იეჰოვას საშვალება ქიმეფჩჷ, ქუხემძღვანელას ჩქიმ ნაბიჯეფს

ᲘᲜᲒᲚᲘᲡᲨᲔ ᲐᲤᲠᲘᲙᲐᲨᲐ ᲒᲘᲜᲣᲚᲐ

დებაბდჷ 1935 წანას ქალაქ დარლასტონს, ინგლისიშ თი რეგიონს, სოდეთ ბრელ ქარხანეფიშ გურშენ ირიათო კუმა რე. სოდგარენ ოთხ წანერ ვორდჷ, მუჟამსით ჩქიმ მშობლეფქ იეჰოვაშ მოწმეეფწკუმა ბიბლიაშ გურაფა ქიდიჭყეს. 14—15 წანერ იპჸიდ, მუჟამსით დებრწმუნ, ნამდა თენა ჭეშმარიტება რდჷ დო 1952 წანას 16 წანერ ვორდინ თეშ დიბნათ.

თე დროს მუშობა ქიდიბჭყჷ დიდ ქარხანას, სოდეთ მანქანეფიშ ნაწილეფს დო ხელსაწყოეფს ამზადენდეს. თექ მუშობაწკუმა ართო საქმეს ხოლო მოგურუანდეს. გურაფაშ უკულ თე კომპანიას ჯგირ ადგილ მაშიდ. მანგარო მობწონდჷ ჩქიმ საქმე.

მნიშვნელოვან გადაწყვეტილებაშ წოხოლე ქიგებდირთჷ, მუჟამსით გილმალ ზედამხედველქ მიწუ, ნამდა ჩქინ კრებას, უილენჰოლს, ქუხემძღვანელკო წიგნიშ შესწავლას. თე დროშო ჟირ კრებას ვოსწრუდ. შქამარაშ შეხვალამას ვოსწრუდ კრებას, ნამუთ ჩქიმ სამუშაწკუმა არძაშ უმოს ხოლოს რდჷ; თენა რდჷ ბრომსგროუვს, ნამდგაშა ჩქიმ ჸუდეშე 32 კილომეტრ მემძუდ. მარაშ ბოლოს, მუჟამსით ჩქიმ მშობლეფიშ ჸუდეშა მიფშჷ, ვოსწრუდ უილენჰოლიშ კრებას.

მოკოდ, ხუჯ დუკინკო იეჰოვაშ ორგანიზაციას, ათეშენ გილმალ ზედამხედველს ქოია უწი, თიშ უმკუჯინუო, ნამდა მიოტებელ მაჸიდ სამუშა, ნამუთ მანგარო მობწონდჷ. თეშნერო, იეჰოვას საშვალება ქიმეფჩჷ, ქუხემძღვანელკო ჩქიმ ნაბიჯეფს, ნამდგაქ თიცალ ცხოვრებაშ კარ გომინჯჷ, ნამუთ დღას ვამნარღებ.

ბრომსგროუვიშ კრებას ქეშეფხვად ართ სქვამ დო სულიერო მოწიფულ დას, ენის. ჩქი 1957 წანას დეფქორწინით. მიღდეს პატი, ართო ივმსახურითკო სრულ დროთ პიონერო, სპეციალურ პიონერო, გილმალ მსახურებას დო ბეთელს. ენის ჩქიმ ცხოვრებაშა დიდ ხიოლ მოუღ.

მანგარო მახიოლეს მუჟამსით 1966 წანას მემწვიეს გალაადიშ 42-ა კლასშა. სკოლაშ უკულ დუმანიშნეს მალავის, ნამდგას აფრიკაშ ტიბ გურს უძახნა, მუშენდა თექ კეთილ დო სტუმარიშ მოჸოროფე ხალხ ცხოვრენს. თიმ დროს მუს იფიფქრენდით, ნამდა თექ ბრელ ხანს ვაგმაჩერებედეს.

