გამანგარით მეგობრულ ურთიერთობეფ აღსასრულიშ მონჭაშაფა

1, 2. მუჭოთ 1 პეტრეშ 4:7 დო 8-ს ჭარჷ, მუ მიმეხვარებნა გავურზათ სირთულეეფს?

მუთ უმოს ხოლოს ვორეთ აღსასრულწკუმა, პრობლემეფ უმოსო მაძინუნა (2 ტიმ. 3:1). მაგალთო, დასავლეთ აფრიკაშ ართ-ართ ქიანას არჩევნეფიშ უკულ არეულობაქ დო ჩხუპიქ ქიდიჭყჷ. ამშვ თუთაშე უმოსის, ჩქინ და დო ჯიმალეფს ვეშულებდეს თავისფალო გილულა, მუშენდა საომარ ზონას ცხოვრენდეს. მუქ მეხვარ თინეფს, ქუგურზესკო თეცალ სირთულეეფს? ნამთინექ თი და დო ჯიმალეფიშ ჸუდეეფს ქუდოსკიდ, მით უსაფრთხო ადგილს ცხოვრენდეს. ართ ჯიმაქ თქუ: „თე დროს ბედნერო ბგინაფლენდჷ დუდის, მუშენდა მეგობრეფწკუმა ართო ვორდჷ. ჩქი ართიანს გურშა ელვუკინანდით“.

² „დიდ გასაჭირიშ“ დოჭყაფაშ დროს, ნამდვილ მეგობრეფ ქუმაჸვენუნან-და, ბედნერეფ იპჸით (გამოცხ. 7:14). ათეშენ, მნიშვნელოვან რე ამდღარშე გუვამანგარათ მეგობრულ ურთიერთობეფ (წეკითხით 1 პეტრე 4:7, 8). ჩქი ბრელ მუდგარენიშ გურაფა შემლებნა იერემიაშ მაგალითშე. თის მეგობრეფქ მეხვარეს ქუგურზუკო თი განსაცდელეფს, მუდგას იერუსალიმიშ განადგურებაშახ შეხვადუდ დო ცოცხალო გეგნოსქიდკო.b მუჭო შემლებნა მივაჸუნათ იერემიაშ მაგალითის?

დიგურეთ იერემიაშ მაგალითშე

3. ა) მუშენ შილებე იერემიაქ დუდ აურიდუკო ხალხწკუმა ურთიერთობას? ბ) მუშ გურშენ ეჩიებუდ იერემია მუშ ართგურ მდივან ბარუქის დო მუ რდუ თეშ შედეგ?

³ სოდგარენ 40 წანაშე მეტ ხანს იერემია თიცალ ხალხ შქას ცხოვრენდჷ, მით ვა რდეს ღორონთიშ ართგურეფ. თინეფ შქას რდეს მეზობელეფ დო შილებე ნამთინე ნათესე ხოლო მუშ მშობლიურ ქალაქ ანათოთშე (იერ. 11:21; 12:6). მარა თინა დუდის ვა ურიდანდჷ ხალხწკუმა ურთიერთობას. იერემია მუშ გრძნობეფიშ გურშენ ეჩიებუდ მუშ ართგურ მდივან ბარუქის. თეს გეძინელ, ჩქი ხოლო მიჩქნა მუს გინაფლენდჷ თე წინასწარმეტყველ, მუშენდა თიშ გრძნობეფ ბიბლიას რე ინოჭარილ (იერ. 8:21; 9:1; 20:14—18; 45:1). ბარუქიქ იერემიაშ მსახურებაშ გურშენ წიგნ „იერემიას“ ჭარჷ. წერმიდგინით, მუნერ დიდ ჸოროფა დო პატიცემაქ გევითარ თე ჟირ პიროვნებაშ შქას თე დროშ დინახალე (იერ. 20:1, 2; 26:7—11).

4. მუშ კეთება დავალ იეჰოვაქ იერემიას დო მუჭო გამანგარენდჷ თე დავალება იერემიაშ დო ბარუქიშ მეგობრობას?

