ჩქი მანგარო მიჸორა ჩქინ ზეციერ მუმა, იეჰოვა

1, 2. მუშენ დო მუჭო გინაშქვჷ იეჰოვაქ შეიოლებერო, ნამდა მუშ ოჯახის ვორდითკო გაერთიანებულ?

იეჰოვაქ ეკოფშაყარეს მუშ თაყვანიშმცემელეფიშ ოჯახის. თენა დიდებულ პატი რე! იეჰოვაშ ოჯახშა თინეფ მიშულა, მიდგაქ დუდ მეუძღვინ ღორონთის დო მით გიმირჩქინანს რწმენას იესოშ მსხვერპლიშ მიმართ. ჩქი ბედნერ ოჯახის ვორეთ გაერთიანებულ. ფხარენთ აზრით ეფშა ცხოვრებათ ამდღა დო მომავალს მარადიულ სიცოცხლეშ იმენდით, თენა ზეცას იჸინო დო ვარ დედამიწას.

² იეჰოვას ვუჸორთ, ათეშენ მუშ ოჯახშა მინაულარო შარა გომინწყეს მუდგაშოთ დიდ ფას გინიგ (იოან. 3:16). ჩქი ფასით ვორეთ ნაჸიდერ (1 კორ. 6:20). გიშაჸიდირალიშ ჭყოლოფათ, იეჰოვაქ შეიოლებერო გინაშქვჷ მუწკუმა ხოლოშიან ურთიერთობა მიღდან. ჩქი მიღნა თიშ პატი, ნამდა სამყაროს არძაშ უმოს დიდებულ პიროვნებას მუმა დუძახათ. მუჭოთ წოხლენ სტატიას გუვარჩით, იეჰოვა არძაშ უჯგუშ მუმა რე.

3. მუ კითხვეფ შილებე დუსვათ ჩქინ დუდის, მუჟამსით ფიფქრენთ თი ირფელშე, მუთ იეჰოვაქ ჩქინო აკეთ? (ქოძირით ჩარჩო „ქუმაქციენსო იეჰოვა ყურადღებას?“)

³ ბიბლიაშ ართ მაჭარალცალო ჩქი ხოლო შემლებნა იბკითხათ: „მუთ გინვუგანქ იეჰოვას თი ირფელ ჯგირშე, მუთ ჩქიმო უკეთებ?“ (ფსალმ. 116:12). ჩქი დღას ვეშმალებენა ჩქინ ზეციერ მუმაშა თეშ გინოგაფა, მარა შემლებნა იეჰოვაშ ჸოროფას ჸოროფათ ვუპასუხათ. მოციქულ იოანექ ჭარჷ: „ჩქი მიჸორა, მუშენდა პირველო თიქ ქომიჸოროფეს“ (1 იოან. 4:19). მუჭო შემლებნა ჩქინ ზეციერ მუმას ვოძირუათ, ნამდა მიჸორა თინა?

ვადინუათ იეჰოვაწკუმა ხოლოშიან ურთიერთობა

4. მუჭოთ იაკობიშ 4:8-ს რე მოჩამილ, მუშენ ოკო ვეცადათ დევეახლოვათ იეჰოვას?

⁴ იეჰოვას ოკო ხოლოშიან ურთიერთობა მიღდან თიწკუმა დო დურაგადუათ თის (წეკითხით იაკობი 4:8). თინა მომწოდენა, ნამდა ირიათო იბლოცათ დო თეწკუმა ართო, ირო მირჩქილენა (რომ. 12:12). ღორონთ დღას ვა რე თიშნერ დაკავებულ ვარდა მუშობათ შულადირ, ნამდა ვა შეიალებუას ჩქინ მორჩქილაფაქ. ჩქი იეჰოვას ვურჩქილეთ მუშ სიტყვაშ, ბიბლიაშ დო თიშა გერსხილ პუბლიკაციეფიშ კითხირით. თეს გეძინელ, იეჰოვას ვურჩქილეთ, მუჟამსით მეპჸუნთ თი ხემძღვანელობას, ნამდგას კრებაშ შეხვალამეფშე ბღებულენთ. მუჭოთ მშობლეფ დო ბაღანეფ შქას ჯგირ კომუნიკაცია უნწყუნს ხეს ხოლოშიან ურთიერთობას, თეშ იეჰოვაწკუმა რეგულარულ კომუნიკაცია მოხვარნა ხოლოს ვორდათ თიწკუმა.

