რენო მუთუნ დუმაბრკოლებერ, მუთ გეცილებნა იესოშ მეჸუნას?

1. მუქ შილებე გუგაკვირესკო, მუჟამსით პირველო მინდომით ბიბლიურ ცნობაშ შხვეფშა გინოჩამა?

ქორშუნანო თი მომენტ, მუჟამსით მეხვადით, ნამდა ჭეშმარიტებას მიოგორეთ? ირფელ, მუდგას ბიბლიაშე გურაფლენდით, ადვილ გაგებელ გაფდეს! ფიქრენდით, ნამდა არძას მეწონებუდ თინა, მუთ თქვა ირწმუნით. დარწმუნებულ რდით, ნამდა ბიბლიურ ცნობა თინეფს აზრიან ცხოვრებას ქუმუღანდჷ ამდღარშო დო შესანიშნავ იმენდის მომავალშო (ფსალმ. 119:105). ათეშენ შურ დო გურით ეჩიებუდით ჭეშმარიტებაშ გურშენ თქვან მეგობრეფს დო ნათესეეფს. მარა, მუდგა გასაკვირ ვა რდუკონ, ბრელქ ვა მოირჩქილუეს.

2, 3. მუნერ დამოკიდებულება უღუდ იესოშ მიმართ თიმ დროს მახორუ ხალხის?

² ნამთინს ოკო ვა გამკვირდან, მუჟამსით ვა ღებულენა ცნობას, ნამდგას ფქადაგენთ. მართალ რე, იესო ორთუდ სასწაულეფს, მუთ თის ამტკიცენდჷ, ნამდა ღორონთშე რდჷ, მარა ხალხიშ უმენტაშ იშენით ვა ურჩქილედ. მაგალთო, თიქ გათელ ლაზარე. თე სასწაულ თიშ მოწინააღმდეგეეფს ხოლო ვეგნავარიებედეს. თეშ უმკუჯინუო, იუდეველ ლიდერეფს იშენით ვა ჯერდეს, ნამდა იესო მესია რდჷ. თინეფს იესოშ დო ლაზარეშ ჸვილუა ოკოდეს (იოანე 11:47, 48, 53; 12:9—11).

³ იესოს უჩქუდ, ნამდა ხალხიშ უმენტაშ ვაღიარენდჷ თის, მუჭოთ მესიას (იოანე 5:39—44). თიქ იოანე ნათლისმცემელიშ მოწაფეეფს უწუ: „ბედნერ რე თინა, მით ჩქიმდე დუმაბრკოლებერს ვარწყე მუთუნს“ (მათე 11:2, 3, 6). მუშენ ვაღიარენდჷ ბრელ იესოს?

4. მუს გუვარჩიენთ თე სტატიას?

⁴ თე დო უკულიან სტატიას, ჩქი გუვარჩიენთ მუსხირენ მიზეზის, მუშენ ვერწმუნ ბრელქ პირველ საუკუნეს იესო ქრისტე. თეს გეძინელ, ქობძირუნთ, მუშენ ვა ღებულენს ამდღა ბრელ ჩქინ ცნობას. დო მუთ არძაშ უმოს მნიშვნელოვან რე, ქიგებგენთ, მუშენ შემლებნა მიღდან იესოშ ძალიერ რწმენა, ნამდა ვა დევბრკოლათ.

1) იესოშ ისტორია

5. მუშენ შილებე ფიქრენდკო ნამთინე, ნამდა იესო ვარდჷ ნაწინასწარმეტყველებ მესია?

⁵ ბრელს აბრკოლენდჷ იესოშ ისტორია. მართალ რე, ხალხ აღიარენდჷ, ნამდა თინა ჯგირ მასწავლებერ რდჷ დო სასწაულეფს ხოლო ორთუდ, მარა თინეფშო იესო უბრალოთ ღარიბ ჯაშ მოხელეშ სქუა რდჷ, ნაზარეთშე, ნამუთ მნიშვნელოვან ქალაქო ვემიორჩქუდეს. ნათანაელქ ხოლო, ნამდგაქ უკულ იესოშ მოწაფეთ გინირთჷ, პირველო თქუ: „ნაზარეთშე ჯგირს მუს ოკო ელდე?!“ (იოან. 1:46). ნათანაელს შილებე ვა მოწონდკო თი ქალაქ, სოდეთ იესო ცხოვრენდჷ. ვარდა შილებე მიქაშ 5:2-ს მოჩამილ წინასწარმეტყველება შუდკო, ნამუთ იჩიებ, ნამდა მესია ნაზარეთის ვარინ, ბეთლემს დებადებუდ.

