„იეჰოვაქ გამსწორ ოულარ შარა“

მშობლეფქ სწორ შარას ქიგმორინუეს

დაქორწინებაშახ, 1920-იან წანეფს, ჩქიმ მშობლეფქ ჭეშმარიტება ქიგეგეს. მა 1939 წანაშ დაჭყაფუს დებაბდჷ. ბაღანობას ინგლისის ფცხოვრენდით დო შეხვალამეფშა მშობლეფს გილაპჸუნდჷ. ჭიჭე ხანშა თეოკრატიულ მსახურებაშ სკოლას ქენიბჭარ. ასე ხოლო ფშუ, მუჟამსით პირველო ვაკეთ მოხსენება, ყუთის ქიგმაბდირთჷ, ნამდა ტრიბუნას ქელვანჭიკო დო აუდიტორია ქობძირკო. ამშვ წანერ ვორდჷ დო მანგარო ბნერვიანენდჷ, მუშენდა ვორწყედ, აუდიტორიას უნჩაშეფ მიკოხედეს.

მუაჩქიმქ მარტივ შეთავაზება ქიგემჭარ ბარათშა, ნამდა ოქადაგებელო გეგმომრინუაფუდკო. ბრუო წანერ ვორდჷ პირველო მობინადრეშ კარშა ხვალე მეფრთინ. მანგარო მახიოლ, მუჟამსით მობინადრექ წეკითხჷ ჩქიმ ბარათ დო ხეთეშე გაგწომიღ წიგნ, „მართალ რდას ღორონთ“! მა ქუჩა გალებრულ, ნამდა თენა ჩქიმ მუმაშა ქომთქუალუდკო. მსახურება დო შეხვალამეფს ჩქიმდა ხიოლ მოუღუდ დო მიმეხვარ, იეჰოვაშა სრულ დროთ მსახურება მიზანო მიღუდკო.

ბიბლიურ ჭეშმარიტებაშ ჸოროფა უმოსო თიშ უკულ მემანგარებუდ, მუთ მუაჩქიმქ ჩქიმო „გინაჯინალ კოშკიშ“ გიშაჭარუა ქიდიჭყჷ. მუჭოთ მეილშა ქიმიშ, ხეთეშე ყურადღებათ ბკითხულენდჷ არძა ეგზემპლარს. იეჰოვაშ მიმართ ჩქიმ ნდობაქ მირდჷ დო აღბძრჷ, დუდ მევუძღვინკო თის.

მთელ ოჯახ ვოსწრუდით კონგრესის ნიუ-იორკის 1950 წანას. თე კონგრესიშ მთავარ თემა რდუ „თეოკრატიაშ რდუალა“ დო 3 არგუსოშ, ცააშხა დღაშ, თემა — „მისიონერულ დღა“. თიმ დღას ჯიმა კერი ბარბერქ, ნამუთ უმოს გვიანო ხემძღვანელ საბჭოს მსახურენდჷ, გაკეთ ნათუაშ მოხსენება. თიშ უკულ მუთ მოხსენებაშ ბოლოს ნათუაშ კანდიდატეფს ჟირ კითხვა დუსვჷ, გემწობდირთჷ დო ქოფთქვი „ქო!“. 11 წანერ ვორდჷ, მარა მარჩქილედ, მუ მნიშვნელოვან ნაბიჯ გინობდგჷ. წყარიშ ინულაშა მოშქურუდ, მუშენდა ნჩურუა ვა მიჩქუდ. ჩქიმ ბიძიაქ აუზშახ ქიმმაჸუნ დო დუმარწმუნ, ნამდა ირფელ ჯგირო იჸუაფუდ. დო თექ ქოთ თიშ მამალას მოხვად, ნამდა ჩქიმ კუჩხეფ აუზიშ ქვინჯის შურო ვენკოწაწაფ. ართ ჯიმაშ ხეშე მაჟია ჯიმაშ ხეს ქუმოფხვად. ართიქ დობნათ დო მაჟიაქ აუზშე გეშამიჸონ. თე მნიშვნელოვან დღაშ უკულ იეჰოვაქ გაგრძელ ჩქიმ ოულარ შარეფიშ გასწორება.