ᲛᲡᲐᲮᲣᲠᲔᲑᲐ ᲛᲐᲚᲐᲕᲘᲡ ᲡᲘᲠᲗᲣᲚᲔᲔᲤᲘᲨ ᲓᲠᲝᲡ

1967 წანაშ 1 ფრევალს მალავიშა გეგნოფრთით. გინულაშ პირველ თუთას უმენტაშ დროს თექიან ნინაშ გურაფას გიმურთუნდით დო უკულ საოლქო მსახურება ქიდიბჭყით. გილეფშით ჯიპით, ნამდგაშე იჩიებდეს, ნამდა ირდიხაშა ალნედ დო მალწყარ ხოლო გინართედ. მარა ქობძირით, ნამდა თე მანქანათ ხვალე მარჩხა წყარიშ გინულა შილებედ. მინშა ფჩენდუდით თიხათ შენებულ დო ნაცალათ გინორთვილ ქოხეფს, ნამუთ ბრიზენტით ოკო გინოფორკო, ნამდა ჭვემაშ დროს წყარქ ვემთაკათკო. თენა ჩქინ მისიონერულ მსახურებაშ იშენდოიშენ ჯგირ დაჭყაფ ვა რდჷ, მარა იშენით მობწონდეს.

აპრილიშ თუთას ქიმეფხვად, ნამდა მალას მთავრობაშე პრობლემეფ ქუმაშიდეს. რადიოს მალავიშ პრეზიდენტიშ ჰეისტინგზ ბანდაშ გიშულა ქიმიფრჩქილე. მუჭოთ თინა აცხადენდჷ, იეჰოვაშ მოწმეეფ ვა გაფულენდეს ოგაფურეფს დო სახელმწიფოშა პრობლემეფ მოუღდეს. მუშო ოკო რაგად, თე ირფელ ვა რდჷ სიმართლე. არძას მარჩქილედეს, პრობლემა ჩქინ ნეიტრალიტეტ რდჷ. განსაკუთრებულო თინა ვა მოწონდეს, ნამდა ვა პჸიდულენდით ბარათეფს, ნამდგათ პოლიტიკურ პარტიას ქუვაკათუდით.

მუჭოთ სექტემბერიშ გაზეთშე იბკითხით, პრეზიდენტ ბრალს გედვანდჷ ჯიმალეფს. პოლიტიკურ შეხვალამაშ დროს თიქ განცხადება აკეთ, ნამდა მთავრობა ხეთე ქიმიაჸუნუდ რეზოლუციას, მუდგაშ შედეგო იეჰოვაშ მოწმეეფიშ საქმიანობა ვარიებულ იჸუაფუდ. 1967 წანაშ 20 ოქტომბერს თე რეზოლუციაქ მოქმედება ქიდიჭყჷ. თეშ უკულ ხეთეშე, პოლიციაშ დო საიმიგრაციო განყოფილებაშ თანამშრომელეფქ ფილიალშა ქუმორთეს, ნამდა დოკილესკო თინა დო მისიონერეფს დეპორტ ქიგუშქვესკო.

ჭოფუაშე სუმ დღაშ უკულ დეპორტით გომტეს მავრიკშა, ნამუთ ბრიტანეთიშ კონტროლიშ თუდო რდჷ. მარა მავრიკიშ მთავრობა ხოლო ვამჩანდეს უფლებას, თექ მისიონერო ივმსახურითკო. ათეშენ დაბნიშნეს როდეზიას (ამდღარ ზიმბაბვე). მუჟამსით საზღვარშა ქიმეფრთით, თექიან საიმიგრაციო განყოფილებაშ უნჩაშიქ გარისხებულქ ქუდოფხვადეს. თინა უფლებას ვა მარზენდეს ქიანაშა გემნოფრთითკო. თიქ მიწის: „თქვა მალავიშე გოიტეს, ვართ მავრიკის დუგარინედეს, ნამთინ ქიანაქ ვემეიღესინ თიშენ გოკონა თაქ მოულა, ვარო?!“. ენის ნგარაქ გეუოლ. თეშ იძირედ, ნამდა მითინს ვა ვოკოდით. თე დროს ხვალე თინა მოკოდ, ნამდა ირფელ მემტებუდკო დო ინგლისშა, ჸუდეშა, დომრთინუდკო. საბოლათ თინეფქ უფლება ქომჩეს, ქიგიფსერეთკო ფილიალს თი პირობათ, ნამდა მაჟია დღას თინეფიშ სამართველოს ქიდვეკავშირებუდით. ძალაგიშალიებურ ვორდით, მარა ირფელ იეჰოვაშა მაფდეს მენდებულ. მაჟია დღას, შურო ვეველუდითინ თეშ, ნებართვა ქომჩეს, ზიმბაბვეს ჭიჭე ხანით ქუდოფსქიდითკო, მუჭოთ ტურისტეფ. დღას ვაგმოჭყორდუ, მუს ბგინაფლენდჷ თიმ დღას. დარწმუნებულ ვორდჷ, იეჰოვა ხემძღვანელენდჷ ჩქინ ოულარს.

