ქიმეხვარით შხვეფს განსაცდელეფიშ დროს

1. მუჭო შემლებნა მივაჸუნათ ჩქინ მოჸოროფე მუმაშ, იეჰოვაშ მაგალითის?

იეჰოვას მანგარო ვუჸორთ (იოან. 3:16). მუშო ოკო რაგად, ჩქი ხოლო მოკონა მივაჸუნათ ჩქინ მოჸოროფე მუმაშ მაგალითის. ათეშენ ირნერო ვოცადუთ ვორდათ ყურადღებიან, მიღდან ჯიმალურ ჸოროფა დო გურშა მიბღათ შხვეფიშ გაჭირება, განსაკუთრებულო თინეფიშ, „მით რწმენათ ჩქინიან რე“ (1 პეტ. 3:8; გალ. 6:10). მუჟამსით და დო ჯიმალეფ განსაცდელეფს შეხვადნა, მოკონა მივეხვარათ თინეფს.

2. მუს გუვარჩიენთ თე სტატიას?

² არძა, მიდგას ოკო იეჰოვას ემსახურას, რთულ სიტუაციეფს შეხვადუ (მარ. 10:29, 30). მუთ უმოსო მივანჭუაფუთ ქვეყნიერებაშ აღსასრულს, თით უმოს პრობლემას შეფხვადუთ. მუჭო შემლებნა თეცალ დროს მივეხვარათ ართიანს? მორთ ქობძირათ, მუშ გურაფა შემლებნა ლოტიშ, იობიშ დო ნაომიშ მაგალითეფშე. თეს გეძინელ, გუვარჩიენთ მუსხირენ პრობლემას, ნამდგას თანაქრისტიანეფ შეხვადუნა დო ქიგებგენთ, მუჭო შემლებნა მივეხვარათ თინეფს, მერუან პრობლემეფს.

გეგმირჩქინით მოთვინება

3. მუჭოთ 2 პეტრეშ 2:7, 8-შე იძირე, მუ არასწორ გადაწყვეტილება მიღჷ ლოტიქ დო მუ შედეგეფქ მაჸუნ თეს?

³ ლოტიქ არასწორ გადაწყვეტილება მიღჷ, მუჟამსით გინოჭყვიდ იცხოვრუკო სოდომს, სოდეთ უზნეო ხალხ ცხოვრენდჷ (წეკითხით 2 პეტრე 2:7, 8). მართალ რე, სოდომი მდიდარ ქალაქ რდუ, მარა ლოტიქ ბრელ სირთულეს შეხვად თექ გინულათ (დაბ. 13:8—13; 14:12). მუჭოთ იძირე, თიშ ოსურქ თეშ ქიმიარჩქვან თი ქალაქის დო თექ მახორუ ხალხის, ნამდა ღორონთიშ ურჩო გინირთჷ. თიქ მიოდინუ მუშ სიცოცხლე, მუჟამსით ღორონთიქ „დაჩხირიშ დო გოგირდიშ ჭვემათ განადგურ“ სოდომი. დეფიქრით ლოტიშ ჟირ ძღაბშე ხოლო. თინეფიშ საქომონჯოეფ სოდომელეფ რდეს, მიდგაქ ქალაქიშ განადგურებაშ დროს დოღურეს. ლოტიქ მიოდინუ მუშ ჸუდე, ქონება დო არძაშ უმოს ძვირფას — მუშ ოსურ (დაბ. 19:12—14, 17, 26). ხომ ვა დინაფ იეჰოვას მოთვინება ლოტწკუმა, თეცალ რთულ სიტუაციაშ დროს? მუშო ოკო რაგად, ვარ.

4. მუჭო გიმირჩქინ იეჰოვაქ მოთვინება ლოტწკუმა? (ქოძირით სურათ პირველ გვერდის).

