კითხვა დო პასუხი

მი რდეს იერუსალიმიშ ტაძარიშ მცველეფ დო მუ რდუ თინეფიშ მოვალეობეფ?

თი ლევიანეფ, მით მღვდელეფო ვა მსახურენდეს, შხვა მოვალეობეფ უღდეს, მუნერით რდუ ტაძარიშ მცველო მსახურება. თინეფ ტაძარიშ მცველეფიშ უნჩაშიშ ხემძღვანელობაშ თუდო რდეს. ართ ებრაელ მაჭარალ ფილონ ალექსანდრიელ ეჭარუნს, მუ მოვალეობეფ უღდეს თე მცველეფს. თინა იჩიებ, ნამდა თე ლევიანეფშე ნამთინე ტაძარიშ მინაულარწკუმა გერდჷ, მუჭოთ კარიშ მცველეფ, ნამთინე ტაძარიშ ტერიტორიას საწმინდარიშ წოხოლე გერდჷ დო იცვენდჷ თის, ნამდა გარძახ ვარდა გურუგუჩამუო, საწმინდარშა ვემნურთუმუდკო თის, მიდგას მინულაშ უფლება ვა უღუდ. შხვეფ ტაძარიშ შენობაშ გალე გილეშეს დო იცვენდეს თის. თინეფ მორიგეობათ მსახურენდეს, ნამთინე დღაშით მსახურენდჷ, ნამთინე — სერით.

სინედრიონიშ წევრეფს შეულებდეს თე მცველეფს მოხვარა თხუესკო. რომიშ ხელისუფლება ხვალე თე მცველეფს არზენდჷ იარაღიშ გილაღალაშ უფლებას.

მუჭოთ ართ ბიბლეისტ იოაკიმ იერემიას იჩიებ, მუჟამსით მცველეფქ იესო ოჭოფეს, თიქ კითხჷ თინეფს, თიმწკუმა მუშენ ვა ჭოფეს, მუჟამსით ტაძარს ოგურუანდჷ (მათ. 26:55). იესო თეს ვა კითხენდჷ თი მცველეფს, თინეფ ტაძარიშ მცველეფ ვა ჸოფედესკო. თე ბიბლეისტ ფიქრენს, ნამდა თინეფ ხოლო, მით თე შემთხვევაშახ ჭიჭე ხანით ადრე იესოშ ოჭოფშა რდეს გოტებულ, ტაძარიშ მცველეფ რდეს (იოან. 7:32, 45, 46). უმოს გვიანო, სინედრიონქ ტაძარიშ მცველეფიშ უნჩაშ დო მუსხირენ მცველ მიდაშქვჷ, ნამდა იესოშ მოციქულეფ სინედრიონიშ წოხოლე ქიგიორინესკო დო მუჭოთ იძირენ, შილებე მოციქულ პავლე ტაძარშე ზუსტას ტაძარიშ მცველეფქ გიმაჩერჩელუეს (საქ. 4:1—3; 5:17—27; 21:27—30).