„გამანგარით ართიან“

1. მუჭოთ 1 თესალონიკელეფიშ 5:11-ის ჭარჷ, მუ საქმეს ბღებულენთ არძა მონაწილებას?

ᲥᲘᲛᲔᲘᲦᲔᲑᲜᲝ დღას მონაწილება დარბაზიშ აშენებას ვარდა თიშ გარემონტებას? თაშ ქორენ-და, ჯგირო რშუდას იჸი მუს გინაფლენდჷ, მუჟამსით პირველო დესწრჷ თექ შეხვალამას; იეჰოვაშ მანგარ მარდულ იჸუაფუდ. ალბათ დუდის თიცალ ბედნერო გინაფლენდჷ, ნამდა ხიოლით განგარინედ დო თეშ გურშენ ობირეშიშ ბირა ხოლო გიჭირდჷ. ჩქინ ჯგირო შენებულ დარბაზეფ განადიდენს იეჰოვას. მარა ხოლო უმოსო განვადიდენთ თის, მუჟამსით შხვანერ მშენებლობას ბღებულენთ მონაწილებას. თეშა პირდაპირ გაგებათ მშენებლობაშე უმოს მნიშვნელოვან მუდგარენ მიშურს — თი ადამიანეფიშ გურშა ელაკინა, მით თეცალ შენობეფშა იეჰოვაშ თაყვანიშოცემებელო მოულა. მუჟამსით მოციქულ პავლექ 1 თესალონიკელეფიშ 5:11-ის მოჩამილ სიტყვეფ ჭარჷ, იმენდ უღუდ, ნამდა ქრისტიანეფ მონაწილებას მიღენდეს თეცალ მშენებლობას (წეკითხით). ბერძნულ სიტყვა, ნამუთ თე მუხლის თარგმნილ რე, მუჭოთ „გამანგარება“, შილებე „შენებას“ ხოლო ნიშნენდას.

2. მუს გუვარჩიენთ თე სტატიას?

² პავლე მოციქულ მიშეშ შხვეფიშ მდგომარეობაშა დო ჯგირო უჩქუდ, მუჭო ელუკინკო გურშა და დო ჯიმალეფს; თინა თეშ მართალო ჯგირ მაგალითის მარზენა. თე სტატიას გუვარჩიენთ, მუჭო ოხვარუდ თინა თანაქრისტიანეფს, 1) გაურზესკო სირთულეეფს, 2) უღდესკო ართიან შქას მშვიდობა დო 3) გამანგარესკო იეჰოვაშ მიმართ რწმენა. მორთ გუვარჩუათ, მუჭო შემლებნა მივაჸუნათ თიშ მაგალითის დო გუვამანგარათ და დო ჯიმალეფ (1 კორ. 11:1).

ᲞᲐᲕᲚᲔ ᲝᲮᲕᲐᲠᲣᲓ ᲓᲐ ᲓᲝ ᲯᲘᲛᲐᲚᲔᲤᲡ, ᲒᲐᲣᲠᲖᲔᲡᲙᲝ ᲡᲘᲠᲗᲣᲚᲔᲔᲤᲡ

3. მუ გაწონასწორებულ დამოკიდებულება უღუდ პავლეს?

