ქორექო მზათ, დემკვიდრე დედამიწა?
ᲐᲠᲫᲐ ველუთ იესოშ დუნაპირებუშ შესრულებას: „ბედნერეფ რენა ლიბ ხასიათიშ კათა, მუშენდა დემკვიდრენა დედამიწას“ (მათ. 5:5). ცხებულეფ დემკვიდრენა დედამიწას თი გაგებათ, ნამდა ზეცაშე იესოწკუმა ართო მეფეეფო იმსახურენა (გამოცხ. 5:10; 20:6). ამდღა ჭეშმარიტ ქრისტიანეფიშ უმენტაშ ელჷ თი დროს, მუჟამსით დემკვიდრენა დედამიწას დო იცხოვრენა მარადიულო სრულყოფილ, მშვიდობიან დო ბედნერ გარემოს. თეცალ გარემოქ ქიჸუასინ, თინეფს მუსხირენ მნიშვნელოვან საქმე აჸინა ოკეთებელ. გუვარჩუათ სუმ საქმე: დედამიწაშ გასქვამება, გათელებურეფიშ მოხვარა დო თინეფშა გურაფა. თეს გეძინელ, გუვარჩუათ, მუჭო შემლებნა ვოძირუათ ამდღა ხოლო, ნამდა მოკონა, მონაწილება მიბღათ თე საქმეეფს.
ᲛᲖᲐᲗ ᲥᲝᲠᲔᲥᲝ ᲓᲔᲓᲐᲛᲘᲬᲐᲨ ᲒᲐᲡᲥᲕᲐᲛᲔᲑᲔᲚᲝ?
მუჟამსით, იეჰოვაქ ადამიანეფს მითითება მეჩჷ დო უწუ: „გეიოფშით დედამიწა დო ქემინჯით თის“, თინა გულისხმენდჷ, ნამდა მთელ დედამიწა სამოთხეთ გინაშქვესკო (დაბ. 1:28). თე დუდშეიან მითითებას შეასრულენს თინა, მით დემკვიდრენს დედამიწას. სამოთხე უცფას ვეჸუაფ, მუშენდა ედემიშ ბაღ ბრელ ხან რე, მუთ ვა არსებენს. არმაგედონიშ უკულ ქიანაშ მაჸინა ომუშებელ, ნამდა გუვასქვამათ თი ადგილეფ, ნამუთ ამდღა განადგურებულ რე. თენა, მუშო ოკო რაგად, მართალო დიდ საქმე იჸუაფ.
თექ შილებე ქუგმოშინან თი საქმეეფ, ნამუთ ბაბილონშე დორთელ ისრაელეფს აფდეს ოკეთებელ. 70 წანას თინეფიშ ქიანას მითინ ვა ცხოვრენდჷ, მარა ესაიაქ იწინასწარმეტყველ, ნამდა იეჰოვაშ მოხვარათ თინეფს შეიალებედეს, აღადგინესკო თინა. წინასწარმეტყველებას ჭარუდ: „თიშ უდაბნოს ედემს ქუგურუანს დო კოჩ ვახორანსინ ფერ ადგილს — იეჰოვაშ ბაღის“ (ეს. 51:3). თინეფს შეიალებუეს თეშ კეთებაქ. თეშნერო, იეჰოვაშ კურთხევათ, მით დედამიწას დემკვიდრენა, თის სამოთხეთ გინაშქვანა. ასეშე შეილებ დამტკიცე, ნამდა გოკო, მონაწილება მიღე თე საქმეს.
ართ-ართ საშვალება, მუდგათ თეს ჯგირო ოძირანქ, რე თინა, მუჭო იცვენქ სისუფთავეს ჸუდეს დო ელ-მოლს. თიშ უმკუჯინუო, იცვენა დო ვარ სქან მეზობელეფ სისუფთავეს, სი იშენით ოკო დეცვე თინა. თეს გეძინელ, შეილებ მონაწილება მიღე დარბაზეფიშ, თინეფ შქას საკონგრესო დარბაზეფიშ, დასუფთებაშ საქმეს. მდგომარეობა ხეს ქოინწყუნს-და, სტიქიურ უბედრობაშ დროს შეილებ სქან ტერიტორიას მოხალისეთ იმსახურე. თეშნერო ოძირანქ, ნამდა მზათ რექ, მეხვარე და დო ჯიმალეფს საჭირო დროს. ქოკითხ სქან დუდის: „ხომ ვა დიბგურუა თიცალ საქმე, ნამუთ სამოთხეს ცხოვრებაშ საშვალებაქ ქუმმაჩ-და, თექ გიმოდირთუ?“.
ᲛᲖᲐᲗ ᲥᲝᲠᲔᲥᲝ ᲒᲐᲗᲔᲚᲔᲑᲣᲠᲔᲤᲘᲨ ᲛᲐᲮᲕᲐᲠᲔᲑᲔᲚᲝ?
იაიროსიშ ცირასქუაშ გათელებაშ უკულ ხეთეშე იესოქ თქუ, ნამდა ბაღანაშა მუდგარენ ოჭკუმალ ქიმუჩამდესკო (მარ. 5:42, 43). 12 წანერ ბაღანა ძღაბშე ზრუნვა ვეჸუაფუდ რთულ საქმე, მარა დეფიქრით, მუშმადიდა საქმე იჸუაფ ოკეთებელ, მუჟამსით იესო შეასრულენს მუშ დუნაპირებუს: „არძა ღურელ, მით ღორონთიშ მეხსიერებას რე, თიშ ხონარს ქიგეგონენს დო გეთელებ“ (იოან. 5:28, 29). მართალ რე, ბიბლია თეშ გურშენ ბრელ დეტალს ვეჩიებ, მარა არგამა რე, ნამდა თინეფს დესაჭირებნა მოხვარა, ნამდა უღდან ოჭკუმალ, დუდიშგითაფორაფალ დო მიკაქუნალ. შეილებნო ასეშე ქაძირუე, ნამდა მზათ რექ თე საქმეშ ოკეთებელო? გუვარჩუათ მუსხირენ საკითხ.