5. მუჭო შემლებნა გუვაუჯგუშათ ჩქინ ლოცვეფ?

⁵ დეფიქრით მუჭო ლოცულენთ. თიშ სურვილ რე, ქივეჩუათ ჩქინ ფიქრეფიშ დო გრძნობეფიშ გურშენ (ფსალმ. 62:8). ჩქი ოკო ქობკითხათ ჩქინ დუდის: ჩქიმ ლოცვეფ გაუაზრებელო გინოჭარილ წერილს მოგენს დო ვარ ხეთ ნაჭარა გულწრფელ წერილს? მუშო ოკო რაგად, იეჰოვა მანგარო გიჸორა დო გოკონა ვადინუათ თიწკუმა ხოლოშიან ურთიერთობა. თეშო საჭირო რე იეჰოვაწკუმა რეგულარულ კომუნიკაცია გიღდან. ქეჩით თის თქვან გრძნობეფიშ გურშენ. ქუწით მუ რე თქვან ხიოლიშ მიზეზ დო მუ გაწუხენა. რჯერდან, ნამდა შეილებნა ღორონთის მოხვარა თხუათ.

6. მუ ოკო ვაკეთათ, ნამდა ვა ვოდინუათ ჩქინ ზეციერ მუმაწკუმა ხოლოშიან ურთიერთობა?

⁶ ჩქინ ზეციერ მუმაწკუმა ხოლოშიან ურთიერთობა ვა ვოდინუათინ, საჭირო რე ირიათო თიშ მარდულეფ ვორდათ. ჩქი ვოთანხმუთ ფსალმუნმაბირეშ სიტყვეფს, ნამდგაქ ჭარჷ: „ქიანაშ სარკო საქმე აკეთ, იეჰოვა, ჩქიმ ღორონთ, დო შეასრულ თინა, მუთ ჩქინო გაფუდ გინოჭყვიდილ; მითინ ვა რე სქანმადარა. თინეფშე ქომჩიებინუდკონ, თიზმა იჸუაფუდ, ნამდა ვართ გიმმაკოროცხედ“ (ფსალმ. 40:5). ჩქი მარდულობას ხვალე ვა ბგინაფლენთინ, ვოცადუთ გეგმოფხანტათ თინა მუჭოთ ჩქინ სიტყვეფით, თეშ საქმეეფით. თეთ იძირე, ნამდა შხვეფშე გიშებგორუთ. ჩქი ფცხოვრენთ მსოფლიოს, სოდეთ ხალხიშ უმენტაშ ვეგმირჩქინანს მარდულობას თი ირფელშე, მუდგას ღორონთ თინეფშო ორთჷ. სინამდვილეს, ადამიანეფ უმარდულეფ რენან თენა ართ-ართ მხარე რე, სოვრეშეთ იძირე, ნამდა „ბოლო დღალეფს“ ფცხოვრენთ (2 ტიმ. 3:1, 2). ჩქი ვა მოკონა ვაგურათ თინეფს.

7. მუ ოკო იეჰოვას ვაკეთათ დო მუშენ?

