მშობლეფ, ქიმეხვარით თქვან ბაღანას, დინათას

1. მუშა ოკონა დერწმუნან ბაღანაშ ნათუაშახ ქრისტიან მშობლეფს?

ბლოსომ ბრანდტი იშინანს, მუჭო გინოჭყვიდ ნათუა: „ჩქიმ დიდა დო მუმაწკუმა ხშირას იბჩიებუდ, ნამდა ნათუა მოკოდ. თინეფს ოკოდეს დერწმუნესკო, ქუმარჩქილედ დო ვარ, მუსხით სერიოზულ ნაბიჯ რდუ თენა. 1934 წანაშ 31 დეკემბერს ჩქიმ ცხოვრებას თე მნიშვნელოვან მომენტიქ ქუდოდირთ“. ამდღა ხოლო ქრისტიან მშობლეფს ოკონა, მუნეფიშ სქუალეფქ გონივრულ გადაწყვეტილებეფ მიღან. სერიოზულ მიზეზიშ უმშო ნათუაშ გინოდვალა სულიერ წიმიულას ეცილებ (იაკ. 4:17). სოიშახ ბაღანეფ ინათუდანინ, გონიერ მშობლეფს ოკონა დერწმუნან, ნამდა ბაღანეფ მზათ რენა, გინირთან ქრისტეშ მოწაფეეფო.

2. ა) მუ შეამჩნუ ნამთინე რაიონულ ზედამხედველქ? ბ) მუს გუვარჩიენთ თე სტატიას?

² ნამთინე რაიონულ ზედამხედველქ შეამჩნუ, ნამდა ბრელ ახალგაზრდა, ნამუთ 20 წანას რე მენჭაფილ ვარა გინოჩილათირ, დიო ხოლო ვა რე ნათილ, თიშ უმკუჯინუო, ნამდა ქრისტიანულ ოჯახის ირდეს. თინეფიშ უმენტაშ გილურს კრებაშ შეხვალამეფშა დო მონაწილებას ღებულენს მსახურებას. თე ახალგაზრდეფს დუდ იეჰოვაშ მოწმეეფო მიორჩქუნა. მარა მუდგარენ მიზეზიშ გურშენ ვა უძღვინენა დუც იეჰოვას დო ვენათუნა. მუშენ ვეგნმოდგუნა თინეფ თე ნაბიჯის? თარ-ართ მიზეზ თინა რე ნამდა, მინშა მშობლეფ ურაგადნა, ვეჩქარან ნათუა. თე სტატიას გუვარჩიენთ, ოთხ მიზეზის ნამუშ გურშენით ქრისტიან მშობლეფ ვა ჩქარენა, ქიმეხვარან სქუალეფს ნათუას.

გვალო ჭიჭე ხომ ვა რე?

3. მუშ გაგება ოინტერესდეს ბლოსომიშ მშობლეფს?

³ ბლოსომიშ მშობლეფს, ნამუთ პირველ აბზაცის მიფშინეთინ, ოინტერესდეს ქორდ დო ვარ მუნეფიშ ძღაბი თი ასაკის, ნამდა ქინანჭუკო მუსხით სერიოზულ ნაბიჯ რდუ ნათუა. მუჭო შეულებნა მშობლეფს თიშ გაგება ქორენ დო ვარ მუნეფიშ ბაღანა მზათ, იეჰოვას დუდ მეუძღვინას?

4. მუჭო მეხვარებ მათეშ 28:19, 20-ის ინოჭარილ სიტყვეფ მშობლეფს?

⁴ წეკითხით მათე 28:19, 20.a მუჭოთ წოხლენ სტატიას ბძირითინ, ბიბლიას ვა რე დაკონკრეტებულ ნათუაშ ასაკი. მარა, მშობლეფშო ჯგირ იჸუაფ დეფიქრან, მუს ნიშნენს მოწაფეეფიშ მომზადება. მათეშ 28:19-ს ინოჭარილ სიტყვეფ „მოწაფეეფქ იჸუან“ ნიშნენს, ოგურუე პიროვნებას თი მიზანით, ნამდა უკულ ქრისტეშ მიმაჸუნალქ ქიჸუას. მოწაფე რე თინა, მით გურაფლენს დო ინანჭუ იესოშ გურაფეფს. თეს გეძინელ, გინოჭყვიდილ აფჷ თინეფიშ დაცვება. ათეშენ, მშობლეფქ ჭიჭენობაშე ოკო ოგურუან მუნეფიშ ბაღანას თი მიზანით, ნამდა უკულ დინათას დო ქრისტეშ მიმაჸუნალქ ქიჸუას. მუშო ოკო რაგად, გვალო ჭიჭელეფ დღას ვეჸუაფნა მზათ ნათუაშო. მარა, ბიბლიაშე ბგებულენთ, ნამდა ჭიჭე ბაღანეფს ხოლო შეულებნა ქინანჭან დო დაფასან ბიბლიურ ჭეშმარიტება.