⁴ წანეფიშ დინახალე, იერემია ისრაელეფს გაბედულო აფრთხილენდჷ იერუსალიმიშ განადგურებაშ გურშენ (იერ. 25:3). იეჰოვას ოკოდ ხალხიქ მინანუკო, ათეშენ იერემიას დავალ გრაგნილს დოჭარკო არძა თი გაფრთხილება, ნამუთ ღორონთიქ თე წანეფიშ დინახალე მეჩჷ თინეფს (იერ. 36:1—4). მუჟამსით იერემია დო ბარუქი ღორონთშე მოჩამილ თე დავალებას ასრულენდეს, ნამდგაქ შილებე მუსხირენ თუთას გეგრძელ, მუშო ოკო რაგად, თინეფს ბრელ თიცალ საკითხეფიშ გურშენ აღვენუდეს ჩიება, ნამუთ რწმენას გუმანგარენდჷ.

5. მუჭო ოძირუ ბარუქიქ, ნამდა იერემიაშ ნამდვილ მეგობარ რდუ?

⁵ მუჟამსით გრაგნილს ჭარილ ინფორმაციაშ შხვეფშა გინოჩამაშ დროქ ქუმორთჷ, იერემიას ბარუქიშ იმენდ ოკო უღუდკო, ნამდა თინა გაკეთენდჷ თე საქმეს (იერ. 36:5, 6). ბარუქიქ გაბედულო შეასრულ თე რთულ დავალება. წერმიდგინით, მუჭო იამაყენდჷ იერემია, მუჟამსით ბარუქიქ ქიმერთჷ ტაძარშა დო გრაგნილს მოჩამილ ცნობა ხალხის წუკითხჷ (იერ. 36:8—10). იუდაშ მთავრეფქ ქიგეგეს, მუ აკეთ ბარუქიქ დო უწის, ნამდა მუნეფშა ხოლო ხონარმაღალო წუკითხირუდკო თინა (იერ. 36:14, 15). თე მთავრეფქ გეგნოჭყვიდეს მეფე იეჰოიაკიმშა გეგნუჩამდესკო იერემიაშ ცნობა. თინეფშო არძაართ ვარდჷ ბარუქიშ მომავალ, ათეშენ უწის: „მეუთ სი დო იერემიაქ, დიტყობით დო მითინს ვა გაგებაფუათ სო რეთ“ (იერ. 36:16—19). თენა მართალო ჯგირ რჩევა რდუ!

6. მუ აკეთეს იერემია დო ბარუქიქ წინააღმდეგობაშ დროს?

⁶ მუჟამსით მეფე იეჰოიაკიმქ ქიმირჩქილუ იერემიაშ ნაჭარა სიტყვეფ, თეშ გერისხ, ნამდა გრაგნილ დოჭვჷ. თეს გეძინელ, იერემია დო ბარუქიშ ჭოფუა ხოლო ზოჯჷ. მარა იერემიას ვაშქურნებ. თიქ შხვა გრაგნილ ქიმეჩ ბარუქის; იერემია იეჰოვაშ ცნობას უკარნახუდ თის დო ბარუქიქ დოჭარ „თინა, მუთ თი გრაგნილს ჭარუდ, ნამუთ იუდაშ მეფე იეჰოიაკიმქ დაჩხირს დოჭვჷ“ (იერ. 36:26—28, 32).

7. მუჭო იმოქმედენდჷ იერემია დო ბარუქიშ ურთიერთობაწკუმა საქმეშ ართო კეთება?

⁷ ხშირას თი პიროვნებეფ, მიდგას ართო გინუღნა პრობლემეფ, უმოსო ეახლოებნა ართიანს. მუჟამსით იერემია დო ბარუქი, მეფე იეჰოიაკიმიშ განადგურებულ გრაგნილს დუდშე ჭარუნდეს, უმოს უჯგუშო გეჩინებაფუანდეს ართიანს დო ხოლოშიან მეგობრეფო გინირთუდეს. მუ პრაქტიკულ ნაბიჯეფიშ გინოდგუმა შემლებნა, ნამდა იერემია დო ბარუქცალო ჩქი ხოლო გუვამანგარათ მეგობრულ ურთიერთობეფ?

