მუს მოგურუანა გოშინაშ ონჯუა ჩქინ ზეციერ მეფეშენ?

1, 2. ა) მუშენ ვამკვენა, ნამდა იესოქ დომჩინეს მუშ ღურაშ გოშინაშ დღა მარტივო აბღნიშნითკო? ბ) იესოშ ნამ თვისებეფს გუვარჩიენთ?

ქეშეილებნანო გენწყათ, მუჭო იტარებ ქრისტეშ ღურაშ გოშინაშ ონჯუა? ჩქინდე უმენტაშის ადვილო შეულებ თიშ გოშინა, მუშენდა თინა უბრალო ოსერშეთ ეღენიშნებ. მარა თენა განსაკუთრებულ ღონისძიება რე, ათეშენ შილებე იკითხათ: მუშენ რე ოსერშე უბრალო?

² დედამიწას მსახურებაშ დროს იესოს ჩინებულენდეს თით, ნამდა თინა ჭეშმარიტებას უბრალო, ზუსტ დო გასაგებ ნინათ გინოჩანდჷ შხვეფს (მათ. 7:28, 29). თეგვარო თიქ დომჩინეს, ნამდა მუშ ღურაშ დღა ხოლო მარტივო აბღნიშნითკო.b მორთ, უმოს დეტალურო გუვარჩუათ თე ღონისძიება დო თი საკითხეფ, ნამუთ იესოქ თქუ დო აკეთ. თენა მიმეხვარებნა ქიგებგათ, მუნერ თანდაბალ, გაბედულ დო მოჸოროფე რდუ იესო სინამდვილეს; თეს გეძინელ, თის ხოლო ქობძირუნთ, მუჭო მივაჸუნათ ქრისტეშ მაგალითის.

იესო თანდაბალ რე

3. მუჭოთ მათეშ 26:26—28-ს რე მოშინაფილ, მუნერო აღნიშნჷ იესოქ გოშინაშ ონჯუა დო მუს ასიმბოლოენდჷ ჟირ უბრალო მუდგარენ, ნამუთ თიქ გიმირინუ?

³ იესო მუშ 11 ართგურ მოწაფეწკუმა რდუ, მუჟამსით მუშ ღურაშ გოშინაშ ონჯუა დაწეს. თიქ პასექიშ სუფრაშე გინოსკილადირ ოჭკუმალით მარტივო აღნიშნჷ თე ონჯუა (წეკითხით მათე 26:26—28). თიქ თეშო ღვინ დო უდროჟე ქობალ გიმირინუ. იესოქ მუშ მოქიცულეფს უწუ, ნამდა თე ჟირ ძირითად მუდგარენ ასიმბოლოენდჷ თიშ სრულყოფილ სხეულ დო ზისხირს, ნამდგას მალას მსხვერპლო შეწირენდჷ თინეფიშ საჯგირობუოთ. მოციქულეფს ვა გუკვირდუდეს, ნამდა იესოქ მარტივო აღნიშნჷ თე მნიშვნელოვან მოვლენა. საინტერესო რე, მუშენ?

4. მუჭო მოხვარნა მართაშა მეჩამილ რჩევა თიშ გაგებას, მუშენ აღნიშნჷ იესოქ გოშინაშ ონჯუა მარტივო?

⁴ ქიგიფშინათ, მუქ მოხვად მუსხირენ თუთათ ადრე, იესოშ მსახურებაშ მასმა წანას, მუჟამსით თიქ მუშ ხოლოშიან მეგობრეფს — ლაზარე, მართა დო მარიამს ჸუჩა მიაკითხუ. იესო თინეფს ღორონთიშ სამეფოშ გურშენ ეჩიებუდ. თე დროს მართა სტუმარიშ პატიშ ოცემებელო ოჭკუმალს ამზადენდჷ დო ვამარჩქილუ იესოშა. იესოქ ქოძირ თენა დო ქიმეხვარ მართას თიშ გაგებას, ნამდა აუცილებერ ვა რდუ განსაკუთრებულ ოჭკუმალიშ კეთება (ლუკ. 10:40—42). დრო ხანიშ უკულ, ღურაშახ მუსხირენ საათით ადრე იესოქ პირადო გეგმირინუ მუშ რჩევა. თიქ მარტივო აღნიშნჷ მუშ ღურაშ ონჯუა. მუს მოგურუანა თენა იესოშ გურშენ?

