუთ თე რჩევას ასეშე, სოიშახ სტიქიურ უბედრობა მოხვადუ.

11. მუშ გურაფა შემლებნა მარგარეტიშ მაგალითშე?

¹¹ გუვარჩუათ ართ დაშ, მარგარეტიშ შემთხვევა. თიქ ჸუდე ოკო დიტუკო, მუშენდა თი ტერიტორიას დაჩხირ მანგარო რდჷ მოდვალირ დო ათეშენ მთავრობაქ ევაკუაცია გეგმაცხად. არძა მანქანეფით მისოფუდუნ თიშენ, ხიდეს მანქანეფქ გიჭკად დო გინულაქ ნამთინს ვა მახერხებუ. ირფელქ უჩა ფურკით დიფორ, ათეშენ მარგარეტის უკვე ვეშიალებედ მანქანაშე გეგთორთუკო, მარა თიქ გინასქიდ, მუშენდა წინასწარ მომზადებულ რდჷ. თის ხეშმიოლუს უღუდ რუკა, სოდეთ მოჩამილ რდჷ შხვა შარა, მუდგათ შეიალებედ თი ტერიტორიაშე გიშულა. თინა კინ მეჸუნდჷ მუშ გეგმას, ათეშენ ადვილო შეიალებუ რთულ სიტუაციაშე დუდიშ დარსხებაქ. მომზადებაშ ჭყოლოფათ მარგარეტის შეიალებუ გეგნოსქიდკო.

12. მუშენ ოკო მივაჸუნათ უსაფრთხოებაწკუმა დაკავშირებულ მითითებეფს?

¹² ჩქინ დო შხვეფიშ დაცვებელო, მთავრობაშ წარმომადგენელეფქ შილებე მიზოჯან, დეფცვათ კომენდანტიშ საათ, სასწრაფოთ ქიდიბტუათ კონკრეტულ ტერიტორია ვარდა მივაჸუნათ შხვა მითითებეფს. ნამთინე შილებე ვამორჩილდას თე მითითებეფს ვარდა დრო მეუღდას, მუშენდა ვაკოდას ქიდიტუას მუშ საკუთრება. მუჭო ოკო მიქცუან ქრისტიანეფქ? ბიბლია მირაგადნა: „უფალიშ გურშენ დემორჩილით ადამიანეფიშ გერნაფილ ხელისუფლებას: მეფეს, მუჭოთ უმაღლეს მართველს, დო გამგებელეფს, მუჭოთ თინეფშა უფლება მეჩამილეფს“ (1 პეტ. 2:13, 14). თეს გეძინელ, ღორონთიშ ორგანიზაცია მარზენა მითითებეფს, ნამუთ ფთხილანა. უხუცესეფს რეგულარულო ოკო მეფჩათ ჩქინ გურშენ ზუსტ საკონტაქტო ინფორმაცია, ნამდა საგანგებო სიტუაციეფიშ დროს შეიალებუან ჩქინწკუმა დაკავშირებაქ. ქუგაფნანო თენა კეთებულ? შილებე მიბღათ შხვადოშხვა მითითება, მაგალთო, დუდიშგითაფორაფალიშ ვარდა ევაკუაციაშ გურშენ, თიშ გურშენ ხოლო, მუჭო შემლებნა მიბღათ მოხვარა ვარდა მუჭო დო მუჟამ მივეხვარათ შხვეფს. ვა დევემორჩილებუთ-და, შილებე, მუჭოთ ჩქინ, თეშ უხუცესეფიშ სიცოცხლე ხოლო ქიგვორინუათ საფრთხეშ თუდო. რშუდან, თე ართგურ ქომოლკათა ზრუნენა ჩქინდე (ებრ. 13:17). მარგარეტ გეუძინანს: „დარწმუნებულ ვორექ, უხუცესეფშე დო ორგანიზაციაშე მეღებულ მითითებეფიშ მეჸუნაქ, ირსხჷ ჩქიმ სიცოცხლე“.

13. მუქ მეხვარ ბრელ ქრისტიანს, მიდგას ოცხოვრებელქ აჸუ დატებელქ, ვადინუესკო ხიოლ დო მშვიდობა?