6. მუ მეხვარებუდ ხალხის იესოშ დროს, გეგშუჩინებდესკო მესია?

⁶ მუს იჩიებ წმინდა წერილეფ? ესაიაქ იწინასწარმეტყველ, ნამდა მესიაშ ნტერეფ ვედეინტერესებდეს თიშ წარმოშობათ (ეს. 53:8). მესიაშ გურშენ ბრელ დეტალ რდჷ ნაწინასწარმეტყველებ. ხალხის თე ინფორმაცია გეგმურკვიებუდკონ, ქიგეგენდეს, ნამდა იესოქ ბეთლემს დებად დო თინა მეფე დავითიშ გამნარყ რდჷ (ლუკ. 2:4—7). ათეშენ იესოშ დაბადებაშ ადგილ მეურე მიქაშ 5:2-ს მოჩამილ წინასწარმეტყველებას. იმწკუმა, მუ რდჷ პრობლემა? ხალხიქ უდუფიქრებუო გასამართლჷ თინა. თინეფს ვა უღდეს არძა ინფორმაცია დო ათეშენ დებრკოლეს.

7. მუშენ ვა ღებულენს ამდღა ბრელ იეჰოვაშ ხალხის?

⁷ ამდღა ხოლო რენო თეჯგურა პრობლემა? ქო. იეჰოვაშ მოწმეეფიშ უმენტაშ ვა ვორეთ მდიდარ დო საზოგადოებას აღიარებულ, ჩქი მიჯინენა, მუჭოთ „უგურაფ დო უბრალო კათას“ (საქ. 4:13). ნამთინე ფიქრენს, ნამდა ვეშემლებნა ვოგურუათ ბიბლია, მუშენდა ვამთებნა ნამთინ თეოლოგიურ სკოლა. შხვეფს მიორჩქუნა, ნამდა იეჰოვაშ მოწმეეფიშ რელიგია ამერიკულ რე, თიშ უმკუჯინუო, ნამდა თექ მოწმეეფიშ ხვალე 14% ცხოვრენს. რენა თიცალეფ ხოლო, მიდგას ურაგადნა, ნამდა მოწმეეფს ვა ბწანა იესოშ. წანეფიშ დინახალე ხალხ „ამერიკელ ჯაშუშეფს“ დო „ექსტრემისტეფს“ მიძახდეს. ბრელქ, მიდგაქ თეცალ ინფორმაცია მირჩქილუ, დებრკოლ, მუშენდა ვა უღნა არძა ფაქტ ვარდა ვეთვალისწინენა თინეფს.

8. მუჭოთ საქმეეფიშ 17:11-შე იძირე, მუშ კეთება რე საჭირო, ნამდა ადამიანეფქ გაგშეჩინან ღორონთიშ მსახურეფ ამდღა?

⁸ მუ მიმეხვარებნა, დუდ ავარიდათ დაბრკოლებას? საჭირო რე, დევეკვირათ ფაქტეფს. ზუსტას თეშ კეთება აფუდ გინოჭყვიდილ სახარებაშ მაჭარალ ლუკას. თის მონდომა ვა დურკებ, ნამდა დუდშე ბოლოშა ირფელ კილკილშა გეგმურკვიებუდკო. თის ოკოდ, მუშ სახარებას იკითხენდუნ თინეფქ, დერწმუნესკო, ნამდა, მუთ იესოშ გურშენ აფდეს გაგებულ, მართალ რდჷ (ლუკ. 1:1—4). ჯვეშ ბერეას მახორუ იუდეველეფ ხოლო ლუკაცალო ფიქრენდეს. მუჟამსით თინეფქ პირველო მირჩქილუეს სახიოლო ამბე იესოშ გურშენ, თე ინფორმაცია ებრაულ წერილეფს ქეშუდარეს, ნამდა დერწმუნესკო, ქორდჷ დო ვარ თენა მართალ (წეკითხით საქმეეფიშ 17:11). ჩქი ხოლო თეშნერო ოკო გეგმიბრკვიათ ფაქტეფ დო მუდგა ღორონთიშ ხალხშე დიბგურეთ, ოკო შევადარათ თის, მუთ ბიბლიას ჭარჷ. თეს გეძინელ, საჭირო რე, ჯგირო გეგმიბრკვიათ იეჰოვაშ ხალხიშ ამდღანერ საქმიანობა. ინფორმაციას თეშნერო გეგნვამოწმენთ-და, წინასწარ შექმნილ აზრის ვარდა მორჩქილაფირს ვემეფჩანთ საშვალებას, იმოქმედას ჩქინდა.