გურ გეგნუფაჩით მეგობრეფს

8. მუშენ შილებე დუდ ავარიდათ ხოლოშიან მეგობრობაშ გავითარებას დო მუშენ ოკო ვეცადათ გუვავითარათ თეცალ მეგობრობა?

⁸ შილებე ძნელ მაფდან შხვაშა გურიშ გინოფაჩუა, მუშენდა ულირს მიდგარენქ მოწყინებაფეს (იგავ. 18:19, 24). ვარდა შილებე ფიფქრენთ, ნამდა ვა მიღნა ხოლოშიან ურთიერთობეფიშ გავითარებაშო საჭირო დრო დო საშვალება. მარა ოკო ვეცადათ, გუვავითარათ თეცალ მეგობრობა. ქუმოკონა და დო ჯიმალეფქ განსაცდელეფიშ დროს ქელამდირთან-და, ამდღარშე ოკო დიბგურუათ, თინეფშა ჩქინ ფიქრეფ დო გრძნობეფიშ გაზიარება. თენა მნიშვნელოვან ნაბიჯ რე ხოლოშიან მეგობრობაშ გასავითარებელო (1 პეტ. 1:22).

9. ა) მუჭო ოძირუ იესოქ, ნამდა ონდუდ მუშ მეგობრეფს? ბ) მუჭო უნწყუნს ხეს გურგინოფაჩილო რაგად მეგობრობაშ გამანგარებას? ქიმიჸონით მაგალითი.

⁹ იესო მუშ მეგობრეფს გურგინოფაჩილო ეჩიებუდ დო თეშნერო ოძირუ, ნამდა ონდუდ თინეფს (იოან. 15:15). ჩქი შემლებნა იესოშ მაგალითის მივაჸუნათ თით, ნამდა ჩქინ მეგობრეფს ვეჩუათ თი ხიოლ დო გურჭუაშენ მუთ მიღნა. გურგედვალირო ქურჩქილით, მუჟამსით შხვეფ გეჩიებნა დო ქოძირუნთ, ნამდა ბრელ მუდგარენ ნორღვენა საერთო; მაგალთო გრძნობეფ, ფიქრეფ დო გეგმეფ. გუვარჩუათ ართ 29 წანერ დაშ, სინდიშ მაგალით. თიქ მეგობრობა ქიდიჭყჷ ართ პიონერ და მარი-ლუისწკუმა, ნამუთ 67 წანერ რე. სინდი დო მარი-ლუის ირ ცააშხა ოჭმარეს ართო მსახურენა დო ართიანწკუმა გურგინოფაჩილო იჩიებნა შხვადოშხვა საკითხეფიშ გურშენ. სინდი იჩიებ: „მოსიამოვნ მეგობრეფწკუმა გურგინოფაჩილ ჩიება, მუშენდა თენა მოხვარ უჯგუშო გეფჩინებაფუე დო გავუგე თინეფს“. მეგობრულ ურთიერთობეფ უმოსო იმანგარებ, მუჟამსით მეგობრეფს ჩქინ გრძნობეფ დო ფიქრეფშე ვეჩიებუთ დო ვურჩქილეთ, მუჟამსით აშო მეჩიებნა. სინდიცალო, შხვეფწკუმა გურგინოფაჩილო რაგადიშ ინიციატივას გეგმირჩქინანთ-და, თქვან მეგობრობა უმოსო გემანგარებ (იგავ. 27:9).

ართო ქიმსახურით

10. მუჭოთ იგავეფიშ 27:17-ის ჭარჷ, მუ ჯგირ შედეგიქ შილებე მაჸუნას თანაქრისტიანწკუმა ართო ქადაგებას?

¹⁰ მუჭოთ იერემია დო ბარუქიშ შემთხვევას მოხვად, მუჟამსით თანაქრისტიანეფწკუმა ართო ვმსახურენთ დო პირველ რიგის თინეფიშ ჯგირ თვისებეფს ვოკვირუთ, შემლებნა ბრელ დიბგურუათ თინეფშე დო უმოსო დევეახლოვათ (წეკითხით იგავები 27:17). მაგალთო, მუს იგინანთ, მუჟამსით მეგობარწკუმა მსახურენთ დო ორწყეთ, ნამდა თინა გაბედულო იჩიებ მუშ რწმენაშე ვარდა შურდოგურით რაგადანს იეჰოვა დო თიშ განზრახვეფიშ გურშენ? ალბათ უმოსო დაფასენთ თის.