¹³ ბრელ ჩქინ და დო ჯიმაქ, მიდგაქ სტიქიურ უბედრობეფიშ, ომიშ ვარდა სამოქალაქო ჩხუპეფიშ გურშენ ჸუდექ აჸუ დატებელქ, ირფელ გაკეთ, ნამდა ქიმიარჩქვანკო ახალ სიტუაციას დო უმოსო მიღეს მონაწილება იეჰოვაშ მსახურებას. პირველ საუკუნეშ ქრისტიანეფცალო, მიდგას თხოზინიშ გურშენ ოცხოვრებელქ აჸუეს დატებელქ, თინეფქ ხოლო გაგრძელეს გილულა დო ღორონთიშ გურშენ სახიოლო ამბეშ გაცხადება (საქ. 8:4). ქადაგებაქ მეხვარ თინეფს, მთელ ყურადღება მუნეფიშ რთულ სიტუაციეფშა ვარინ სამეფოშა აფდესკო გინოღალირ. შედეგო, თინეფს ვა უდინუაფნა ხიოლ დო მშვიდობა.

ᲛᲨᲕᲘᲓᲝᲑᲐ ᲗᲮᲝᲖᲘᲜᲘᲨ ᲓᲠᲝᲡ

14. მუჭო შეულებ თხოზინს ეცილას ჩქინ მშვიდობას?

¹⁴ თხოზინიშ დროს შილებე მივოდინუათ ბრელ თიცალ მუდგარენ, მუდგას ჩქინდა სიმშვიდე მოუღუდ. დუდის ბედნერო ბგინაფლენთ, მუჟამსით შემლებნა თავისფალო ეკიფშაყარათ, თავისფალო იფქადაგათ, მივაჸუნათ ირდღაშიან გეგმას დო ვამღუდან თიშ შიშ, ნამდა ობჭოფნა. თავისუფლება მიდამღეს დო თე ირფელიშ კეთება ვეშემლებნან-და, შილებე ოწუხებელს გევაჸუნათ დო თიშ შიშიქ ქინმაჭკირან, მუ მოხვადუ უკულ. ბუნებრივ რე, დუდის თაშ ბგინაფლენდათ, მარა ფრთხილას ოკო ვორდათ, მუშენდა იესოქ გუმაფრთხილეს, ნამდა თხოზინს შეულებ თიშ ნამთინე მიმაჸუნალ დაბრკოლას (იოან. 16:1, 2). ათეშენ, მუჭო შემლებნა ვა ვოდინუათ მშვიდობა თხოზინიშ უმკუჯინუო?

15. მუშენ ოკო ვა მოშქურდან თხოზინშა? (იოან. 15:20; 16:33)

¹⁵ ღორონთიშ სიტყვა მირაგადნა: „არძას, მიდგას ოკო ქრისტეშ მოწაფე დო ღორონთიშ ართგურ რდას, თხოზუდან იჸი“ (2 ტიმ. 3:12). ართ ჯიმას, ანდრეის, მანგარო უჭირდჷ თიშ დაჯერება, ნამდა თიშ ქიანას არძა იეჰოვაშ მოწმეს თხოზინს ქუდუჭყანდეს. თინა იჩიებუდ: „თე ქიანას მანგარ ბრელ იეჰოვაშ მოწმე ვორეთ. მთავრობა არძას მუჭო დახუნუანს?“. თიშ მანგიორო, სიმშვიდე დირთინუკო, თეცალ ფიქრეფქ ანდრეი უმოს ოწუხებელს ქინაჸათ. შხვა ჯიმალეფ ონდუდეს იეჰოვას დო ვაცადდეს, მუნეფიშ დუდ დაჯერესკო, ნამდა ვა ჭოფუნდეს. თინეფს უჩქუდეს, ნამდა შილებე ოჭოფესკო, მარა ანდრეიშ გინაწონს, თეშე ზედმეტო ვა წუხენდეს. ათეშენ, თიქ გეგნოჭყვიდ, გევითარკო თინეფცალ დამოკიდებულება დო სრულას მიენდკო იეჰოვას. ანდრეიქ ხეთეშე ქიგინ შინაგან სიმშვიდე დო ხიოლ ვა უდინუაფ ბრელ სირთულეშ უმკუჯინუო. თენა ჩქინ შემთხვევას ხოლო თაშ იჸუაფ. იესო მირაგადნა, ნამდა ოკო ველდათ თხოზინს, მარა თინა მარწმუნენა, ნამდა შემლებნა ვა ვოდინუათ ართგურობა (წეკითხით იოანეშ 15:20; 16:33).