მუჭო შეილებ ამდღარშე ოძირუე, ნამდა მზათ რექ, დემკვიდრე დედამიწა?
მუჟამსით განცხადება იკეთებაფუაფ, ნამდა რაიონულ ზედამხედველ თქვან კრებაშა მოურს, გეგმოხანტუნქო სურვილს, სადილშა ქუდაპატიჟე? მუჟამსით სპეციალურ სრულ დროთ მსახურ ბეთელშე მსახურებაშ შხვა ფორმას ინიშნებ ვარდა რაიონულ ზედამხედველ ათენს გილმალ მსახურებას, ქეშეილებნო, ქიმეხვარე თინეფს ოცხოვრებელ ადგილიშ გორუას? სქან ტერიტორიას რეგიონულ ვარდა სპეციალურ კონგრეს დაგეგმილ ქორენ-და, ხომ ვემსახურენდჷ მოხალისეთ კონგრესშახ ვარდა კონგრესიშ უკულ? ვარდა ნებისმიერ დროს მზათ ხომ ვეჸიდ, ქუდოხვადკო დელეგატეფს?
ᲛᲖᲐᲗ ᲥᲝᲠᲔᲥᲝ ᲒᲐᲗᲔᲚᲔᲑᲣᲠᲔᲤᲨᲐ ᲓᲐᲒᲣᲠᲐᲤᲐᲚᲝ?
საქმეეფიშ 24:15-შე ვორწყეთ, ნამდა ოკო ველდათ მილიარდობით ადამიანიშ გათელებას. თინეფშე ბრელს თეიშახ ვა შიბჷ იეჰოვაშ გაჩინებაფაშ საშვალება. თეშ საშვალება თინეფს გათელებაშ უკულ მიაჩამნა.a თე საქმეს მონაწილებას ღორონთიშ ართგურ დო გამოცდილ მსახურეფ მიღენა (ეს. 11:9). შარლოტას, ნამუთ ქადაგენდჷ ევროპას, სამხრეთ ამერიკას დო აფრიკას, შურ ოლჷ თე დროშ მოულაშა. თინა ხიოლით იჩიებ: «მანგარო მოკო გათელებურეფშა გურაფა. მუჟამსით ბკითხულენქ მიდგარენიშ გურშენ, მით ადრე ცხოვრენდჷ, ხშირას ფიფქრენქ: „თე პიროვნება იეჰოვას ქიჩინენდკონ, თიშ ცხოვრება გვალო შხვანერ იჸუაფუდ“. შურ მოლჷ, მუჟამ ვეჩიებუქ გათელებურეფს თიშ გურშენ, მუთ თინეფქ გიშეტუეს».
იეჰოვაშ თი ართგურ მსახურეფს ხოლო, მით იესოშახ ცხოვრენდეს დედამიწას, ბრელ მუდგარენ აჸინა დაგურაფალ. დეფიქრით, მუშმადიდა ხიოლ დო პატი იჸუაფ დანიელშა მუშ წინასწარმეტყველებაშ შესრულებაშ ენწყუმა, ნამუთ მუქ ჭარჷ, მარა ბოლოშა ვენანჭუდ (დან. 12:8). ვარდა რუთ დო ნაომიშა თიშ ენწყუმა, ნამდა თინეფიშ გამნარყშე ართ-ართ მესია რდჷ. ჩქი ხიოლით მიბღენთ მონაწილებას თე მსოფლიო საგანმანათლებლო პროგრამას, ნამდგაშა მუთუნს ვაცილებე, მუშენდა უბადო ქვეყნიერება მეტო ვეარსებენს.
მუჭო შეილებ ასეშე ოძირუე, ნამდა მზათ რექ, მონაწილება მიღე თე პროგრამას? თეშ ოკეთებელო ართ-ართ საშვალება რე, გაუჯგუშე გურაფაშ უნარეფ დო რეგულარულ მონაწილება მიღე მსოფლიო სამქადაგებლო საქმეს (მათ. 24:14). ხანიშ ვარდა შხვა მიზეზეფიშ გურშენ ამდღა თე საქმეეფს გოკონ თიზმაშ კეთებაშ საშვალება ვაიღუნ-და, ნამ შეილებუნ თიშ კეთებათ ქაძირე, ნამდა მზათ რექ, მონაწილება მიღე გათელებურეფშა გურაფაშ საქმეს.
თაშ ნამდა, დეფიქრ თე მნიშვნელოვან კითხვეფშე: ნამდვილო ქელუქო, ნამდა დემკვიდრენქ დედამიწას? ქუგოკონო, მონაწილება მიღე დედამიწაშ გასქვამებაშ, გათელებურეფიშ მოხვარაშ დო თინეფშა გურაფაშ საქმეს? სი შეილებ ოძირუე, ნამდა მზათ რექ, მარადიულო იცხოვრე დედამიწას, მუჟამსით მონაწილებას მიღენქ თიცალ საქმეეფიშ კეთებას, მუნერით არმაგედონიშ უკულ გაჸი ოკეთებელ.
a ქოძირით 2022 წანაშ სექტემბერიშ „გინაჯინალ კოშკის“ მოჩამილ სტატია „ბრელიშ სიმართლეშახ მიმაჸუნაფალეფ“.