დაფასით ქორწინებაშ ძღვინ
„ათეშენ, მით ღორონთიქ შეაუღლჷ, კოჩიქ ვა დაშორას თინეფ„ (მარ. 10:9).
1, 2. მუშა მომწოდენა ებრაელეფიშ 13:4?
ჩქი არძას მოკონა განვადიდათ იეჰოვა, მუშენდა თინა იმსახურენს თეს. მუჟამსით თაშ ქიმიფქციებუთ, ღორონთ მოპირნა, ნამდა ჩქი ხოლო დუმაფასენა (1 სამ. 2:30; იგავ. 3:9; გამოცხ. 4:11). ღორონც ოკო შხვეფწკუმა ხოლო გიმიფრჩქინათ პატიცემა, მაგალთო მთავრობაშ წარმომადგენელეფწკუმა (რომ. 12:10; 13:7). მარა რე ხოლო ართ მნიშვნელოვან საკითხ, სოდეთ საჭირო რე განსაკუთრებულ პატიცემაშ გიმორჩქინა. თენა რე ქორწინება.
2 მოციქულ პავლექ თქუ: „არძაშ ქორწინება ღირსეულ რდას დო ჩილ დო ქომონჯიშ დანჯირუ წმინდა“ (ებრ. 13:4). პავლეს ზოგადო ვა უჩიებინ ქორწინებაშე. თიქ ქრისტიანეფს მოუწოდ, დაფასესკო ქორწინება დო ძვირფასო მირჩქინესკო თინა. თქვა ხოლო თაშ უჯინეთო თე საკითხის? დაქორწინებულ ქორეთ-და, ქაფასენთო განსაკუთრებულო თქვან ქორწინებას?
3. მუ მნიშვნელოვან რჩევა მუჩეს იესოქ ქორწინებაშენ? (ქოძირით სურათ მა-10 გვერდის).
3 ქორწინებას ქაფასენთ-და, იესოშ მაგალითის მეჸუნთ, ნამუთ აფასენდჷ ქორწინებას. მუჟამსით ფარისეველეფქ იესოს ჩათხიებაშ გურშენ კითხეს, თიქ ღორონთიშ სიტყვეფ მიშინუ, ნამუთ პირველ ქორწინებაშ დროს თქუ: „ათეშენ მიოტენს კოჩ მუმას დო დიდას დო ჟირ ართ ხორც იჸუაფნა“. თეშ უკულ იესოქ გეუძინ: „მით ღორონთიქ შეაუღლჷ, კოჩიქ ვა დაშორას თინეფ“ (წეკითხით მარკოზი 10:2—12;a დაბ. 2:24).
4. მუ რდუ იეჰოვაშ განზრახვა ქორწინებაწკუმა დაკავშირებით?
4 თეგვარო იესო აღიარენდჷ, ნამდა ქორწინება ღორონთიშ გოჭყაფილ რდუ დო თინა მუდმივ კავშირ რე. ღორონც ადამ დო ევაშა ვა უთქუალ, ნამდა თინეფს ჩათხიება შეულებდეს. თიშ განზრახვა რდუ, ჟირ პიროვნებაშ კავშირ მუდმივ ჸოფედკო.
ცვლილებეფ ქორწინებას
5. მუჭო მოქმედენს ღურა ქორწინებაწკუმა?
5 მიჩქნა, ნამდა ადამიშ შეცოდებაშ უკულ ბრელ მუდგარენქ დითირ. ართ-ართ ფაქტორ რე ღურა, ნამუთ მოქმედენს ქორწინებაწკუმა. თენა იძირე მოციქულ პავლეშ სიტყვეფშე, ნამდა ქრისტიანეფ ვაქვემდებარნა მოსეშ კანონს. თინა იჩიებ, ნამდა ღურა ქორწინებაშ შეთანხმებას აუქმენს, მუთ თის ნიშნენს, ნამდა შეულებ ახალაშო დექორწინას (რომ. 7:1—3).
6. მუჭო იძირე მოსეშ კანონშე ღორონთიშ თვალსაზრის ქორწინებაშენ?