⁴ მართალ რე, სოდომს ცხოვრება ლოტიშ არჩევან რდუ, მარა იეჰოვაქ მიშელ თიშ მდგომარეობაშა დო ანგელოზეფ მიდაშკვჷ, ნამდა ირსხუკო თინა დო თიშ ოჯახი. მარა, თიშ მანგიორო, ხეთეშე დემორჩილკო ანგელოზიშ მითითებას დო უნტებუდკო, ლოტი „ვა ჩქარენდჷ“ სოდომიშ დოტებას. ანგელოზეფქ ხე ქიმეთხეს თის დო მუშ ოჯახწკუმა ართო ქალაქშე გეგშეჸონეს (დაბ. 19:15, 16). თეშ უკულ, ანგელოზეფქ უწუეს, გვალამ ადგილშა ინტუკო, მარა თიქ ვედემორჩილ იეჰოვას დო ქოთხუ, უხოლაშ ქალაქშა ულაშ ნება ქიმეჩკო (დაბ. 19:17—20). იეჰოვაქ მოთვინებათ ქუმურჩქილუ დო ქიმეჩ თეშ უფლება. უმოს გვიანო, ლოტის აშკურინ თექ ცხოვრებაშა დო მიდართჷ თი ადგილშა, ნამუთ დუდშე იეჰოვაქ უწუ (დაბ. 19:30). მუშმადიდა მოთვინება გიმირჩქინ იეჰოვაქ! მუჭო შემლებნა მივაჸუნათ თიშ მაგალითის?

5, 6. მუჭო შემლებნა 1 თესალონიკელეფიშ 5:14-ის მოჩამილ რჩევაშ გიმორნაფა, მუჟამსით ღორონთიშ მაგალითის მეპჸუნთ?

⁵ ლოტცალო, შილებე ჩქინ და დო ჯიმალეფქ ხოლო არასწორ გადაწყვეტილებეფ მიღან დო სერიოზულ პრობლემეფქ ქაშუან. მუჭო ოკო მიფქცუათ თეცალ დროს? შილებე ქუმაშუან თიშ რაგადიშ ცდუნებაქ, ნამდა თე ირფელ მუშ გადაწყვეტილებაშ შედეგ რე, მუთ ნამდვილო თაშ რე (გალ. 6:7). მარა უჯგუშ იჸუაფ, მივაჸუნათ იეჰოვაშ მაგალითის დო ქიმვეხვარათ თინეფს. მუჭო შემლებნა თეშ კეთება?

⁶ იეჰოვას ანგელოზეფ ხვალე ლოტი გაფრთხილესკონ თიშენ ვა გუტებ. თის ოკოდ ქიმეხვარკო ლოტის დო გინასკილიდუკო სოდომიშ განადგურებაშ დროს. თეშნერო, ჩქი ხოლო შილებე გუვაფრთხილათ თანაქრისტიან, მუჟამსით სწორას ვექციებ. მარა მზათ ოკო ვორდათ, ქიმვეხვარათ თის. შილებე თინა ვა ჩქარენდას ბიბლიურ რჩევეფიშ გათვალისწინებას, ათეშენ ჟირ ანგელოზცალო, ჩქი ხოლო მოთვინება მოსაჭირნა. თიშ მანგიორო, ნამდა თანაქრისტიანიშ მოხვარაშა გურქ გემიოლან, უჯგუშ იჸუაფ სიტყვათ დო საქმეთ ქელუდირთათ თის (1 იოან. 3:18). შხვა სიტყვეფით ქოფთქუათინ, შემლებნა ქიმვეხვარათ ჯგირ რჩევაშ გიმორნაფას (წეკითხით 1 თესალონიკელები 5:14).

7. მუს ბგურაფლენთ თევრეშე, მუჭო მექცუ იეჰოვაქ ლოტის?

⁷ იეჰოვას შეულებუდ ყურადღება გამახვილკო ლოტიშ ნაკლოვანებეფშა. მარა თეშ გინაწონს, უმოს გვიანო ღორონთიქ მუშ წმინდა შურით მოციქულ პეტრეს ოჭარაფუ, ნამდა ლოტი მართალ კოჩ რდუ. ბედნერეფ ვორეთ, ნამდა იეჰოვა მაპატიენა შეცდომეფს (ფსალმ. 130:3). მუს ბგურაფლენთ იეჰოვაშ მაგალითშე? ჩქინ და დო ჯიმალეფწკუმა მოთვინებაშ გიმორჩქინა ვა გამჭირდუნა, მუჟამსით ყურადღებას თინეფიშ ჯგირ თვისებეფშა გეგნიბღანთ. შედეგო, უმოსო გეადვილებნა მიღან ჩქინდე მოხვარა.