იეჰოვაშა მენდება გიშებგორ

სკოლა გუვათენ, პიონერო მსახურება მოკოდ, მარა ჩქიმ მასწავლებერეფ ელამჩანდეს, ნამდა უმაღლესის გამგრძელებუდკო გურაფა. მა ქუდვაჸუნ თინეფს დო უნივერსიტეტის ჩუვაბარ; მარა მალას ქიმეფხვად, ნამდა ვეშემლებუდ ჭეშმარიტებას მანგარო გერნა დო, თეწკუმა ართო, გურაფაშა ყურადღებაშ გინოღალა, ათეშენ გეგნობჭყვიდ გურაფა მემტებუდკო. თეშ გურშენ ბლოცულენდჷ დო ტაქტიან წერილ ქიმებჭარ ჩქიმ მასწავლებერეფს, ნამდა პირველ წანაშ ბოლოს მივოტენდჷ გურაფას. იეჰოვაშა სრულ მინდობათ, ხეთეშე სრულ დროთ მსახურება ქიდიბჭყჷ.

სრულ დროთ მსახურება ველინგბოროს 1957 წანაშ კვირკვეს დიბჭყჷ. ჯიმალეფს ლონდონიშ ბეთელშე ფთხი, ქუთქუალდესკო ჩქიმდა თიცალ გამოცდილ პიონერ ჯიმაშ გურშენ, მიდგაწკუმა შემალებედ თანამშრომლობა. ჯიმა ბერტ ვეისიქ ბრელ მუდგარენ დუმოგურუ. თიშ დუდგინოდვალირო მსახურებაშ მაგალითიქ მიმეხვარ, მიღუდკო მსახურებაშ ჯგირ განრიგ. კრებას ვორდით მა, ჯიმა ვეისი დო ამშვ ხანშამიშულირ და. შეხვალამეფშო მომზადებაქ დო თექ მონაწილებაშ მეღებაქ მუჩჷ საშვალება, იეჰოვაშ ნდობა გუვამანგარკო დო რწმენა გეგმიფრჩქინკო.

ჯარშა ულაშენ ვარიაშ რაგადიშ გურშენ ციხეს ვოხედ. გათავისუფლებაშე ჭიჭე ხანშა სპეციალურ პიონერ დას, ბარბარას, ქეშეფხვად. ჩქი 1959 წანას დებქორწინით დო მზათ ვორდით სოდგა დაბნიშნენდეს, ირდიხაშა მილინდესკო. პირველო ლანკაშირს, ჩრდილო-დასავლეთ ინგლისის, დაბნიშნეს. უკულ, 1961 წანაშ იანარს, მა მემწვიეს სამეფო მსახურებაშ სკოლაშ ართ თუთიან კურსშა ლონდონიშ ბეთელს. მანგარო გამკვირდჷ, მუჟამსით გურაფაშ ბოლოს გილმალ მსახურებას დებნიშნჷ. ჟირ მარას ართ გამოცდილ რაიონულ ზედამხედველშე ბგურაფლენდჷ ქალაქ ბირმინგემს დო ბარბარაქ ხოლო გინოჭყვიდ, ჩქიმწკუმა ართო იმსახურკო. თეშ უკულ მიდაფრთით ჩქინ დანიშნულებაშ ადგილშა, ლანკაშირ დო ჩეშირშა.