2) იესოქ ვარია თქუ, მესია რდუნ თიშ დამტკიცებელო სასწაულეფიშ კეთებაშე

9. მუქ მოხვად, მუჟამსით იესოქ ვარია თქუ, ქუძირაფუდკო ხალხშა ციურ ნიშან?

⁹ იესოშ დროს ნამთინეს ვაკმაყოფილენდჷ თიშ გურაფეფ. თინეფს უმოს ოკოდეს დო ითხინდეს, მესია რდუნ თიშ დამტკიცებელო, ქაძირუკო „ციურ ნიშან“ (მათ. 16:1). თე მოთხოვნა შილებე თიშენ უღდესკო, ნამდა არასწორო არჩქილედეს დანიელიშ 7:13, 14-ის ენოჭარილ სიტყვეფ. მარა იეჰოვას შხვა დრო აფუდ გიშაგორილ თე წინასწარმეტყველებაშ შეიოსრულებერო. იესოშ გურაფეფ დასაბაღ ოკო ჸოფედკო თინეფშო, ნამდა დერწმუნესკო, თინა მესია რდუნ. მარა, მუჟამსით იესოქ ვარია თქუ, ქუძირაფუდკო თინეფშა ნიშან, ნამდგას ელდეს, თინეფქ დებრკოლეს (მათ. 16:4).

10. მუჭო შეასრულ იესოქ მესიაშ გურშენ ესაიაშ წინასწარმეტყველება?

¹⁰ მუს იჩიებ წმინდა წერილეფ? მესიაშ გურშენ წინასწარმეტყველ ესაიაქ ჭარჷ: „ვა ღვარანდას იჸუაფ დო ხონარს ვეუკინანს, ქუჩას ვეგეგონენა თიშ ხონარს“ (ეს. 42:1, 2). იესო მოკრძალებურო მსახურენდჷ დო ვაცადუდ ყურადღება მიქცუკო. თის ვა უშენებ ტაძრეფ, ვართ რელიგიურ ბარგ მიკაქუნდჷ დო ვართ თის ითხინდჷ, ხალხიქ განსაკუთრებულ ტიტულით მიშინუკო. მუჟამსით იესო განსაცდელიშ წოხოლე გერდჷ, თის ვა უცადებ მეფე ჰეროდეშ სასწაულეფით გაკვირება (ლუკ. 23:8—11). მართალ რე, იესო ორთუდ სასწაულეფს, მარა მთავარ ყურადღება სახიოლო ამბეშ ქადაგებაშა აფუდ გინოღალირ. თიქ მუშ მოწაფეეფს უწუ: „თეშა ვორექ მოულირ“ (მარ. 1:38).

11. მუ არასწორ შეხედულება უღჷ ნამთინეს ამდღა?

¹¹ ამდღა ხოლო რენო თეჯგურა პრობლემა? ქო. ამდღა ბრელს მოწონს ძვირფასო მონწყილ დიდებულ ტაძრეფ, აღმატებულ წოდებეფ უღნან ფერ სასულიერო პირეფ დო ცერემონიეფ, ნამდგაშ მნიშვნელობა დო წარმომავლობა უმენტაშის ვა უჩქჷ. თი ადამიანეფ, მით თეცალ რელიგიურ შეხვალამეფს ოსწრუნა, ქოგურაფლენანო მუთუნს ღორონთიშ დო თიშ განზრახვეფიშ გურშენ?! მარა თინეფ, მით ოსწრუნა ჩქინ ქრისტიანულ შეხვალამეფს, გებულენა, მუს თხულენს იეჰოვა ჩქინდე დო მუჭო მიფქცუათ თიშ შესაბამისო. ჩქინ დარბაზეფ რე სუფთა დო მოკრძალებურ. თინეფს, მიდგას ხემძღვანელობა ოვალნა კრებეფს, ვამკაქუნა განსაკუთრებულ ბარგ დო ვართ ითხინა, შხვეფქ მნიშვნელოვან წოდებეფით მიშინუან. ჩქინ რწმენა დო გურაფეფ ღორონთიშ სიტყვაშა რე გერსხილ. ათეშენ, ამდღა ბრელ იბრკოლებ, მუშენდა თინეფ ფიქრენა, ნამდა ჩქინ თაყვანიშცემა უბრალო რე დო მუდგას ჩქი ვოგურუანთ, ვემურე თის, მუდგაშ გაგონება ოკონა.