³ პავლეს მანგარო უჸორდჷ და დო ჯიმალეფ. სირთულეეფ თიშო უცხო ვა რდჷ. თის ბრელ მუდგარენ აფუდ გინნაღელ, ათეშენ შეულებუდ ქინანჭუკო თინეფიშ მდგომარეობას დო გურშა მიღკო თანაქრისტიანეფიშ გაჭირება. ართშა პავლეს ფარაქ ქეშელუ, ათეშენ თის სამუშა ოკო დუგორუდკო, ნამდა გეიჯუმუკო მუშ დუდ დო თანამსახურეფ ხოლო (საქ. 20:34). თის კარვეფიშ ჭალა უჩქუდ. კორინთშა გენორთუნ, დუდშე აკვილა დო პრისკილაწკუმა მუშენდჷ, მუშენდა თინეფ ხოლო კარვეფს ჭანდეს. მარა „ირ საბატონს“ იუდეველეფ დო ბერძნეფწკუმა ქადაგენდჷ. თიშ უკულ, მუთ სილა დო ტიმოთექ ქუმორთეს, „პავლექ მთლიანო გინილ ღორონთიშ სიტყვაშ ქადაგებაშა“ (საქ. 18:2—5). თის დღას ვა გოჭყოლად მუშ ცხოვრებაშ მთავარ მიზან — იეჰოვაშ მსახურება. პავლე ბრელს ორთუდ ღორონთიშ საქმეშო დო მუშ დუდიშ ეიოჯუმალარო ხოლო ხანდენდჷ. ათეშენ არჩქილედ და დო ჯიმალეფიშ დო თავისფალო შეულებუდ, გურშა ელუკინკო თინეფს. პავლე გაშინანდჷ და დო ჯიმალეფს, ნამდა ირდღაშიან ოწუხებელს ვემეჩესკო საშვალება, გაჭყორდესკო, „მუ რე უმოს მნიშვნელოვან“ — ირნერო ემსახურესკო იეჰოვას (ფილ. 1:10).

4. მუ აკეთეს პავლე დო ტიმოთექ, ნამდა ქიმეხვარესკო და დო ჯიმალეფს, ქუგურზესკო თხოზინს?

⁴ თესალონიკეშ კრებაშ ჩამოყალიბებაშ უკულ ხეთეშე ახალ ქრისტიანეფქ სერიოზულ წინააღმდეგობას ქეშეხვადეს. «მოწინააღმდეგეეფქ პავლე დო სილა ვა ძირესინ, მუსხირენ ჯიმა მიდასერგელუეს ქალაქიშ გამგებელეფშა დო ღვარანდეს: „თენეფ კეისარიშ კანონეფს ოწინააღმდეგნა“» (საქ. 17:6, 7). წერმიდგინით, მუჭო აშქურნედეს თე ახალ ქრისტიანეფს, მუჟამსით ქიმეხვადეს, ნამდა ხალხ თინეფიშ წინააღმდეგ მიშჷ. თინეფს შილებე მსახურებაშ ხიოლქ მეუდინესკო, მარა პავლეს ვაკოდ, თექ მოხვადკო. მართალ რე, პავლე დო სილას ოულარ აფდეს, მარა ახალ კრებას უყურადღებოთ ვეტენდეს. პავლე თესალონიკელ ქრისტიანეფს გაშინანდჷ: „მიდვაშქვით ჩქინ ჯიმა ტიმოთე, ნამდა გუგამანგარესკო დო გურშა ეიქექესკო თქვან რწმენაშ გამანგარებელო დო ვედესუსტკო თიქ თე განსაცდელეფიშ გურშენ“ (1 თეს. 3:2, 3). შილებე ტიმოთექ ხოლო შეხვადკო თხოზინს მუშ ქალაქის, ლისტრას. თის მუშ თოლით აფუდ ნაძირეფ, მუჭო გამანგარ პავლექ თექიან და დო ჯიმალეფ დო მუჭო მეხვარ იეჰოვაქ თინეფს. თე ირფელიშ გურშენ ტიმოთეს შეულებუდ დარწმუნკო ახალ და დო ჯიმალეფ, ნამდა თინეფიშ შემთხვევას ხოლო ირფელ ჯგირობუაშა დითირუდ (საქ. 14:8, 19—22; ებრ. 12:2).

5. მუ ჯგირობუა მოუღ ჯიმა ბრაიანტის უხუცესიშ მოხვარაქ?

