იეჰოვაშ ჸოროფა დო მარდულობა გინგოჭყვიდირაფუანა ნათუას

1, 2. მუჭოთ საქმეეფიშ 8:27—31, 35, 36 დო 38-ს ჭარჷ, მუქ გინაჭყვიდირაფუ ეთიოპელ კოჩის, დინათკო?

ქუგოკონანო დინათათ, მუჭოთ იესოშ მოწაფე? ჸოროფა დო მარდულობაქ ბრელს გინაჭყვიდირაფუ თე ნაბიჯიშ გინოდგუმა. გუვარჩუათ, ართ სახელმწიფო მოხელეშ მაგალით, ნამუთ ეთიოპიაშ დედოფალს ომსახურუდ.

² თე ეთიოპელ პიროვნებაქ, წმინდა წერილეფშე ინფორმაციაშ მეღებაშ უკულ ხეთეშე დინათ (წეკითხით საქმეები 8:27—31, 35—38). მუქ გინაჭყვიდირაფუ თეშ კეთება? მუჭოთ იძირენ, თინა აფასენდჷ ღორონთიშ სიტყვას; მუჟამსით თინა იერუსალიმშე ეთიოპიაშა ეტლით ირთუდ, შარას ესაიაშ წინასწარმეტყველებას კითხულენდჷ. მუჟამსით ფილიპექ თის დურაგადუ, ეთიოპელ კოჩიქ მარდულობა გეგმირჩქინ თი ირფელიშ გურშენ, მუთ იესოქ თიშო აკეთ. მარა მუშენ რდუ ულირ თე ეთიოპელ კოჩ იერუსალიმშა? მუშენდა თის უკვე გავითარებულ აფუდ იეჰოვაშ ჸოროფა. სოვრეშე მიჩქნა თენა? თინა იერუსალიმშა იეჰოვაშა თაყვანიშ ოცემებელო რდუ ულირ. მუჭოთ იძირენ, თიქ ქიდიტუ მუშ ჯვეშ რელიგია დო ღორონთშა მეძღვინელ ერწკუმა ართო ცენდჷ თის თაყვანს. იეჰოვაშ ჸოროფაქ გინაჭყვიდირაფუ თის, გეგნოდკო მაჟია მნიშვნელოვან ნაბიჯ — დინათკო დო გინირთუკო იესოშ მოწაფეთ (მათ. 28:19).

3. მუქ შილებე პიროვნებას ნათუას ეცილას? (ქოძირით ჩარჩო „მუნერ დიხას მოგენს თქვან გურ?“)

³ იეჰოვაშ ჸოროფა ნათუას გინგოჭყვიდირაფუანა. მარა თეშ კეთებას შილებე კინ ჸოროფაქ გეცილან. მუშენ იფჩიებუთ თეს? დეფიქრით მუსხირენ მაგალითშე. შილებე მანგარო გიჸორა თქვან ოჯახიშ წევრეფ დო მეგობრეფ, მით იეჰოვაშ მოწმეეფ ვა რენა დო ათეშენ წუხენდათ, ნამდა დინათუთ-და, თინეფ გოიჯოგუანა (მათ. 10:37). შილებე გიღნა ჩვევეფ, ნამუთ გიჩქნა, ნამდა იეჰოვას ჯოგჷ დო გიჭირდან თინეფშა დუდიშ დანებება (ფსალმ. 97:10). ვარდა შილებე ბაღანობაშე თიცალ დღესასწაულეფს აღნიშნენთ, ნამუთ ტყურა რელიგიაწკუმა რე დაკავშირებულ. შილებე სასიამოვნოთ გუგაშინენა თე დღესასწაულეფიშ აღნიშნება. შედეგო, შილებე გაიჭირდან, იეჰოვას ვა მოწონსინ ფერ წეს-ჩვეულებეფიშ მეტებაქ (1 კორ. 10:20, 21). თაშ ნამდა, ოკო ქოკითხათ თქვან დუდის: „არძაშ უმოსო მუ ვარდა მი მიჸორს?“.

მი ოკო მიჸორდან არძაშ უმოსო

4. მუ რე თი მთავარ მუდგარენ, მუთ ნათუას გინგოჭყვიდირაფუანა?

