ჸოროფა მოხვარნა, მიფთვინათ შხვეფშე გოჯოგაფა

1. მუჭოთ მათეშ 24:9-ს ჭარჷ, მუშენ ოკო ვამკვენდან, ქვეყნიერებას ქობჯოგუთ-და?

იეჰოვაქ თეშ გუმოჭყეს, ნამდა ჸოროფა გეგმოფხანტითკო დო აშო ხოლო ქომიჸოროფესკო. ათეშენ, მუჟამსით მიდგარენს ბჯოგუთ, თენა გურს ალმოჭუანა დო შილებე შიშის ხოლო ბგინაფლენდათ. მაგალთო, ართ და, ჯორჯინა, ნამუთ ევროპას ცხოვრენს, იჩიებ: „14 წანერ ვორდჷ, მუჟამსით ჩქიმ დიდაქ გომჯოგუ, იეჰოვას ვომსახურუდინ თიშ გურშენ. მანგარ მოწყინაფილ ვორდჷ დო დუდის ხვალახეთ ბგინაფლენდჷ. ფიფქრენდჷ, ალბათ ვა ვორექ ჯგირ ადამიან-მაქ“.b ართ ჯიმა, ნამდგას დენილო ჯოხო, ჭარუნს: „იეჰოვაშ მოწმე ვორდინ თიშენ, ჯარიშკოჩეფქ გობლახეს, შეურაცხყოფას მიმორინუეს დო დუმორცქინეს. ათეშენ მაშქურინ დო დუდის დამცირებულო იბგინ“. შხვეფს ქობჯოგუთ-და, თენა დუდის მანგარ გლახათ მოგინებაფუანა, მარა ვამკვენა, მუშენდა იესოქ იწინასწარმეტყველ, ნამდა გომჯოგუანდეს (წეკითხით მათეშ 24:9).

2, 3. მუშენ ჯოგნა იესოშ მიმაჸუნალეფ?

² მუშენ ჯოგჷ ქვეყნიერებას იესოშ მიმაჸუნალეფ? მუშენდა იესოცალო, ჩქი ხოლო ვა ვორეთ „ქვეყნიერებაშ ნაწილ“ (იოან. 15:17—19). ათეშენ, მართალ რე, პატის ფცენთ ადამიანურ მთავრობეფს, მარა თაყვანს ვა ფცენთ ვართ თინეფს დო ვართ სახელმწიფო სიმბოლოეფს დო განსაკუთრებულ ართგურობას ხვალე იეჰოვაშ მიმართ გიმიფრჩქინანთ. ჩქი ხუჯის ვუკინენთ თი აზრის, ნამდა ღორონთის უღჷ აბსოლიტურ უფლება, რდას კაცობრიობაშ მართველ, მარა სატანა დო თიშ „გამნარყ“ ვათანხმუნა თეს (დაბ. 3:1—5, 15). ჩქი ფქადაგენთ, ნამდა ხვალე ღორონთიშ სამეფო რე კაცობრიობაშ იმენდ დო თინა მალას მოსპუნს არძას, მით თის ოწინააღმდეგ (დან. 2:44; გამოცხ. 19:19—21). თენა სახიოლო ამბე რე თვინიერეფშო, მარა გლახა ამბე — უბადოეფშო (ფსალმ. 37:10, 11).

³ ჩქი თიშ გურშენ ხოლო ბჯოგუთ, ნამდა ღორონთიშ სამართლიან ნორმეფით ფცხოვრენთ. თე ნორმეფ მანგარო გენესხვავებ ქვეყნიერებაშ ნორმეფშე. მაგალთო, ამდღა ბრელ არგამათ უკინენს ხუჯის თიცალ უზნეო მოქმედებეფს, მუდგაშ გურშენ ღორონთიქ განადგურ სოდომ დო გომორა! (იუდ. 7). თეცალ საკითხეფწკუმა დაკავშირებით ბიბლიურ ნორმეფს ვომორჩილუთინ თიშ გურშენ, ბრელ გუმოძიცანა დო შეუწყნარებელეფს მიძახნა (1 პეტ. 4:3, 4).

4. მუ თვისებეფ მამანგარენა, მუჟამსით ხალხის ბჯოგუთ?