11, 12. ქიმიჸონით თიშ მაგალითეფ, მუჭო შეულებ ართო მსახურებას, მიგეხვარან მეგობრულ ურთიერთობეფიშ გამანგარებას.

¹¹ მორთ გუვარჩუათ ჟირ შემთხვევა, სოვრეშეთ იძირე, ნამდა ართო მსახურება აახლოვენს თანაქრისტიანეფს. 23 წანერ და ადელაინქ, მუშ ართ-ართ მეგობარ ქენდისის ქოთხუ, თიწკუმა ართო მიდურთუმუდკო იშვიათო ქადაგენან ფერ ტერიტორიაშა. ადელაინ იჩიებ: „ჩქი მოკოდეს უმოს მონდომათ იფქადაგითკო დო მსახურებაქ მეტ ხიოლ მომღესკო. ჟირხოლოს მოსაჭირდეს წახალისება, ნამდა იეჰოვას მუთ შემლებდესინ არძაშ უჯგუშ შებწირითკო“. მუ ჯგირობუა მოუღ თინეფს ართო მსახურებაქ? ადელაინ იშინანს: „ირ დღაშ ბოლოს, ართიანს ვურაგადუდით ჩქინ გრძნობეფიშ გურშენ, არძაშ უმოსო მუქ მიმეწონეს შხვეფწკუმა ქადაგებაშ დროს დო მუჭო ვორწყედით, ნამდა იეჰოვა ხემძღვანელენდჷ ჩქინ მსახურებას. ჟირხოლოს მოსიამოვნუდეს თეცალ გურგინოფაჩილ რაგად დო უმოს უჯგუშო გეფჩინებაფეთ ართიან“.

¹² ლაილა დო მერიენქ, ჟირ დაუქორწინებელ დაქ, ნამუთ საფრანგეთის ცხოვრენა, ხუთ მარათ ოქადაგებშა გეგნორთეს ცენტრალურ აფრიკაშ რესპუბლიკაშ დედაქალაქ ბანგიშა. ლაილა იშინანს: „მერიენქ დო მა სირთულეეფს შეფხვადით, მარა გურგინოფაჩილ ურთიერთობაშ დო ქრისტიანულ ჸოროფაშ ჭყოლოფათ, ჩქინ მეგობრობაქ უმოსო გემანგარ. მერიენ უმოსო დუვაფას, მუჟამსით ქობძირ, ნამდა თის ვა უჭირდჷ თექიანობაშ მერჩქვანა, ადგილობრივეფწკუმა დიდ ჸოროფას გიმირჩქინანდჷ დო გურგედვალირო ქადაგენდჷ“. აუცილებერ ვა რე, შხვა ქიანაშა გინულა, ნამდა თეცალ ხიოლ თქვა ხოლო გიღდან. მუჟამსით ადგილობრივ ტერიტორიას და დო ჯიმალეფწკუმა ართო ქადაგენთ, საშვალება გიღნა უჯგუშო გეჩინებაფუათ თინეფ დო გამანგარათ მეგობრულ ურთიერთობა.

ყურადღება მეგობრეფიშ ჯგირ თვისებეფშა გეგნიღით დო ქაპატით შეცდომეფ

13. მუ სირთულეეფს შილებე შეფხვადათ, მუჟამსით თანაქრისტიანეფწკუმა ვმსახურენთ?

¹³ მინშა, და დო ჯიმალეფწკუმა მსახურებაშ დროს, ვორწყეთ, მუჭოთ თინეფიშ ჯგირ თვისებეფს თეშ, შეცდომეფს ხოლო. მუ მიმეხვარებნა თე შეცდომეფიშ უმკუჯინუო, ხოლოშიან ურთიერთობა ვა ვოდინუათ თინეფწკუმა? მორთ, ხოლო ართშა გუვარჩუათ იერემიაშ მაგალით დო ქიგებგათ მუქ მეხვარ თის, ქეშუმჩნიებუდკო მეგობრეფიშ ჯგირ თვისებეფ დო ქუპატიებუდკო თინეფშა შეცდომეფ.

