იეჰოვაშ ჸოროფა მოხვარნა, გივორჯგინათ შიშის

1. ნამ რე თი ნამთინე შიშ, ნამდგას ბრელ გინაფლენს?

დეფიფქრათ სიტუაციეფშე, ნამდგას მუსხირენ იეჰოვაშ მოწმექ შეხვად. ნესტორ დო მარიასb თექ ოკოდეს გინულა, სოდეთ მაქადაგებელეფიშ საჭიროება რდჷ, მარა თეშ გურშენ ფარაშ ეკონომიურ ხარჯება ოკო ქიდიგურუესკო. თინეფს ოშქურდეს, ქიჸუაფდეს დოვარ ბედნერ, მუჟამსით მატერიალურო ნაკლებ საშვალება აღვენუდეს. ბინიამქ იეჰოვაშ მოწმეთ გინირთუნ, თიცალ ქიანას ცხოვრენდჷ, სოდეთ ჩქინ საქმიანობა ვარიებულ რდჷ. თის არჩქილედ, ნამდა შილებედ თეშ გურშენ თხოზინს ქეშეხვადკო, მუდგაშა ოშქურუდ, მარა თეშ უმოსო თიშა ოშქურუდ, მუნერ რეაქცია აღვენუდეს თიშ ოჯახიშ წევრეფს, მუშ ახალ რელიგიაშ ამბეს ქიგეგენდესინ. ვალერიას ავთვისებიან კიბოშ დიაგნოზ ქიგუშქვეს. თინა ოცადუდ, თიცალ ქირურგ დოგორკო, მით გეთვალისწინენდჷ ვალერიაშ ბიბლიაშა გერსხილ დამოკიდებულებას ზისხირწკუმა დაკავშირებით. თის ღურაშა ოშქურუდ, მუთ შურო ვა რე გასაკვირ.

2. მუშენ რე საჭირო მონდომა, ნამდა გივორჯგინათ შიშის?

² ჩქინდე ბრელს უგინაფ ჟიშე მოშინაფილ შიშეფშე ნამთინე. თე ემოციაშ კონტროლ ვა დიბგურეთ-და, თიქ შილებე გლახა გადაწყვეტილება მიმოღებაფუან დო ეცილას იეჰოვაწკუმა ჩქინ ურთიერთობას. სატანას ხოლო ზუსტას თენა ოკო. თინა თის ხოლო ოცად, შიშიქ გეგნმორთაფუან იეჰოვაშ კანონეფშა, თინეფ შქას, სახიოლო ამბეშ ქადაგებაშ გურშენ მითითებაშა (გამოცხ. 12:17). სატანა უბადო, უგურე დო ძალიერ რე, მარა თიშე დუდიშ თხილუა შემლებნა.

3. მუ მიმეხვარებნა, გივორჯგინათ შიშის?

³ იეჰოვა ელამრენა დო თის უჸორთინ თიშა დარწმუნებულ ქუვორეთ-და, სატანას ვადვაშქურინეთ (ფსალმ. 118:6). მაგალთო, 118-ო ფსალმუნიშ მაჭარალქ მუსხირენ მანგარ რთულ სიტუაციას შეხვად. თის ბრელ ნტერ ჸუნდჷ, თინეფ შქას მაღალ მდგომარეობა უკინებუდუნ ფერეფ ხოლო რდეს (მუხლეფ 9, 10). მინშა სერიოზულ ოწუხებელ ურჩქინდუდ (მუხლ 13). თეს გეძინელ, იეჰოვაქ ხოლო მანგარო დასაჯ თინა (მუხლ 18). თე ირფელიშ უმკუჯინუო, თე ფსალმუნმაბირე იჩიებუდ: „ვა მაშქურნე“. მუშენ გინაფლენდჷ თინა დუდის თეცალ თხილერო? მართალ რე, იეჰოვაქ დასაჯ, მარა ზეციერ მუმას მანგარო უჸორდჷ, მუთ ფსალმუნმაბირეს ჯგირო არჩქილედ. თის უჩქუდ, ნამდა მუდგა სიტუაციას ვა მოხვალამედკონ, მოჸოროფე ღორონთ ირიათო მზათ იჸუაფუდ თიშ მახვარებელო (ფსალმ. 118:29).