იეჰოვაშა მენდება ირო სწორ რე

მუჟამსით 1962 წანაშ არგუსოს იფსვანჯუდით, ფილიალშე წერილქ ქუმომირთეს. თე წერილწკუმა ართო რდუ გალაადიშ სკოლაშ ბლანკ! მა დო ბარბარაქ დიო ქიბლოცით, უკულ შევავსით დო ხეთეშე ქუვოჯღონით თინა კინ ფილიალშა, მუჭოთ წერილს ჭარუდ. ხუთ თუთაშ უკულ უკვე ბრუკლინშა, ნიუ-იორკშა მიფშით, ნამდა გალაადიშ სკოლაშ 38-ო კლასის ვით თუთიან თეოკრატიულ განათლებაშ კურს გემკომრთუმდესკო.

გალაადიშ სკოლას ხვალე ღორონთიშ სიტყვა დო თიშ ორგანიზაციაშე ვარინ, ჩქინ საჯიმალოშ გურშენ ხოლო დიბგურეთ. დიო ხოლო 20 წანერეფ ვორდითინ თეშ, ბრელ მუდგარენ დიბგურეთ თე კლასიშ შხვა სტუდენტეფშე. ჩქიმო დიდ პატი რდუ, ირდღას იფთანამშრომლიკო ჯიმა ფრედ რასკწკუმა, ჩქინ ართ-ართ მასწავლებერწკუმა. ართ მნიშვნელოვან გაკვეთილ, მუთ თიქ მოგურუ, რდუ რჩევაშ სწორას მეჩამა. რჩევა თიმწკუმა რე ჯგირ, მუჟამსით თინა ღორონთიშ სიტყვაშა რე გერსხილ. შხვა ჯიმალეფ, მით მოგურუანდეს, რდეს ნეითან ნორი, ფრედერიკ ფრენცი დო კარლ კლაინი. ბრელ დიბგურეთ თანდაბალ ჯიმა ალექსანდრე მაკმილანიშ მაგალითშე, მიდგაქ უმოს ემინწყეს, მუჭო ხემძღვანელენდჷ იეჰოვა მუშ ხალხის გამოცდეფიშ დროს 1914—1919 წანეფს!

დუმათირეს დანიშნულებაქ

გურაფაშ ბოლოს ჯიმა ნორქ მა დო ბარბარას მიწუეს, ნამდა დანიშნულ ვორდით ბურუნდის, აფრიკას. ჩქი ხეთეშე ბეთელიშ ბიბლიოთეკაშა მიდაფრთით, ნამდა წელიწდეულშე ქომძირდესკო, მუსხი მაუწყებელ მსახურენდჷ ბურუნდის თი დროს. მანგარო გამკვირდეს, ნამდა სოთინ ვამაგორეს თე ინფორმაციაქ! ჩქი მიფშით დღას ვარდჷ ნაქადაგებუნ ფერ ტერიტორიაშა, ნამუთ თიცალ კონტინენტის რდუ, ნამდგაშეთ ბრელ მუთუნ ვა მიჩქუდეს. მანგარო მნერვიანენდით! მარა მთელ გურით რაგადებულ ლოცვაქ დუმამშვიდეს.

ჩქინ ახალ დანიშნულებას ირფელ განსხვავებულ რდუ — კლიმატ, კულტურა დო ნინა. ასე ფრანგულ ოკო დომგურუაფდესკო. თეს გეძინელ, ოცხოვრებელ ადგილ მაფდეს ოგორალ. თექიან ენულაშე ჟირ დღაშ უკულ გალაადიშ სკოლაშ ართ-ართ კლასელქ, ჰარი არნოტიქ, მიკომშარუეს. თინა ზამბიაშა, მუშ დანიშნულებაშა ირთუდ. თიქ მიმეხვარეს ბინაშ გორუას, ნამუთ ჩქინ პირველ მისიონერულ ჸუდე რდუ. ჭიჭე ხანშა წინააღმდეგობას ქეშეფხვადით ადგილობრივ თანამდებობაშ პირეფშე, მიდგას მუთუნ ვა უჩქუდეს იეჰოვაშ მოწმეეფიშ გურშენ. მუჭოთ ჩქინ დანიშნულებას ხიოლ ქიბგინით, ხეთეშე, თინეფქ მიწუეს, ნამდა სამუშა ნებართვაშ უმშო ვეშმალებედეს თექ დოსქილადა. სანარღოთ, თევრეშე ოულარქ მაჸუეს დო შხვა ქიანაშა, უგანდაშა, მიდაფრთით.