5, 6. ა) მუს ბგებულენთ ნათუაშ გურშენ ტიმოთეშ მაგალითშე? ბ) მუჭო შეულებნა გონიერ მშობლეფს ოგურუან მუნეფიშ ბაღანეფს?

⁵ ტიმოთექ იეჰოვაშ მსახურება ახალგაზრდობას დიჭყჷ. მოციქულ პავლექ თქუ, ნამდა თინა ჭეშმარიტებას ჭიჭენობაშე გურაფლენდჷ. ტიმოთეშ მუმა ვარდ იეჰოვაშ თაყვანიშმცემელი. მარა თიშ დიდა დო ბები, ებრაელეფ რდეს დო თინეფქ ქიმეხვარეს ტიმოთეს, დუფასებუდკო წმინდა წერილეფი. შედეგო, თიქ მანგარ რწმენა გავითარ (2 ტიმ. 1:5; 3:14, 15). მუჟამსით თინა სოდგარენ 20 წანერ რდუნ, კრებას განსაკუთრებულ დავალება მიღჷ (საქ. 16:1—3).

⁶ მუშო ოკო რაგად, ბაღანეფ გენესხვავებნა ართიანშე, ათეშენ არძა ართნერ ასაკის ვეჸუაფ სულიერო მოწიფული. ნამთინე ბაღანა უცფას ინანჭუ ჭეშმარიტებას დო ოკო ნათუა. შხვეფს უმოს დრო ოკონა, მემზადან ნათუაშო. ათეშენ, მშობლეფქ ოკო ვადანძალან ბაღანეფს ნათუა დო ქიმეხვარან, მუნეფიშით გაგრძელან სულიერო წიმიულა. მშობლეფს შეულებნა ბრელ მუთუნ დიგურუან იგავეფიშ 27:11-ის (წეკითხით)b ინოჭარილ სიტყვეფშე. მარა თინეფს ირიათო ოკო შუდან, მუნეფიშ მთავარ მიზან — ქიმეხვარან ბაღანეფს ქიმიაჸუანან ქრისტეს. ზუსტას ათეშენ, მშობლეფქ ოკო ქოკითხან მუნეფიშ დუც: ქუჩქუნო ჩქიმ ბაღანას თისხი, ნამდა დუდ მეუძღვინას იეჰოვას დო დინათას?

ქოუღუნო ჩქიმ ბაღანას დასაბაღ რჩქინა?

7. აუცილებერ რენო პიროვნებას კილკილშა უჩქდას ბიბლია ნათუაშახ?

⁷ მუშო ოკო რაგად, მშობლეფს ოკონა სქუალეფს ჯგირო უჩქდან ჭეშმარიტება. თე ირფელ მეხვარებ ბაღანეფს, დუდ მეუძღვინან ღორონც. მარა თენა თის ვა ნიშნენს, ნამდა დუდიშ მეძღვინუა დო ნათუაშახ, ბაღანას კილკილშა უჩქდას ბიბლიაშ არძა გურაფა. ნათუაშ უკულ ქრისტეშ არძა მოწაფექ ოკო გაგრძელას რჩქინაშ მეღება (წეკითხით კოლოსელები 1:9, 10).c თაშ ნამდა, მუსხიშ რჩქინა რე საჭირო ნათუაშახ?

8, 9. მუს ბგურაფლენთ პავლეშ დო ციხეშ ზედამხედველიშ მაგალითშე?