გურშა მიღით შხვეფიშ გაჭირება

8. მუშ კეთებაშა აღბძრენა შხვეფიშ გაჭირებაშ გურშა მეღალა?

⁸ ლოტიშ გინაწონს, იობიშ პრობლემეფ მუშ არასწორ გადაწყვეტილებაშ შედეგ ვა ჸოფე. თის ბრელ უბედრობეფქ გიოტირხჷ დუც, მეუდინ ქონებაქ, მდგომარეობაქ დო ჯამრთელობაქ. მუთ არძაშ უფრაშ რე, თის დო მუშ ოსურს არძა სქუაქ დუღურეს. თეს გეძინელ, იობის მუშ სუმ ითამ მეგობარ ხოლო ბრალს გედვანდჷ. მუ რდუ თიშ ართ-ართ მიზეზ, ნამდა თინეფქ გურშა ვემიღეს იობიშ გაჭირება? თინეფს ბოლოშა ვარჩქილედეს, სინამდვილეს მუს გინაფლენდჷ იობი. ათეშენ, არასწორ დასკვნეფ გაკეთეს დო განსაჯეს თინა. მუ ოკო ვაკეთათ, ნამდა ჩქი ხოლო თაშ ვაგშამირთან? ირიათო ოკო ფშუდან, ნამდა ხვალე იეჰოვას უჩქჷ არძა ფაქტი პიროვნებაშ მდგომარეობაშ გურშენ. ყურადღებით ქურჩქილით პიროვნებას, ნამუთ მუშ გაჭირებაშე გეჩიებნა. ქეცადით ხვალე სიტყვეფ ვემირჩქილუათინ, ქიგინათ თიშ გურჭუა. ხვალე თე დროს შეგალებენა გურშა მიღათ თანაქრისტიანიშ გაჭირება.

9. მუშ კეთებას ევუჩილითუანთ დუც, მუჟამსით გურშა მიბღენთ შხვეფიშ გაჭირებას დო მუშენ?

⁹ შხვეფიშ გაჭირებაშ გურშა მეღალა მიმეხვარებნა, ვებჭორავათ შხვეფიშ პრობლემეფიშ გურშენ. თენა კრებაშ ართობას ხეს ვეშუნწყუნს (იგავ. 20:19; რომ. 14:19). თინა, მით ჭორავენს, მუთუნ ჯგირს ვართჷ, პირიქით, თიშ სიტყვეფ ხოლო უმოს ზიანს მიორინუანს თის, მით იტანჯებ (იგავ. 12:18; ეფეს. 4:31, 32). უჯგუშ იჸუაფ, თანაქრისტიანეფიშ ჯგირ თვისებეფს მივაქცუათ ყურადღება დო მივეხვარათ, მერუან პრობლემეფს.

10. მუს ბგურაფლენთ იობიშ 6:2, 3-ს ინოჭარილ სიტყვეფშე?

¹⁰ წეკითხით იობი 6:2, 3. მინშა იობი უდუფიქრებუო იჩიებუდ. უმოს გვიანო, თიქ ქიმეხვად დო აღიარ თენა (იობ. 42:6). იობცალო, ამდღა ხოლო პიროვნებაქ, მიდგას ოწუხებელ უღჷ, შილებე უდუფიქრებუო ქოთქუას მუდგაინ დო უმოს გვიანო დენარღას. მუჭო ოკო მიფქცუათ თეცალ სიტუაციას? კრიტიკაშ მანგიორო, უჯგუშ იჸუაფ, გურშა მიბღათ თიშ გაჭირება. ირიათო რშუდან, იეჰოვას ვაკოდ, მიღდესკო თი პრობლემეფ დო ოწუხებელ, ნამდგას ამდღა შეფხვადუთ. ათეშენ მარჩქილენა, ნამდა თეცალ დროს იეჰოვაშ ართგურ მსახურქ ხოლო შილებე უდუფიქრებუო ქოთქუას მუდგაინ. თიმწკუმა ხოლო, მუჟამსით იეჰოვაშენ ვარდა ჩქინ გურშენ არასწორს იჩიებ, ხეთეშე ვა მომირთან ოკო გურქ დო ვაგვასამართლათ თინა (იგავ. 19:11).