14. მუ დიგურუ იერემიაქ იეჰოვაშე დო მუჭო მეხვარ ნაგურეფუქ?

¹⁴ იერემიაქ ბიბლიაშ სუმ წიგნ ჭარჷ: 1 მეფეეფ, 2 მეფეეფ დო წიგნ, ნამდგას თიშ სახელ ჯოხო. თე დავალებეფიშ შესრულება მეხვარებუდ თის, ქოძირუკო მუშმადიდა ჸოროფას გიმირჩქინანს იეჰოვა არასრულყოფილ ადამიანეფწკუმა. მაგალთო, თის შეულებუდ დეფიქრუკო მეფე ახაბიშ შემთხვევაშე. თიქ მუშ გლახა საქმეეფ მინანუ დო ათეშენ იეჰოვაქ ვაძირუ თის ოჯახიშ დო ხოლოშიანეფიშ ღურა (1 მეფ. 21:27—29). თეს გეძინელ, იერემიას შეულებუდ დეფიქრუკო მეფე მენაშეშ მაგალითშე ხოლო, ნამუთ ახაბიშ უფრაშო იქციებუდ. მარა, თიქ მინანუ დო იეჰოვაქ ხოლო ქაპატუ დაშებულ (2 მეფ. 21:16, 17; 2 მატ. 33:10—13). თე შემთხვევეფქ ოკო მეხვარკო იერემიას, მიაჸუნკო იეჰოვაშ გიმორჩქინელ მოთვინებაშ დო ჭყოლოფაშ მაგალითის დო თე თვისებეფ ხოლოშიან მეგობრეფწკუმა გეგმირჩქინკო (ფსალმ. 103:8, 9).

15. მუჭო მიაჸუნ იერემიაქ იეჰოვაშ მოთვინებაშ მაგალითის, მუჟამსით ბარუქიქ ყურადღება შხვა მუდგარენშა გეგნიღ?

¹⁵ მორთ ქობძირათ, მუჭო მექცუ იერემიაქ ბარუქის, მუჟამსით თიქ ართ მომენტის ყურადღება შხვა მუდგარენშა გეგნიღ. თიშ მანგიორო, ნამდა ხეთეშე ოჭიშ ქურთინუკო მეგობარს, მთელ გურით დო პირდაპირ გეგნოჩ ღორონთიშ ცნობა ბარუქის დო თეშნერო მეხვარ თის (იერ. 45:1—5). მუს ბგურაფლენთ თე შემთხვევაშე?

16. მუჭოთ იგავეფიშ 17:9-ს ჭარჷ, მუ ოკო ვაკეთათ, ნამდა ვა ვოდინუათ მეგობრეფ?

¹⁶ და დო ჯიმალეფშე სრულყოფილებას ვეველუთ. ათეშენ, ირფელ ოკო გუვაკეთათ, ნამდა ხოლოშიან ურთიერთობა ვა ვოდინუათ თინეფწკუმა. ჩქინ მეგობრეფქ არასწორ ნაბიჯ გეგნოდგეს-და, მთელ გურით დო პირდაპირ ოკო მეფჩათ ღორონთიშ სიტყვაშა გერსხილ რჩევა (ფსალმ. 141:5). მეგობრეფქ ქუმოწყინებაფეს-და, ოკო ქუვაპატუათ თინეფს; პატიებაშ უკულ, ვართ თინეფს ოკო გუვოშინათ მოხვალამირ დო ვართ შხვეფწკუმა ოკო იფჩუათ თეშ გურშენ (წეკითხით იგავები 17:9). მნიშვნელოვან რე, თეცალ დროს ყურადღება გეგნიბღათ და დო ჯიმალეფიშ ჯგირ თვისებეფშა დო ვართ ხოლო თინეფიშ სისუსტეეფშა. თეცალ საქციელ ამდღარშე გამანგარენს თანაქრისტიანეფწკუმა ჩქინ მეგობრობას, მუთ მართალო მნიშვნელოვან რე, მუშენდა „დიდ გასაჭირიშ“ დროს ნამდვილ მეგობრეფ დემესაჭირებნა.