⁴ მუ მიმეხვარებნა, მიფთვინათ, მუჟამსით ხალხის ბჯოგუთ დო შეურაცხყოფას მიმორინუანა? თიშ ძალიერ რწმენა მოსაჭირნა, ნამდა იეჰოვა ქიმმეხვარებნა. ჩქინ რწმენას, მუჭოთ ფარს, შეულებ „უბადოშ დაჩხირმონტებულ ისარეფიშ ეჩილითაფა“ (ეფეს. 6:16). ჩქი ხვალე რწმენა ვარინ, ჸოროფა ხოლო მოსაჭირნა. მუშენ იფჩიებუთ თეს? მუშენდა ჸოროფა „ვეღიზიანებ“. თინა ურზუ დო ითვინენს ირფელს, მუთ გურიშ ალმაჭუაფალ რე (1 კორ. 13:4—7, 13). მორთ ქობძირათ, მუჭო მოხვარნა იეჰოვაშ, თანამორწმუნეეფიშ დო ნტერეფიშ ჸოროფა, მიფთვინათ გოჯოგაფა.

იეჰოვაშ ჸოროფა მოხვარნა, მიფთვინათ გოჯოგაფა

5. მუჭო გამანგარ იესო მუმაშ ჸოროფაქ?

⁵ თიმ სერს, სოიშახ იესოს ნტერეფ ოჸვილარო ჭოფუნდეს, თიქ მუშ ართგურ მიმაჸუნალეფს უწუ: „მუმა მიჸორს, [ათეშენ] თის ვორთუქ, მუთ მუმაქ მუჩჷ მცნებათ“ (იოან. 14:31). იეჰოვაშ ჸოროფაქ გამანგარ იესო, ქუგურზკო თი განსაცდელეფს, ნამუთ ელუდ. ღორონთიშ ჸოროფას შეულებ ჩქინდე ხოლო თაშ იმოქმედას.

6. მუჭოთ რომაელეფიშ 5:3—5-ის ჭარჷ, მუჭო უჯინენა იეჰოვაშ მსახურეფ ქვეყნიერებაშე გოჯოგაფას?

⁶ ღორონთიშ ჸოროფა ირო ოხვარუდ იეჰოვაშ მსახურეფს, ქუგურზესკო თხოზინს. მაგალთო, მუჟამსით მოციქულეფს იუდეველეფიშ უზენაეს სასამართლოქ უზოჯ ვექადაგესკო, ღორონთიშ ჸოროფაქ თინეფ აღძრჷ, ადამიანეფიშ უმოსო ღორონთის დემორჩილესკო, მუჭოთ მართველს (საქ. 5:29; 1 იოან. 5:3). თეცალ ძალიერ ჸოროფა ამდღა ხოლო ამანგარენს ჩქინ და დო ჯიმალეფს, თინეფშე ბრელ მტკიცას გერე უდუნდებელ დო ძალაუფლება უღუნ ფერ მთავრობეფიშ თხოზინიშ უმკუჯინუო. თიშ მანგიორო, ნამდა გურქ გომტირხან, ქვეყნიერებაშე გოჯოგაფას პატით მიფრჩქინანთ (საქ. 5:41; წეკითხით რომაელეფიშ 5:3—5).

7. მუ რეაქცია ოკო მიღდან, მუჟამსით ოჯახიშ წევრეფ მოწინააღმდეგნა?

⁷ შილებე ართ-ართ დიდ გამოცდას ჩქინ ოჯახიშ წევრეფშე ქეშეფხვადათ. მუჟამსით ჭეშმარიტებაშ გურაფას იბჭყანთ, ნამთინე ოჯახიშ წევრიქ შილებე იფიქრას, ნამდა ღორებულ ვორეთ ვარდა ჭკუაშე გინიბლით (ქეშუდარით მარკოზიშ 3:21). თინეფქ შილებე მანგარო ქიმეწინააღმდეგან, მაგალთო ფიზიკურ დო ემოციურ ჭუა ხოლო ქიმმორინუან. თე უარყოფით რეაქციაქ ოკო ვა გამკვირდან. მუშენდა იესოქ თქუ: „კოჩის მუშ ოჯახიშ წევრეფ გინართუ ნტერო“ (მათ. 10:36). მუშო ოკო რაგად, მუდგანერ შეხედულება ვა უღდან ნათესეეფს ჩქინ გურშენ, თინეფს ნტერეფცალო ვა ვოქცუთ. თეშ გინაწონს, მუჭოთ იეჰოვაშ მიმართ ირდუ ჩქინ ჸოროფა თეშ ირდუ ხალხიშ მიმართ ხოლო (მათ. 22:37—39). მარა, დღას ვემვოტენთ ბიბლიურ კანონეფ დო პრინციპეფიშ მორჩილებას თიშ გურშენ, ნამდა შხვას ქუვასიამოვნათ.