4. მუ დო მუნერ შიშის გივორჯგინანთ, მუჟამსით დარწმუნებულ ვორეთ, ნამდა იეჰოვას უჸორთ?

⁴ საჭირო რე, დარწმუნებულ ვორდათ, ნამდა იეჰოვას პირადო უჸორთ. თენა მიმეხვარებნა, გივორჯგინათ სუმნერ შიშის, ნამდგას ბრელ ადამიან გინაფლენს: 1) შიშ, ნამდა ვემაჯუმენა ოჯახ, 2) ადამიანიშ შიშ დო 3) ღურაშ შიშ. პირველ აბზაცის მოშინაფილ და დო ჯიმალეფქ გიორჯგინეს მუნეფიშ შიშის, მუშენდა დარწმუნებულ რდეს იეჰოვაშ ჸოროფაშა.

შიშ, ნამდა ვემაჯუმენა ოჯახ

5. მუ სიტუაციეფქ შილებე ოჯახიშ დუდის ოწუხებელ გურჩქინას? (ქოძირით სურათ გალენ გვერდის)

⁵ ქრისტიან ოჯახიშ დუდეფ სერიოზულო უჯინენა ოჯახშე მატერიალურო ზრუნვაშ პასუხიშმგებლობას (1 ტიმ. 5:8). თე პანდემიაშ პერიოდის შილებე უმოსო წუხენდათ, ვაიდინან სამუშაქ. შილებე თიშე ნერვიანენდათ, ნამდა ოჭკუმალ ვა გაჩინენა თქვან ოჯახშა ვარდა დუდიშ გითაფორაფალიშ უმშო ქუდოსქიდუთ. ვარდა თიშე ნერვიანენდათ, ნამდა სამუშაქ მეიდინეს-და, ახალ სამუშა ძნელ ოგორალ გაჸინა. ნესტორ დო მარიაცალო შილებე თქვა ხოლო ფიქრენდათ, ნამდა ვეშქალებენა ნაკლებ შემოსავალით ცხოვრება. სატანას ბრელშა გიშურთჷ, თეცალ შიშით ადამიანეფს იეჰოვაშ მსახურება მიოტებაფუკო.

6. მუ ოკო სატანას, დუმოჯერუან?

⁶ სატანას ოკო, დუმოჯერუან, ნამდა იეჰოვა ვა ზრუნენს პირადო ჩქინდე დო ოჯახიშ ეჯუმალაშ საქმეს ვა მოხვარნა. თეშ შედეგო შილებე იფიფქრათ, ნამდა სამუშაქ ვამდინანინ, ირფელ ოკო გუვაკეთათ, მუდგაშა ბიბლიურ პრინციპეფიშ გინორთა ხოლო მიშურს.

7. მუშა მარწმუნენა იესო?

⁷ იესო, მით არძაშ უჯგუშო იჩინენს ზეციერ მუმას, მარწმუნენა: „ღორონთის, თქვან მუმას, თეიშახ უჩქჷ ირფელ, მუთ გოსაჭირნა, სოიშახ თხინდათ“ (მათ. 6:8). იესოს უჩქჷ, ნამდა იეჰოვა მზათ რე, ქიზრუნას ჩქინ საჭიროებეფშე. მუჭოთ ქრისტიანეფ, ჩქი თიშ ოჯახიშ წევრეფ ვორეთ დო შემლებნა დარწმუნებულ ვორდათ, ნამდა ოჯახიშ დუდ, იეჰოვა, ვეგნურთანს 1 ტიმოთეშ 5:8-ს ენოჭარილ პრინციპის.

8. ა) მუ მიმეხვარებნა, გივორჯგინათ თიშ შიშის, ნამდა ვემაჯუმენა ოჯახ? (მათ. 6:31—33) ბ) მუჭო შემლებნა მივაჸუნათ სურათის მოჩამილ წყვილიშ მაგალითის?