5. ფილიპელეფიშ 2:5—8-შ თანახმათ, მუს მოგურუანა უბრალო ოსერშე იესოშ გურშენ?

⁵ იესო საქმეთ დო სიტყვათ ოძირანდჷ, ნამდა თანდაბალ რდუ. ათეშენ გასაკვირ ვა რე, ნამდა თიქ მუშ ღურაშ წოხოლენ სერს დიდ თანდაბლობა გიმირჩქინ (მათ. 11:29). თის უჩქუდ, ნამდა კაცობრიობაშ ისტორიას არძაშ უდიდაშ მსხვერპლშა მიდეშ; თეშ უკულ იეჰოვა გათელენდჷ დო ზეცას მეფეთ ქუდარნუანდჷ. მარა თეშ უმკუჯინუო, თის ვაკოდ ზედმეტ ყურადღება მიქცუკო დო ვამუთხუ მუშ ღურაშ გოშინა განსაკუთრებულო აღნიშნესკო. თეშ მანგიორო, თიქ მუშ მოწაფეეფს უწუ, ნამდა წანაშე ართშა უბრალო ოსერშეთ აღნიშნესკო თინა (იოან. 13:15; 1 კორ. 11:23—25). უბრალო, მარა შესაფერის ოსერშე ოძირანს, ნამდა იესო ვა რდუ ამაყ პიროვნება. ბედნერეფ ვორეთ, ნამდა ჩქინ ზეციერ მეფეშ ართ-ართ მნიშვნელოვან თვისება თანდაბლობა რე (წეკითხით ფილიპელები 2:5—8).

6. მუჭო შემლებნა მივაჸუნათ იესოშ თანდაბლობაშ მაგალითის განსაცდელეფიშ დროს?

⁶ იესოშ თანდაბლობაშ მაგალითის მივაჸუნუთ, მუჟამსით შხვეფიშ ინტერესეფს ჩქინ დუდიშ წოხოლე ქიგვორინუანთ (ფილ. 2:3, 4). მორთ, კინ დუვართათ იესოშ ღურაშ წოხოლენ სერს. თის უჩქუდ, ნამდა მალას წამებულო დოღურუდ, მარა მუშ ართგურ მოციქულეფიშ მდგომარეობა უმოსო აწუხენდჷ, მუშენდა თიშ ღურათ მანგარო ქელაჭვედეს გურ. ათეშენ ბოლო სერ თინეფწკუმა გატარ, გურშა ქელუკინ დო იმენდჷ გუმანგარ (იოან. 14:25—31). თაშ ნამდა, იესოს მუშ დუდიშ უმოსო შხვეფიშ ჯგირობუა ოინტერესუდ დო თეთ ნამდვილო ჯგირ მაგალით დომტუეს არძას.

იესო გაბედულ რე

7. მუჭო გიმირჩქინ იესოქ გაბედულება?

⁷ ღურაშ გოშინაშ ონჯუაშ დაწესებაშ უკულ, იესოქ დიდ გაბედულება გიმირჩქინ. თიქ ქიდემორჩილ მუშ მუმაშ ნებას, თიშ უმკუჯინუო ნამდა თეშ გურშენ უბადოშ მაკეთებელცალო დასაჯენდეს (მათ. 26:65, 66; ლუკ. 22:41, 42). იესოქ ბოლოშა ართგურქ ქუდოსკიდ დო თეთ განადიდ იეჰოვაშ სახელ, ხუჯ ქუდუკინ თიშ უზენაესობას დო მარადიულ სიცოცხლეშ საშვალება ქიმეჩ თი კათას, მით ინანიენა მუნეფიშ ცოდეფს. თეწკუმა ართო მუშ მიმაჸუნალეფ სირთულეეფშო ხოლო მამზად.

8. ა) მუ უწუ იესოქ მუშ ართგურ მოციქულეფს? ბ) მუჭო გიმირჩქინანდეს გაბედულებას მოწაფეეფ იესოშ ღურაშ უკულ?