8, 9. მუქ მეხვარ ართ დას წინააღმდეგობეფიშ უმკუჯინუო, ვა უდინუაფუდკო სიმტკიცე?

⁸ ჯორჯინაქ, ნამუთ ჟიშე მიფშინეთ, მტკიცაშე ქუდოსქიდ მუშ დიდაშე სასტიკ წინააღმდეგობაშ უმკუჯინუო. თინა ენწყუნს: „მა დო ჩქიმ დიდაქ ბიბლიაშ გურაფა ქიდიბჭყით მოწმეეფწკუმა. მარა ამშვ თუთაშ უკულ, მუჟამსით მა შეხვალამეფშა მოკოდ დასწრება, ჩქიმ დიდაშ დამოკიდებულებაქ მთლიანო დითირ. ქიგებგჷ, ნამდა თის ურთიერთობა უღუდ განდგომილეფწკუმა დო ჩქიმწკუმა ჩიებაშ დროს თინეფიშ არგუმენტეფს იმეორენდჷ. თინა შეურაცხყოფას ხოლო მუმორინუანდჷ, თუმას გუმოპუტორანდჷ, მოშქვიდუანდჷ დო გინომრღვანდჷ ლიტერატურას. 15 წანერო გინიფრთინ თიშ უკულ, დიბნათ. იეჰოვაშ მსახურება მიმოტებაფუკონ, ჩქიმ დიდაქ თიცალ დაწესებულებაშა გომტუ, სოდეთ თიცალ მოზარდეფ ცხოვრენდეს, მით გლახათ იქციებუდ. თინეფშე ნამთინე ნარკოტიკის ღებულენდჷ დო კრიმინალურ დანაშაულ ხოლო აფუდ ნაკეთებ. წინააღმდეგობაშ გარზება განსაკუთრებულო რთულ თიმწკუმა რე, მუჟამსით თიცალ ადამიანშე შეხვადუქ, მიდგას ოკო უჸორდე დო სქანდე ზრუნენდას“.

⁹ მუჭო გიორჯგინ ჯორჯინაქ თე წინააღმდეგობას? თინა იჩიებ: „თიმ დღას, მუჟამსით ჩქიმ დიდაქ წინააღმდეგობა დომიჭყჷ, ბიბლიაშ მთლიანო კითხირ ახალ ნათებ მაფუდ. უკვე დარწმუნებულ ვორდჷ, ნამდა თენა ჭეშმარიტება რდუ დო იეჰოვაწკუმა მანგარ ხოლოს ბგინაფლენდჷ დუდის. ხშირას ბლოცულენდჷ დო თინა ხოლო მირჩქილედ. თე გიშასწორებელ დაწესებულებას ფცხოვრენდინ თიმწკუმა, ართ და მაპატიჟენდჷ მუშ ჸუდეშა დო ჩქი ბიბლიას ართო ბკითხულენდით დო იბრკვიენდით. თე დროშ დინახალე კრებას და დო ჯიმალეფ მამანგარენდეს. თინეფქ მუნეფიშ ოჯახიშ წევრო მემღეს. არგამათ ქობძირ, ნამდა ვა უღჷ მნიშვნელობა, მი მოწინააღმდეგნა, იეჰოვა არძაშე უმოს ძალიერ რე“.

10. მუშა შემლებნა ვორდათ დარწმუნებულ?

¹⁰ პავლე მოციქულქ ჭარჷ, ნამდა მუთუნს „ვეშიალებე გენკმოჸოთან ღორონთიშ ჸოროფას, ნამუთ ჩქინ უფალ ქრისტე იესოს რე“ (რომ. 8:38, 39). თიშ უმკუჯინუო, ნამდა შილებე მინშა განსაცდელს შეფხვადათ, იეჰოვა ირიათო ჩქინწკუმა იჸუაფ, გურშა ემქექუანა დო გუმამანგარენა. მუჭოთ ჯორჯინაშ მაგალითშე იძირე, თინა ჩქინ ძვირფას სულიერ ოჯახიშ საშვალებათ ხოლო მოხვარნა.