⁸ მუჟამსით ბჯერა, ნამდა იეჰოვას უჸორთ ჩქი დო უჸორს ჩქინ ოჯახ, შემლებნა დარწმუნებულ ვორდათ, ქომჩანა ირფელს, მუთ მოსაჭირნა (წეკითხით მათეშ 6:31—33). იეჰოვას ოკო, ჩქინდე იზრუნას. თენა იძირე თევრეშე, მუნერ ჸოროფათ აფჷ დედამიწა გოჭყაფილ. თის ხვალე ჩქინ არსებობაშო აუცილებერ მუდგარენეფ ვა გუჭყაფ. თეშ მანგიორო, ჸოროფათ ბრელ მუდგარენ გაჭყჷ დედამიწას თიშო, ნამდა ბედნერეფ პჸოფედითკო (დაბ. 2:9). თიმწკუმა ხოლო, მუჟამსით ხვალე თიზმა მიღნა, მუთ დუდიშ ეიოჯუმალარო მობაღნან თიშ მეტ ვა რე, ფშუდან, ნამდა თენა ხოლო იეჰოვაშ ჭყოლოფა რე (მათ. 6:11). დღას ოკო ვაგმოჭყორდან, ნამდა ჩქინ მხარეშე ნებისმიერ მატერიალურ მსხვერპლ თეშით ხოლო ველეჸუნინე თიშა, მუდგას ღორონთ ჸოროფათ მარზენა ამდღა დო მუჩანა მომავალს. ნესტორ დო მარიაქ თეშა დერწმუნეს (ეს. 65:21, 22).

9. მუშ გურაფა შეილებნა ნესტორ დო მარიაშ მაგალითშე?

⁹ ნესტორ დო მარია კოლუმბიას კომფორტულო ცხოვრენდეს. თინეფ იჩიებნა: „ცხოვრებაშ გამარტივებაშე დო მსახურებაშ გაფართოებაშე ფიფქრენდით, მარა მოშქურდეს, ქიპიდითო ბედნერ უმოს ნაკლებ ფარათ?“. მუქ მეხვარ თინეფს, გიორჯგინესკო თე შიშის? თინეფქ დეფიქრეს, მუზმაშა დუმტკიც იეჰოვაქ ჸოროფა ულირს. თიშა დარწმუნებულეფქ, ნამდა იეჰოვა ირიათო ქიზრუნენდჷ, ქიდიტუეს ჯგირ სამუშეფ, გეგმოჩეს ჸუდე დო ქიანაშ თი მხარეშა გინილეს, სოდეთ სამეფოშ მაქადაგებელეფიშ უმოს საჭიროება რდჷ. მუს ფიქრენა თინეფ მუნეფიშ გადაწყვეტილებაშენ? ნესტორ იჩიებ: „მათეშ 6:33-ს მოჩამილ სიტყვეფიშ ჭეშმარიტება ჩქინ დუდშა ქიბგინით. ჩქი დღას ვა მობრკებნა აუცილებერ დო ასე ბედნერ ცხოვრება მიღნა“.

ადამიანიშ შიშ

10. მუშენ ვა რე გასაკვირ, ნამდა ადამიანეფს ართიანშა ოშქურნა?

¹⁰ ადამ დო ევაშ დროშე მოჸუნაფილ ადამიანეფ ირიათო გლახათ ოქცუნა ართიანს (ეკლ. 8:9). მაგალთო, უბადოთ ირინუანა მუნეფიშ ძალაუფლებას, ძალას გიმირინუანა შხვეფიშ წინააღმდეგ, სკოლას ბაღანეფ ართიანს გაძიცანა დო აჩაგრენა. ნამთინე ოჯახიშ წევრეფს ხოლო მანგარ გლახათ ოქცუ. თაშ ნამდა, გასაკვირ ვა რე, ადამიანეფს ართიანშა ოშქურდან. მუჭო ირინუანს სატანა მუშ საჯგირობუოთ თეცალ შიშის?

11, 12. მუჭო ირინუანს სატანა ადამიანიშ შიშის ჩქინ წინააღმდეგ?

