დირთინე იეჰოვაწკუმა მეგობრულ ურთიერთობა

ირწანას ქრისტიანულ კრებას ბრელ ძვირფას შხურ ართუ. წერმიდგინით, მუ „დიდ ხიოლ იჸუაფ ზეცას“ თითოულიშ დორთაშ დროს (ლუკ. 15:7, 10). სი ხოლო თინეფშე ართ-ართ ქორექ-და, შეილებ დარწმუნებულ რდე, ნამდა იესო, ანგელოზეფ დო პირადო იეჰოვა მანგარ გახარებულეფ რენა, მუჟამსით ორწყენა, ნამდა კრებას ართუქ. მარა იეჰოვაწკუმა მეგობრობაშ დორთინაფას შილებე სირთულეეფქ ქუმაჸუნას. მუ რე ნამთინე სირთულე დო მუქ შილებე მიგეხვარას?

მუ რე ნამთინე სირთულე?

კრებაშა დორთაშ უკულ ბრელ და დო ჯიმა ობრძოლ უარყოფით გრძნობეფს. სი ალბათ ჯგირო გარჩქილე, მუს გინაფლენდჷ მეფე დავით. იეჰოვაქ თის ცოდვეფ ქაპატუ, მარა დავითიქ პატიებაშ უკულ ხოლო თეცალ სიტყვეფ თქუ: „ჩქიმ შეცდომეფშე ფიქრ ვა მოსვანჯუანს“ (ფსალმ. 40:12; 65:3). პიროვნება იეჰოვაშა დორთაშ უკულ ხოლო შილებე წანეფს ობრძოლდას ონჯღორეშ ვარდა დანაშაულიშ გრძნობას. იზაბელ 20 წანაშე მეტ ხანს რდჷ გარიცხულ.a თიქ თქუ: „მანგარო მიჭირდჷ თიშ დაჯერება, ნამდა იეჰოვას შეულებუდ ჩქიმ პატიება“. მუჟამსით გურ გოიტირხუ, სულიერო კინ დესუსტებუქ (იგავ. 24:10). ირნერო ქეცად, ნამდა თექ ვა მოხვადას.

შხვეფს ოშქურნა, ნამდა ვეშიალებენა, გაკეთან ირფელ, მუთ საჭირო რე იეჰოვაწკუმა ხოლოშიან ურთიერთობაშ დართინაფალო. ანტუანქ კრებაშა დორთაშ უკულ თქუ: „ვორწყედ, ნამდა ბრელ მუთუნ გოჭყოლადირ მაფუდ, მუთ ადრე მიგურუაფ ვარდა მიკეთებ, მუჟამსით იეჰოვაშ მოწმე ვორდჷ“. თეცალ გრძნობეფიშ გურშენ შილებე ნამთინე დუდის ურიდანდას სულიერ საქმეეფს სრულაშე მონაწილებაშ მეღებას.

მაგალთო, წერმიდგინ, ნამდა პიროვნებას ქარბორიაქ ჸუდე ეკურღვჷ. შილებე თის აფიქრენდას, მუსხი დრო დო მონდომა დესაჭირებ თიშ კინ აშენებას. თეშნერო, სერიოზულ ცოდვაქ იეჰოვაწკუმა მეგობრობა აკოირღვ-და, შილებე ფიქრენდე, ნამდა თიშ კინ დორთინაფას დიდ მონდომა დო ხანდა დესაჭირებ. მარა რშუდას, სი ხვალე ვა რექ.

იეჰოვა მირაგადნა: „მორთით დო მუვაგვარათ საქმეეფ“ (ეს. 1:18). სი უკვე ბრელ მუთუნ აკეთ, ნამდა „მაგვარკო საქმეეფ“, მუდგაშ გურშენ ღორონთის მანგარო უჸორქ. დეფიქრ: იეჰოვაშა სქან დორთა თის საშვალებას არზენს, დამტკიცას, ნამდა სატანა მეტყურე რე (იგავ. 27:11).