უგანდაშა ვიზაშ უმშო ულაშა მოშქურდეს, მარა იეჰოვას ვონდუდით. ართ კანადელ ჯიმაქ, ნამუთ უგანდას, საჭიროება რდუნ ფერ ტერიტორიას, მსახურენდჷ, ჩქინ სიტუაცია საიმიგრაციო ოფიცერს გეუნწყჷ დო თიქ მიწუეს, ნამდა შემლებდეს მუსხირენ თუთათ დოსქილადა, სოიშახ თექ ცხოვრებაშ ნებართვას ვებჭოფუნდით. სიტუაციაქ ჩქინ მოხუჯურო გევითარუნ თექ, დუმარწმუნეს, ნამდა იეჰოვა მოხვარდეს.

უგანდას ბურუნდის მიღდესინ თიშე, განსხვავებულ სიტუაცია რდუ. თე ტერიტორია უკვე დამუშებულ აფდეს, მარა მთელ ქიანას ხვალე 28 მაუწყებელ მსახურენდჷ. თექ ბრელ თიცალ ადამიანს შეფხვადით, ნამუთ ინგლისურო იჩიებუდ. მალას ქიმეფხვადით, ნამდა დაინტერესებულეფს სულიერო წიმი ულას ქიმვეხვარითკონ, საჭირო რდუ თექიან ართ ნინა ვარა ქუდომგურუაფდესკო. ქადაგება ქიდიბჭყით კამპალაშ გოხოლუას, სოდეთ ლუგანდა ნინაშა ბრელ იჩიებუდ, ათეშენ გეგნობჭყვიდით თე ნინა ქიდიბგურეთკო. მუსხირენ წანაქ დემესაჭირეს, ნამდა თავისფალო ქიფჩითკო ლუგანდა ნინაშა, მარა თექ მანგარ ჯგირო იმოქმედ ჩქინ ქადაგებაშა! უჯგუშო ინვანჭუდით ბიბლიაშ მაგურაფალეფიშ სულიერ საჭიროებეფს. თინეფ ხოლო გულწრფელო გუმოხანტუნდეს ჩქინწკუმა მუნეფიშ დამოკიდებულებას ნაგურეფუშ მიმართ.

ჩქინ მოგზაურობეფ

ჩქინ ხიოლს, ნამუთ თიცალ თანდაბალ ადამიანეფიშ ძირაფას მოუღუდ, მით ადვილო ღებულენდჷ ჭეშმარიტებას, ქიგიაძინ მთელ ქიანას გილმალ მსახურებაშ ვეველუდითინ ფერ პატიქ. კენიაშ ფილიალიშ ხემძღვანელობათ მთელ ქიანას ქიდიბჭყით თიცალ ტერიტორიაშ გორუა, სოდეთ სპეციალურ პიონერეფ განსაკუთრებულო რდეს საჭირო. ბრელშა გიმოფცადით სტუმარიშ ჸოროფა თი ხალხშე, მით აიშახ დღას ვა რდუ იეჰოვაშ მოწმეეფწკუმა შენახვამლეფ. თინეფ ჯგირო ბღებულენდეს დო ოჭკუმალს ხოლო მიკომღანდეს.

ხოლო შხვა მოგზაურობაშ დროქ ქიდოდირთჷ. კამპალაშე 2 დღას მიფშჷ მატარებელით კენიაშა, ქალაქ მომბასაშ პორტშა დო უკულ გემით მიდაფრთჷ სეიშელშა, ინდოეთიშ ოკეანეშ კუნძულეფშა. უმოს გვიანო, 1965—1972 წანეფს ბარბარაქ ხოლო ჩქიმწკუმა ართო ქიდიჭყჷ გილულა სეიშელიშ კუნძულეფშა. დუდშე თექ ხვალე 2 მაუწყებელ რდუ, მარა ჭიჭე ხანშა დიო ჯგუფიქ დო უკულ კრებაქ ჩემეყალიბ. შხვა მოგზაურობეფიშ დროს იბძირე ჯიმალეფ ერიტრეას, ეთიოპიას დო სუდანს.