¹¹ ადამიანიშ შიშის სატანა თიშო ირინუანს, ნამდა დუმოთმებაფუან ჩქინ ქრისტიანულ პოზიცია დო მიმოტებაფუან ქადაგება. თიშ ახნარებულ მთავრობეფს ვარიებულ აფნა ჩქინ საქმიანობა დო ფთხოზუნა (ლუკ. 21:12; გამოცხ. 2:10). სატანაშ ქვეყნიერებაშ შხვადოშხვა ნაწილ ტყურას ავრცელენს იეჰოვაშ მოწმეეფიშ გურშენ დო ხალხის გლახა წარმოდგენას ურჩქინანს. თინეფქ, მიდგას თე ტყურეფიშ ჯერს, შილებე ქუგმაძიცუან დო ფიზიკურ შეურაცხყოფა ხოლო ქუმმორინუან (მათ. 10:36). ჩქი ვამკვენა სატანაშ თეცალ საქციელ. თიქ პირველ საუკუნეს ხოლო გიმირინუ თე მეთოდ (საქ. 5:27, 28, 40).

¹² სატანა ხვალე მთავრობაშ წინააღმდეგობაშ შიშის ვერინუანს. ნამთინეს ჭეშმარიტებაშ მიმართ ოჯახიშ წევრეფიშ დამოკიდებულებაშა უმოსო ოშქურ, ვინემ ფიზიკურ შეურაცხყოფაშა. თინეფს უჸორა მუნეფიშ ნათესეეფ დო მანგარო ოკონა, თინეფქ ხოლო დეახლოვან იეჰოვას. ათეშენ, მუჟამსით ნათესეეფშე ღორონთიშ დო თიშ თაყვანიშმცემელეფიშ მიმართ უპატიცემულო ჩიებას ირჩქილენა, გურ ელაჭუნა. ნამთინე შემთხვევას, თი ნათესეეფქ, მით დუდშე მოწინააღმდეგეეფ რდეს, მიღეს ჭეშმარიტება. მარა მუჭო მიფქციებუთ, მუჟამსით ოჯახიშ წევრეფ ჩქინ ახალ რწმენაშ გურშენ მიმენდურებნა?

13. მუჭო მოხვარნა იეჰოვაშ ჸოროფაშა დარწმუნება, მუჟამსით ოჯახიშ წევრეფ მოწინააღმდეგნა? (ფსალმ. 27:10)

¹³ თეცალ დროს გურშა ემქექუანა ფსალმუნიშ 27:10-ის მოჩამილ ძვირფას სიტყვეფ (წეკითხით). იეჰოვას მუზმათ ვუჸორთინ თინა ქოფშუნან-და, წინააღმდეგობეფიშ დროს დუდის თხილერო იბგინანთ. დარწმუნებულ ვორეთ, ნამდა თინა მაკურთხენა მოთვინებაშ გურშენ. იეჰოვა თიშე ბრელით უმოსო იზრუნენს ჩქინ ფიზიკურ, ემოციურ დო სულიერ საჭიროებეფშე, ვინემ შხვა მითინ. ზუსტას თენა გიმოცად მუშ დუდშა ბინიამქ.

14. მუ შეილებნა დიგურუათ ბინიამიშ მაგალითშე?

¹⁴ ბინიამს უჩქუდ, ნამდა იეჰოვაშ მოწმეთ გინორთას თხოზინ ქუმაჸუნუდ, მარა თიქ იშენ გაკეთ თენა. გუვარჩუათ, მუჭო მეხვარ ბინიამს თიშ რჩქინაქ, ნამდა იეჰოვას უჸორს, გიორჯგინკო ადამიანიშ შიშის. თინა იჩიებ: „ფიფქრენდჷ, მუჭო მეხვარ იეჰოვაქ თინეფს, მიდგა შხვადოშხვა პრობლემას შეხვადუდ, მაგალთო, უღონობას, უსამართლობას ვარდა მოწინააღმდეგეეფშე თხოზინს. მიჩქუდ, ნამდა იეჰოვაშ ართგურ ქიპჸიდ-და, თინა მაკურთხენდჷ. ბრელშა ობჭოფეს დო ქოთ მაწამეს. თი პერიოდის ჩქიმ დუდშა გეგმოფცად, მუჭო ოხვარ იეჰოვა ართგურეფს საჭირო დროს“. იეჰოვაქ ბინიამშო ნამდვილ მუმათ გინირთჷ დო თიშ ხალხიქ — ნამდვილ ოჯახო.

ღურაშ შიშ

15. მუშენ ვა რე გასაკვირ, ღურაშა მოშქურდან?