12. მუჭოთ ებრაელეფიშ 11:1, 6-ის რე ენწყუმილ, მუშა ოკო რდას ჩქინ რწმენა გერსხილ?

¹² მუ მიმეხვარებნა, დუდ ავარიდათ დაბრკოლებას? მოციქულ პავლექ რომს მახორუ ქრისტიანეფს უწუ: „რწმენა მორჩქილაფაშ შედეგ რე, დო მორჩქილაფა — ქრისტეშ გურშენ ქადაგებაშ“ (რომ. 10:17). თაშ ნამდა, ჩქი რწმენას იმამნგარენთ წმინდა წერილეფიშ გურაფათ დო ვართ ხოლო არაბიბლიურ ცერემონიეფს მონაწილებათ, თინეფ მუდგანერ სქვამას ვეძირედასინ. რწმენა ზუსტ რჩქინაშა ოკო მაფდან გერსხილ, მუშენდა „რწმენაშ უმშო შეიოლებერ ვა რე, გურ გუხარათ ღორონთის“ (წეკითხით ებრაელეფიშ 11:1, 6). ათეშენ ჩქი ვა მოსაჭირნა განსაკუთრებულ ნიშან ცაშე თიშ დამტკიცებელო, ნამდა ჭეშმარიტებას ქიმვოგორეთ. რწმენაშ გუმამანგარებელ ბიბლიურ გურაფეფიშ ტომბაშე გიმორკვიება დასაბაღ რე თეშა დარწმუნებელო დო ეჭვეფიშ ჩათხინაფალო.

3) იესო ვემეჸუნდჷ ბრელ იუდაურ ტრადიციას

13. მუქ დაბრკოლ ბრელ?

¹³ მუჟამსით იესო დედამიწას რდჷ, თიშ მოწაფეეფ ვა მარხულენდეს, მუთ იოანე ნათლისმცემელიშ მოწაფეეფს უკვენდეს. იესოქ ენწყჷ, ნამდა მოციქულეფს მუთუნნერ მიზეზ ვა უღდეს, იმარხულესკო, ონდო თინა ცოცხალ რდჷ (მათ. 9:14—17). თეშ უმკუჯინუო, ფარისეველეფ დო შხვა მოწინააღმდეგეეფ თის ბრალს გედვანდეს, მუშენდა ვემეჸუნდჷ თინეფიშ ტრადიციეფს დო გერისხეს, მუჟამსით იესოქ საბატონს ლეხეფ დასქილიდუ (მარ. 3:1—6; იოან. 9:16). რელიგიურ ლიდერეფს ოამაყუდეს თიშ რაგად, ნამდა საბატონიშ კანონს იცვენდეს, მარა, თეწკუმა ართო, ტაძარს ვაჭრობას მუთუნნერ პრობლემას ვარწყედეს, ათეშენ, გურქ მოურთეს, მუჟამსით იესოქ ბრალ გედვჷ თეშ გურშენ (მათ. 21:12, 13, 15). თინეფქ ხოლო, მიდგას იესოქ ნაზარეთიშ სინაგოგას უქადაგ, გერისხეს, მუჟამსით თიქ ისრაელიშ ისტორიაშე მაგალითეფ ქიმიჸონ თიშ ოძირაფალო, ნამდა ეგოისტეფ რდეს დო სუსტ რწმენა უღდეს (ლუკ. 4:16, 25—30). იესოშ თეშნერ მოქმედებეფქ ბრელ დაბრკოლ, მუშენდა თინეფ შხვა მუდგარენს ელდეს თიშე (მათ. 11:16—19).