ᲐᲮᲐᲚ ᲓᲐᲜᲘᲨᲜᲣᲚᲔᲑᲐ — ᲒᲘᲜᲣᲚᲐ ᲛᲐᲚᲐᲕᲘᲨᲔ ᲖᲘᲛᲑᲐᲑᲕᲔᲨᲐ

ზიმბაბვეშ ფილიალს სამსახურებრივ განყოფილებას დებნიშნჷ, ნამუთ პასუხიშმგებელ რდჷ მალავიშ დო მოზამბიკიშ ტერიტორიეფშა. და დო ჯიმალეფს მალავის მანგარო თხოზუდეს. ჩქიმ სამუშაშა მიშეშ, დოფთარგმნიკო მალავიშ სარაიონო ზედამხედველეფიშ მუნაჯღონა ანგარიშეფ. ართშა მუშობაქ გვიანშახ ქიმემირთჷ. ნგარაქ გემიოლ, მუჟამსით წებკითხჷ, მუ გინუღდეს და დო ჯიმალეფს მალავის.a ჩქიმ გურს მანგარო შეხუ თინეფიშ გიმორჩქინელ ართგურობაქ, რწმენაქ დო მოთვინებაქ (2 კორ. 6:4, 5).

ჩქი მუთ შემლებდესინ ირფელს ვორთუდით, ნამდა სულიერ საზრდოქ ვემიოკორდუკო მალავის დოსქილადირ და დო ჯიმალეფს დო თინეფს ხოლო, მიდგაქ დუდიშგითაფორაფალო მალავიშე მოზამბიკშა ინტეს. ჩიჩევა ნინაშ მთარგმნელობით ჯგუფიქ, ნამდგაშე მალავიშ უმენტაშ იჩიებ, ზიმბაბვეს მახორუ ართ ჯიმაშ დიდ ფერმაშა გეგნორთჷ. თე ჯიმაქ მთარგმნელობით ჯგუფშო ქოთ ჸუდეეფ დო ქოთ ოფის აშენ, სოდეთ თინეფქ ბიბლიურ ლიტერატურაშ თარგმნუაშ მნიშვნელოვან საქმე გაგრძელეს.

თეშ გუვაკეთით, ნამდა მალავიშ რაიონულ ზედამხედველეფს ირ წანას ქეშიალებესკო დასწრებაქ ზიმბაბვეს ჩიჩევა ნინაშა ჩატარებულ საოლქო კონგრესეფშა. თექ თინეფ კონგრესიშ მოხსენებეფიშ გეგმეფს ხოლო ღებულენდეს. მალავიშა დორთაშ უკულ რაიონულ ზედამხედველეფ ირნერო ოცადდეს, და დო ჯიმალეფს კონგრესის მორჩქილაფირ ინფორმაცია გეგნოჩესკო. ზიმბაბვეშა ართ-ართ მოულაშ დროს თე გაბედულ ზედამხედველეფიშ გურიშელაკინალო ირფელ გუვაკეთით, ნამდა სამეფო მსახურებაშ სკოლაქ ჩეტარკო.