⁷ მშობლეფს ოკონა მუნეფიშ სქუალეფს ართიანწკუმა დაძაბულ ურთიერთობა ვარინ მეგობრულ ურთიერთობა უღდან. თეშნერო, იეჰოვას ხოლო ოკო მუშ თაყვანიშმცემლეფს მეგობრულ ურთიერთობა უღდან ართიანწკუმა. ჸოროფა, ნამუთ ართიანწკუმა მიღნა, ამტკიცენს, ნამდა ჭეშმარიტ ქრისტიანეფ ვორეთ (იოან. 13:35). ჩქი ვოთანხმუთ ფსალმუნმაბირეშ სიტყვეფს, ნამდგაქ ჭარჷ: „მუ ჯგირ რე დო მუ ჰამო, ნამდა ართო ცხოვრენა ჯიმალეფ ართობას!“ (ფსალმ. 133:1). მუჟამსით ჩქინ და დო ჯიმალეფ მიჸორა, თეთ იეჰოვას ვუმტკიცენთ, ნამდა მიჸორა თინა (1 იოან. 4:20). მუ სასიამოვნო რე ვორდათ თიცალ ოჯახიშ წევრეფ, სოდეთ და დო ჯიმალეფ ჯგირო ოქცუნა დო გურშა ელუკინანა ართიანს (ეფეს. 4:32).

მორჩილებათ ქაძირეთ ჸოროფა

8. მუჭოთ 1 იოანეშ 5:3-ს რე მოჩამილ, მუ რე მთავარ მიზეზ, მუდგაშ გურშენ ვომორჩილუთ იეჰოვას?

⁸ იეჰოვას ოკო, ნამდა ბაღანეფქ დემორჩილან მშობლეფს დო თეწკუმა ართო, თინა ჩქინდე ელჷ, ნამდა დევემორჩილებუთ თის (ეფეს. 6:1). ღორონთ იმსახურენს ჩქინდე მორჩილებას, მუშენდა თიშ გოჭყაფილ ვორეთ, თიშე მოურს სიცოცხლე დო არძა მშობელშე უმოს ბრძენ რე. მარა ჸოროფა რე მთავარ მიზეზ, მუდგაშ გურშენ ვომორჩილუთ იეჰოვას (წეკითხით 1 იოანე 5:3). თიშ უმკუჯინუო, ნამდა მორჩილებაშ ბრელ მიზეზ მიღნა, იეჰოვა ვა მანძალენა თაშ მოქციებას. იეჰოვაქ მუჩეს ნებაშ თავისუფლებაშ ძღვინ, ათეშენ, თინა ბედნერ რე, მუჟამსით გიშებგორუნთ ჸოროფათ დევემორჩილათ თის.

9, 10. მუშენ რე მნიშვნელოვან, მიჩქუდან იეჰოვაშ მაღალზნეობრივ ნორმეფ დო ცხოვრებას გეგმიბრინუათ თინეფ?

⁹ მშობლეფს ოკონა მუნეფიშ სქუალეფ დაცულეფ რდან. ათეშენ, თინეფ გარკვეულ წესეფს უდგინენა ბაღანეფს, მუდგას ჯგირობუა მოუღ თინეფშო. მუჟამსით ბაღანეფ ომორჩილნა თე წესეფს, ოძირანა, ნამდა ონდუნა დო პატის ცენა მშობლეფს. მუსხით უმოს მნიშვნელოვან რე, მიჩქუდან იეჰოვაშ მაღალზნეობრივ ნორმეფ დო თიშ მიხედვით იფცხოვრათ. თეშნერ საქციელით იეჰოვას ვოძირანთ, ნამდა მიჸორა დო პატის ფცენთ თის. თეს გეძინელ, ჩქინ დუდშო ხოლო ჯგირობუა მომღუნა (ეს. 48:17, 18). თეშ გინაწონს, მით ვეცვენს იეჰოვაშ მაღალზნეობრივ ნორმეფს, აზარალენს მუშ დუდის (გალ. 6:7, 8).