16. ნამ მითითებას ოკო მივაჸუნათ, მუჟამსით ფთხოზნა?

¹⁶ მუჟამსით ჩქინ საქმიანობა ვარიებულ ვარდა მანგარ შეზღუდულ რე, შილებე ფილიალშე დო უხუცესეფშე მიბღათ მითითებეფ. თენა ნიშნენს, ნამდა თხილერ იპჸით, ათეშენ შემლებნა ბჯერდან, ვამმოკორდნა სულიერ საზრდო დო მიბღენთ მოხვარას, მუდგაშ საშვალებათ, მუჭოთ შემალებენან თეშ გუვაგრძელენთ ქადაგებას. ირფელ გაკეთით, ნამდა მიაჸუნათ თი მითითებას, ნამდგას მიღენთ, თიმწკუმა ხოლო, მუჟამსით ბოლოშა ვენანჭუთ თე მითითებას (იაკ. 3:17). თეს გეძინელ, დღას ვა გავრცელათ ინფორმაცია კრებაშ საქმიანობაშ დო და დო ჯიმალეფიშ გურშენ თინეფწკუმა, მიდგას ვა უღნა თეშ რჩქინაშ უფლება (ეკლ. 3:7).

17. პირველ საუკუნეშ მოციქულეფცალო, მუშ კეთება მაფნა გინოჭყვიდილ?

¹⁷ ართ-ართ მთავარ მიზეზ, მუდგაშ გურშენ სატანა ოწინააღმდეგ ღორონთიშ ხალხის თინა რე, ნამდა თინეფს „იესოშ გურშენ ქადაგებაშ საქმე ოვალნა“ (გამოცხ. 12:17). უფლება ვემეჩათ სატანას დო თიშ ქვეყნიერებას დუგოშქურინუან. წინააღმდეგობაშ უმკუჯინუო, ქადაგებას დო გურაფას ხიოლ დო მშვიდობა მოუღ ჩქინდა. პირველ საუკუნეს, მუჟამსით იუდეველ მართველეფქ მოციქულეფს უზოჯეს, მიოტუესკო ქადაგება, თე ართგურ ქომოლკათაქ ისხუნუ, დემორჩილესკო ღორონთის. მოციქულეფქ გაგრძელეს ქადაგება დო თე საქმექ თინეფს ხიოლ მოუღ (საქ. 5:27—29, 41, 42). მუშო ოკო რაგად, მუჟამსით ჩქინ საქმიანობა შეზღუდულ რე, ქადაგებაშ დროს ფრთხილას ოკო ვორდათ (მათ. 10:16). მუჟამსით დუდის ვა ბზოგენთ, ბღებულენთ მშვიდობას, ნამუთ მოურს იეჰოვაშე მოწონაშ მეღებათ დო სიცოცხლეშ მუმაღალარ ცნობაშ გაცხადებათ.

„ᲛᲨᲕᲘᲓᲝᲑᲐᲨ ᲦᲝᲠᲝᲜᲗ ᲗᲥᲕᲐᲜᲬᲙᲣᲛᲐ ᲘᲸᲣᲐᲤ“

18. მუ ოკო ფშუდან თი მშვიდობაშ მუმაჩამალშე, ნამუთ მოსაჭირნა?

¹⁸ რჯერდან, მუდგა რთულ დროქ ვა დოდირთას შემლებნა მიღდან მშვიდობა. თეცალ რთულ დროს ოკო ბჯერდან, ნამდა თი მშვიდობა, ნამუთ მოსაჭირნა ღორონთიშ მშვიდობა რე დო თის ხვალე იეჰოვა ირზენს. მიენდით თის, მუჟამსით შეხვადუთ ეპიდემიეფს, სტიქიურ უბედრობეფს ვარდა თხოზინს. ხოლოს რდათ თიშ ორგანიზაციაწკუმა. რწმენათ უჯინით თი დიდებულ მომავალს, ნამუთ გელნა. თაშ გაკეთენთ-და, „მშვიდობაშ ღორონთ თქვანწკუმა იჸუაფ“ (ფილ. 4:9). უკულიან სტატიას გუვარჩიენთ, მუჭო შემლებნა მივეხვარათ თი თანაქრისტიანეფს, მით რთულ სიტუაციეფს რენა, ნამდა ვადინუან ღორონთიშ მშვიდობა.