თანამორწმუნეეფიშ ჸოროფა მოხვარნა, მიფთვინათ გოჯოგაფა

11. მუჭო მეხვარ მოწაფეეფს ჸოროფაქ, ნამუთ იესოქ იოანეშ 15:12, 13-ს ენწყჷ? ქიმიჸონით მაგალით.

¹¹ ღურაშახ იესოქ მუშ მოწაფეეფს გაშინ, ნამდა უჸორდესკო ართიან (წეკითხით იოანეშ 15:12, 13). თის უჩქუდ, დუდგინოდვალირ ჸოროფა მეხვარებუდ თინეფს, ვადინუესკო ართობა დო მითვინესკო ქვეყნიერებაშე გოჯოგაფა. გუვარჩუათ თესალონიკეშ კრებაშ მაგალით. თე კრებაქ ჩემეყალიბუნ თიშ უკულ თექიან და დო ჯიმალეფს თხოზუდეს. მარა თინეფქ ართობაშ დო ჸოროფაშ ჯგირ მაგალით მუჩეს (1 თეს. 1:3, 6, 7). პავლექ ელუჩ თინეფს, გაგრძელესკო ჸოროფაშ გიმორჩქინა დო ხოლო უმოსო გამანგარესკო თე გრძნობა (1 თეს. 4:9, 10). ჸოროფა აღძრენდჷ თე და დო ჯიმალეფს, გურშა ეუქექუესკო გურაკოჭირებულეფს დო ქელუდირთესკო სუსტეფს (1 თეს. 5:14). თინეფ მეჸუნდეს პავლეშ მითითებეფს დო მუშ მაჟია წერილს, ნამუთ სოდგარენ ართ წანაშ უკულ ჭარჷ, პავლექ უწუ თესალონიკელეფს: „უმოსო გემანგარებნა . . . ართიანიშ ჸოროფა“ (2 თეს. 1:3—5). ჸოროფაქ მეხვარ თინეფს, გიორჯგინესკო გაჭირებას დო თხოზინს.

12. მუჭო გიმირჩქინეს ართ ქიანას და დო ჯიმალეფქ ართიანიშ ჸოროფა ომიშ დროს?

¹² დეფიქრით ჟიშე მოშინაფილ დენილოშ დო თიშ ოსურიშ მაგალითშე. მართალ რე, თინეფიშ ქალაქის ომ რდუ, მარა იშენით აგრძელენდეს შეხვალამეფიშ დასწრებას, ნამ შეულებდეს თით ქადაგენდეს დო და დო ჯიმალეფს მუნეფიშ ოჭკუმალს ურთუნდეს. ართ დღას დენილოშა შეიარაღებულ ჯარიშკოჩეფქ ქუმორთეს. თინა იჩიებ: „თინეფ მანძალენდეს, ვარია ქოფთქვიკო ჩქიმ რწმენაშე. თენა ვა ვაკეთინ, გობლახეს დო ოშქურნაფალო ჩქიმ დუდიშ ჟი იარაღის ოჸოთანდეს. ულაშახ დუმორცქინეს, ნამდა დირთუდეს დო ჩქიმ ოსურს გაუპატიურენდეს. მარა ჯიმალეფქ მატარებელით ხეთეშე შხვა ქალაქშა გომტეს. დღას ვაგმოჭყორდუ თე ძვირფას ჯიმალეფიშ გიმორჩქინელ ჸოროფა. ახალ ქალაქშა გენოფრთითინ, თექიან ჯიმალეფქ ოჭკუმალ ქომჩეს დო მიმეხვარეს სამუშაშ დო ოცხოვრებელ ბინაშ გორუას! შედეგო, შემლებდეს მიბღითკო შხვა და დო ჯიმალეფ, მით ნტებულ რდეს საომარ ტერიტორიაშე“. თეცალ შემთხვევეფ მოძირანა, ნამდა ქრისტიანულ ჸოროფას შეულებ მუმოთვინებაფუან გოჯოგაფა.

ჩქინ ნტერეფიშ ჸოროფა მოხვარნა, მიფთვინათ გოჯოგაფა

13. მუჭო მოხვარნა წმინდა შურ, იეჰოვაშ ართგურო ქუდოფსქიდათ, მუჟამსით შხვეფს ბჯოგუთ?