⁵ ხოლო მუჭო ამანგარენდჷ პავლე თანაქრისტიანეფს? ლისტრა, იკონიონ დო ანტიოქიას პავლე დო ბარნაბაშ მაჟია ინულაშ დროს თინეფქ „თითოულ კრებას უხუცესეფ დანიშნეს“ (საქ. 14:21—23). მუშო ოკო რაგად, უხუცესეფ გურშა ეუქექუანდეს კრებეფს, მუთ ამდღა ხოლო თაშ რე. ყურადღება ქიმიაქცით ჯიმა ბრაიანტიშ სიტყვეფს: „15 წანერ ვორდჷ, მუჟამსით მუაჩქიმქ ჸუდეშე მიდართჷ დო დიაჩქიმქ გერიცხჷ. დუდის მეტებულო ბგინაფლენდჷ დო გურგოტახილ ვორდჷ“. მუქ მეხვარ თის თეცალ რთულ დროს? ბრაიანტ იჩიებ: „ართ უხუცეს, ტონი, შეხვალამეფიშ დო შხვა დროს ხოლო ირიათო ოცადუდ ჩქიმწკუმა დორაგადაფას. თინა მეჩიებუდ თინეფიშ გურშენ, მით სირთულეეფიშ უმკუჯინუო იშენით ბედნერეფ რდეს. უკულ ფსალმუნიშ 27:10 გეშამკითხჷ. თინა ხშირას მეჩიებუდ ხიზკიაშ გურშენ, ნამუთ ართგურო ომსახურუდ იეჰოვას თიშ უმკუჯინუო, ნამდა მუმა ვარზენდჷ ჯგირ მაგალითის“. მუჭო იმოქმედ თე პრაქტიკულ მოხვარაქ ბრაიანტშა? თინა იჩიებ: „ტონიშ ელარნაქ გინმოჭყვიდირაფუ, ქიდიბჭყიკო სრულ დროთ მსახურება, ნამდგას ნამდვილ კმაყოფილება მოუღ“. უხუცესეფ, მზათ რდათ, ქიმეხვარათ თინეფს, მიდგას ბრაიანტცალო „გემუან სიტყვა“ ოსაჭირნა (იგავ. 12:25).

6. მუჭო ირინუანდჷ პავლე ღორონთიშ მსახურეფიშ ისტორიეფს და დო ჯიმალეფიშ გამანგარებელო?

⁶ პავლექ გაშინ თანაქრისტიანეფს, ნამდა იეჰოვაშ მოხვარათ „მოწმეეფიშ დიდ ლაშქარქ“ სირთულეეფს გურზჷ (ებრ. 12:1). თის არჩქილედ, ნამდა თინეფიშ ისტორიეფ, მიდგაქ გიორჯგინეს არძანერ სირთულეს, გაბედულებას ქიმეჩანდჷ და დო ჯიმალეფს დო ქიმეხვარებუდ მთავარ ყურადღება „ცოცხალ ღორონთიშ ქალაქშა“ გეგნიღესკო (ებრ. 12:22). ამდღა ხოლო თაშ რე. გურშა ველაიკინანანო, მუჟამსით კითხულენთ, მუჭო მეხვარ იეჰოვაქ გედეონს, ბარაკის, დავითის, სამუელს დო ხოლო შხვეფს? (ებრ. 11:32—35). მუშ რაგად შემლებნა რწმენაშ თანამედროვე მაგალითეფშე? იეჰოვაშ მოწმეეფიშ მსოფლიო მთავარ სამართველოს ხშირას ბღებულენთ წერილეფს და დო ჯიმალეფშე, მით იჩიებნა, ნამდა თინეფიშ რწმენა გამანგარ ართგურ თანამედროვე მოწმეეფიშ ბიოგრაფიეფიშ კითხირქ.

ᲞᲐᲕᲚᲔ ᲝᲫᲘᲠᲐᲜᲓᲷ ᲓᲐ ᲓᲝ ᲯᲘᲛᲐᲚᲔᲤᲡ, ᲛᲣᲭᲝ ᲣᲦᲓᲔᲡᲙᲝ ᲛᲨᲕᲘᲓᲝᲑᲐ ᲐᲠᲗᲘᲐᲜ ᲨᲥᲐᲡ

7. მუს გურაფლენთ რომაელეფიშ 14:19—21-ის მოჩამილ პავლეშ რჩევაშე?

