გურშა მიღით არძანერ ხალხიშ გაჭირება

მუჟამსით იესო მოწაფეეფს ქადაქებას ოგურუანდუნ, თის უჩქუდ, ნამდა სახიოლო ამბეს სამეფოშ გურშენ არძა ვემირჩქილუანდჷ (ლუკ. 10:3, 5, 6). მინშა ჩქი ხოლო შეფხვადუთ თიცალ კათას, მით უხეშ პასუხის მარზენა. ათეშენ შილებე გამჭირდან გურშა მიბღათ თინეფიშ გაჭირება, მიდგას ვუქადაქუთ.

პიროვნება, მიდგას შხვეფიშ გაჭირება გურშა მეუღუნ, ორწყე, მუ აწუხენს დო მუ პრობლემეფ უღჷ შხვეფს, მიშურს მდგომარეობაშა დო ოკო თინეფიშ მოხვარა. შხვეფიშ გაჭირება გურშა ვემიბღით-და, შილებე მივოტუათ გურგედვალირო ქადაქება დო ჩქინ მსახურებას ჯგირ შედეგეფქ ვა მაჸუნას. გურგედვალირ ქადაქება შილებე დაჩხერს შევადარათ; დაჩხერქ ვაშკირტასინ, საჭირო რე ბრელ ჟანგბად. თეგვარო, უმოს გურგედვალირო იფქადაქუთ, მუჟამსით გემშურთ თინეფიშ მდგომარეობაშა, მიდგას ვუქადაქუთ (1 თეს. 5:19).

მუჭო შემლებნა გურშა მიბღათ შხვეფიშ გაჭირება, თიმწკუმა ხოლო, მუჟამსით თეშ კეთება ადვილ ვა რე? მორთ, გუვარჩუათ იეჰოვაშ, იესოშ დო მოციქულ პავლეშ მაგალითეფ, ნამუთ მიმეხვარებნა თეშ კეთებას.

მიაჸუნით იეჰოვაშ მაგალითის

ანთასობით წანა რე, იეჰოვა ითვინენს მუშ სახელიშ ლანძღუას. მარა თინა იშენით „ჯგირო ოქცუ უმარდულეფს დო უბადოეფს“ (ლუკ. 6:35). ღორონთიშ სიჯგირა ჯგირო იძირე თიშ მოთვინებაშე. თის ოკო არძანერ ხალხიქ გინასკიდას (1 ტიმ. 2:3, 4). მართალ რე, ღორონც ჯოგ უბადობა, მარა თიშო ძვირფას რე ხალხიშ სიცოცხლე დო ვაკო მითინიშ ღურა (2 პეტ. 3:9).

იეჰოვას ჯგირო არჩქილე, ნამდა სატანა გონებას ურიენს ურწმუნო კათას (2 კორ. 4:3, 4). ბრელს ბაღანობაშე ოგურუანა ღორონთიშ გურშენ ტყურა გურაფეფს, ათეშენ თინეფს უჭირა ჭეშმარიტებაშ გაგება. იეჰოვას მანგარო ოკო ქიმეხვარას თეცალ კათას. სოვრეშე მიჩქნა თენა?

ქიგიფშინათ, მუჭო უჯინედ იეჰოვა ნინეველეფიშ სიტუაციას. თინეფ გლახა საქმეეფს ორთუდეს, მარა იეჰოვაქ იონას უწუ: „მა თეშმადიდა ქალაქ, ნინევე ხომ ოკო ქიდემდიკო, სოდეთ 120 000-შე მეტ კოჩ ცხოვრენს, ნამდგას მარძგვან ხე კვარჩხანშე ვეგშაგორე“ (იონ. 4:11). იეჰოვას ოცოდუდ ნინეველეფ, მუშენდა ვა უჩქუდეს ჭეშმარიტება, ათეშენ თინეფიშ გაფრთხილეფშა იონა მიდაშქვჷ.

იეჰოვაცალო, ჩქინო ხოლო ძვირფას რე ხალხიშ სიცოცხლე. ათეშენ მორთ, მივაჸუნათ იეჰოვაშ მაგალითის დო შურდოგურით ვეცადათ, ქიმვეხვარათ ჭეშმარიტებაშ გაგებას თინეფს ხოლო, მიდგაშე ფიფქრენთ, ნამდა ვემირჩქილუანა.

მიაჸუნით იესოშ მაგალითის

მუშ ზეციერ მუმაცალო, იესოს ხოლო ოცოდუდ ხალხ, მიდგას სულიერ მოხვარა ოსაჭირუდ. ბიბლიას ჭარ: „ხალხის ორწყედუნ, გურს ონტუდ თინეფიშ გურშენ, მუშენდა უჭყიშო შხურცალო ძალა გიშალიებურ დო მიკოცუმილ რდეს“ (მათ. 9:36). იესოს არჩქილედ, მუშენ რდეს თინეფ თეცალ მდგომარეობას. თეშ მიზეზ რელიგიურ ლიდერეფ რდეს, მით გლახათ ოქცუდეს ხალხის დო ღორონთიშ გურშენ ტყურას ოგურუანდეს. იესოს უჩქუდ, ნამდა ბრელ, მით თის ურჩქილედუნ, შხვადოშხვა მიზეზიშ გურშენ ვემიაჸუნუდ თის, მარა იშენით ბრელ მუთუნს ოგურუანდ თინეფს (მარ. 4:1—9).