⁸ პირველ საუკუნეს მახორუ ართ ოჯახიშ მაგალითშე მშობლეფს ბრელ მუთუნიშ გურაფა შეულებნა (საქ. 16:25—33). სოდგარენ ახ. წ 50 წანას, მაჟია მისიონერულ მოგზაურობაშ დროს პავლექ ქალაქ ფილიპეშა ხოლო მერთ. თექ პავლე დო სილა ტყურა ბრალდებეფიშ საფუძველშა ოჭოფეს დო ციხეს ქუდახუნეს. სერით მიწისძვრაქ ქუმოხვად დო ციხეშ არძა კარქ გინჯჷ. ციხეშ ზედამხედველს აშკურინ პატიმარეფიშ ნტებაშა, ათეშენ დუდიშ ჸვილუა მინდომ, მარა პავლექ გაჩერ თინა. თეშ უკულ პავლე დო სილაქ ქუქადაქეს ციხეშ ზედამხედველს დო თიშ ოჯახის. თინეფქ ქიდეჯერეს ირფელ, მუთ ქრისტეშ გურშენ გეგეს დო ქიმეხვადეს, ნამდა მნიშვნელოვან რდუ თიშ კანონეფიშ მორჩილება. ათეშენ ვეგნუდვალნა ნათუა. მუს ბგურაფლენთ თავრეშე?

⁹ ციხეშ ზედამხედველ შილებედ ადრე რომიშ ჯარს მსახურენდკო. თის მუთუნნერ შეხება ვა უღუდ წმინდა წერილეფწკუმა. ქრისტიანო გინირთკონ თიშენ, თის ოკო ქუგუგებუდკო ბიბლიაშ ძირითად გურაფეფ, ქინანჭუკო მუს ნიშნენდ ღორონთიშ მსახურება დო დემორჩილკო იესოშ მითითებეფს. თი რჩქინაქ, ნამუთ თიქ ჭიჭე დროშ დინახალე მიღუნ, გინაჭყვიდრაფუ, დინათკო. მუშო ოკო რაგად, თინა ნათუაშ უკულ ხოლო აგრძელენდჷ რჩქინაშ მეღებას. მუჭო ოკო მიქცუათ, მუჟამსით ორწყეთ, ნამდა თქვან ბაღანა აფასენს ძირითად ბიბლიურ გურაფეფს დო არჩქილე, მუს ნიშნენს მეძღვინუა დო ნათუა? ქრისტიან მშობლეფქ შილებე გეგნოჭყვიდან, ბაღანაქ კრებაშ უხუცესეფს ქუდურაგადუას. თინეფ ქოძირნა, ქორენ დო ვარ თინა მზათ ნათუაშო.d შხვა ნათილ ქრისტიანეფცალო, ბაღანა გაგრძელენს იეჰოვაშ განზრახვეფიშ გურშენ რჩქინაშ მეღებას მთელ მუშ ცხოვრებას (რომ. 11:33, 34).

მუნერ განათლებას მოუღჷ წარმატება?

10, 11. ა) მუს ფიქრენს ნამთინე მშობელი? ბ) მუ შემთხვევას იჸუაფნა ბაღანეფ თხილერ?

¹⁰ ნამთინე მშობელი ფიქრენს, ნამდა უჯგუშ იჸუაფ მუნეფიშ ბაღანაქ დიო ქიგურუას, ჯგირ სამუშა დოგორას დო უკულ დინათას. მუშო ოკო რაგად, მშობლეფს ჯგირ ოკონა მუნეფიშ სქუალეფშო, მარა ქიმეხვარებნო ბაღანეფს თეცალ მიზნეფ ნამდვილ წარმატებაშ მეჭირნაფას? მუთ არძაშ უმოს მნიშვნელოვან რენ, ქიმურენო თენა ბიბლიურ პრინციპეფს? მუს მირაგადნა ღორონთიშ სიტყვა თე საკითხიშ გურშენ? (წეკითხით ეკლესიასტე 12:1).e