⁷ და დო ჯიმალეფს ვამანგარენთ, მუჟამსით კრებას ხეს ვუნწყუნთ მშვიდობას. განსხვავებულ აზრის ვა ვარზენთ ჩქინ გორთუალაშ საშვალებას. ოკო ვევეცადათ ჩქინიშ გოჸუნას თიცალ საკითხწკუმა დაკავშირებით, მუდგაშ დროს ბიბლიურ პრინციპეფ ვერღვიებ. გუვარჩუათ მაგალით: რომიშ კრებას მუჭოთ იუდეველ, თეშ უცხოტომელ ქრისტიანეფ ხოლო რდეს. მოსეშ კანონიშ გაუქმებაშ უკულ ქრისტიანეფს მეტო ვემეთხიებდეს ნამთინე ოჭკუმალიშ ჭკუმუაშე ვარიაშ რაგად (მარ. 7:19). თე დროშ უკულ ნამთინე იუდეველ ქრისტიან თავისფალო ჭკუმუნდჷ არძანერ ოჭკუმალს, მარა ნამთინეს სინდის ვარზენდჷ თეშ უფლებას. თე განსხვავებულ აზრიშ გურშენ კრებაქ გირთჷ. ათეშენ პავლექ ყურადღება გამახვილ, მუსხით მნიშვნელოვან რდჷ კრებას ვა უდინუაფდესკო მშვიდობა. თიქ თქუ: „სქან ჯიმა დებრკოლებ-და, უჯგუშ იჸუაფ ვა ჭკუმე ხორც, ვაშვე ღვინ დო შხვა თიცალ მუთუნ ვაკეთე“ (წეკითხით რომაელეფიშ 14:19—21). თეშნერო პავლექ თანამორწმუნეეფს ქაძირუ, მუნერ გლახათ იმოქმედენდჷ უთანხმოება მუჭოთ თითოულ ქრისტიანშა, თეშ მთელ კრებაშა. პავლე თიშო ხოლო მზათ რდჷ, ვაკეთკო თიცალ მუდგარენეფ, მუთ შხვას დაბრკოლენდჷ (1 კორ. 9:19—22). ჩქი ხოლო გუვამანგარენთ და დო ჯიმალეფს დო მშვიდობას შეუნწყუნთ ხეს, მუჟამსით ნირზის ვედიბჭყანთ თიცალ საკითხეფწკუმა დაკავშირებით, ნამუთ პირად გინაჭყვიდირალ რე.

8. მუჭო მიქცუ პავლექ, მუჟამსით კრებაშ მშვიდობაქ საფრთხეშ თუდო ქიგედირთჷ?

⁸ პავლექ თიშ ჯგირ მაგალით ხოლო დომტეს, მუჭო ოკო ვა ვოდინუათ მშვიდობა თიმწკუმა ხოლო, მუჟამსით მნიშვნელოვან საკითხეფწკუმა დაკავშირებით შხვეფს განსხვავებულ აზრ უღნა. მაგალთო, ნამთინე პირველ საუკუნეშ კრებას უცხოტომელ ქრისტიანეფშე წინადაცვეთას ითხინდჷ, შილებე თიშენ, ნამდა დუდ ეუჩილითესკო შხვა იუდეველეფიშ უკმაყოფილებას (გალ. 6:12). პავლე ვათანხმუდ თე აზრის, მარა თიშ მანგიორო, ნამდა მუშიშ გოჸუნაფას ეცადკო, თანდაბლურო ქელაკითხუ რჩევა მოციქულეფს დო უხუცესეფს იერუსალიმს (საქ. 15:1, 2). პავლეშ თეცალ საქციელქ მეხვარ პირველ საუკუნეშ კრებაშ ქრისტიანეფს, ვა უდინუაფდესკო ხიოლ დო მშვიდობა (საქ. 15:30, 31).

9. მუჭო შემლებნა მივაჸუნათ პავლეშ მაგალითის?

⁹ სერიოზულ უთანხმოებაქ გორჩქინდ-და, მშვიდობას შევუნწყუნთ ხეს, მუჟამსით ქიმვაჸუნუთ თინეფიშ მითითებეფს, მით იეჰოვაქ კრებაშ ოხემძღვანელებერო დანიშნჷ. ხშირას ბიბლიაშა გერსხილ რჩევეფიშ ძირაფა შემლებნა ჩქინ პუბლიკაციეფს ვარდა ორგანიზაციაშე მეღებულ მითითებეფს. მთავარ ყურადღებას თე მითითებეფიშ შესრულებაშა გეგნიბღანთ დო ჩქინიშ გოჸუნას ვევეცადებუთ-და, კრებას მშვიდობას შეუნწყუნთ ხეს.