¹³ იესოქ მუშ მიმაჸუნალეფს უწუ, უჸორდესკო მუნეფიშ ნტერეფ (მათ. 5:44, 45). ადვილ რენო თეშ კეთება? მუშო ოკო რაგად, ვარ! მარა თენა შეიოლებერ რე ღორონთიშ წმინდა შურიშ მოხვარათ. წმინდა შურიშ ნაყოფშა მიშურს ჸოროფა, მოთვინება, სიკეთე, ლიბ ხასიათ დო დუდშეკება (გალ. 5:22, 23). თე თვისებეფ მოხვარნა, მიფთვინათ გოჯოგაფა. ბრელ მოწინააღმდეგეს დათირ შეხედულებაქ მორწმუნე ქომონჯიშ, ოსურიშ, სქუაშ ვარდა მეზობელიშ გიმორჩქინელ ღორონთიერ თვისებეფიშ გურშენ. ბრელქ ჩქინ და დო ჯიმათ გინირთჷ. ათეშენ, თინეფიშ ჸოროფაქ, მიდგას რწმენაშ გურშენ ჯოგუთ, გაიჭირდეს-და, ქოთხით იეჰოვას წმინდა შურ (ლუკ. 11:13). დარწმუნებულ რდათ, ღორონთიშ მორჩილება, ირო არძაშ უჯგუშ რე (იგავ. 3:5—7).

14, 15. მუჭო მეხვარ რომაელეფიშ 12:17—21-იქ იასმინს, გეგმირჩქინკო ქომონჯიშ ჸოროფა, თიშ უმკუჯინუო, ნამდა თინა მანგარო ოწინააღმდეგუდ?

¹⁴ დეფიქრით იასმინიშ მაგალითშე. მუჟამსით თიქ იეჰოვაშ მოწმეთ გინირთჷ, ქომონჯ ფიქრენდჷ, ნამდა თინა დაღორეს დო ოცადუდ, მიოტებაფუკო ღორონთიშ მსახურება. თინა შეურაცხყოფას მიორინუანდჷ იასმინს დო ეიახნარენდჷ ნათესეეფს, რელიგიურ ლიდერს დო ჯადოქარს, დარცქინესკო თის დო ოჯახიშ აკორღვაფა ქეკაწამესკო. ხვალე თენა ვარინ, იასმინიშ ქომონჯ შეხვალამაშ დროს ჯიმალეფს სიტყვიერ შეურაცხყოფას მიორინუანდჷ! იასმინი ხშირას ინგარდჷ, მუშენდა თის მანგარ გლახათ ოქცუდეს.

¹⁵ კრებას იასმინს მუშ სულიერ ოჯახ გურშა ეუქექუანდჷ დო ამანგარენდჷ. უხუცესეფქ ელუჩეს თის, რომაელეფიშ 12:17—21-ს მოჩამილ სიტყვეფს მიაჸუნკო (წეკითხით). იასმინი იჩიებ: „თენა ვარდჷ ადვილ, მარა იეჰოვას ქოფთხი მოხვარა დო ირფელს ვორთუდ, ნამდა მივაჸუნკო თის, მუდგას ბიბლია იჩიებ. ათეშენ, მუჟამსით ჩქიმ ქომონჯ კუხნას გვამს სპეციალურო ორღვანდჷ, მა ბწიმინდანდჷ. მუჟამსით შეურაცხყოფას მიმორინუანდჷ, ლიბას ვარზენდჷ პასუხის დო მუჟამსით გლახათ რდუ, ვულუანდჷ“.

16, 17. მუს გურაფლენთ იასმინიშ მაგალითშე?

¹⁶ იასმინქ ჯილდო მიღჷ, ქომონჯიშ ჸოროფას გიმირჩქინანდუნ თიშენ. თინა იჩიებ: „ჩქიმ ქომონჯ უმოსო მონდუდ, მუშენდა უჩქუდ, ტყურას დღას ვა ფთქუანდჷ. მუჟამსით ჩქიმ რელიგიაშ გურშენ ვეჩიებუდ, პატიცემათ რჩქილა ქიდიჭყჷ დო ოთანხმუდ თი აზრის, ნამდა ჸუდეს მშვიდობა მიღდესკო. ასე თინა აშო მირაგად, კრებაშ შეხვალამეფშა მიდაფრთე. ჩქინ ოჯახურ ცხოვრებაქ მანგარო გეუჯგუშ დო ფხარენთ ნამდვილ სიმშვიდეთ. იმენდ მიღჷ, ჩქიმ ქომონჯ მიღენს ჭეშმარიტებას დო ართო ვემსახურებუთ იეჰოვას“.