1975 წანაშ ფრევალს, მოზამბიკშა მიდაფრთჷ, ნამდა ქიბძირეკო მალავიშე ნტებულ და დო ჯიმალეფ, მით თექ ბანაკეფს ცხოვრენდეს. თე ჯიმალეფ ართგურო მეჸუნდეს იეჰოვაშ ორგანიზაციაშე მეღებულ ახალ ხემძღვანელობას, თინეფ შქას ახალ მითითებას უხუცესეფიშ საბჭოეფიშ ჩამოყალიბებაშ გურშენ. ირფელიშ უმკუჯინუო, თე ახალ უხუცესეფ იშენით ხემძღვანელენდეს სულიერ ღონისძიებეფს, მუდგაშა მიშეშ საჯარო მოხსენებეფიშ კითხირ, ირდღაშიან მუხლიშ დო „გინაჯინალ კოშკიშ“ გარჩიება დო სარაიონო კონგრესეფიშ ჩატარება ხოლო. თინეფს თე ბანაკეფ საკონგრესო ადგილცალო აფდეს მონწყილ; უღდეს დასუფთებაშ, ოჭკუმალიშ მომარაგებაშ დო უსაფრთხოებაშ განყოფილებეფ. თე ართგურ ჯიმალეფქ იეჰოვაშ კურთხევათ ბრელ მუდგარენ აკეთეს. თე ირფელიშ ძირაფაქ გურშა მანგარო ელამკინ.

1970-იან წანეფიშ ბოლოშე მალავიშ ტერიტორიაშ ხემძღვანელობაშ პასუხიშმგებლობაქ ზამბიაშ ფილიალს გეგნაჩ. თეშ უმკუჯინუო, ხშირას ფიფქრენდჷ მალავის მახორუ და დო ჯიმალეფშე დო შხვეფცალო, მა ხოლო ბლოცულენდჷ თინეფშო. ზიმბაბვეს ფილიალიშ კომიტეტიშ წევრო ვმსახურენდჷ. ათეშენ მუსხირენშა მიღუდ შესაძლებლობა, მთავარ სამართველოშე მოულირ ჯიმალეფწკუმა ართო ქეშეფხვადკო ჯიმალეფს მალავიშე, სამხრეთ აფრიკაშე დო ზამბიაშე. ირ თეცალ შეხვალამაშ დროს ვოკითხუდით თინეფს, ხოლო მუშ კეთება შემლებდეს მალავის მახორუ და დო ჯიმალეფშო.

დროშ მიკულაწკუმა ართო, თხოზინ ირკენდჷ. ათეშენ თი და დო ჯიმალეფს, მით თექ ცხოვრენდეს, უმოს თავისუფლებაქ ქიმიაჩეს დო თინეფ ხოლო, მით მალავიშე ნტებულ რდეს, ჭიე-ჭიეთ უკახლე ირთუდეს. მეზობელ ქიანეფქ მოწმეეფს ქადაგებაშ დო ართო აკოშაყარუაშ უფლება ქიმეჩეს. თინეფქ შეზღუდვეფ ხოლო მონწყეს. 1991 წანას თე ქიანეფს მოზამბიკიქ ხოლო ქაკათ. მარა ჩქი თიშე ბწუხენდით, მუჟამ აღვენუდეს მალავის მახორუ მოწმეეფს თავისუფლება.

ᲛᲐᲚᲐᲕᲘᲨᲐ ᲓᲝᲠᲗᲐ

საბოლათ მალავის პოლიტიკურ სიტუაციაქ დითირ დო 1993 წანას მთავრობაქ იეჰოვაშ მოწმეეფიშ წინააღმდეგ არძა შეზღუდვა მონწყჷ. თეშ უკულ ხეთეშე ართ მისიონერქ ბკითხჷ: „მალავიშა დორთა ხომ ვაილამ?“. თიმწკუმა 59 წანერ ვორდჷ, ათეშენ უწი: „ანწ სონ ჩქიმ ულა რე?!“. მარა კინ თიმ დღას ხემძღვანელ საბჭოშე მიბღით მალავიშა დორთაშ წერილ.