10. ხოლო მუ აკეთ პავლექ, ნამდა ხე შეუნწყუკო კრებას მშვიდობას?

¹⁰ პავლე თით ხოლო უნწყუნდჷ ხეს მშვიდობას, ნამდა ყურადღება და დო ჯიმალეფიშ ჯგირ თვისებეფშა გინუღუდ დო ვართ ხოლო გლახაშა. მაგალთო, რომაელეფშა მეჭარილ წერილიშ ბოლოს პავლე ბრელ და დო ჯიმას სახელეფით მიშინუანს დო თინეფიშ გურშენ დადებითო იჩიებ. შემლებნა მივაჸუნათ თიშ მაგალითის დო იფჩუათ და დო ჯიმალეფიშ ჯგირ თვისებეფიშ გურშენ. თეშნერო კრებას და დო ჯიმალეფ შქას უმოს ხოლოშიან ურთიერთობაშ დო ჸოროფაშ გავითარებას შეუნწყუნთ ხეს.

11. მუჭო შემლებნა მშვიდობაშ დორთინაფა, მუჟამსით კრებას უთანხმოება მაშინა?

¹¹ მინშა მოწიფულ ქრისტიანეფს ხოლო შილებე ქაშუან უთანხმოებაქ. თაშ მოხვად პავლე დო თიშ ხოლოშიან მეგობარ ბარნაბაშ შემთხვევას. მაჟია მისიონერულ მსახურებაშა მარკოზიშ ჸონაფაშ გურშენ თინეფს შხვადოშხვა აზრ უღდეს, შედეგო ჟირხოლოქ „მანგარო გერისხჷ დო ართიანს ჩეთხუეს“ (საქ. 15:37—39). მარა პავლე, ბარნაბა დო მარკოზიქ დირთინუეს მშვიდობიან ურთიერთობა, მუდგათ ოძირეს, ნამდა აფასენდეს კრებას მშვიდობას დო ართობას. უმოს გვიანო პავლექ დადებითო მიშინუ ბარნაბა დო მარკოზ (1 კორ. 9:6; კოლ. 4:10). ჩქი ხოლო საჭირო რე, მშვიდობიანო მუვაგვარათ უთანხმოებეფ, ნამუთ კრებას მაშინა, დო ყურადღება და დო ჯიმალეფიშ ჯგირ თვისებეფშა გეგნიბღათ. თეშნერო ხეს შეუნწყუნთ კრებას მშვიდობას დო ართობას (ეფეს. 4:3).

ᲞᲐᲕᲚᲔ ᲐᲛᲐᲜᲒᲐᲠᲔᲜᲓᲷ ᲓᲐ ᲓᲝ ᲯᲘᲛᲐᲚᲔᲤᲘᲨ ᲠᲬᲛᲔᲜᲐᲡ

12. მუ სირთულეეფს ხვადუნა ჩქინ და დო ჯიმალეფ?

¹² მუჟამსით გურშა ელუკინანთ და დო ჯიმალეფს, იეჰოვაშ მიმართ თინეფიშ რწმენას ვამანგარენთ. ნამთინეს ოჯახიშ წევრ, თანამშრომელ ვარდა თანაკლასელ გაძიცანს. შხვეფს ჯანმრთელობაშ სერიოზულ პრობლემეფ უღნა, ვარდა უარყოფით გრძნობეფს ობრძოლნა. მინ ბრელ ხანიშ ნათილ ქრისტიან წანეფ რე, მუთ არმაგედონიშ მოულას ელჷ. თეშნერ სიტუაციეფქ შილებე ქრისტიანიშ რწმენა გეგმოცადას. პირველ საუკუნეშ ქრისტიანეფ ხოლო ხვადუდეს თეცალ სირთულეეფს. მუ აკეთ პავლექ, ნამდა თინეფს რწმენა გუმანგარკო?

13. მუჭო მეხვარ პავლექ თინეფს, მიდგას მუნეფიშ რწმენაშ გურშენ გაძიცანდეს?