¹¹ დღას ვაგმოჭყორდან, ნამდა თე ქიანა დო ირფელ, მუდგას თინა ფთავაზენან, ოწინააღმდეგ იეჰოვაშ აზროვნებას (იაკ. 4:7, 8; 1 იოან. 2:15—17; 5:19). ბაღანეფ სატანაშ გავლენაშე, თიშ ქიანაშე დო სწორ ვარენ ფერ აზროვნებაშე თხილერ თიმწკუმა იჸუაფნა, მუჟამსით იეჰოვაწკუმა ხოლოშიან ურთიერთობა აღვენუნა. მშობლეფს პირველ ადგილშა გურაფა დო ჯგირ სამუშაშ გორუა ქიგურენან-და, ბაღანეფქ შილებე იფიქრან, ნამდა თენა უმოს მნიშვნელოვან რე ცხოვრებას ვინემ იეჰოვაწკუმა ურთიერთობა. მუშო ოკო რაგად, მოჸოროფე ქრისტიან მშობლეფს ვაკონა, სატანაშ ქიანაქ დაგურუას სქუალეფს, მუს მოუღჷ ნამდვილ ბედნერობა. ფაქტ რე, ნამდა ნამდვილ ხიოლ დო წარმატება ხვალე თიმწკუმა მაღვენუნა, მუჟამსით ჩქინ ცხოვრებას პირველ ადგილს იეჰოვას ქიგვორინუანთ (წეკითხით ფსალმუნი 1:2, 3).f

მუჭო მიფქცუა, ჩქიმ სქუაქ შეცოდ-და?

12. მუშენ გინმოდვანს ნამთინე მშობელი ბაღანეფიშ ნათუას?

¹² ართ ქრისტიან დიდა იჩიებ, მუშენ ვაკოდ მუშ ძღაბიშ ნათუა: „ონჯღორე მიჩქ თეშ რაგადშა, მარა მოშკურუდ ვაგარიცხებედკო“. თე დაცალო, ნამთინე მშობელ ფიქრენს, ნამდა უჯგუშ იჸუაფ ვენათან ბაღანეფქ, სოიშა თი ასაკის ვეგნაჩირთუნა, მუ დროსით შილებე ადვილო მეჩირთან (დაბ. 8:21; იგავ. 22:15). შილებე მშობლეფ ფიქრენდან: „ჩქიმ ბაღანა ნათილ ვარენ-და, კრებაშე ხოლო ვეგერიცხებ“. მუშენ რე არასწორ თეცალ აზროვნება? (იაკ. 1:22).

13. ნიშნენსო ნათუაშ გინოდვალა თის, ნამდა ბაღანა ვა რე იეჰოვაშ წოხოლე პასუხიშმგებელი?

¹³ მუშო ოკო რაგად, ქრისტიან მშობლეფს ვაკონა დინათან სქუალეფქ, სოიშა მზათ ვეჸუაფნა დუდ მეუძღვინან იეჰოვას. მარა სწორ ვეჸი იფიფქრათ, ნამდა ნათუაშახ ბაღანა პასუხიშმგებელ ვა რე იეჰოვაშ წოხოლე. მუშენ შემლებნა თეშ რაგად? იეჰოვაშ წოხოლე პასუხიშმგებლობა ნათუაშა ვა რე დამოკიდებული. მუჟამსით ბაღანას არჩქილე მუ რე იეჰოვაშ თოლს ჯგირ დო ფურ, თინა პასუხიშმგებელ რე იეჰოვაშ წოხოლე (წეკითხით იაკობი 4:17).g გონიერ მშობლეფ ირნერო ოცადნა პირადო ქიმეჩან მაგალით ბაღანეფს დო ვართ ხოლო გურ გეუჸოთან ნათუაშა. თინეფ ჭიჭენობაშე ოგურუანა ბაღანეფს იეჰოვაშ მაღალ ზნეობრივ ნორმეფიშ ჸოროფას (ლუკ. 6:40). იეჰოვაშ ჸოროფა მეხვარებ თინეფს დუდ ეუჩილითუან სერიოზულ ცოდეფს დო აკეთან თინა, მუთ იეჰოვაშ თოლს სწორ რე (ეს. 35:8).

შხვეფს შეულებნა მოხვარა

14. მუჭო შეულებნა უხუცესეფს ქელუდირთან მშობლეფს?

¹⁴ სულიერ მიზნეფშენ დადებით ჩიებათ უხუცესეფ ოხვარნა მშობლეფს ბაღანეფიშ ნათუაშო მომზადებას. ართ და, ნამუთ 70 წანაშე მეტ ხანს მსახურენდჷ პიონერო, იშინანს მუნერ დადებითო იმოქმედ ჯიმა ჩარლზი ტეიზ რასელწკუმა რაგადიქ. თიმ დროს თე და ამშვი წანერ რდუ. თინა იჩიებ: „ჩქი 15 წუთის იფჩიებუდით ჩქიმ სულიერ მიზნეფშენ“. დასურო, ჯგირ დო გურიშ ემაკინალ სიტყვეფს მანგარ ძალა უღუ (იგავ. 25:11). უხუცესეფს შეულებნა მონაწილება მიოღებაფუან მშობლეფს დო თინეფიშ სქუალეფს სამეფო დარბაზიშ დასუფთებაშა, ვარდა ქუდავალან ახალგაზრდეფს თიცალ საქმეეფ, ნამუშ კეთება შეულებნა.