6 ისრაელეფშა მეჩამილ ღორონთიშ კანონს მოშინაფილ რდუ დეტალეფ, ნამუთ ქორწინებას ოხუდ. კანონით დაშვებულ რდუ მუსხირენ ოსურიშ მოჸუნაფა. თე წეს-ჩვეულება თეიშახ რდუ გავრცელებურ, სოიშახ ღორონთ ისრაელეფს კანონს მეჩანდჷ. მარა თე კანონ უფლებას ვარზენდჷ ისრაელეფს გლახათ მექცისკო ოსურეფს დო ბაღანეფს. მაგალთო, ისრაელ კოჩი ოსურო მონას ქიმიჸონანდჷ დო ჭიჭე ხანიშ უკულ კინ დექორწინებუდ-და, თიქ ვემიოტუკო ოკო პირველ ოსურიშ ეჯუმაფა დო შეასრულკო ოკო ჩილ დო ქომონჯურ მოვალეობა. ღორონთიშ მოთხოვნა რდუ, ნამდა ქომონჯიქ დეცვუკო დო ქემინჯუკო თის (გამ. 21:9, 10). ამდღა ჩქი ვა მოვალნა მოსეშ კანონიშ დაცვება, მარა თავრეშე ჯგირო იძირე, მუ თვალსაზრის უღჷ იეჰოვას ქორწინებაშენ, მუთ მიმეხვარებნა დუვაფასათ თინა.
7, 8. ა) მუ ჭარჷ კანონიშ 24:1-ს ჩათხიებაშ გურშენ? ბ) მუ შეხედულება უღჷ ღორონც ჩათხიებაშ გურშენ?
7 მუ ჭარუდ კანონს ჩათხიებაშ გურშენ? მუშო ოკო რაგად, იეჰოვა ირიათო აფასენდჷ ქორწინებას, მარა თიქ დუშვჷ ჩათხიება (წეკითხით კანონი 24:1).b ისრაელ კოჩის შეულებუდ ჩეთხინუკო ოსურ, „მუდგაინ უწესოს“ ქახვილუანდ-და. კანონს ენწყუმილ ვარდჷ, მუ ითვალუდ უწესობათ. თენა შილებე საონჯღორო ვარდა უმოს სერიოზულ საქციელ ჸოფედკო დო ვართ ხოლო უბრალო მუდგარენ (კან. 23:14). სანარღოთ, იესოშ დროს ბრელ იუდეველ „ირნერ მიზეზით“ ეთხიებუდ მეუღლეს (მათ. 19:3). მუშო ოკო რაგად, ჩქი დღას ოკო ვემიფქცუათ თინეფცალო.
8 წინასწარმეტყველ მალაქიაშ დროს ხშირას ქომოლკოჩეფ ითხინუანდეს მუნეფიშ „ახალგაზრდობაშ ოსურს“, უმოს ახალგაზრდა ქიმიჸონესკონ თიშენ, ნამუთ ვამსახურუდ იეჰოვას. მარა მალაქიაქ მიშინუ ღორონთიშ თვალსაზრის ჩათხიებაშ გურშენ. თიქ ჭარჷ: „ბჯოგ ჩათხიება“ (მალ. 2:14—16). ღორონთიშ შეხედულება ქორწინებაწკუმა დაკავშირებით ვათირე. პირველ წყვილიშ გოჭყაფაშ დროს თიქ თქუ: „ქუმკაჭაბუ [კოჩ] ოსურს დო ართ ხორც იჸუაფნა“ (დაბ. 2:24). იესო ხუც უკინენდჷ მუშ ზეციერ მუმაშ თვალსაზრისის, მუთ თე სიტყვეფშე იძირე: „მით ღორონთიქ შეაუღლჷ, კოჩიქ ვა დაშორას თინეფ“ (მათ. 19:6).
ჩათხიებაშ ხვალე ართ მიზეზი
9. მუჭო შილებე იესოშ სიტყვეფიშ გაგება, ნამუთ მარკოზიშ 10:11, 12-ს ინოჭარ?