¹⁰ მუჟამსით იეჰოვას მოწონსინ თეშ ფცხოვრენთ, დაცულ ვორეთ ფიზიკურ, ემოციურ დო სულიერ ზიანშე. იეჰოვას უჩქჷ, მუ რე ჩქინო არძაშ უჯგუშ. ავრორა, ნამუთ შეერთებულ შტატეფს ცხოვრენს, იჩიებ: „მიჩქჷ, ნამდა იეჰოვას დევემორჩილებუთ-და, არძაშ უჯგუშ ცხოვრება მაღვენუნა“. თენა ჩქინ შემთხვევას ხოლო თაშ იჸუაფ. მუ ჯგირობუა მოიღეს იეჰოვაშ მითითებეფიშ მორჩილებაქ, ნამუთ ჸოროფაშა რე გერსხილ?

11. მუჭო მოხვარნა ლოცვა?

¹¹ ლოცვეფ მოხვარნა ვორდათ მორჩილეფ, თიმწკუმა ხოლო, მუჟამსით თეშ კეთება ძნელ რე. მინშა იეჰოვაშ მორჩილება ძნელ თიშენ მაფნა, ნამდა ცოდვილეფ ვორეთ, მარა ჩქი ირიათო ოკო ვებრძოლათ ცოდვილ მიდრეკილებეფს. ფსალმუნმაბირე თხინდჷ ღორონთის: „ქუგმოგებაფე, ნამდა ქიდეფცვე სქან კანონ დო მთელ გურით შევასრულე“ (ფსალმ. 119:34). დენის, ნამუთ სრულ დროთ პიონერ რე, იჩიებ: „მუჟამსით მოძნელ იეჰოვაშ ნამთინე მითითებაშ მორჩილება, ლოცვას ფთხინქ თის ქომჩას ძალა, ვაკეთე თინა, მუთ სწორ რე“. ჩქი შემლებნა დარწმუნებულ ვორდათ, ნამდა ღორონთ ირო ქუპასუხენს თეცალ ლოცვას (ლუკ. 11:9—13).

ქიმეხვარით შხვეფს, ქიჸოროფუან ჩქინ ზეციერ მუმა

12. მუჭოთ ეფესოელეფიშ 5:1-ს ჭარჷ, მუ ოკო ვაკეთათ?

¹² წეკითხით ეფესოელები 5:1. ჩქი, მუჭოთ იეჰოვაშ „საჸოროფო სქუალეფ“, ირნერო ვოცადუთ მივაჸუნათ თიშ მაგალითის. თეს თით ვორთუთ, ნამდა შხვეფწკუმა ურთიერთობაშ დროს გიმიფრჩქინანთ თიცალ თვისებეფს, მუნერით რე ჸოროფა, სიჯგირა დო პატიება. მუჟამსით თინეფ, მით ვეჩინენს ღორონთის, ორწყენა ჩქინ ჯგირ საქციელს, შილებე ქიმიკორინუან იეჰოვაშ გურშენ მეტიშ გაგება (1 პეტ. 2:12). ქრისტიან მშობლეფს ჯგირ მიზეზ უღნა, ბაღანეფწკუმა ურთიერთობაშ დროს მიაჸუნან იეჰოვაშ მაგალითის. მუშენდა თეცალო ქიმიქციებნან-და, შილებე ბაღანეფქ ხოლო ქიმიკორინუან ჩქინ ზეციერ მუმაწკუმა დამეგობრება.

13. მუშ გურშენ ოკო დეფიფქრათ?

¹³ ჭიჭე ბაღანეფს ოამაყნა მუნეფიშ მუმალეფ დო ოხიოლნა შხვეფწკუმა თინეფიშ გურშენ ჩიება. თინეფცალო, ჩქი ხოლო მოამაყნა ჩქინ ზეციერ მუმა, იეჰოვა დო მოკონა შხვეფს ხოლო გუვოჩინებაფუათ თინა. გურს არძა თეშ ფიფქრენთ, მუჭოთ მეფე დავითიქ ჭარჷ: „სიამაყეთ იფჩიებუქ იეჰოვაშ გურშენ“ (ფსალმ. 34:2). მარა შილებე თიცალ მორდებუანეფ ვორეთ, ნამდა მორიდუნა იეჰოვაშ გურშენ ჩიება. მუჭო შემლებნა გაბედულებაშ გიმორჩქინა? თეშ კეთება თიმწკუმა შემალებენა, მუჟამსით დეფიფქრებუთ, მუჭო გუხარენთ იეჰოვას გურს დო მუშმადიდა ჯგირობუას მოუღანს შხვეფს თიშ გაჩინებაფა. ღორონთ საჭირო გაბედულებას ქომჩანა. თიქ მეხვარ პირველ საუკუნეშ ქრისტიანეფს გაბედულებაშ გიმორჩქინას დო ჩქი ხოლო მიმეხვარებნა (1 თეს. 2:2).