მანგარო მიჸორდეს ჩქინ დანიშნულება ზიმბაბვეს, ათეშენ ჩქინო თე გადაწყვეტილებაშ მეღება ადვილ ვა რდჷ. თექ გვალო ჯგირო ვორდით დო ჯგირ მეგობრეფ ხოლო პჸუნდეს. ხემძღვანელ საბჭოქ მიწის, ნამდა დანიშნულებაშ თირუა ვა მოკოდეს-და, შემლებდეს ქუდოფსქიდითკო ზიმბაბვეს. ჩქი მარტივო შემლებდეს, ვა ფთირეთკო გეგმეფ დო ვებდითკო მალავიშა. მარა ჯგირო ფშუდ, მუჭო დიტეს ხანშამიშულირ აბრაამქ დო სარაქ კომფორტულ ცხოვრება დო დემორჩილეს იეჰოვაშ მითითებას (დაბ. 12:1—5).

გეგნობჭყვიდით, მივაჸუნითკო იეჰოვაშ ორგანიზაციაშე მეღებულ მითითებას დო 1995 წანაშ 1 ფრევალს, მალავიშა ჩქინ პირველ ენულაშე 28 წანაშ უკულ, კინ დიფრთით თექ. მალავის ჩემეყალიბ ფილიალიშ კომიტეტიქ, სოდეთ ჟირ ჯიმაწკუმა ართო ვმსახურენდჷ დო ხეთეშე ქიდიბჭყით იეჰოვაშ მოწმეეფიშ საქმიანობაშ განახლება.

ᲘᲔᲰᲝᲕᲐ ᲠᲓᲣᲜᲡ

მუშმადიდა კურთხევა რე, მუჟამსით სქან თოლით ორწყექ, მუჭო რდუნს იეჰოვა. 1993 წანას მალავის სოდგარენ 30 000 მაუწყებელ რდჷ. მარა თე რიცხვიქ ხეთეშე მირდჷ დო 1998 წანაშო 42 000-ის გეგნაჩირთჷ.b მუშო ოკო რაგად, ასე უმოს საქმე რდჷ ოკეთებელ. ათეშენ ხემძღვანელ საბჭოქ ნებართვა ქომჩეს, ახალ ფილიალ გევაშენითკო. ფილიალიშ ოშენებელო ლილონგვეს 12 ჰექტარ დიხა ქიპჸიდით დო მა მშენებლობაშ კომიტეტიშ წევრო დაბნიშნეს.

2001 წანაშ მესის ხემძღვანელ საბჭოშ წევრიქ, ჯიმა გაი პირსიქ, აკეთ ახალ ფილიალიშ მოხსენებაშ მეძღვინუა. თე შეხვალამას სოდგარენ 2 000-შე მეტ ადგილობრივ მოწმე ოსწრუდ. თინეფიშ უმენტაშ 40 წანაშე მეტ ხანიშ ნათილ რდჷ. თე და დო ჯიმალეფ თხოზინიშ დროს წანეფიშ დინახალე ურზუდეს ნინათ ვეიჭარენ ფერ სირთულეეფს. მართალ რე, თინეფს მატერიალურო ბრელ მუთუნ ვა უღდეს, მარა სულიერო მდიდარეფ რდეს, მუშენდა მტკიცე რწმენა დო იეჰოვაწკუმა ხოლოშიან ურთიერთობა უღდეს. ასე გურ ხიოლით აფდეს ეფშა, მუშენდა უღდეს შესაძლებლობა, ფილიალიშ ახალ შენობა ქოძირესკო. ბეთელიშ ნამდგა კუნთხუშა ვედესკონ, ირდიხაშე ირჩქილედ, მუჭო იბირდეს ჩქინ ობირეშეფს აფრიკულ სტილშა, მუდგაშ გურშენ თე ღონისძიებაქ მანგარო შეხუ ჩქიმ გურს. თე ირფელ თიშ ცოცხალ მაგალით რდჷ, ნამდა იეჰოვა კურთხევეფს ვარკენს თინეფს, მით ართგურო ურზუ განსაცდელეფს.