¹⁵ ბიბლიას ღურაშა ნტერ უჯოხო (1 კორ. 15:25, 26). ღურაშე ფიქრ გურს მისოფნა, განსაკუთრებულო თიმწკუმა, მუჟამსით ჩქი გივორეთ ღურაშ კარს ვარდა თინა — მით მანგარო მიჸორა. ღურაშა თიშენ მოშქურნა, ნამდა იეჰოვაქ მარადიულ სიცოცხლეშო გუმოჭყეს (ეკლ. 3:11). ღურაშ მიმართ გაწონასწორებულ შიშის შეულებ ქიმმეხვარან, ქუმუთხილუათ ჩქინ სიცოცხლეს. მაგალთო, ბჭკუმათ ჯანსაღ ოჭკუმალ, დასაბაღო ქიბვარჯიშათ ვარდა მიბღათ სამედიცინო მოხვარა, მუჟამსით თენა მოსაჭირნა. თეწკუმა ართო, აუცილებერ ვა რენ-და, დუდ ეუჩილითუათ თიცალ სიტუაციეფს, მუთ ჩქინ სიცოცხლეს საფრთხეს ქინაჸათანს.

16. მუჭო ოცად სატანა, გეგმირინუას ღურაშ მიმართ ჩქინ ბუნებრივ შიშ?

¹⁶ სატანას უჩქჷ, მუჭო ვაფასენთ სიცოცხლეს. თინა ამტკიცენს, ნამდა ირფელს, თინეფ შქას, იეჰოვაწკუმა ურთიერთობას ხოლო, დაფთმენთ ოღონდ სიცოცხლექ ვამდინან (იობ. 2:4, 5). მუჭო ჩირთუ თინა! ზუსტას სატანას „მოუღ ღურა“, ათეშენ ღურაშ მიმართ ბუნებრივ შიშის ირინუანს, ნამდა იეჰოვაშე ქუმორაგადაფუან ვარია (ებრ. 2:14, 15). ნამთინე შემთხვევას, სატანაშ ახნარებულ ხალხ იეჰოვაშ მსახურეფს თიშ ართგურობაშ გურშენ ჸვილუათ ორცქინანს. მინშა, მუჟამსით ჩქინ სიცოცხლეშო სამედიცინო მოხვარა რე აუცილებერ, სატანა ოცად, თე შემთხვევა თიშო გეგმირინუას, ნამდა ჩქინ პოზიცია დუმოთმებაფუან. ექიმეფ ვარდა იეჰოვაშ მოწმე ვა რენან ფერ ოჯახიშ წევრეფ შილებე ოცადდან, ქუდომჸუნუან დო ზისხირ გეგნმობუნაფუან, მუთ ღორონთიშ კანონიშ გინორთა იჸუაფ. ვარდა შილებე მკურნალობაშ თიცალ მეთოდ ელამჩან, ნამუთ არგამათ ოწინააღმდეგ ბიბლიურ პრინციპეფს.

17. მუჭოთ რომაელეფიშ 8:37—39-ს ჭარჷ, მუშენ ოკო ვა მოშქურდან ღურაშა?

¹⁷ მუშო ოკო რაგად, ჩქი ვა მოკონა ღურა, მარა მიჩქნა, ნამდა თექ ქუმოხვადასინ ხოლო, იეჰოვას იშენით ვუჸორდათ იჸი (წეკითხით რომაელეფიშ 8:37—39). მუჟამსით იეჰოვაშ მეგობრეფ ღურუნა, თიშ მეხსიერებას სქიდუნა, მუჭოთ ცოცხალეფ (ლუკ. 20:37, 38). თის შურ ოლჷ, მუჟამ დურთინუანს თინეფს სიცოცხლეს (იობ. 14:15). იეჰოვაქ მანგარ ძვირ გინიგ ჩქინ მარადიულ სიცოცხლეშო (იოან. 3:16). მიჩქნა, ნამდა იეჰოვას უჸორთ დო ზრუნენს ჩქინდე. თაშ ნამდა, გლახათ გინიფრთუთ ვარდა ღურაშ კარს ქიგვოდირთუთ-და, იეჰოვაშე ვარია ფთქუათინ თიშ მანგიორო, ქოფთხუათ თის გურიშექექაფა, სიბრძნე დო ძალა. ზუსტას თაშ მიქცის ვალერია დო თიშ ქომონჯიქ (ფსალმ. 41:3).