⁴ მუშო ოკო რაგად, რე თიცალ მუდგარენეფ, მუთ გიჸორა დო აფასენთ. მაგალთო, იეჰოვაშ მოწმეეფწკუმა გურაფაშ დოჭყაფაშახ ხოლო, შილებე უკვე მანგარო აფასენდით ბიბლიას დო გიჸორდეს იესო. ასე, მუჟამსით გეჩინებაფეთ იეჰოვაშ მოწმეეფ, შილებე გოსიამოვნუნა თინეფწკუმა ურთიერთობა. თეცალ ჯგირ მუდგარენეფიშ ჸოროფა ვა ნიშნენს, ნამდა თქვან დუდის იეჰოვას მეუძღვინენთ დო დინათუთ. მთავარ მუდგარენ, მუთ ნათუას გინგოჭყვიდირაფუანა, იეჰოვა ღორონთიშ მიმართ ჸოროფა რე. მუჟამსით ირკოჩიშ დო ირფელიშ უმოსო იეჰოვა გიჸორა, ვა დუშვენთ, ნამდა მიდგარენქ ვარდა მუდგარენქ გეცილან ღორონთიშ მსახურებას. იეჰოვაშ ჸოროფა გინგოჭყვიდირაფუანა ნათუას დო თეს გეძინელ, მიგეხვარებნა ნათუაშ უკულ ართგურეფქ ქუდოსქიდათ.

5. მუს გუვარჩიენთ თე სტატიას?

⁵ იესოქ თქუ, ნამდა იეჰოვა ოკო მიჸორდან მთელ გურით, შურით, გონებათ დო ძალათ (მარ. 12:30). მუჭო შეილებნა თეცალ ძლიერ ჸოროფა დო პატიცემა გავითარათ იეჰოვაშ მიმართ? მუჟამსით ფიფქრენთ, მუჭო ვუჸორთ იეჰოვას, თენა აღბძრენა, ჸოროფათ ვუპასუხათ თის (1 იოან. 4:19). თე სტატიას გუვარჩიენთ მუსხირენ რჩევას, ნამუთ თაშ მოქციებას მიგეხვარებნა. თეს გეძინელ, ქობძირუნთ, ხოლო მუს იგინანთ დო გაკეთენთ, მუჟამსით გევითარენთ თე არძაშ უმოს მნიშვნელოვან ჸოროფას.b

6. მუჭოთ რომაელეფიშ 1:20-ის ჭარჷ, მუ რე იეჰოვაშ გურშენ მეტიშ გაგებაშ ართ-ართ საშვალება?

⁶ გუნაჭყეფშე დაკვირებათ მეტ ქიგეგით იეჰოვაშ გურშენ (წეკითხით რომაელები 1:20; გამოცხ. 4:11). დეფიქრით, მუჭო იძირე ღორონთიშ გუნაჭყეფ მცენარეეფ დო ცხოველეფშე, ნამდა თინა არძაშ უმოს ბრძენ რე. ქიდეკვირით, მუ სარკოთ რე გოჭყაფილ თქვან სხეულ (ფსალმ. 139:14). დეფიქრით მუშმადიდა ენერგია უღჷ ღორონთიშ გოჭყაფილ ჩხანას; ვაგგოჭყორდან, ნამდა თინა ართ-ართ რე მილიარდობით მურიცხ შქასc (ეს. 40:26). თაშ ქიმიქციებუთ-და, უმოსო დაფასენთ იეჰოვას. მნიშვნელოვან რე, თიშ რჩქინა, ნამდა იეჰოვა ბრძენ დო ძალიერ რე, მარა ღორონთიშ მიმართ ჸოროფა გამანგარათ დო თიშ ხოლოშიან მეგობარო გინირთათინ, უჯგუშო ოკო გეჩინებაფუათ თინა.

7. მუშა ოკო რდათ დარწმუნებულ, ნამდა იეჰოვა უმოსო ქიჸოროფუათ?

⁷ დარწმუნებულ ოკო რდათ, ნამდა იეჰოვა პირადო თქვანდე ზრუნენს. ხომ ვაიჭირა თიშ დაჯერება, ნამდა ცა დო ქიანაშ გუმაჭყაფალ ღორონთ გოკვირნა დო ზრუნენს თქვანდე? თაშ ქორენ-და, რშუდან, ნამდა იეჰოვა „შორს ვა რე“ თითოულ პიროვნებაშე (საქ. 17:26—28). ღორონთ „გურეფს ირკვიენს“ დო გოპირნა, ნამდა თიწკუმა დაახლოებას ქეცადებუთ-და, თეშ საშვალებას ქიმერჩანა (1 მატ. 28:9). სინამდვილეს, მიზეზ, მუდგაშეთ ასე ბიბლიას გურაფლენთ, თინა რე, ნამდა იეჰოვაქ ირფელ გაკეთ, თის დეახლოვითკო (იერ. 31:3). მუთ უმოსო დაფასენთ თი ირფელს, მუთ იეჰოვაქ პირადო თქვანო აკეთ, უმოსო ქიგეჸოროფებნა თინა.