⁸ იესოქ გაბედულება თით ხოლო გიმირჩქინ, ნამდა ყურადღება მუშ პრობლემეფ დო ოწუხებელშა ვარინ, მუშ ართგურ მოციქულეფიშ საჭიროებეფშა გეგნიღ. უბრალო ოსერშე, ნამუთ იუდაშ ულაშ უკულ დაწეს, მუშ ცხებულ მიმაჸუნალეფს გაშინანდჷ, ნამდა ახალ შეთანხმებაშ ნაწილ რდეს დო მუ სარგებელს მოუღანდჷ იესოშ დობუნილ ზისხირ (1 კორ. 10:16, 17). იესოქ მუშ მიმაჸუნალეფს უწუ, მუს ითხინდჷ ზეციერ მუმა თინეფშე, ნამდა ართგურო ქუდოსკიდესკო დო იესოწკუმა ართო იმეფესკო ზეცას (იოან. 15:12—15). იესოქ მოციქულეფ თი განსაცდელეფშე ხოლო გაფრთხილ, ნამუთ წოხოლე ელდეს. თეშ უკულ მოუწოდ, ქიმიაჸუნესკო მუშ მაგალითის დო გაბედულება გეგმირჩქინესკო (იოან. 16:1—4ა, 33). წანეფიშ უკულ ხოლო, იესოშ მოწაფეეფ მეჸუნდეს თიშ მაგალითის, დუდგინოდვალირო მსახურენდეს დო გიმირჩქინანდეს გაბედულებას. დიდ მსხვერპლიშ უმკუჯინუო, შხვადოშხვა განსაცდელიშ დროს თინეფ ართიანს ელურდეს (ებრ. 10:33, 34).

9. მუჭო შემლებნა მივაჸუნათ იესოშ მაგალითის გაბედულებაშ გიმორჩქინას?

⁹ ამდღა ხოლო ღორონთიშ მსახურეფ იესოშ მაგალითის მეჸუნა დო გიმირჩქინანა გაბედულებას. მაგალთო, ჩქი მოსაჭირნა გაბედულება, ნამდა ქიმვეხვარათ და დო ჯიმალეფს, მუჟამსით თინეფს რწმენაშ გურშენ თხოზნა. მინშა შილებე ჩქინ და დო ჯიმალეფ მუთუნ ბრალ ვა უღნან თეშ ციხეს ქუდახუნუან. თეცალ დროს, ჩქი ირფელ ოკო გუვაკეთათ, ნამდა ქიდეფცვათ თინეფ (ფილ. 1:14; ებრ. 13:19). გაბედულებას თიმწკუმა ხოლო გიმიფრჩქინანთ, მუჟამსით ვაგრძელენთ „გაბედულო“ ქადაგებას (საქ. 14:3). იესოცალო, ჩქი ხოლო გინოჭყვიდილ მაფნა იფქადაგათ სახიოლო ამბე თიმწკუმა ხოლო, მუჟამსით წინააღმდეგობას შეფხვადუთ. მარა მინშა შილებე ვამბაღან გაბედულებაქ. მუჭო შილებე მიფქცუათ თეცალ დროს?

10. მუ ოკო ვაკეთათ გოშინაშ ონჯუაშ წოხოლენ მარეფს დო მუშენ?

¹⁰ უმოს გაბედულეფ იპჸით, მუჟამსით დეფიფქრებუთ თი იმენდშე, ნამუთ ქრისტეშ მსხვერპლიშ შედეგო მიღნა (იოან. 3:16; ეფეს. 1:7). გოშინაშ ონჯუაშ წოხოლენ მარეფს განსაკუთრებულ შესაძლებლობა მიღნა გეგმოფხანტათ ჩქინ მარდულობა ქრისტეშ მსხვერპლშა. თე დროს, ჩქი პკითხულენთ ბიბლიურ მონაკვეთის, ნამუთ გოშინაშ ონჯუას ოხუ დო ფიფქრენთ თი მოვლენეფშე, ნამუთ ქრისტეშ ღურაწკუმა რე დაკავშირებულ. მუჟამსით ქრისტეშ გოშინაშ ონჯუაშ აღნიშნებელო გეკიბშაყარუთ, უჯგუშო ქიგებგენთ სიმბოლოეფიშ დო თე სიმბოლოეფით წარმოდგენილ მსხვერპლიშ მნიშვნელობას. იმენდის უმოსო გამმანგარენა თიშ გაგება, მუ აკეთეს იესო დო იეჰოვაქ ჩქინ გურშენ დო მუ ჯგირობუა მოუღ თეს ჩქინო დო ჩქინ საჸოროფო კათაშო; თეს გეძინელ, უმოსო ვორეთ აღძრულ ბოლოშა მიფთვინათ დო გეგმიფრჩქინათ გაბედულება (ებრ. 12:3).

11, 12. იესოშ ნამ თვისებეფიშ გურშენ გებგით?