9 შილებე მიდგაინს გურჩქინდას კითხვაქ: მუ შემთხვევას შეულებ ქრისტიანს ჩათხიება დო ახალაშო დაქორწინება? იესოქ ჩათხიებაშ გურშენ თქუ: „მით ოსურს ითხინუანს დო შხვა მოჸუნს ოსურო, თიშ წინააღმდეგ მრუშენს. დო ოსურ ქომონჯის დეთხიებუნ უკულ შხვას მიდაჸუნ-და, მრუშენს“ (მარ. 10:11, 12; ლუკ. 16:18). არგამა რე, იესო აფასენდჷ ქორწინებას დო ოკოდ შხვეფქ ხოლო თაშ მიქცისკო. კოჩ ვარდა ოსურ, ნამუთ დეთხიებუდ მუშ ართგურ მეუღლეს დო შხვაშა დექორწინებუდ, მრუშენდჷ. ჩათხიებათ ქორწინება ვეთებუ, მუშენდა ღორონთიშ თოლს თინეფ იშენით „ართ ხორც“ რენა. თეს გეძინელ, იესოქ თქუ, ნამდა კოჩ, ნამუთ მუშ ოსურს ეთხიებუდ, მრუშობაშ მიზეზის არზენდჷ თის. მუშენ შილებე თეშ რაგად? ჩათხიებაშ უკულ ოსურს შილებე ფინანსურო გუჭირდას დო დაქორწინება გინოჭყვიდას. თეცალ დაქორწინება იგივე მრუშობარე.
10. მუ მიზეზით შეულებ ქრისტიანს ჩათხიება დო ახალაშო დაქორწინება?
10 იესოქ მიშინუ მიზეზი, ნამუთ ჩათხიებაშ საფუძველს ირზენს: „გირადაგუთ: ქომონჯ ოსურს სიძვაშ [პორნია] მიზეზიშ უმშო ქითხინუანს დო შხვა ქუმოჸუნს-და, მრუშენს“ (მათ. 19:9). თე აზრი თიქ გვალას ქადაქებაშ დროს ხოლო თქუ (მათ. 5:31, 32). ჟირხოლო შემთხვევას იესოქ სექსუალურ უზნეობა მიშინუ, ნამდგაშა მიშმურს სიძვა, პროსტიტუცია, დაუქორწინებელ პიროვნებეფ შკას სექსუალურ ურთიერთობა, ჰომოსექსუალიზმი დო ზოოფილია. მაგალთო, კოჩ სექსუალურ უზნეობას ჩედინენს-და, ოსურს უფლება უღჷ ჩეთხუას. ჩათხიებაშ შემთხვევას ღორონთიშ თოლს თინეფიშ ქორწინება ძალას ოდინუანს.
11. მუშენ შილებე ქრისტიანქ საფუძვლიან მიზეზიშ უმკუჯინუო გინოჭყვიდას ვედეთხუას მეუღლეს?
11 ყურადღება ქიმიაქცით, ნამდა იესოს ვა უთქუალ, დაქორწინებულ პიროვნება სექსუალურ უზნეობას (პორნია) ჩედინენდ-და, თიშ მეუღლექ აუცილებერო დეთხუკო ოკო თის. ოსურს შეულებუდ ქუდოსკიდკო მუშ ქომონჯწკუმა, თიშ უმკუჯინუო, ნამდა თიქ სიძვა ჩედინ. შილებე თის უჸორდჷ თინა, მზათ რდუ ქაპატუკო დო გერიგკო თის. სინამდვილეს, ჩათხიებაშ უკულ კინ ვედექორწინებუდ-და, თიქ შილებე პრობლემეფს ქეშეხვადკო. მაგალთო, მუჭო მერიებუდ ფინანსურ პრობლემეფს, სექსუალურ მოთხოვნილებეფს, ხვალახობას დო ბაღანეფიშ რდუალას? ხომ ვა გუჭირდუდ მორდუკო თინეფ ჭეშმარიტებას? (1 კორ. 7:14). არგამა რე, ნამდა თეცალ დროს მეუღლე სერიოზულ სირთულეეფს ქეშეხვადუდ.
12, 13. ა) მუ პრობლემას შეხვად ოსიაქ ქორწინებას? ბ) მუშენ დირთინუ ოსიაქ გომერი დო მუს ბგურაფლენთ თავრეშე?