8. მუჭო შეილებნა უპასუხათ იეჰოვაშ ჸოროფას?

⁸ ართ-ართ შარა, ნამდგათ შეილებნა იეჰოვაშ ჸოროფას უპასუხათ თინა რე, ნამდა თის ლოცვათ დურაგადუათ. ღორონთ უმოსო გეჸოროფებნა, მუჟამსით თქვან ოწუხებელს ქეჩიებუთ დო მადლობას ქუწინთ ირფელშე, მუდგას თქვან გურშენ ორთჷ. მუჟამსით ქოძირუნთ, მუჭო პასუხენს იეჰოვა თქვან ლოცვეფს, თიწკუმა ურთიერთობა უმოსო გემანგარებუ (ფსალმ. 116:1). დერწმუნებუთ, ნამდა თინა მიშურს თქვან მდგომარეობაშა. მარა იეჰოვას უმოსო დეახლოვათინ, ოკო ქინანჭათ თიშ აზროვნებას. თეს გეძინელ, ოკო გიჩქუდან მუს ითხინს ღორონთ თქვანდე. თეს ხვალე თიმწკუმა გეგენთ, მუჟამსით ღორონთიშ სიტყვას, ბიბლიას ქიდიგურუანთ.

9. მუჭო შეილებნა ოძირუათ, ნამდა აფასენთ ბიბლიას?

⁹ გავითარით მარდულობა ღორონთიშ სიტყვა, ბიბლიაშ მიმართ. ხვალე ბიბლიას რე მოჩამილ ჭეშმარიტება იეჰოვა ღორონთიშ დო თიშ განზრახვეფიშ გურშენ, ნამუთ პირადო თქვანწკუმა რე დაკავშირებულ. მუჟამსით ირ დღას კითხულენთ ღორონთიშ სიტყვას, ემზადებუთ ბიბლიაშ გურაფაშო დო ნაგურეფუს ცხოვრებას გიმირინუანთ, ოძირანთ, ნამდა აფასენთ ბიბლიას (ფსალმ. 119:97, 99; იოან. 17:17). ქოიღნანო ბიბლიაშ კითხირიშ გეგმა? ქიმეჸუნთო თე გეგმას თეშ, ნამდა ირდღას იკითხათ თინა?

10. მუ რე ბიბლიაშ ართ-ართ განსაკუთრებულ თავისებურება?

¹⁰ ართ-ართ განსაკუთრებულ თავისებურება, მუთ ბიბლიას უღჷ, თინა რე, ნამდა თექ ინოჭარ თი პიროვნებეფიშ ნარაგადუეფ, ნამდგაქ იესო მუშ თოლით ძირჷ. ხვალე თე წიგნ ენწყუნს, მუ აკეთ იესოქ თქვანო. მუჟამსით ქიგეგენთ, მუ აკეთ დო მუ თქუ იესოქ, ალბათ სურვილ გაღვენუნა თიშ მეგობარო გინირთათ.

11. მუ მიგეხვარებნა უმოსო ქიჸოროფუათ იეჰოვა?

¹¹ გავითარით იესოშ ჸოროფა. იესო ქოიჸორან-და, ხოლო უმოსო ქიგეჸოროფებნა იეჰოვა. მუშენ იფჩიებუთ თეს? მუშენდა იესო სრულყოფილო გიმირჩქინანდჷ მუშ მუმაშ თვისებეფს (იოან. 14:9). მუთ უმოს მეტის გეგენთ იესოშ გურშენ, თით უმოს უჯგუშო გეჩინებაფუანთ იეჰოვას დო დაფასენთ თის. დეფიქრით, მუჭო მიშეშ იესო ღარიბეფიშ, დალახებულეფიშ დო სუსტეფიშ მდგომარეობაშა, მით შხვეფს მუთუნო ვემიორჩქუდეს. თეს გეძინელ, დეფიქრით თი პრაქტიკულ რჩევეფშე, ნამდგას იესო გარზენა დო თიშე ხოლო, მუჭო იუჯგუშებ თქვან ცხოვრება, მუჟამსით თე რჩევეფს გიმირინუანთ (მათ. 5:1—11; 7:24—27).

12. მუშ კეთება შილებე გინოჭყვიდათ, მუჟამსით იესოშენ მეტის ქიგეგენთ?