¹³ პავლე ირინუანდჷ წმინდა წერილეფს, ნამდა გუმანგარკო რწმენა და დო ჯიმალეფს. მაგალთო, ებრაელ ქრისტიანეფს შილებე ვა უჩქუდესკო, მუჭო უპასუხესკო ოჯახიშ წევრეფს, მით აცხადენდჷ ნამდა იუდაიზმშა ქრისტიანობას ვემიართინედ. მუშო ოკო რაგად, ებრაელეფშა მეჭარილ პავლეშ წერილ მანგარო გამანგარენდჷ ქრისტიანეფს (ებრ. 1:5, 6; 2:2, 3; 9:24, 25). თინეფს პავლეშ ლოგიკურ მსჯელობაშ გიმორნაფათ შეულებდეს პასუხ ქიმეჩესკო მოწინააღმდეგეეფს. ჩქი ხოლო შემლებნა მივეხვარათ თანამორწმუნეეფს, ნამდა გეგმირინუან ბიბლიაშა გერსხილ პუბლიკაციეფ თინეფშა პასუხიშ მიოჩამალო, მით გაძიცანა. ჩქინ ახალგაზრდა და დო ჯიმალეფს გუმაჭყაფალიშ არსებობაშ ჯერან თიშ გურშენ ქიგიაძიცენან-და, შემლებნა მუნეფიშ პოზიციაშ დამტკიცებელ ფაქტეფიშ გორუას ქიმვეხვარათ ბროშურეფშე „მუჭო გორჩქინდჷ სიცოცხლექ?“ [ქორთ.] ვარდა „სიცოცხლეშ გოჭყაფა — ხუთ კითხვა, ნამდგაშე ღირჷ დაფიქრება“ [ქორთ.].

14. ხოლო მუს ორთუდ პავლე თიშ უმკუჯინუო, ნამდა ბრელს ხანდენდჷ გურაფა დო ქადაგებაშ საქმეს?

¹⁴ პავლექ ელუჩ და დო ჯიმალეფს, „ჯგირ საქმეეფით“ გეგმირჩქინესკო ჸოროფა (ებრ. 10:24). თინა და დო ჯიმალეფს ხვალე სიტყვათ ვარინ, საქმეთ ხოლო ოხვარუდ. მაგალთო, მუჟამსით იუდეას შქირენაქ ქიდიჭყჷ, პავლე რდჷ ართ-ართ, მიდგაქ თექიან თანაქრისტიანეფშო საჭირო მუდგარენეფ ენიღ (საქ. 11:27—30). მართალ რე, პავლე ბრელს ხანდენდჷ ქადაგება დო გურაფაშ საქმეშო, მარა თინა ირიათო გორუნდჷ საშვალებეფს, მეხვარკო თინეფს, მიდგას მატერიალურო ელარნა ოსაჭირუდ (გალ. 2:10). თეშნერ მოქციებათ პავლე ამანგარენდჷ თანაქრისტიანეფიშ ნდობას, ნამდა იეჰოვა ქიზრუნენდჷ თინეფშო. ჩქი ხოლო ვამანგარენთ და დო ჯიმალეფიშ რწმენას, მუჟამსით ჩქინ ძალას, დროს დო უნარეფს იბრინუანთ სტიქიურ უბედრობეფიშ დროს დაზარალებურეფიშ მახვარებელო. და დო ჯიმალეფს მსოფლიო სამქადაგებლო საქმეშო რეგულარულო კეთებულ შესაწირავეფით ხოლო ვოხვარუთ. თე დო შხვა საშვალებეფით თინეფს უმანგარენთ იეჰოვაშ ნდობას, ნამდა ღორონთ დღას ვემიოტენს თინეფს.

15, 16. მუჭო ოკო მივექცუათ თინეფს, მიდგაშ რწმენაქ დესუსტჷ?