12 წინასწარმეტყველ ოსიაშ მაგალითშე იძირე, მუჭო უჯინე იეჰოვა ქორწინებაშ საკითხის. ღორონთიქ ოსიას უწუ, ოსურო ქუმუჸუნაფუდკო გომერი, ნამუთ „გერყვნებუდ დო გარყვნილებათ გეიორჩქინანდჷ სქუალეფს“. გომერქ „დეორსულ დო გეიორჩქინ სქუა“ (ოს. 1:2, 3). თეშ უკულ, გარყვნილებათ ხოლო ქეშეძინ ძღაბიქ დო ბოშიქ. თიშ უმკუჯინუო, ნამდა გომერი აგრძელენდჷ გარყვნილ ცხოვრებას, ოსიას ვა ჩუთხინუაფ თინა. საბოლათ თიქ ქიდიტუ ოსია დო მონათ გინირთჷ, მარა ოსიაქ თინა კინ დირთინუ (ოს. 3:1, 2). იეჰოვაქ ოსიაშ მაგალით თიშ ოძირაფალო გიმირინუ, ნამდა მზათ რდუ ქაპატუკო ისრაელს მუნეფიშ ცოდეფ. მუშ გურაფა შემლებნა თე მაგალითშე?
13 დაქორწინებულ ქრისტიან უზნეობას ჩედინენს-და, თიშ მეუღლე გადაწყვეტილებაშ მეღებაშ წოხოლე ქიგედირთუ. იესოქ თქუ, ნამდა ბრალ ვა უღუნ ფერ მეუღლეს თეცალ დროს შეულებ ჩეთხუას მეუღლეს დო შხვაშა დექორწინას. მარა თის შეულებ ქაპატუას მეუღლეს დო ვართ თენა იჸუაფუდ არასწორ. მაგალთო, ოსიაქ ქაპატუ მუშ ოსურს. თიშ უკულ მუთ ოსიას დართჷ, გომერქ მიოტუ უზნეო ცხოვრებაშ წესი. გარკვეულ პერიოდის ოსიას მუთუნნერ ურთიერთობა ვა უღუდ გომერწკუმა (ოს. 3:3). მარა დრო ხანიშ უკულ, ალბათ გაგრძელენდჷ ჩილ დო ქომონჯურ ურთიერთობას მუშ ოსურწკუმა. თენა თის განასახიერენდჷ, ნამდა ღორონთ მზათ რდუ, დირთინუკო მუშ ხალხ დო გაგრძელკო თინეფწკუმა ურთიერთობა (ოს. 1:11; 3:3—5). მუს ბგურაფლენთ თე მაგალითშე? ბრალ ვა უღუნ ფერ მეუღლექ გეგნოჭყვიდ ჩილ დო ქომონჯურ ურთიერთობაშ გაგრძელება-და, თენა თიშ მაძირაფალ რე, ნამდა თიქ ქაპატუ მუშ მეუღლეს (1 კორ. 7:3—5). თეშ უკულ ჩათხიებაშ საფუძველ ვა არსებენს, ათეშენ ჟირხოლოქ ეცადას ოკო, ქორწინებას იეჰოვაშ თოლით უჯინან.
დაფასით ქორწინება სირთულეეფიშ დროს ხოლო
14. მუჭოთ 1 კორინთელეფიშ 7:10, 11-ის ჭარჷ, მუქ შილებე მოხვადას?
14 იეჰოვა დო იესოცალო არძა ქრისტიანქ ოკო დაფასას ქორწინება. მარა არასრულყოფილეფ ვორეთინ თიშენ, თეშ კეთება ირიათო ადვილ ვა რე (რომ. 7:18—23). ათეშენ ჩქი ვამკვენა, ნამდა პირველ საუკუნეშ ქრისტიანეფს ხოლო უღდეს პრობლემეფ ქორწინებას. პავლექ ჭარჷ: „ოსურქ ვეჩეთხუას ქომონჯის“. მარა მინშა მოხვადუ თეცალ შემთხვევა (წეკითხით 1 კორინთელები 7:10, 11).c
სირთულეეფიშ უმკუჯინუო, მუჭო შილებე ქორწინებაშ შენარჩუნება? (ქოძირით აბზაცი 15)
15, 16. ა) ქორწინებას პრობლემეფიშ უმკუჯინუო, მუ ოკო რდას დაქორწინებულეფიშ მიზან დო მუშენ? ბ) მუჭო შილებე იგივე პრინციპეფიშ გათვალისწინება რელიგიურო გორთილ ოჯახის?