¹¹ გოშინაშ ონჯუა ხვალე ქრისტეშ ძვირფას მსხვერპლის ვარინ, თის ხოლო გუმოშინანა, ნამდა თინა თანდაბალი დო გაბედულ რდუ. მარდულეფ ვორეთ, ნამდა იესო აგრძელენს თე თვისებეფიშ გიმორჩქინას მუჭოთ ჩქინ ზეციერ მეფე, ნამუთ ჩქინ საჯგირობუოთ მოქმედენს (ებრ. 7:24, 25). მარდულობას ვოძირანთ, მუჟამსით მეპჸუნთ იესოშ მითითებას დო ზუსტას თეშ აბღნიშნენთ თიშ გოშინაშ ონჯუას, მუჭოთ დომჩინეს (ლუკ. 22:19, 20). თე ღონისძიებას აბღნიშნენთ წანაშ არძაშ უმოს მნიშვნელოვან დღას, ნამუთ 14 ნისანს უხვადუ.

¹² თე უბრალო ოსერშეშე ხოლო ართ მნიშვნელოვან თვისებაშე ბგებულენთ, ნამუთიქ მეხვარ იესოს დათმუკო მუშ სიცოცხლე ჩქინ გურშენ. თე თვისებათ იჩინედეს იესოს დედამიწას. მუ რდუ თენა?

იესო მოჸოროფე რე

13. მუჭო რე ეჭარილ იეჰოვაშ დო იესოშ ჸოროფა იოანეშ 15:9-ს დო 1 იოანეშ 4:8—10-ის დო მი ღებულენს სარგებელს თინეფიშ ჸოროფაშე?

¹³ იესო ირნერ საქმეს ოძირანდჷ, ნამდა სრულყოფილო მეჸუნდჷ იეჰოვაშ მაგალითის ჸოროფაშ გიმორჩქინას (წეკითხით იოანე 15:9; 1 იოანე 4:8—10). მუთ არძაშ უმოს მნიშვნელოვან რე, თიქ მთელ გურით დათმჷ ჩქინ გურშენ მუშ სიცოცხლე. ცხებულეფ ვორეთ დო ვარ „შხვა შხურიშ“ წარმომადგენლეფ, ჩქინო სარგებელ მოუღ იეჰოვაშ დო იესოშ ჸოროფას, ნამუთ გიშაჸიდირალიშ საშვალებათ გიმირჩქინეს (იოან. 10:16; 1 იოან. 2:2). დეფიფქრათ თი ჟირ მუდგარენშე, ნამდგას გოშინაშ ონჯუას გიმიბრინუანთ; თეთ ხოლო იძირე იესოშ ჸოროფა დო მზრუნველობა. მუშენ შილებე თეშ რაგად?

14. მუჭო გიმირჩქინ იესოქ მუშ მოწაფეეფიშ ჸოროფა?

¹⁴ იესოქ მუშ ცხებულ მიმაჸუნალეფიშ ჸოროფა გიმირჩქინ, მუჟამსით გოშინაშ ონჯუაშ აღნიშნება უბრალო რიტუალით დაწეს. დრო ხანიშ უკულ, ცხებულ მოციქულეფქ გოშინაშ ონჯუა ირ წანას შხვადოშხვა სირთულეეფიშ უმკუჯინუო დო თეწკუმა ართო, პატიმრობაშ დროს ხოლო ოკო აღნიშნესკო (გამოცხ. 2:10). ქეშიალებედესო თინეფს დემორჩილესკო იესოშ მითითებას დო აღნიშნესკო გოშინაშ ონჯუა? მუშო ოკო რაგად, ქო!

15, 16. მუჭო შეიალებუ ნამთინეს გოშინაშ ონჯუაშ აღნიშნებაქ რთულ სიტუაციეფიშ დროს?

¹⁵ პირველ საუკუნეშე მოჸუნაფილ, ჭეშმარიტ ქრისტიანეფ ირნერო ოცადნა აღნიშნან იესოშ ღურაშ დღა. თინეფ ზუსტას თეშ აღნიშნენა თის, მუჭოთ იესოქ დაწეს, თიმწკუმა ხოლო, მუჟამსით სირთულეეფს შეხვადნა. ქობძირათ მუსხირენ მაგალით. ჩინეთიშ ციხეს რდუნ თეშ ჯიმა ჰაროლდ კინგიქ ქრისტეშ გოშინაშ ონჯუა აღნიშნჷ. თიქ ტყობაშე მამზად სიმბოლოეფ. ჯიმა ჰაროლდიქ ირნერო ქეცად გეგმოთვალკო გოშინაშ ონჯუაშ დღა. მუჟამსით თე დღაქ ქუდოდირთ, თიქ ქიბირ, ქილოც დო ბიბლიურ მოხსენება წეკითხჷ საკანს, სოდეთ ხვალე ხედჷ.