მუჟამსით მსახურებას ხალხ ვამრჩქილენან, ოკო დეფიფქრათ, მუ შილებე რდას თეშ მიზეზი. შილებე თინეფს გლახა წარმოდგენა უღდან ბიბლიაშე დო ქრისტიანეფშე, მუშენდა ნამთინე, მით დუც ქრისტიანო აცხადენს, გლახათ იქციებ. შხვეფს შილებე ჩქინ რწმენაშ გურშენ სწორ ვარენ ფერ ინფორმაცია უღდან. ნამთინეს ოშკურ, ნათესეფ ვარდა შხვეფიშ გოძიცაშა.

მინშა აგრესიულ ხალხის შეფხვადუთ, მუშენდა თინეფს გაჭირება აფნა ნაძირეფ დო ემოციურო განადგურებულ რენა. ართ მისიონერ და, კიმ იჩიებ: „ჩქინ ტერიტორიას ბრელ თიცალ პიროვნება ცხოვრენს, მიდგაქ ჩხუპიშ დროს, მუთ ქუღუდესინ, ირფელ მიოდინეს. თინეფს მუთუნიშ იმენდი ვა უღნა. მანგარ გაღიზიანებულ დო გურგოტახილ რენა. თაქ ხშირას შეფხვადუთ წინააღმდეგობას. ართშა ქადაქებაშ დროს ართ მობინადრექ ფიზიკურ შეურაცხყოფა მიმორინუ“.

თე ირფელიშ უმკუჯინუო, მუჭო მეუღუდ თის გურშა შხვეფიშ გაჭირება? კიმ იჩიებ: «მუჟამსით გლახათ მოქცუნან, იგავეფიშ 19:11-ის ინოჭარილ სიტყვეფს იფშინანქ: „გონიერება რისხუას აჩერენს“. მიჩქჷ, მუ აფჷ გინნაღელ თი კათას, მიდგას ჩქიმ ტერიტორიას შეფხვადუქ; თენა მოხვარ, გურშა მიბღე თინეფიშ გაჭირება. თაქ თიცალ კათას ხოლო შეფხვადუთ, მიდგას ოინტერეს ჩქინ რჩქილა დო მუსხირენ მეკითხირ ხოლო მიღნა».

შილებე ჩქინ დუც ქოპკითხათ: მუნერ რეაქცია მაღვენუდ სახიოლო ამბეშ მორჩქილაფაშ დროს, თი პიროვნებაშ ადგილს ქუვორდე, მიდგას ვუქადაქუქ? მაგალთო, მუჭო მიფქციებუდით, იეჰოვაშ მოწმეეფიშ გურშენ ირიათო ტყურა ინფორმაცია ქუმარჩქილედეს-და? თეცალ შემთხვევას, ალბათ ჩქი ხოლო უარყოფით რეაქცია მაღვენუდეს დო საჭირო იჸუაფუდ, შხვეფქ ჩქინ გაჭირება გურშა მიღესკო. იესოქ თქუ, ნამდა თეშ მივექცუათ შხვეფს, მუჭოთ შხვეფქ მოკონა მიმექცუან ჩქი. თაშ ნამდა, ირნერო ვეცადათ, ქუგუგათ შხვეფს დო მოთვინება გეგმიფრჩქინათ თიმწკუმა ხოლო, მუჟამსით თეშ კეთება ადვილ ვა რე (მათ. 7:12).

მიაჸუნით პავლეშ მაგალითის

მოციქულ პავლეს გურშა მეუღუდ თინეფიშ გაჭირება, მით ოწინააღმდეგუდ ქადაგებაშ დროს. თის ვაგოჭყოლად მუშ ულირ ცხოვრება. პავლე იჩიებ: „მართალ რე, ადრე ღორონც ვოგორანდჷ, თიშ ხალხის ფთხოზუდ დო ბლანძღუნდჷ. მარა ღორონთიქ ქეშემცოდილუ, მუშენდა ურჩქინჯობა დო ურწმუნოება მოკეთებაფუანდ თეს“ (1 ტიმ. 1:13). პავლე აღიარენდჷ, ნამდა იეჰოვაქ დო იესოქ თიშ ჭყოლოფა გიმირჩქინეს. თეგვარო, თის არჩქილედ თინეფიშ მდგომარეობა, მით თხოზუდ, მუშენდა მუ ხოლო ართ დროს, თინეფცალ რდუ.