15 პავლეს კონკრეტულო ვა უთქუალ, მუქ შილებე ცალკე ცხოვრებაშ მიზეზიქ იჸუკო. მუშო ოკო რაგად, თენა ვეჸუაფუდ სექსუალურ უზნეობა, მუ დროსით ოსურს უღჷ ჩათხიებაშ დო კინ დაქორწინებაშ საფუძველ. პავლექ ჭარჷ, ნამდა ოსურქ, ნამუთ ცალკე ცხოვრებას გინოჭყვიდუნდჷ ოკო ვეგეთხუკო, ვარდა მუშ ქომონჯის გერიგუკო. თინეფ იეჰოვაშ თოლს იშენით ჩილ დო ქომონჯო ითვალუდეს. პავლექ ელუჩ ქრისტიანეფს, ნამდა მუდგანერ პრობლემაქ ვა მოხვადკონ, სექსუალურ უზნეობა ვარდჷ ჩადენილ-და, თინეფიშ მიზან შერიგა ოკო რდუკო. წყვილქ თეცალ დროს კრებაშ უხუცესეფს ოკო ქოთხუას მოხვარა. უხუცესეფქ ნამთინიშ მხარე ოკო ვედეკინან დო ბიბლიაშე პრაქტიკულ რჩევეფ ქიმეჩან.
16 რელიგიურო გორთილ ოჯახის შილებე უმოს პრობლემეფქ ქირჩქინას დუდი. მარა ქიჸუაფუდუო ცალკე ცხოვრება გამოსავალ პრობლემეფიშ დროს? ბიბლიას ჭარჷ, ნამდა ჩათხიებაშ საფუძვლიან მიზეზ სექსუალურ უზნეობა რე, მარა თინა მუთუნს ვეჩიებ ცალკე ცხოვრებაშ მიზეზეფშენ. პავლექ თქუ: „ოსურს ურწმუნო ქომონჯ ქოჸუნს დო თე კოჩ თანახმა ქორე თიწკუმა იცხოვრას-და, ვემიოტუას ქომონჯი“ (1 კორ. 7:12, 13). თე სიტყვეფ ამდღა ხოლო რე ძალას.
17, 18. პრობლემეფიშ უმკუჯინუო, მუშენ შილებე ნამთინე ქრისტიანქ გინოჭყვიდას, ვედეთხუას მეუღლეს?
17 რე შემთხვევეფ, მუჟამსით „ურწმუნო ქომონჯი“ თეშ იქციებ, ნამდა თიწკუმა ართო ცხოვრება მანგარ რთულ რე. შილებე მოძალადე რდას დო ოსურიშ ჯამრთელობას ზიანს მიორინუანდას ვარდა თიშ სიცოცხლეს საფრთხეს უქმნენდას; თეს გეძინელ, ვა ზრუნენდას მატერიალურო ვარდა ოცილდას თიშ სულიერობას. თეცალ შემთხვევეფს ნამთინე ქრისტიან პირადო გინოჭყვიდუნს, ქიდოსკიდას, დო ვარ ცალკე იცხოვრას. მარა შხვა ქრისტიანეფს შილებე თეშე უმოს სირთულეეფ უღდან, მარა გინოჭყვიდან ვეცხოვრან ცალკე დო ეცადან გაუჯგუშან ურთიერთობეფ. მუშენ შილებე თაშ გინოჭყვიდან?
18 ცალკე ცხოვრებაშ უმკუჯინუო თინეფ იშენით ჩილ დო ქომონჯო ითვალუნა. მუჭოთ ჟიშე მიფშინეთ, ცალკე ცხოვრებაშ დროს ჟირხოლოს პრობლემეფ აღვენუნა. მოციქულ პავლექ შხვა მიზეზ ხოლო მიშინუ, მუდგაშენ ოკო დოსკიდან ართო. თიქ ჭარჷ: „ურწმუნო ქომონჯი ოსურიშ საშვალებათ გენიწმინდებ დო ურწმუნო ოსურ გენიწმინდებ ჯიმაშ საშვალებათ. შხვანერო, თქვან სქუალეფ უწმინდურეფ იჸუაფდეს, მარა ასე წმინდეფ რენა“ (1 კორ. 7:14). ბრელ ართგურ ქრისტიან სკიდუ ურწმუნო მეუღლეწკუმა რთულ პრობლემეფიშ დროს ხოლო. თინეფს შეულებნა დადასტურან, ნამდა პრობლემეფიშ გარზება ღირუდ თიშო, მუნეფიშ მეუღლეეფქ ჭეშმარიტ თაყვანიშმცემლეფო გინირთესკო (წეკითხით 1 კორინთელები 7:16;d 1 პეტ. 3:1, 2).