¹² ალბათ იესოს უმოსო ქიჸოროფუანთ, მუჟამსით ჯგირო დეფიქრებუთ თიშ მსხვერპლშენ, ნამდგაშ საშვალებათ ჩქი ცოდვეფ მეპატიებნა (მათ. 20:28). მუჟამსით ქინანჭუთ, ნამდა იესოქ მუშ ნებათ დათმჷ თქვანო სიცოცხლე, შილებე თექ გინგოჭყვიდირაფუან, ცოდვეფ მინანუათ დო იეჰოვას ქოთხუათ პატიება (საქ. 3:19, 20; 1 იოან. 1:9). მუთ უმოსო გეჸოროფებნა იეჰოვა დო იესო, თით უმოსო გოკოდან იჸი თი ხალხწკუმა რინა, მიდგას უჸორს თინეფ.

13. მუ საშვალებათ მიგეხვარებნა იეჰოვა?

¹³ გავითარით თინეფიშ ჸოროფა, მიდგას იეჰოვა უჸორს. თქვან ოჯახიშ წევრეფს დო მეგობრეფს, მით იეჰოვაშ მოწმეეფ ვა რენა, შილებე ვარჩქილედან, მუშენ გოკონა თქვან დუდ იეჰოვას მეუძღვინათ. თეს გეძინელ, შილებე ქიგეწინააღმდეგან. იეჰოვა კრებას რენან თი და დო ჯიმალეფიშ საშვალებათ მიგეხვარებნა, ნამუთ თქვანო სულიერ ოჯახ იჸუაფ. თე სულიერ ოჯახწკუმა ხოლოს ქიჸუაფუთ-და, მიღენთ ჸოროფას დო ელარნას, ნამუთ გოსაჭირნა (მარ. 10:29, 30; ებრ. 10:24, 25). დროშ მიკულაწკუმა ართო, თქვან ოჯახიშ წევრეფქ შილებე ქიდიჭყან იეჰოვაშ მსახურება დო დემორჩილან თის (1 პეტ. 2:12).

14. მუჭოთ 1 იოანეშ 5:3-ს ჭარჷ, პირადო თქვა მუშა დერწმუნით იეჰოვაშ პრინციპეფიშ გიმორნაფაშ უკულ?

¹⁴ გავითარით იეჰოვაშ ნორმეფიშ მარდულობა დო მიაჸუნით თინეფს. სოიშახ იეჰოვას გეჩინებაფუანდით, შილებე თქვანით გინოჭყვიდუნდით მუ რდუ სწორ დო არასწორ, მარა ასე თქვა ორწყეთ, ნამდა იეჰოვაშ ნორმეფით ხემძღვანელობა უჯგუშ რე (ფსალმ. 1:1—3; წეკითხით 1 იოანე 5:3). დეფიქრით თი რჩევეფშე, ნამდგას ბიბლია არზენს ქომონჯეფს, ოსურეფს, მშობლეფს დო ბაღანეფს (ეფეს. 5:22—6:4). ქოიღნანო უმოს ბედნერ ოჯახურ ცხოვრება თე რჩევეფიშ გიმორნაფაშ უკულ? უჯგუშ პიროვნებათ გინირთითო, თიშ უკულ, მუთ მეგობრეფიშ გიშაგორუაწკუმა დაკავშირებულ რჩევეფ გეგმირინეთ? ქორეთო უმოს ბედნერ? (იგავ. 13:20; 1 კორ. 15:33). ალბათ თე კითხვეფს დადებითო ქუპასუხენთ.

15. მუ ოკო აკეთათ, მუჟამსით გიჭირა თიშ გაგება, მუჭო გიმირინუათ ბიბლიურ პრინციპეფ?

¹⁵ მინშა შილებე გიჭირდან თიშ გაგება, მუჭო გიმირინუათ თი ბიბლიურ პრინციპეფ, ნამდგას გურაფლენთ. ათეშენ იეჰოვა მუშ ორგანიზაციაშ საშვალებათ გარზენა ბიბლიაშა გერსხილ პუბლიკაციეფს, ნამდგას შეულებ მიგეხვარან, ქინანჭათ მუ რე სწორ დო არასწორ (ებრ. 5:13, 14). მუჟამსით წეკითხენთ დო გეგმირკვიენთ თე პუბლიკაციეფს, ქოძირუნთ მუნერ პრაქტიკულ რე ბიბლიურ პრინციპეფ დო მუჟამ ოკო გიმირინუათ თინეფ. თე ირფელიშ უკულ ალბათ სურვილ გაღვენუნა, რდათ იეჰოვაშ ორგანიზაციაშ ნაწილ.