14. მუშენ ვეწონუანდჷ იესო ადამიანურ ტრადიციეფს, ნამუთ ვემურდჷ წმინდა წერილეფს?

¹⁴ მუს იჩიებ წმინდა წერილეფ? იეჰოვაქ წინასწარმეტყველ ესაიაშ პიჯით თქუ: „თე ხალხ მუშ პიჯით მოურს ჩქიმდა, ხვალე ნინათ მადიდენა, მარა თინეფიშ გურ შორს რე ჩქიმდე; ადამიანეფიშ მოგონილ წესეფიშ მეჸუნა ჩქიმ მოშიშება მიორჩქუნა“ (ეს. 29:13). იესო მართალ რდჷ, მუჟამსით ვეწონუანდჷ ადამიანურ ტრადიციეფს, ნამუთ ვემურდჷ წმინდა წერილეფს. თინეფ, მით ადამიანეფიშ მოფიქრებულ წესეფს დო ტრადიციეფს წმინდა წერილეფიშ უმოს მაღალას გიორინუანდეს, ვაღიარენდეს იეჰოვას დო თის, მით თიქ მაშქვჷ — მესიას.

15. მუშენ ვა მოწონს ამდღა ბრელს იეჰოვაშ მოწმეეფ?

¹⁵ ამდღა ხოლო რენო თეჯგურა პრობლემა? ქო. ბრელ იღიზიანებ, მუჟამსით იეჰოვაშ მოწმეეფ ვემეპჸუნთ არაბიბლიურ ტრადიციეფს დო ვა ბზეიმენთ დღესასწაულეფს, მუნერით რე დაბადებაშ დღა დო ქირსე. შხვეფს თიშენ მალენა გურ, ნამდა მონაწილებას ვა ბღებულენთ ნაციონალურ ღონისძიებეფს ვარდა დაკრძალვაშ ცერემონიეფს, ნამუთ ვა რე ღორონთიშ სიტყვაწკუმა შეთანხმებულ. თინეფს, მით თეშ გურშენ იბრკოლებ, შილებე მთელ გურით ჯერდან, ნამდა სწორაშე ცენა ღორონთის თაყვანს. მარა ბიბლიაშ არგამა გურაფეფშა ქვეყნიურ ტრადიციეფს ქისხუნუანან-და, ვეშიალებენა გურ გუხარან ღორონთის (მარ. 7:7—9).

16. მუჭოთ ფსალმუნიშ 119:97, 113, 163—165-ის ჭარჷ, მუ ოკო ვაკეთათ დო მუს ოკო ავარიდათ დუდ?

¹⁶ მუ მიმეხვარებნა, დუდ ავარიდათ დაბრკოლებას? საჭირო რე, გუვავითარათ იეჰოვაშ კანონეფიშ დო პრინციპეფიშ ძალიერ ჸოროფა (წეკითხით ფსალმუნიშ 119:97, 113, 163—165). მუჟამსით მიჸორა იეჰოვა, ვარიას ქოფთქუანთ არძა ტრადიციაშე, ნამუთ გურს უწყუნუანს თის დო მუთუნს ვემეფჩანთ საშვალებას, მეცილან თიშ ჸოროფას.

4) იესოს ვა უთირუ ხელისუფლება

17. მუს ელუდ ბრელ იესოშ დროს, მუდგაქ თინეფიშ დაბრკოლებაშ მიზეზიქ იჸუ?

¹⁷ იესოშ დროს ნამთინეს ხელისუფლებაშ თირუა ოკოდ. თინეფ ელდეს, ნამდა მესია დერსხენდჷ რომაელეფიშ ხეშე. მარა, მუჟამსით იესოშ გამეფება მინდომეს, თიქ ვარია თქუ (იოან. 6:14, 15). შხვეფს, თინეფ შქას მღვდელეფს, ოშქურდეს, ნამდა იესო პოლიტიკურ ცვლილებას მინდომენდჷ. შედეგო, გარისხებულ რომაელეფ მიდუღანდეს თინეფს მეჩამილ ძალაუფლებას. პოლიტიკაშე თაშ წუხენდესინ თიშენ, ბრელ იუდეველქ დებრკოლ.