თაშ მოქციებათ სი უკვე დეახლოვ იეჰოვას დო თინა პირობას გარზენს, ნამდა მუ ხოლო დეგეახლოებ (იაკ. 4:8). მუშო ოკო რაგად, ჯგირ რე, მუჟამსით შხვეფ ორწყენა, ნამდა სი კინ დართჷ კრებას, მარა საჭირო რე უმოს მეტიშ კეთება. საჭირო რე, გამანგარე სქან ზეციერ მუმაშ დო მეგობარიშ, იეჰოვაშ, ჸოროფა. მუჭო შეილებ თეშ კეთება?

გიღდას რეალურ მიზნეფ

ქეცად, გიღდას რეალურ მიზნეფ. სი ალბათ ვა გორჭყოლად მთავარ გურაფეფ იეჰოვაშ გურშენ დო თეს გეძინელ, მომავალწკუმა დაკავშირებულ თიშ დუნაპირებუეფ. მარა ასე გოსაჭირ, დართე ჯგირ სულიერ განრიგის, მუდგაშა მიშურს სახიოლო ამბეშ რეგულარულო ქადაგება, კრებაშ შეხვალამეფშა გილულა დო და დო ჯიმალეფწკუმა ურთიერთობა. გუვარჩუათ თუდო მოჩამილ მიზნეფ.

ხშირას დურაგადე იეჰოვას. სქან ზეციერ მუმას არჩქილე, ნამდა დანაშაულიშ გრძნობაშ გურშენ, შილებე ლოცვა გიჭირდას (რომ. 8:26). თეშ უმკუჯინუო, ირიათო ილოც, ქეჩი იეჰოვას, ნამდა მანგარო გოკო თიწკუმა მეგობრობა (რომ. 12:12). ანდრეი იშინანს: „დანაშაულიშ დო ონჯღორეშ გრძნობა ვა მოსვანჯუანდჷ. მარა ირ ლოცვაშ უკულ თე გრძნობეფ ჭიჭე-ჭიჭეთ მეთხიებუდ დო დუდის უმოს მშვიდას ბგინაფლენდჷ“. მუჟამსით ვაიჩქჷ, მუშ გურშენ ილოცე, დეფიქრ 51-ა დო 65-ა ფსალმუნს მოჩამილ მეფე დავითიშ ლოცვეფშე, ნამუთ მანგარო ნარღენდჷ მუშ დაშებულს.

რეგულარულო გეგმირკვი ბიბლია. თენა რწმენას გაიმანგარენს დო უმოსო ქოიჸოროფუანს იეჰოვას (ფსალმ. 19:7—11). ფილიპი იჩიებ: „რეგულარულ ბიბლიაშ კითხირ დო პირად გურაფა ვამღუდ. ზუსტას თენა რდჷ მთავარ მიზეზ, მუდგაშ გურშენ მივოდინე ძალიერ რწმენა დო გურ ქუწყუნე იეჰოვას. ვა მოკო, კინ თაშ ქუმოხვადას, ათეშენ გეგნობჭყვიდ, რეგულარულ პირად გურაფა მიღდას“. თეშ კეთება სი ხოლო შეილებ. პირად გურაფაშო საკითხეფიშ გორუა ქოიჭირს-და, შეილებ მოწიფულ მეგობარს ქოთხუე მოხვარა.

დირთინე მეგობრულ ურთიერთობა და დო ჯიმალეფწკუმა. კრებაშა ნამთინე ახალდორთელ ფიქრენს, ნამდა შხვეფს თიშ მიმართ უარყოფით დამოკიდებულება აღვენუნა. ლარისა იჩიებ: „ონჯღორე მიჩქუდ. დუდის თეშ ბგინაფლენდჷ, ითამ კრებას ვუღალატ. თეცალ გრძნობეფ ბრელ ხანს მაწუხენდჷ“. დარწმუნებულ რდა, ნამდა უხუცესეფს დო შხვა მოწიფულ ქრისტიანეფს ოკონა, ქიმგეხვარან, კინ დემეგობრე იეჰოვას (ქოძირით ჩარჩო „მუშ კეთება შეულებნა უხუცესეფს?“). თინეფს მანგარო ოხიოლნა სქან დორთინა დო ოკონა, ნამდა ბედნერ რდე (იგავ. 17:17).