გეგმირჩქინით ნამდვილ ჸოროფა

17. მუჭო ოძირუ იერემიაქ, ნამდა ნამდვილ მეგობარ რდუ გაჭირებაშ დროს?

¹⁷ წინასწარმეტყველ იერემიაქ საქმეეფით დამტკიც, ნამდა გაჭირებაშ დროს ნამდვილ მეგობარ რდუ. მაგალთო, ართ-ართ სახელმწიფო მოხელექ, ებედ-მელექიქ იერემია ღურას გინასქილიდუ, მარა თეშ უკულ ებედ-მელექის ოშქურუდ, ნამდა მთავრეფქ თეშ კეთებაშ გურშენ თის მუთუნ გლახა ვა უკეთესკო. მუჟამსით იერემიაქ თეშ გურშენ ქიგეგ, თიშ იმენდო ვა დოსქილადე, ნამდა ებედ-მელექ მუშით მაგვარენდჷ თე პრობლემას. მართალ რე, იერემია ციხეს ხედჷ, მარა მუთ შეულებუდუნ ირფელ გაკეთ; თიქ ებედ-მელექის იეჰოვაშ გურიშემაკინალ ცნობა გეგნოჩ (იერ. 38:7—13; 39:15—18).

18. მუჭოთ იგავეფიშ 17:17-ის ჭარჷ, მუჭო ოკო მიფქცუათ, მუჟამსით და დო ჯიმალეფ სირთულეეფს შეხვადნა?

¹⁸ ამდღა ბრელ და დო ჯიმა შხვადოშხვა სირთულეს შეხვადუ. მაგალთო, სტიქიურ უბედრობეფს ვარდა სირთულეეფს, ნამუთ ადამიანეფიშ მიზეზით ხვადუ. თე დროს, ნამთინეს შილებე მიღდან თიშ საშვალება, ნამდა ჸუდეშა მიბღათ ჩქინ და დო ჯიმალეფ. შხვეფს შილებე ფინანსურო ელარნა შემლებდან. მარა არძას შემლებნა იეჰოვას ქოფთხუათ, ქიმეხვარას თე და დო ჯიმალეფს. მუჟამსით ქიგებგენთ, თანამორწმუნე გურგოტახილ რენ, შილებე ვა მიჩქუდან მუ ვუწუათ ვარდა მუ ვაკეთათ. მარა ჩქი იშენით შემლებნა თინეფიშ მოხვარა. მაგალთო, შემლებნა დრო გეგმურთათ თინეფს, შურდოგურით ქუმურჩქილუათ დო გეშუკითხათ გურიშემაკინალ ბიბლიურ მუხლი, ნამუთ არძაშ უმოსო მობწონა (ეს. 50:4). მუთ არძაშ უმოს მნიშვნელოვან რე, თქვა თანაქრისტიანეფწკუმა რეთ თი დროს, მუჟამსით თინეფს ოსაჭირუთ (წეკითხით იგავები 17:17).

19. მუჭო მიმეხვარებნა ხოლოშიან ურთიერთობაშ ამდღარშე გავითარება მომავალს?

¹⁹ გინოჭყვიდილ ოკო მაფდან, ამდღარშე გუვავითარათ დო ვა ვოდინუათ ხოლოშიან ურთიერთობა და დო ჯიმალეფწკუმა. თეშ კეთება მნიშვნელოვან რე, მუშენდა ჩქინ ნტერეფ ეცადებნა ტყურა გავრცელან დო თეშნერო დუმაშორან ართიანს. თეშ უკულ, თინეფ ეცადებნა ართიანს დუმაპირისპირან. მარა თეშ კეთება ვექშალენა! თინეფს ჩქინ ჯიმალურ ჸოროფაშა ვეწარნენა. ჩქინ ნტერეფქ მუდგა ვაკეთანინ, ჩქინ მეგობრობაშა მუთუნ ვა დარკებენა. მუშო ოკო რაგად, თეცალ მეგობრობა ხვალე თე სისტემაშ აღსასრულშახ ვარინ, მარადიულო გეგრძელებ!