19. მუ რე თიშ მიზეზ, ნამდა ქრისტიანულ კრებას ბრელ ბედნერ წყვილ რე?
19 იესოქ ჩათხიებაშ გურშენ მუჩეს რჩევა; პავლე მოციქულქ ცალკე ცხოვრებაშ გურშენ. ჟირხოლოს ოკოდ ღორონთიშ მსახურეფქ დაფასესკო ქორწინება. ამდღა მთელ მსოფლიოს ქრისტიანულ კრებეფს ბრელ ბედნერ წყვილეფ პჸუნა. თქვან კრებეფს ხოლო იჸუაფნა თიცალ წყვილეფ, მიდგას უჸორა დო აფასენა ართიანს. ჩქი მოხიოლნა, ნამდა მილიონობით ართგურ მსახურ ამართლენს ბიბლიას ინოჭარილ სიტყვეფს: „ათეშენ მიოტენს კოჩ მუმას დო დიდას, ქუმკაჭაბუ ოსურს დო ჟირ ართ ხორც იჸუაფნა“ (ეფეს. 5:31, 33).
a მარკ. 10:2—12: 2 ქიმერთეს თიშა ფარისეველეფქ დო მიოჩილითაფარო კითხეს, ქორდჷ დო ვარ დაშვებულ ოსურიშ ჩათხიება. 3 თიქ კითხჷ: „მუ მერჩეს მოსექ მცნებათ?“. 4 „მოსექ ჩათხიებაშ მოწმობაშ ჭარუაშ დო ჩათხიებაშ ნება მუჩეს“, — უპასუხეს თინეფქ. 5 იესოქ თინეფს უწუ: «თიქ თქვან უგურობაშ გურშენ გიჭარეს თე მცნება. 6 შემოქმედებაშ დაჭყაფუს ღორონთიქ „კოჩო დო ოსურო გაჭყჷ თინეფ“. 7 ათეშენ მიოტენს კოჩ მუმას დო დიდას 8 დო ჟირ ართ ხორც იჸუაფნა“. თაშ ნამდა, თინეფ უკვე ჟირ ვარინ, ართ ხორც რენა. 9 ათეშენ, მით ღორონთიქ შეაუღლჷ, კოჩიქ ვა დაშორას თინეფჷ». 10 თე საკითხშენ მოწაფეეფქ კინ ქოკითხეს ჸუდეს. 11 თიქ უწუ თინეფს: „მით ოსურს ითხინუანს დო შხვა მოჸუნს ოსურო, თიშ წინააღმდეგ მრუშენს. 12 დო ოსურ ქომონჯის დეთხიებუნ უკულ შხვას მიდაჸუნ-და, მრუშენს“.
b კან. 24:1: კოჩ ოსურს ქიმიჸონანს დო თიშ მინჯეთ გინირთუ, მარა უკულ ვემეწონებ, მუშენდა მუდგარენ უწესოს ქახვილუანს-და, დოუჭარას ჩათხიებაშ მოწმობა, ხეს ქიდაკინუას დო გოუტუას ჸუდეშე.
c 1 კორ. 7:10, 11: 10 დაქორწინებულეფს მითითებას ვარზენქ — თუმცა მა ვარინ, უფალ — ნამდა ოსურქ ვეჩეთხუას ქომონჯის, 11 მარა ჩეთხუ-და, ვეგეთხუას, ვარდა ქომონჯის გერიგას. ვართ ქომონჯიქ მიოტუას ოსურ.
d 1 კორ. 7:16: მუ გიჩქჷ სი, ოსურ, ეგებ ირსხე სქან ქომონჯი? ვარდა მუ გიჩქჷ სი, ქომონჯი, ეგებ ირსხე სქან ოსურ?