11. მუჭო შეულებნა უხუცესეფს მიაჸუნან ელიჰუშ მაგალითის, მუჟამსით შხვეფს რჩევეფს არზენა?

¹¹ მინშა პიროვნებას, ნამუთ რთულ სიტუაციას რე, რჩევეფ დო დარიგება ოსაჭირ (გალ. 6:1). მუჭო ოკო მიქცუან უხუცესეფქ თეცალ დროს? თინეფქ ოკო მიაჸუნან ელიჰუშ მაგალითის, ნამუქით ქუმურჩქილუ იობის დო გურშა მიღჷ თიშ გაჭირება (იობ. 33:6, 7). ელიჰუქ ქეცად, ქიგეგკო, მუს გინაფლენდჷ იობი დო თეშ უკულ მეჩჷ რჩევა. უხუცესეფქ ხოლო, მით ელიჰუშ მაგალითის მეჸუნა, დიო გურგედვალირო ურჩქილენა პიროვნებას დო ოცადნა ქინანჭან თიშ მდგომარეობას. თეშ უკულ, უმოსო იჸუაფ შეიოლებერ, თინეფიშ რჩევაქ შეხუას თიშ გურს.

გურშა ეუქექეთ შხვეფს თქვან სიტყვეფით

12. მუჭო იმოქმედ ქომონჯიშ დო ჟირ სქუაშ ღურაქ ნაომიწკუმა?

¹² ნაომის უჸორდჷ იეჰოვა დო თიშ ართგურ რდუ. მარა ქომონჯიშ დო ჟირ სქუაშ ღურაშ უკულ, თის მუშ სახელიშ თირუა დო შხვა სახელიშ „მარაშ“ გედვალა ოკოდ, მუთ „მწარეს“ ნიშნენს (რუთ. 1:3, 5, 20, 21). ნაომიშ ნოსაქ, რუთიქ ვედიტუ თინა თეცალ განსაცდელიშ დროს. თინა ხვალე პრაქტიკულო ვახვარუდ ნაომის, გემუან სიტყვეფს ხოლო ურაგადუდ თის. რუთი ნაომიშ ჸოროფას დო ელარნას უბრალო დო შურ დო გურით რაგადებულ სიტყვეფით გიმოხანტუნდჷ (რუთ. 1:16, 17).

13. მუშენ ოსაჭირნა ელარნა თინეფს, მიდგას მეუღლე აფჷ ღურელ?

¹³ მუჟამსით თანაქრისტიანს მეუღლე უღურუ, თის ჩქინ ელარნა ოსაჭირ. დაქორწინებულ წყვილ შილებე ჟირ ჯას შევადარათ, ნამუთ ართიანიშ ხასლას ირდუ. წანეფიშ უკულ, თე ჯალეფიშ ჩხვიჩხვეფ ართიანს მიარდუ. მუჟამსით თინეფშე ართ დოხუმუ, თენა მაჟია ჯაწკუმა გლახათ მოქმედენს. თეშნერო, მუჟამსით მიდგაინს მეუღლე უღურუ, დიდ ხანს რე ემოციურ სტრესის. ართ და პაულასb ქომონჯიქ ველუდუნ თეშ დუღურ. თინა იჩიებ: „ჩქიმ ცხოვრებაქ ირფელამო დითირ დო დუც მანგარ გლახათ ბგინაფლენდჷ. მა არძაშ უჯგუშ მეგობარქ მემდინ. ჩქიმ ქომონჯის ირფელს ვეჩიებუდ. თინა ჩქიმ ხიოლს იზიარენდჷ დო სირთულეეფიშ დროს მანგარო ელამირდჷ. თინა ირიათო მირჩქილედ, მუჟამსით პრობლემეფიშ გურშენ ვეჩიებუდ. ნამდვილო, დუც ხასლაელასოფილო ბგინაფლენდჷ“.