¹⁷ იასმინიშ მაგალით ოძირანს, ნამდა ჸოროფა „ირფელს ურზუ, . . . ირფელიშ იმენდ უღჷ დო ირფელს ითვინენს (1 კორ. 13:4, 7). გოჯოგაფა შილებე ძალიერ დო გურიშალმაჭუაფალ რდას, მარა ჸოროფას უმოს შეულებ. თის შეულებ ადამიანს დამოკიდებულება დათირაფუას დო თიშ გურ მიგას. ჸოროფაშ გიმორჩქინა გურს უხარენს იეჰოვას. თიმწკუმა ხოლო, მუჟამსით ჩქინ მოწინააღმდეგეეფ აგრძელენა გოჯოგაფას, შემლებნა ვორდათ ბედნერეფ. მუჭო რე თენა შეიოლებერ?

რდათ ბედნერეფ, მუჟამსით ჯოგუთ

18. მუშენ შემლებნა ვორდათ ბედნერეფ, მუჟამსით ბჯოგუთ?

¹⁸ იესოქ თქუ: „ბედნერეფ რეთ, ხალხის ქოჯოგუთ-და“ (ლუკ. 6:22). ჩქი ვეგშებგორუნთ გოჯოგაფილო რინას დო ვა ვოცადუთ, ვორდათ წამებულეფ. იმწკუმა, მუშენ შემლებნა ვორდათ ბედნერეფ, მუჟამსით ბჯოგუთ? გუვარჩუათ სუმ მიზეზი. პირველ, მუჟამსით იფთვინენთ, ღორონთიშ მოწონას ბღებულენთ (1 პეტ. 4:13, 14). მაჟია, ჩქინ რწმენა უმოს ძვირფასო დო ძალიერო გინირთუ (1 პეტ. 1:7). მასმა, მიბღენთ ფას ვეგიდვინენ ფერ ჯილდოს — ულიებ სიცოცხლეს (რომ. 2:6, 7).

19. მუშენ რდეს მოციქულეფ ბედნერეფ გოროზგუაშ უკულ?

¹⁹ იესოშ გათელებაშ უკულ ხეთეშე მოციქულეფქ გეგმოცადეს ხიოლ, ნამდგაშ გურშენ თინა იჩიებუდ. თიშ უკულ, მუთ გოროზგეს დო უზოჯეს ვექადაგესკო, თინეფ ბედნერეფ რდეს, მუშენდა „თიშ [იესოშ] სახელიშ გურშენ შეურაცხყოფაშ ღირსეფქ იჸუეს“ (საქ. 5:40—42). თინეფს ნტერეფიშ შიშიშ უმოსო მუნეფიშ ბატონიშ ჸოროფა უღდეს დო თე ჸოროფას სახიოლო ამბეშ სახალხოთ დო „უშულადუო“ გაცხადებათ ოძირანდეს. ამდღა ხოლო ბრელ ჩქინ და დო ჯიმა, სირთულეეფიშ უმკუჯინუო, აგრძელენს ართგურო მსახურებას. თინეფს უჩქნა, ნამდა იეჰოვას ვა გაჭყორდუ ხანდა დო თი ჸოროფა, ნამდგას თიშ სახელიშ გურშენ გიმირჩქინანა (ებრ. 6:10).

20. მუს გუვარჩიენთ ანწიან სტატიას?

²⁰ ქვეყნიერებას ბჯოგუდათ იჸი ონდო თე სისტემა არსებენს (იოან. 15:19). მარა შიშიშ მიზეზ ვა მიღნა. მუჭოთ ანწიან სტატიაშე ბძირუნთ, იეჰოვა გამანგარენს დო დეცვენს მუშ ართგურეფს (2 თეს. 3:3). ათეშენ, მორთ ირიათო მიჸორდან იეჰოვა, და დო ჯიმალეფ დო ნტერეფ ხოლო. მუჟამსით მივაჸუნუთ თე რჩევას, ვა ვოდინუანთ ართობას დო ძალიერ რწმენას, განვადიდენთ იეჰოვას დო დუვამტკიცენთ, ნამდა ჸოროფას უმოს მეტ შეულებ, ვინემ გოჯოგაფას.