¹⁶ მორთ, ხოლო ართ მაგალით გუვარჩუათ. მაჟია მსოფლიო ჩხუპიშ დროს მუსხირენ დაქ დაპატიმრებულ რდუნ თეშ, აღნიშნჷ გოშინაშ ონჯუა; მუშო ოკო რაგად, თინეფქ საფრთხეშა ქინიჸოთეს მუნეფიშ სიცოცხლე. მარა თინეფს შეიალებუეს თიშ აღნიშნებაქ, მუშენდა თეშო ბრელ მუთუნ ვა რდუ საჭირო. თინეფ იჩიებნა: „ჩქი აკოშაყარელო წრეს გივორდით, შკას კუჩხიშ გიოდგუმალ სკამს ჩე ნოჭკერს სიმბოლოეფ გილაძუდ. ოთახის სანთელ მირზუდეს, მუშენდა ჩვეულებრივ სინთეთ შილებე ქოუძირუდითკო. . . . ჩქი მუსხირენშა გუმეორით ჩქინ პირობა ზეციერ მუმას, ნამდა მთელ ჩქინ ძალას თიშ წმინდა სახელიშ განსადიდებელო გეგმიბრინუანდით“. ნამდვილო, თე დალეფქ დიდ რწმენა გიმირჩქინეს. მუშო ოკო რაგად, იესოქ დიდ ჸოროფა გიმირჩქინ, მუშენდა თიშ გოშინაშ ონჯუაშ აღნიშნება რთულ სიტუაციეფიშ დროს ხოლო რე შეიოლებერ.

17. მუ კითხვეფშე ოკო დეფიფქრათ?

¹⁷ მალას ქრისტეშ ღურაშ გოშინაშ ონჯუას აბღნიშნენთ, ათეშენ ჯგირ იჸუაფ ქოპკითხათ ჩქინ დუც: მუჭო შემლებ მივაჸუნე იესოშ მაგალითის ჸოროფაშ გიმორჩქინას? ჩქიმ დუდიშ უმოსო ქოფიფქრენქო და დო ჯიმალეფიშ საჭიროებეფშე? ბრელს ხომ ვეფთხინქ თინეფშე დო ქიფთვალისწინენქო თინეფიშ შესაძლებლობეფს? მორთ, ირიათო ქიმვაჸუნათ იესოშ მაგალითის დო გურშა მიბღათ შხვეფიშ მდგომარეობა (1 პეტ. 3:8).

ვეგიბჭყოლიდუათ თინა, მუთ იესოქ დუმოგურუეს

18, 19. ა) მუშა შემლებნა ვორდათ დარწმუნებულ? ბ) მუ ოკო მაფდან გინოჭყვიდილ?

¹⁸ ქრისტეშ ღურაშ გოშინაშ აღნიშნება ირიათო ვეჸუაფ საჭირო. დიდ გაჭირებაშ დროს, მუჟამსით იესო გაკოშაყარანს დედამიწას დოსკილადირ „მუშ გიშაგორილეფს“ დო ზეცაშა მიდეჸონანს, გოშინაშ ონჯუაშ აღნიშნება მეჭყორდუ (1 კორ. 11:26; მათ. 24:31).

¹⁹ შემლებნა დარწმუნებულ ვორდათ, ნამდა იეჰოვაშ ხალხის დღას ვა გაჭყორდუ თე უბრალო ოსერშე, ნამდგაშ დაწესებათ იესოქ დიდ თანდაბლობა, გაბედულება დო ჸოროფა გიმირჩქინ. თიმ დროს თინეფ, მით ოსწრუდ თე მნიშვნელოვან მოვლენას, შხვეფს ქეჩიებნა თეშ გურშენ. მარა სარგებელ ამდღარშე მიბღათინ, საჭირო რე მივაჸუნათ ქრისტეშ თანდაბლობაშ, გაბედულებაშ დო ჸოროფაშ მაგალითის. თაშ ქიმიფქციებუთ-და, მიბღენთ ჯილდოს, ნამდგას იეჰოვა მოპირნა (2 პეტ. 1:10, 11).