14, 15. მუჭო შემლებნა გურშა ელვუკინათ თინეფს, მიდგას მეუღლე აფჷ ღურელ?

¹⁴ მუჭო შემლებნა გურშა ელვუკინათ თი პიროვნებას, მიდგას მეუღლე აფჷ ღურელ? პირველ რიგის მნიშვნელოვან რე, ქუდურაგადუათ თეცალ პიროვნებას თიმწკუმა ხოლო, მუჟამსით უხერხულო ბგინაფლენთ დუც ვარდა ვამჩქუნა, მუ ვუწუათ. ჟიშე მოშინაფილ პაულა იჩიებ: „მესმებ, ნამდა თეცალ დროს უხერხულო გინაფლენა დუც. შილებე თიშე წუხენდან, ნამდა მუნეფიშ სიტყვეფით შხვეფს გურ ველაჭუან. მარა ხოლო უფრაშ რე, მუჟამსით შურო მუთუნს ვა თქუანქ“. თინეფს, მიდგას საჸოროფო პიროვნება აფნა ღურელ, ველნა, ნამდა ბრძნულ აზრეფს ვუწინთ. პაულა იჩიებ: «მარდულ ვორდჷ, მუჟამსით მეგობრეფ უბრალოთ თეცალ სიტყვეფს მიწინდეს: „მანგარო მეწყინ“».

¹⁵ უილიამ, ნამდგას მუსხირენ წანაშ წოხოლე ოსურქ უღურ, იჩიებ: „მანგარო ვაფასენქ, მუჟამსით შხვეფ გიშინანა ჯგირ შემთხვევეფს, ნამუთ ჩქიმ ოსურს ოხუ; თენა მარწმუნენს, ნამდა თინა უჸორდეს დო პატის ცენდეს. თენა გურშა ელამკინანს დო კმაყოფილებაშ გრძნობა მიღჷ, მუშენდა ჩქიმ მეუღლეს მნიშვნელოვან ადგილ უკინებუდ ჩქიმ ცხოვრებას დო მანგარო ვაფასენდჷ თის“. ქომონჯღურელ ბიანკა იჩიებ: „გურშა ელამკინანს, მუჟამსით შხვეფ ჩქიმწკუმა ართო ლოცულენა დო ართ ვარდა ჟირ ბიბლიურ მუხლის მიზიარენა. თინა ხოლო მოხვარ, მუჟამსით შხვეფ ჩქიმ ქომონჯიშ გურშენ იჩიებნა. თეს გეძინელ, მირჩქილენა, მუჟამსით თიშ გურშენ ვეჩიებუქ“.

16. ა) მუჭო ოკო ელუდირთათ თინეფს, მიდგას საჸოროფო პიროვნება აფნა ღურელ? ბ) იაკობიშ 1:27-იშ თანახმათ, მუ პასუხიშმგებლობა მიღნა თითოულს?