18. მუშ გურაფა შეილებნა ვალერიაშ მაგალითშე?

¹⁸ ვალერია 35 წანერ რდჷ, მუჟამსით იშვიათ დო ავთვისებიან კიბოშ დიაგნოზ გეუშქვეს. გუვარჩუათ, მუჭო მეხვარ თის იეჰოვაშ ჸოროფაქ, გიორჯგინკო ღურაშ შიშის. ვალერია იჩიებ: „ჩქიმ დიაგნოზიქ ჩქინ ცხოვრება დუდგიმე გემნართინუ. გეგნოფსქიდკონ, სერიოზულ ოპერაცია მოსაჭირუდ. ბრელ ქირურგშა მეფრთჷ, მარა თინეფ ვარიას იჩიებდეს ზისხირიშ გინობუნაშ უმშო ოპერაციაშ ჩატარებაშენ. შქურნაფილ ვორდჷ, მარა ღორონთიშ კანონს მუთუნით ვეგნურთანდჷ დო ზისხირს ვეგნიბუნდჷ. მთელ ჩქიმ ცხოვრებას იეჰოვაქ ბრელნერო მოძირუ მუშ ჸოროფა დო ასე საშვალება მიღუდ, იშო ხოლო ქუვოძირკო თინა. ირო, მუჟამსით ექიმეფშე გლახა ამბეს ბგებულენდჷ, უმოსო გინობჭყვიდუნდჷ, იეჰოვას გუხარკო გურ დო სატანა წაგებულო ქიდიბტეკო. ბოლოს, მუდგათ იჸუნ, ჩამტარეს ოპერაცია ზისხირიშ უმშო, მუდგაქ ჯგირ შედეგეფ მიღჷ. ჯამრთელობაშ პრობლემეფ ამდღა ხოლო მიღჷ, მარა იეჰოვა ირიათო მარზენა ირფელს, მუთ მოსაჭირნა. მაგალთო, სოიშახ დიაგნოზის გემშქვანდეს, კრებას გუვარჩით სტატია, „გაბედულო გივორჯგინათ ამდღანერ სირთულეეფს“.c თე სტატიაქ მანგარო ემქექუეს გურშა. თეცალ სტატიეფ დო ჯგირ სულიერ განრიგ მა დო ჩქიმ მეუღლეს მოხვარდეს, დუდ მშვიდას იბგინითკო, სულიერ წონასწორობა ვამდინუაფდესკო დო სწორ გადაწყვეტილებეფ მემღებდესკო.

შიშშა გერჯგინა

19. მუ მოხვადუ მალას?

¹⁹ იეჰოვაშ მოხვარათ ქრისტიანეფ გიორჯგინანა რთულ სიტუაციეფს დო ოწინააღმდეგნა ეშმაკის (1 პეტ. 5:8, 9). თენა თქვა ხოლო შეილებნა. მალას იეჰოვა უზოჯუნს იესოს დო თიშ თანამართველეფს, მოსპან „ეშმაკიშ საქმეეფ“ (1 იოან. 3:8). თეშ უკულ ღორონთიშ ხალხ თის ირნერ შიშიშ უმშო ომსახურდას იჸი (ეს. 54:14; მიქ. 4:4). თეიშახ ბრელ ოკო იფხანდათ, ნამდა გივორჯგინათ შიშის.

20. მუ მიმეხვარებნა, გივორჯგინათ შიშის?

²⁰ საჭირო რე, უმოსო გუვამანგარათ თიშ რწმენა, ნამდა იეჰოვას უჸორთ დო მიცვენა. თეს მიმეხვარებნა თიშე ფიქრ დო ჩიება, მუჭო თხილუ ღორონთიქ მუშ მსახურეფ ჯვეშო. თეს გეძინელ, ირიათო ოკო ფშუდან, მუჭო მიმეხვარეს თიქ რთულ სიტუაციეფიშ გინოღალას. იეჰოვაშ მოხვარათ შემალებენა, გივორჯგინათ შიშის (ფსალმ. 34:4).