15. მუჭო შეულებნა კრებაშ წევრეფს გამხნევან ახალგაზრდეფი?

¹⁵ კრებაშ არძა წევრის შეულებ მეხვარას ახალგაზრდეფს პირად ინტერესიშ გიმორჩქინათ. მაგალთო, შეულებნა ყურადღება ქიმიაქცუან ახალგაზრდეფიშ სულიერო წიმიულას. მთელ გურით ქაცქვეთ ახალგაზრდეფს, მუჟამსით გააზრებულ კომენტარეფს ორთნა ვარდა დავალებათ გიშულა. შილებე რწმენაშ გურშენ შხვადოშხვა სირთულეს შეხვადუდან სკოლას, მარა იშენით ქადაქენა დო ართგურეფ სქიდუნა. ჯგირ იჸუაფ თეშ გურშენ ხოლო ქაცქუათ თინეფს. შემლებნა მიზანო მიღდან კრებაშ დოჭყაფაშახ ვარდა თიშ თებაშ უკულ დრო გეგმურთათ ახალგაზრდეფწკუმა ჩიებას. თეცალ მოქმედებათ თინეფ დუც კრებაშ წევრეფო ქიგინანა (ფსალმ. 35:18).

ქიმეხვარით სქუალეფს მიმზადან ნათუაშო

16, 17. ა) მუშენ რე მნიშვნელოვან ბაღანეფშო ნათუა? ბ) მუს მოუღჷ ქრისტიან მშობლეფშო ხიოლ? (ქოძირით სურათი მა-8 გვერდის).

¹⁶ ქრისტიან მშობლეფშო დიდ პატი რე, ქუჸოროფუან ბაღანეფს იეჰოვა (ეფეს. 6:4; ფსალმ. 127:3). ისრაელეფიშ სქუალეფიშ გინაწონს, ამდღარ ქრისტიანეფიშ ბაღანეფ ღორონთიშ მეძღვინელ მსახურეფო ვებადებნა. თეს გეძინელ, ღორონთიშ დო ჭეშმარიტებაშ ჸოროფა მეკვირდეობათ ვეგნურს. ბაღანაშ დაბადებაშე მშობლეფიშ მიზან ოკო რდას, ქიმეხვარან სქუალეფს ღორონთშა დუდიშ მეძღვინუას დო ნათუას. თენა არძაშ უმოს მნიშვნელოვან რე, მუშენდა მეძღვინუა, ნათუა დო იეჰოვაშ ართგურო მსახურება გინმოსკილიდუანა დიდ გასაჭირიშ დროს (მათ. 24:13).

¹⁷ ბლოსომ ბრანდტიშ მშობლეფს ოკოდეს დერწმუნესკო, ქორდ დო ვარ თინა მზათ ცხოვრებას არძაშ უმოს მნიშვნლოვან ნაბიჯ გეგნოდგუკო. მუჟამსით თინეფქ ქოძირეს, ნამდა თინა ნათუაშო დასურო მზათ რდუნ, ხუჯ ქუდუკინეს თიშ გადაწყვეტილებას. ბლოსომ იშინანს, მუ აკეთ მუამუშიქ ნათუაშ წოხოლენ სერს: „მუაჩქიმქ მიწის, ბირგულ დოშკუმალირო ქიბლოცითკო. თიქ იეჰოვას უწუ, ნამდა მანგარო ოხიოლუდ, მუშ ჭიჭე ძღაბ დუც უძღვინენდჷ თის“. თე ამბეშე 60 წანაშე მეტ ხანქ გემკორთ. ბლოსომი იშინანს: „მუსხი წანაქ ვამკორთასინ, დღას ვაგმოჭყორდუ თიმ სერ!“. მშობლეფი, თქვა ხოლო შეილებნა ქიგინათ თი ხიოლი დო კმაყოფილება, ნამუთ მოჸუნს თქვან ბაღანეფიშ დუდიშ მეძღვინუას დო ნათუას.