14. მუ მიზეზეფიშ გურშენ რე მნიშვნელოვან მოწაფეეფიშ მომზადებაშ საქმეს მონაწილებაშ მეღება?

¹⁴ იეჰოვა ვეგმირჩქინანს გიშაკერძაფას დო ბედნერ რე, მუჟამსით ორწყე, მუჭო გიმიფრჩქინანთ შხვეფწკუმა ჸოროფას თინეფიშ წარსულიშ დო მდგომარეობაშ უმკუჯინუო (საქ. 10:34, 35). სახიოლო ამბეშ ქადაგება ართ-ართ არძაშ უჯგუშ საშვალება რე, ნამდგათ შხვეფიშ ჸოროფას გიმიფრჩქინანთ (მათ. 28:19, 20). მუ შედეგ მოჸუნს თე საქმეს? თინეფს, მით მირჩქილენან, შეულებნა გეუჯგუშან მუნეფიშ ცხოვრება დო უღდან მარადიულ სიცოცხლეშ იმენდ (1 ტიმ. 4:16).

გიჸორდან ჩქინ ზეციერ მუმა დო რდათ ბედნერეფ

15, 16. ბედნერობაშ მუ მიზეზეფ მიღნა?

¹⁵ იეჰოვა მოჸოროფე მშობელ რე, ათეშენ თის ოკო მუშ ოჯახიშ წევრეფ ბედნერეფ რდან (ეს. 65:14). თიშ უმკუჯინუო, ნამდა შილებე სირთულეეფ მიღდან, შემლებნა ამდღა ხოლო ვორდათ ბედნერეფ, მუშენდა თეშ ბრელ მიზეზ მიღნა. მაგალთო, ჩქი დარწმუნებულეფ ვორეთ, ნამდა ზეციერ მუმას ვუჸორთ. ღორონთიშ სიტყვაშ, ბიბლიაშ ზუსტ რჩქინა მიღნა (იერ. 15:16). თეს გეძინელ, განსაკუთრებულ ოჯახიშ წევრეფ ვორეთ, სოდეთ თიცალ ხალხ რე, მიდგას უჸორა იეჰოვა, თიშ ზნეობრივ კანონეფ დო ართიან (ფსალმ. 106:4, 5).

¹⁶ შემლებნა ბედნერეფ ვორდათ, მუშენდა დარწმუნებულეფ ვორეთ, მომავალს უჯგუშ ცხოვრება მაღვენუნა. მიჩქნა, ნამდა მალას იეჰოვა ბოლოს მუღენს უბადო კათას დო თიშ სამეფოშ ხემძღვანელობათ დედამიწას სამოთხეთ გინაშქვანს. თეს გეძინელ, მიღნა იმენდ, ნამდა ღურელეფ გეთელებნა დო დართუნა მუნეფიშ საჸოროფო კათას (იოან. 5:28, 29). მუნერ სახიოლო იჸუაფ თენა! მუთ არძაშ უმოს მნიშვნელოვან რე, დარწმუნებულეფ ვორეთ, ნამდა არძა, მუჭოთ ზეცას თეშ დედამიწას ხოლო, განადიდენს დო ზუსტას თეშ ემსახურებ თის, მუჭოთ იმსახურენს.