¹⁶ მუჭოთ რუთიქ ვემიოტუ ქომონჯღურელ ნაომი, თეშ ჩქი ხოლო ვემვოტუათ ოკო თინეფ, მიდგას საჸოროფო პიროვნება აფჷ ღურელ. ჟიშე მოშინაფილ პაულა იჩიებ: „ჩქიმ ქომონჯიშ ღურაშ უკულ ბრელ მიშჷ ჩქიმდა, ნამდა ქიმმეხვარესკო დო გურშა ელამკინესკო. დრო ხანიშ უკულ თინეფქ მუნეფიშ ცხოვრებაშ ჩვეულებრივ რიტმის დართეს. მარა, ჩქიმ ცხოვრება ირფელამო თირელ რდუ. დიდ მნიშვნელობა უღჷ შხვეფს არჩქილედან, ნამდა თინეფს, მიდგას საჸოროფო კათა აფნა ღურელ, მოხვარა ოსაჭირნა თუთეფიშ დო შილებე წანეფიშ დინახალე ხოლო“. მუშო ოკო რაგად, არძა პიროვნება განსხვავებულ რე. ნამთინე უმოს მალას მიარჩქვანუ ახალ მდგომარეობას. მარა შხვეფს მუნეფიშ საჸოროფო პიროვნებას გაშინანს ირფელ, მუდგას თინეფწკუმა ართო ორთუდეს. არძას შხვადოშხვანერო გინუღ საჸოროფო პიროვნებაშ ღურა. ვაგმოჭყორდან, ნამდა იეჰოვა მარზენა პატის დო პასუხიშმგებლობას, მივეხვარათ თინეფს, მიდგას მეუღლე აფჷ ღურელ (წეკითხით იაკობი 1:27).

17. მუშენ ოსაჭირნა ჩქინ მოხვარა თინეფს, მით მეუღლექ ქიდიტუ?

¹⁷ ნამთინეს დიდ გურჭუა დო სტრეს უღჷ, მუჟამსით მეუღლე იტენს თის. ჯოისი, ნამუთ მეუღლექ შხვა ოსურიშ გურშენ მიოტუ, იჩიებ: „ქომონჯიშ ღურა თიცალ გინაღალარ ვა მაჸიდ, მუნერით ჩათხიებაქ მაჸუ, მუშენდა უბედურ შემთხვევათ ვარდა ლახალათ დოღურედკონ, თენა თიშ არჩევან ვეჸიდ. მარა ჩქიმ ქომონჯიქ მუშით გინოჭყვიდ, მიმოტუკო. დუც დამცირებულო ბგინაფლენდჷ“.

18. მუჭო შემლებნა მივეხვარათ თინეფს, მიდგას მეუღლექ უღურ ვარდა ქიდიტუ?

¹⁸ თინეფიშ მიმართ ყურადღებაშ გიმორჩქინათ, მიდგას მეუღლექ უღურ ვარდა ქიდიტუ, ვოძირანთ, ნამდა მიჸორა თინეფ. არძაშ უმოსო თეცალ დროს ოსაჭირნა მეგობრეფიშ ელარნა (იგავ. 17:17). მუჭო შეილებნა ოძირუათ, ნამდა თინეფიშ მეგობარ რეთ? ჯგირ იჸუაფ ქუდაპეჯათ უბრალო ოჭკუმალშა, თინეფწკუმა ართო დრო გატარათ ვარდა მსახურებაშა მიდეჸონათ. თეს გეძინელ, შეილებნა მინშა ოჯახურ თაყვანიშცემაშა ხოლო ქუდაპეჯათ. თეცალ მოქციებათ გურს გუხარენთ იეჰოვას, ნამუთ „ხოლოს რე გურგოტახილეფწკუმა“ დო ზრუნენს თინეფშო, მიდგას მეუღლე აფჷ ღურელ (ფსალმ. 34:18; 68:5).

19. მუშ კეთება გაფნა გინოჭყვიდილ 1 პეტრეშ 3:8-ს ინოჭარილ სიტყვეფიშ თანახმათ?

¹⁹ მალას, მუჟამსით ღორონთიშ სამეფო დედამიწას მართველობას ქიდიჭყანს, ირნერ გაჭირება ულირს ჩებარებ. ჩქი ველუთ თი დროს, მუჟამსით „ულირს მოხვალამირ მითინს ვა გაშინე დო გურს ხოლო მითინს ვა დუმონკენს“ (ეს. 65:16, 17). თე დროშ მოულაშახ, მორთ მივეხვარათ ართიანს დო ჩქინ ჩიებათ დო საქმეეფით ქუვოძირათ და დო ჯიმალეფს, ნამდა მიჸორა თინეფ (წეკითხით 1 პეტრე 3:8).