უგანდას პოლიტიკურ მდგომარეობაქ უცბას დითირ დო სამხედრო ჯგუფიქ ქუმორთჷ ხელისუფლებაშა. თეს მანგარ სირთულეეფქ ქუმაჸუნ დო თე დროს დებრწმუნ, ნამდა ჭკვერულ რე ბიბლიურ მითითებაშ მეჸუნა: „კეისარიშ კეისარს ქიმეჩით“ (მარ. 12:17). არძა უცხოელ ვალდებულ რდუ რეგისტრაცია გემკორთკო პოლიციაშ თი განყოფილებას, ნამუთ მუშ ჸუდეშ ხოლოს რდუ. ჩქი თეს ხეთეშე დევემორჩილით. მუსხირენ დღაშ უკულ, კამპალაშა მიფშითინ თეშ, საიდუმლო პოლიციაშ თანამშრომელეფქ გუმაჩერეს მა დო ხოლო ართ მისიონერ. მანგარო მაშქურინეს! თინეფ ჯაშუშობას მაბრალენდეს დო ათეშენ პოლიციაშ მთავარ განყოფილებაშა მიდამიჸონეს. თექ ჩქი გევუნწყით, ნამდა მშვიდობიან მისიონერეფ ვორდით. ვურაგადუდით, ნამდა რეგისტრაცია მიკულირ მაფდეს, მარა მითინქ ვა მირჩქილეს. შეიარაღებულ დაცვაქ მიდამიჸონეს პოლიციაშ განყოფილებაშა, ნამუთ არძაშ უმოს ხოლოს რდუ მისიონერეფიშ ჸუდეწკუმა. მანგარო ემქექუეს, მუჟამსით პოლიციაშ თანამშრომელქ, მიდგას უჩქუდ, ნამდა რეგისტრაცია მიკულირ მაფდეს, ქომჩინეს დო მცველეფს უწუ, ნამდა გუტებუდითკო!

თი დღალეფს ჩქი ხშირას შეფხვადუდით ოშქურანჯ სიტუაციეფს სამხედრო ბლოკპოსტეფწკუმა, განსაკუთრებულო თი დროს, მუჟამსით მანგარ შუმილ ჯარიშკოჩეფ მაჩერენდეს. მარა თეჯგურა შემთხვევეფს ირო ბლოცულენდით დო უსაფრთხოთ გენკიფშითინ, მანგარ სიმშვიდეს ბგინაფლენდით. სანარღოთ, 1973 წანას არძა უცხოელ მისიონერს უგანდა ქუდატებაფუეს.

კინ დუმათირეს დანიშნულებაქ, ასე კოტ-დ’ივუარშა, დასავლეთ აფრიკაშა, ოკო იბდითკო. თე ცვლილება ჩქინო ნიშნენდჷ გვალო შხვანერ ახალ კულტურაშ მერჩქვანას, კინ ფრანგულო ჩიებას დო შხვადოშხვა წარმომავლობაშ მისიონერეფწკუმა ართო ცხოვრებას! მარა მუჟამსით თანდაბალ დო გულწრფელ ადამიანეფ ხეთეშე ღებულენდეს სახიოლო ამბეს, ხოლო უმოსო ვორწყედით იეჰოვაშ ხემძღვანელობას. ჩქი ართო ქობძირით, მუჭო გამსწორეს ოჸულარ შარა იეჰოვაშა მენდებაქ.