მუს შეულებ, უმოსო დუგაახლოვას კრებაწკუმა? რეგულარულო დესწრ კრებაშ შეხვალამეფს და დო ჯიმალეფწკუმა ართო დო სრულაშე მიღჷ მონაწილება ქადაგებაშ საქმეს. მუჭო მიგეხვარებ თენა? ფელიქსი იჩიებ: „თანაქრისტიანეფ მთელ გურით ელდეს კრებაშა ჩქიმ დორთას, ათეშენ დუდის დაფასებულო ბგინაფლენდჷ. თინეფიშ მოხვარათ ქიბგინ, ნამდა კინ სულიერ ოჯახიშ წევრ ვორდჷ, იეჰოვაქ ქუმაპატუ დო შემლებუდ თიშ მსახურებაშ გაგრძელება“ (ქოძირით ჩარჩო „სი მუშ კეთება შეილებ?“).

სი მუშ კეთება შეილებ?

დართ ჯგირ სულიერ განრიგის, მუდგაშა მიშურს ლოცვა, ბიბლიაშ გურაფა დო და დო ჯიმალეფწკუმა ურთიერთობა

ხშირას დურაგადე იეჰოვას

ქუწი იეჰოვას, ნამდა მანგარო გოკო თიწკუმა მეგობრობა. უხუცესეფ ქილოცენა სქანო დო სქანწკუმა ართო

რეგულარულო გეგმირკვი ბიბლია

სულიერ საზრდოშ მეღება რწმენას გაიმანგარენს დო უმოსო ქოიჸოროფუანს იეჰოვას

დირთინე მეგობრულ ურთიერთობა და დო ჯიმალეფწკუმა

რეგულარულო დესწრ და დო ჯიმალეფწკუმა ართო კრებაშ შეხვალამეფს დო სრულაშე მიღჷ მონაწილება ქადაგებაშ საქმეს

დირთინე იეჰოვაწკუმა მეგობრულ ურთიერთობა!

მუჟამსით ეცადებუქ იეჰოვაწკუმა მეგობრობაშ დორთინაფას, სატანა ხოლო უმოსო ქეშეცადებ „ქარბორიაცალ“ პრობლემეფს ქეშგოხვამილუას, ნამდა სულიერო დუგასუსტას (ლუკ. 4:13). მორთ ამდღარშე ირფელ გაკეთ სქან სულიერობაშ გამანგარებელო.

იეჰოვა მუშ შხურს თეცალ დაპირებას არზენს: „დინაფილს დობგორუნქ, შარასეჩილათირს დუვორთინუანქ, წყუნაფილ ადგილს გოვუკირუნქ დო ძალაგიშალიებურს ძალას დურთინუანქ“ (ეზეკ. 34:16). იეჰოვაქ ბრელს მეხვარ, ნამდა მუწკუმა მეგობრულ ურთიერთობა დირთინუკო. დარწმუნებულ რდა, თის სქან მოხვარა ხოლო ოკო, ნამდა მუწკუმა უმოს ძალიერ დო ხოლოშიან ურთიერთობა გიღდას.

მუშ კეთება შეულებნა უხუცესეფს?

უხუცესეფ მნიშვნელოვან როლს ასრულენა, ნამდა ქიმეხვარან კრებაშა ახალდორთელ მაუწყებელეფს, კინ გავითარან იეჰოვაწკუმა მეგობრულ ურთიერთობა. გუვარჩუათ, მუშ კეთება შეულებნა თინეფს.

გურშა ელუკინით. მოციქულ პავლეს უჩქუდ, ნამდა მომნანიე შემცოდველქ შილებედ დარდის გეგნაჸუნკო (2 კორ. 2:7). პიროვნებას, ნამუთ კრებაშა ირთუ, შილებე ონჯღორე უჩქუდას, დუდის დამნაშავეთ გინაფლენდას დო გურქ გუტირხას. ათეშენ პავლექ კრებას თეცალ რჩევა მეჩჷ: „მთელ გურით ოკო აპატუათ დო გურშა ელუკინათ“. კრებაშა ახალდორთელეფს ოსაჭირნა თიშა დარწმუნება, ნამდა იეჰოვას დო თანაქრისტიანეფს მანგარო უჸორა. უხუცესეფ ხშირას ქაცქვანა დო პრაქტიკულო ქელურენან-და, ქიმეხვარებნა თინეფს, ნამდა გურქ ვა გუტირხან.