16. მუჭო ხემძღვანელენს იეჰოვა მუშ ხალხის?

¹⁶ გავითარით იეჰოვაშ ორგანიზაციაშ ჸოროფა დო ხუჯ ქუდუკინით თის. იეჰოვაქ მუშ ხალხ გაერთიან კრებეფს, ნამდგაშ დუდ იესო რე (ეფეს. 1:22; 5:23). იესოქ ცხებულ ქომოლკათაშ ჭიჭე ჯგუფ დანიშნჷ, ნამდა ორგანიზებულო ქუხემძღვანელან საქმეს, ნამდგაშ კეთება იესოს ამდღა ოკო. თიქ თე ჯგუფ მიშინუ, მუჭოთ „ართგურ დო გონიერ მონა“, ნამუთ მთელ სერიოზულობათ ასრულენს მუშ პასუხიშმგებლობას — მიგეხვარან, დეახლოვათ ღორონთის დო დაიცვან სულიერო (მათ. 24:45—47). ართ-ართ საშვალება, ნამდგათ ართგურ მონა გოხვარნა, თინა რე, ნამდა შესაფერის ქომოლკათა ინიშნებნა უხუცესეფო, თინეფს შეულებნა გიხემძღვანელან დო დაიცვან (ეს. 32:1, 2; ებრ. 13:17; 1 პეტ. 5:2, 3). უხუცესეფ მზათ რენა, თქვან გურშენ მუთ შეულებნან ირფელ გაკეთან დო მიგეხვარან, უმოსო დეახლოვათ იეჰოვას. მარა ართ-ართ არძაშ უმოს მნიშვნელოვან მუდგარენ, მუდგაშ კეთება შეულებნა, თინა რე, ნამდა მიგეხვარან შხვეფს იეჰოვაშ გურშენ ქაგურუათ (ეფეს. 4:11—13).

17. მუჭოთ რომაელეფიშ 10:10, 13 დო 14-ის ჭარჷ, მუშენ ვურაგადუთ შხვეფს იეჰოვაშ გურშენ?

¹⁷ ქიმეხვარით შხვეფს, გავითარან იეჰოვაშ ჸოროფა. იესოქ მუშ მიმაჸუნალეფს უწუ, ნამდა შხვეფს იეჰოვაშ გურშენ დაგურუესკო (მათ. 28:19, 20). მუშო ოკო რაგად, შემლებნა თე მითითებას ვალდებულებაშ გურშენ ვარინ, ჩქინ სურვილით დევემორჩილათ. მუჟამსით უმოსო ქიჸოროფუანთ იეჰოვას, მოციქულ პეტრე დო იოანეცალო იგინანთ დუდის, მიდგაქ თქუეს: „ჩქი ვემმატებენა თიშე რაგად, მუთ ბძირით დო მიფრჩქილეთ“ (საქ. 4:20). მუჟამსით შხვეფს მივეხვარებუთ, ქიჸოროფუან იეჰოვა, თენა დიდ ბედნერობას მომღანა. წერმიდგინით, მუნერ ბედნერ იჸუაფუდ ფილიპე, მუჟამსით ეთიოპელ კოჩის მეხვარ, წმინდა წერილეფშე ჭეშმარიტებას ქინანჭუკო დო დინათკო! მუჟამსით ფილიპეშ მაგალითის მიაჸუნუთ დო დემორჩილებუთ იესოშ მითითებას ქადაგებაშ გურშენ, დამტკიცენთ, ნამდა გოკონა იეჰოვაშ ართ-ართ მოწმე რდათ (წეკითხით რომაელები 10:10, 13, 14). თიმწკუმა, თქვა ხოლო ეთიოპელ კოჩცალო ქიკითხენთ: „მუ მოცილ დიმნათენ?“ (საქ. 8:36).

18. მუს გუვარჩიენთ ანწიან სტატიას?

¹⁸ მუჟამსით ნათუას გეგნოჭყვიდუნთ, თეთ არძაშ უმოს მნიშვნელოვან ნაბიჯის გეგნოდგუნთ თქვან ცხოვრებას. თენა მანგარ სერიოზულ ნაბიჯ რე, ათეშენ ჯგირო ოკო დეფიქრათ მუს ნიშნენს ნათუა. მუ ოკო გიჩქუდან ნათუაშ გურშენ? მუ ოკო აკეთათ ნათუაშახ დო თიშ უკულ? თე კითხვეფს ანწიან სტატიას გუვარჩიენთ.