ფილიალიშ მშენებლობაშ თებაშ უკულ მიბღჷ ახალ დანიშნულება — გუვაკეთკო დარბაზეფიშ მეძღვინუაშ მოხსენებეფ. მალავიშ კრებეფშო კურთხევაქ იჸუ დარბაზეფიშ სწრაფ მეთოდით შენებაშ პროგრამაქ, თიცალ ქიანეფშო, სოდეთ ეკონომიკურო უჭირა. თეიშახ ნამთინე კრება ევკალიფტიშ ქოხეფს იშაყარუდ, ნამდგას ნაცალათ რთუნდეს დო სკამეფიშ ოკეთებელო თიხას გიმირინუანდეს. ასე ჯიმალეფ ბრელს ხანდენდეს, ნამდა მუნეფიშ კეთებულ ფეჩქის გეგშაჭვესკო ანგურეფ დო შეხვალამაშო სქვამ-სქვამ ადგილეფ მანწყუესკო. მარა და დო ჯიმალეფს იშენით ჯვეშობურ გინძელია სკამ უსხუნდეს, მუშენდა, მუჭოთ იჩიებნა, თექ ართ კოჩიშ ელახუნაფა ირო შილებე.

გურს ხიოლით ემიფშანდჷ თიშ ძირაფა, მუჭო ოხვარუდ იეჰოვა და დო ჯიმალეფს, სულიერო მირდესკო. ჩქიმდა მანგარო იმოქმედ ახალგაზრდა აფრიკელ ჯიმალეფიშ დამოკიდებულებაქ, მუშენდა თინეფქ მზადყოფნა გეგმირჩქინეს მახვარებელო დო, ორგანიზაციაშე მეღებულ მითითებეფიშ გიმორნაფათ, ბრელ მუდგარენიშ კეთება ქიდიგურეს. შედეგო, თინეფქ მიღეს უმოს პასუხიშმგებლობეფ ბეთელს დო კრებეფს. ადგილობრივ ჯიმალეფიშ რაიონულ ზედამხედველო დანიშვნაქ კრებეფ გამანგარ. თე ჯიმალეფიშ უმენტაშ დაქორწინებულ რდჷ. თიშ უმკუჯინუო, ნამდა თინეფს ოჯახიშ წევრეფ დო შხვეფ ირიათო ურაგადდეს, გეიორჩქინესკო ბაღანეფ, თინეფს იშენით გინოჭყვიდილ აფდეს, თე ქვეყნიერებას სქუალეფ ვა ჸუნდესკო, ნამდა იეჰოვაშო უმოსიშ კეთებაქ შეიალებესკო.

ᲙᲛᲐᲧᲝᲤᲘᲚ ᲕᲝᲠᲔᲥ ᲩᲥᲘᲛ ᲒᲐᲓᲐᲬᲧᲕᲔᲢᲘᲚᲔᲑᲔᲤᲘᲗ

აფრიკას 52 წანიან მსახურებაშ უკულ ჯამრთელობაშ პრობლემეფქ ქუმაშუ. კომიტეტიშ რჩევათ, ხემძღვანელ საბჭოქ ბრიტანეთის დაბნიშნეს. მანგარო მიჸორდეს ჩქინ დანიშნულება, მარა ბრიტანეთიშ ბეთელიშ ოჯახიშ წევრეფ თე ორჩინელობას ჯგირო მილუანა.

შემლებ თამამას ფთქუე, ნამდა არძაშ უჯგუშ გადაწყვეტილება მიბღჷ, მუჟამსით იეჰოვას საშვალება მეფჩჷ, ქუხემძღვანელას ჩქიმ ნაბიჯეფს. გადაწყვეტილებეფიშ მეღებაშ დროს ღორონთიშ მანგიორო ჩქიმ დუდშა ქიმემნდებუდკონ, მის უჩქჷ, ასე სო იპჸუაფუდ. თის ირო ჯგირო უჩქუდ, მუჭო უხემძღვანელკო ჩქიმ ოულარს (იგავ. 3:5, 6). ახალგაზრდობას მანგარო მობწონდჷ დიდ კომპანიას მუშობა, მარა იეჰოვაშ ორგანიზაციას მეღებულ სულიერ კარიერაქ უმოს მეტ კმაყოფილება მომიღ. იეჰოვაშ მსახურებას ჩქიმდა, მუჭოთ ულირს, თეშ ასე ხოლო, კმაყოფილებათ ეფშა ცხოვრება მოუღ!