ქილოცით თინეფწკუმა ართო. „მართალ კოჩიშ ხვეწებას დიდ ძალა უღჷ“ (იაკ. 5:16). სტატიას მოშინაფილ ლარისა იჩიებ: „უხუცესეფს ქივეჩი ჩქიმ ეჭვეფ დო გრძნობეფიშ გურშენ. თინეფ ჩქიმწკუმა ართო ლოცულენდეს, შედეგო ქიმეფხვად, ნამდა უხუცესეფს ჩქიმდე გურ ვაფდეს მოულირ. თინეფს ოკოდეს, ქიმმეხვარესკო იეჰოვაწკუმა ურთიერთობაშ დორთინაფას“. თეო იჩიებ: „უხუცესეფიშ ლოცვაქ დუმარწმუნ, ნამდა იეჰოვას მართალო ვუჸორქ დო თინა ხვალე ჩქიმ გლახა თვისებეფს ვარინ, ჯგირ თვისებეფს ხოლო ორწყე“.

დემეგობრით. ახალდორთელეფს კრებას მეგობრეფ ოსაჭირნა. ჯასტინი, ნამუთ უხუცესო მსახურენს, იჩიებ: „ქეცადით, კრებაშა ახალდორთელეფ ხშირას მიდეჸონათ მსახურებაშა დო, მუთ უმოს მნიშვნელოვან რე, ჸუდეშა ხოლო ქიმიაკითხუათ. თინეფწკუმა დამეგობრება აუცილებერ რე“. შხვა უხუცეს, ჰენრი, იჩიებ: „მუჟამსით კრებას შხვეფ ქოძირნა, ნამდა უხუცესეფ ემეგობრებნა ახალდორთელს, თინეფ ხოლო მინდომენა თეშ კეთებას“.

ქიმეხვარით გურაფას. სულიერო მოწიფულ მეგობარს შეულებ ახალდორთელს ქიმეხვარას გურაფაშ ჯგირ განრიგ უღდას. ართ უხუცეს იჩიებ: „მანგარო მიჸორს პირად გურაფაშ დროს გიმორკვიებულ სულიერ აზრეფიშ შხვეფშა გაზიარება დო თინეფშა თიშ ძირაფა, მუ დიდ ხიოლ მოუღ ჩქიმდა ბიბლიაშ გურაფას. თეს გეძინელ, თინეფწკუმა ართო იბრკვიენქ ნამთინე გურიშემაკინალ სტატიას“. შხვა უხუცეს, კლეიტონი, მეჩიებნა: „კრებაშა ახალდორთელეფს ელუჩანქ, დოგორან თიცალ ბიბლიურ მაგალითეფ, ნამუთ მუნეფიშ შემთხვევას მეურე“.

დოჭყიშეთ. ახალდორთელქ უკვე ქოძირ უხუცესეფიშ, მუჭოთ მოსამართლეეფიშ როლ. მარა ასე თინეფს არძაშ უმოსო ოსაჭირნა უხუცესეფიშ, მუჭოთ ჭყიშეფიშ როლ ქოძირან (იერ. 23:4). მზათ რდა, ქურჩქილე, ქაცქუე დო ხშირ ურთიერთობა გიღდას თინეფწკუმა. ყურადღება ქიმიაქცი, მუს ორთჷ უხუცეს, სახელო მარკუსი, სამწყემსო მონახულებაშ დროს: „ჩქი ვუზიარენთ ბიბლიურ აზრეფს, ვოცქვანთ დო ვარწმუნენთ, ნამდა ქოთ ჩქი დო ქოთ იეჰოვას მოამაყნა თინეფ, თიშენ ნამდა ბრელ იხანდეს კრებაშა დართალო. თეს გეძინელ, ირ მონახულებაშ ბოლოს ჩქი მიბრაგადუანთ უკულიან მონახულებაშ დროს“.

a თე სტატიას სახელეფ თირელ რე.