პავლე თიცალ კათას ხოლო შეხვადუდ, მიდგას მანგარო წანდჷ ტყურა გურაფეფ. მუნერ რეაქცია უღუდ თის? საქმეეფიშ 17:16 ჭარ, ნამდა პავლექ მანგარო გეღიზიან, მუჟამსით ქოძირ, ათენი კერპეფით რდუ ეფშა. მარა თექიანეფს ჯგირო დუმოწმუკონ თიშენ, პავლექ ზუსტას თინა გეგმირინუ, მუდგაქ არძაშ უმოსო გაღიზიან (საქ. 17:22, 23). თინა არძანერ კატეგორიაშ ხალხის შეხვადუდ, ათეშენ ქადაგებაშ შხვადოშხვანერ მეთოდის გიმირინუანდჷ, ნამდა „ურსხებუდკო ნამთინე“ (1 კორ. 9:20—23).

შემლებნა მივაჸუნათ პავლეშ მაგალითის, მუჟამსით ქადაქებაშ დროს ნამთინეს უარყოფით რეაქცია უღჷ ვარდა ტყურა გურაფეფიშ ჯერს. ჯგირ იჸუაფ, გეგმიბრინუათ თი ინფორმაცია, მუთ მიჩქნა თინეფიშ გურშენ, ნამდა ქიმვეხვარათ სახიოლო ამბეშ გაგებას (ეს. 52:7). ართ და დოროთი იჩიებ: „ჩქინ ტერიტორიას ბრელ ფიქრენს, ნამდა ღორონთ მკაცრ რე დო თიშ მოსაწონ მითინს ვაკეთებე. თეცალ დროს, მა ვოცქვანქჷ თინეფს მუნეფიშ რწმენაშენ დო უკულ ბიბლიაშე ვოძირანქ, ნამდა ღორონთი მოჸოროფე რე დო ხალხის ჯგირ მომავალს ოპირ“.

„დარჯგინ უბადობას ჯგირით“

ჩქი ბოლო დღალეფს ფცხოვრენთ, ათეშენ ვაგამკვირდან ოკო, ნამდა ქადაქებაშ დროს ხოლო უფრაშო ქიმმექცუეს-და (2 ტიმ. 3:1, 13). ჩქი იშენით გურშა ოკო მიბღათ თინეფიშ გაჭირება დო ვა ვოდინუათ მსახურებაშ ხიოლ. იეჰოვას შეულებ ქომჩან ძალა, გივორჯგინათ უბადობას ჯგირით (რომ. 12:21). ართ პიონერ და ჯესიკა იჩიებ: „ხშირას თიცალ ხალხის შეფხვადუქ, მით ვა რე თანდაბალ დო ვამაფასენა ვართ ჩქი დო ვართ სახიოლო ამბეს. თენა მანგარო მაღიზიანენს. მუჟამსით რაგადის იბჭყანქინ, გურს იეჰოვას ფთხულენქ, ქიმმეხვარას, მა ხოლო თეშ ვუჯინე თეცალ პიროვნებას, მუჭოთ მუ უჯინე. თენა მოხვარ გივორჯგინე ჩქიმ გრძნობეფს დო თიშო იფიფქრე, მუჭო მივეხვარე თე პიროვნებას“.

ჩქი გურშა ოკო ელვუკინათ და დო ჯიმალეფს ხოლო, მიდგაწკუმა ართო ვმსახურენთ. ჯესიკა იჩიებ: „ვოცადუქ გლახა შემთხვევეფშენ ვაბრაგადუე. თეშ მანგიორო დადებით საკითხეფშე იფჩიებუქ, მაგალთო თი ჯგირ შედეგეფშე, ნამუთ ჩქინ მსახურებას მოჸუნს, თიშ უმკუჯინუო ნამდა, ნამთინეს უარყოფით რეაქცია უღჷ“.

იეჰოვას ჯგირო უჩქჷ, მუ სირთულეეფს შეფხვადუთ მსახურებაშ დროს. ღორონც მანგარო ოხიოლ, მუჟამსით მეპჸუნთ თიშ მაგალითის დო ჭყოლოფას გიმიფრჩქინანთ (ლუკ. 6:36). მუშო ოკო რაგად, იეჰოვაშ ჭყოლოფაშ გიმორჩქინას საზღვარ უღჷ. შემლებნა დარწმუნებულ ვორდათ, ნამდა თის უჩქჷ, მუჟამ რე არძაშ უჯგუშ დრო, განადგურას თე უბადო ქიანა. თე დროშ მოულაშახ, აუცილებერ რე ქადაქებაშ საქმე უგნუდვალუო შევასრულათ (2 ტიმ. 4:2). მორთ, მთელ გურით შევასრულათ ჩქინ დავალება დო გურშა მიბღათ არძანერ ხალხიშ გაჭირება!