18. მესიაშ გურშენ, ნამ ბიბლიურ წინასწარმეტყველებეფს ვემირჩქინანდჷ ბრელ მუთუნო?

¹⁸ მუს იჩიებ წმინდა წერილეფ? მართალ რე, ბრელ წინასწარმეტყველება იჩიებუდ, ნამდა მესია საბოლათ გამარჯვებულ მებრძოლ იჸუაფუდ, მარა შხვა წინასწარმეტყველებეფშე იძირედ, ნამდა თინა დიო ოკო დოღურედკო ჩქინ ცოდვეფიშ გურშენ (ეს. 53:9, 12). იმწკუმა, მუშენ უღდეს თინეფს არასწორ მოლოდინ? იესოშ დროს ბრელ მუთუნო ვემირჩქინანდჷ თი წინასწარმეტყველებეფს, ნამუთ თი პერიოდის მუნეფიშ პრობლემეფიშ მოგვარებაშ პირობას ვერზენდჷ (იოან. 6:26, 27).

19. მუს ელჷ ამდღა ბრელ ჩქინდე, მუდგაქ თინეფიშ დაბრკოლებაშ მიზეზიქ იჸუ?

¹⁹ ამდღა ხოლო რენო თეჯგურა პრობლემა? ქო. ამდღა ბრელს აბრკოლენს ჩქინ პოლიტიკურ ნეიტრალიტეტ. თინეფ ფიქრენა, ნამდა არჩევნეფს ოკო მიბღათ მონაწილება. მარა ჩქი მარჩქილენა იეჰოვაშ დამოკიდებულება, ნამდა ადამიანურ მართველობაშა ხუჯიშ დაკინებათ, თიშე ფთქუანთ ვარიას (1 სამ. 8:4—7). ხალხ შილებე თის ხოლო ფიქრენდას, ნამდა ჩქი ოკო ვაშენათ სკოლეფ, საავადმყოფოეფ დო ვაკეთათ შხვა თეცალ საქველმოქმედო საქმეეფ. თინეფ იბრკოლებნა, მუშენდა ჩქი მთავარ ყურადღება კაცობრიობაშ პრობლემეფიშ გინოჭკირუაშა ვარინ, ქადაგებაშ საქმეშა მაფნა გინოღალირ.

20. მუჭოთ მათეშ 7:21—23-ს მოჩამილ იესოშ სიტყვეფშე იძირე, მუშა ოკო მაფდან მთავარ ყურადღება გინოღალირ?

²⁰ მუ მიმეხვარებნა, დუდ ავარიდათ დაბრკოლებას? (წეკითხით მათეშ 7:21—23). ჩქი მთავარ ყურადღება თი საქმეშ კეთებაშა ოკო მაფდან გინოღალირ, მუთ იესოქ დუმავალეს (მათ. 28:19, 20). დრო ოკო ვა ვოდინუათ მსოფლიოშ პოლიტიკურ დო სოციალურ პრობლემეფიშ მოგვარებათ. ჩქი მიჸორა ხალხ დო მაწუხენა თინეფიშ პრობლემეფ, მარა მარჩქილენა, ნამდა მოყვასიშ მახვარებელო არძაშ უჯგუშ საშვალება თინეფშა ღორონთიშ სამეფოშ გურშენ გურაფა დო იეჰოვაწკუმა მეგობრობაშ გავითარებას მოხვარა რე.

21. მუ ოკო მაფდან გინოჭყვიდილ?

²¹ თე სტატიას ჩქი გუვარჩით ოთხ დუმაბრკოლებერ მიზეზ, მუდგაშ გურშენ პირველ საუკუნეს ბრელ ვა ღებულენდჷ იესოს დო მუდგაშ გურშენ შილებე ნამთინე ამდღა თიშ მიმაჸუნალეფს ხოლო ვა ღებულენდას. მარა ხვალე თე ოთხ მიზეზის ოკო ავარიდათო დუდ? ანწიან სტატიას გუვარჩიენთ ხოლო ოთხ დუმაბრკოლებერ მიზეზის. მორთ მტკიცაშო მაფდან გინოჭყვიდილ, ნამდა დუდ ავარიდათ დაბრკოლებას დო ვა ვოდინუათ ძალიერ რწმენა!