¹⁵ პავლეს გურ ველაფ თინეფიშ მოხვარაშა, მიდგას რწმენაქ დესუსტჷ. პავლე მიშეშ თინეფიშ მდგომარეობაშა, გემუანო ურაგადუდ დო თიშ სიტყვეფშე თე და დო ჯიმალეფიშ მიმართ დადებით დამოკიდებულება იძირედ (ებრ. 6:9; 10:39). მაგალთო, ებრაელეფშა მეჭარილ წერილს პავლე ხშირას იჩიებუდ პირველ პირს დო ირინუანდჷ სიტყვას „ჩქი“, მუდგათ ოძირანდჷ, ნამდა თი რჩევაშა, ნამდგას თინეფს არზენდჷ, მუს ხოლო აფუდ მიოჸუნალ (ებრ. 2:1, 3). პავლეცალო ჩქი ხოლო ვემიოლნა გურ თინეფიშ მოხვარაშა, მიდგას რწმენაქ დესუსტჷ. თეშ მანგიორო, თინეფით შურ დო გურით ვორეთ დაინტერესებულ, მუდგათ ვამანგარენთ დო ჩქინ ჸოროფას ვუმტკიცენთ. მუს ვურაგადუთინ თიწკუმა ართო, თინა ხოლო რე მნიშვნელოვან, ორაგადე გემუანას დო ლიბას ქუწუათ.

¹⁶ პავლე არწმუნენდჷ და დო ჯიმალეფს, ნამდა იეჰოვა ორწყედ თინეფიშ ჯგირ საქმეეფს (ებრ. 10:32—34). თეცალ მუდგარენიშ კეთება ჩქი ხოლო შემლებნა თინეფიშ მახვარებელო, მიდგას რწმენაქ დესუსტჷ. მაგალთო, ქოფთხუათ, ქიმეჩუან, მუჭო გეგეს ჭეშმარიტება ვარდა დეფიქრან თი შემთხვევეფშე, მუჟამსით მუნეფიშ ცხოვრებას იეჰოვაშ ალარნა იგინეს. თე სიტუაცია შემლებნა ქიბრგებუათ დო დუვარწმუნათ, ნამდა იეჰოვას ვა გოჭყოლად ულირს თინეფიშ ჸოროფათ კეთებულ საქმეეფ დო ვართ მომავალს მიოტენს თინეფს (ებრ. 6:10; 13:5, 6). თეცალ ჩიებეფქ შილებე ჩქინ ძვირფას თანაქრისტიანეფს მეხვარას, მტკიცას გეგნოჭყვიდან იეჰოვაშ მსახურებაშ გაგრძელება.

„ᲒᲣᲠᲨᲐ ᲔᲚᲣᲙᲘᲜᲘᲗ“

17. მუშ გაუჯგუშება შემლებნა გუვაგრძელათ?

¹⁷ მუჭოთ მოხელე აუჯგუშენს მუშ უნარეფს, თეშ ჩქი ხოლო შემლებნა გუვაუჯგუშათ შხვეფშა გურიშელაკინაშ ხარისხ. შემლებნა და დო ჯიმალეფ გუვამანგარათ თინეფიშ მაგალითეფით, მიდგაქ ულირს გურზეს სირთულეეფს. ხეს შევუნწყუნთ მშვიდობას, მუჟამსით შხვეფიშ დადებითშა გეგნიბღანთ ყურადღებას, ირნერო ვეცადებუთ მშვიდობაშ დორთინაფას უთანხმოებეფიშ დროს დო დუდის ეუჩილითუანთ ჩქინ პირად აზრიშ გოჸუნაფას. თეწკუმა ართო, გუვაგრძელენთ და დო ჯიმალეფიშ რწმენაშ გამანგარებას, მუჟამსით თინეფწკუმა ართო მნიშვნელოვან ბიბლიურ საკითხეფშე ქიფჩიებუთ, პრაქტიკულო ქელუდირთუთ დო სულიერო მოსუსტებულეფს ქიმვეხვარებუთ.

18. მუშ კეთება გაფნა გინოჭყვიდილ?

¹⁸ თინეფ, მით თეოკრატიულ მშენებლობეფს ღებულენა მონაწილებას, ბედნერეფ დო კმაყოფილეფ რენა. თეშნერო, ჩქი ხოლო ბგინაფლენთ ბედნერობას დო კმაყოფილებას, მუჟამსით და დო ჯიმალეფს ვოხვარუთ რწმენაშ გამანგარებას. შენობა მუდგარენ დროს აკოცენს, მარა ჩქინ ხანდაშ შედეგეფქ შილებე მარადიულო ქუდოსქიდას. მორთ გინოჭყვიდილ მაფდან, ნამდა გურშა ელუკინათ დო გუვამანგარათ ართიან (1 თეს. 5:11).