თეშ უკულ, სანარღოთ, ბარბარას კიბოშ დიაგნოზ ქიგუშქვეს. თიშ უმკუჯინუო, ნამდა ხშირას გილეფშით ევროპაშა ომკურნალებშა, 1983 წანას ქიმეფხვადით, მეტო ვაგმაგრძელებედეს აფრიკას, ჩქინ დანიშნულებას, მსახურება. თენა ჟირხოლოშო მანგარ გურიშგუმატახალ რდუ!

მდგომარეობაქ დუმათირეს

ბარბარაშ ლახალაქ ლონდონიშ ბეთელს ვმსახურენდითინ თეშ, მანგარო გერთულ დო საბოლათ თიქ დოღურ. ბეთელიშ ოჯახიქ მანგარო ქელამდირთჷ. ართ წყვილქ განსაკუთრებულო მიმეხვარ, ნამდა მდგომარეობაშე გეგშამრთუმუდკო დო გუვაგრძელკო იეჰოვაშა მენდება. უმოს გვიანო ქეშეფხვად ართ დას, ნამუთ ბეთელიშ შტატგარეშე თანამშრომელ რდუ. თის სპეციალურ პიონერო მსახურებაშ გამოცდილება უღუდ დო იეჰოვა მანგარო უჸორდჷ. მა დო ენიქ 1989 წანას დებქორწინით დო თიშ უკულ ლონდონიშ ბეთელს ვმსახურენდით.

მიღუდ პატი მთავარ სამმართველოშ წარმომადგენელო (თიმ დროს სამხარეო ზედამხედველ ჯოხოდ) მიმსახურებუდკო 1995—2018 წანეფს. სოდგარენ 60 შხვადოშხვა ქიანა იბძირე. თითოულ ვიზიტ მარწმუნენდჷ, ნამდა იეჰოვა ზრუნენს მუშ მსახურეფშო, მუდგა მდგომარეობას ვა რდანინ.

ართ-ართ მონახულებაშ დროს, 2017 წანას, აფრიკაშა მაჸუ დართინალქ. მანგარო მოხიოლუდ ენიშა ბურუნდიშ ძირაფა დო ჟირხოლოს მანგარო მიკვენდეს, მუზმათ რდუ თექ მაუწყებელეფიშ რაოდენობა რდილ! თი ქუჩას, სოდეთ 1964 წანას კარდოკარ ვმსახურენდჷ, ასე ბეთელიშ სქვამ შენობა გედგუდ დო მთელ ქიანას 15 500 მაუწყებელშე მეტ მსახურენდჷ.

მანგარ გახარებულ ვორდჷ, მუჟამსით თი ქიანეფიშ სია მიბღჷ, ნამუთ 2018 წანას ოკო იბძირეკო. თე ქიანეფიშ სიას კოტ-დ’ივუარ ხოლო ოკათუდ. მუჟამსით აბიჯანშა, დედაქალაქშა, ენიბლით, დუდის თეშ ბგინაფლენდჷ, ითამ ჸუდეშა დიფრთიკო. სატელეფონო სიას თოლ ქიგნულინე დო ქობძირ, ნამდა ჩქინ გვერდით, ბეთელიშ სასტუმრო ოთახის, ცხოვრენდჷ ჯიმა, ნამდგაშ სახელ რდუ სოსუ. ქუგმაშინ, მუჟამსით მა აბიჯანს ვორდჷ, თინა საქალაქო ზედამხედველო მსახურენდჷ. მარა მეფჩირთჷ, თენა შხვა სოსუ რდუ — თიშ სქუა.

იეჰოვაქ მუშ დუნაპირებ შეასრულ. თი ბრელ სირთულექ, მუდგას შეფხვად, ქუდმოგურუ, ნამდა მუჟამსით იეჰოვას ვონდუთ, თინა მართალო ასწორენს ჩქინ ოჸულარ შარას. მანგარო მოკო, გუვაგრძელე თი ულიებ შარაშ მეჸუნა, ნამუთ ახალ ქვეყნიერებას უმოს ნათელ იჸუაფ (იგავ. 4:18).