იოსებ არიმათეელი გაბედულებას გიმირჩქინანს

იოსებ არიმათეელს წარმოდგენა ვა უღუდ თეჯგურა გაბედულებას გეგმირჩქინანდ დო რომაელ გამგებელშა ქიმიშუნ. პონტიუს პილატეს იჩინენდეს, მუჭოთ მანგარ ჯიუტ კოჩის. იესო ღირსუანო დასაფლესკონ, საჭირო რდუ პილატეშა მიდგაინს ქუთხუდკო თეშ ნება ქიმუჩამუდკონ. ქიძირ, ნამდა სინამდვილეს პილატეწკუმა შეხვალამა ვა ჸოფე თიცალ ძნელ, მუჭოთ თენა იოსების მიორჩქუდ. მუჟამსით პილატექ ჯარიშ უნჩაშშე ქიგეგ, იესო დასურო ღურელ რდუნ, თიშ დასაფლებაშ ნება ქიმეჩ. თეშ უკულ, გურშეჭირებულ იოსებიქ თი ადგილშა მიდართ, სოდეთ იესო ჸვილეს (მარ. 15:42—45).

• მი რდუ იოსებ არიმათეელი?

• მუ საერთო უღუდ იესოწკუმა?

• მუშენ რე ჩქინო საინტერესო თიშ ისტორია?

სინედრიონიშ წევრი

მარკოზიშ სახარება იოსების მიშინუანს, მუჭოთ საბჭოშ, სინედრიონიშ საპატიცემო წევრის. სინედრიონ ებრაელეფიშ უზენაეს სასამართლო დო ადმინისტრაციულ საბჭო რდუ (მარ. 15:1, 43). იოსების, მუჭოთ მუშ ხალხიშ ართ-ართ ხემძღვანელს, ვა გუჭირდუდ რომაელ მართველწკუმა შეხვალამა. მუშო ოკო რაგად, თის დიდ ქონება ხოლო აღვენუდ (მათ. 27:57).

სინედრიონიშ წევრეფ ონტერუდეს იესოს დო ირნერო ხეს უნწყუნდეს თიშ ჸვილუას. მარა ბიბლია იოსების ჯგირ დო მართალ კოჩო მიშინუანს (ლუკ. 23:50). თინა ვა გუდ სინედრიონიშ უმენტაშ შხვა წევრეფს, მუშენდა ზნეობრივო სუფთა, პატიოსან კოჩ რდუ დო ღორონთიშ მითითებეფს იცვენდ. იოსებ „ელუდ ღორონთიშ სამეფოს“ დო თექ გინაჭყვიდრაფუ იესოშ მოწაფეთ გინორთედკო (მარ. 15:43; მათ. 27:57). თეს გეძინელ, იოსებ მანგარო აფასენდ ჭეშმარიტებას, სამართლიანობას დო შილებე თეშ გურშენ დეინტერესკო იესოშ ქადაქებათ.

მუს ფულუნდ იოსები?

იოანეშ 19:38-ს იოსებიშ გურშენ ჭარ, ნამდა თინა „იესოშ მოწაფე რდუ, მარა იუდეველეფიშ შიშით ფულუნდ თეს“. მუშა ოშქურუდ იოსების? თის უჩქუდ, ნამდა იუდეველეფს თოლშა ვა მაძირედეს იესო დო გინოჭყვიდილ აფდეს, სინაგოგაშე გუტებდესკო არძა, მით თიშ მიმაყუნალო გინირთუდ (იოან. 7:45—49; 9:22). თენა თის ნიშნენდ, ნამდა იუდეველეფ გიჯოგუანდეს დო ვემიღენდეს თინეფს. მუშ მდგომარეობა ვემუდინუაფუდკო თიშენ, იოსები ვა არგამენდ მუშ რწმენას.

ხვალე იოსებ ვა რდუ თეცალ რთულ მდგომარეობას. იოანეშ 12:42-შე ბგებულენთ: „ბრელ მართველქ ხოლო ირწმუნ თინა, მარა ფარისეველეფიშ გურშენ ფულუნდეს, მუშენდა სინაგოგაშ წევრობა ვემიოდინესკო“. ართ-ართ თეცალ პიროვნება სინედრიონიშ წევრი, ნიკოდემე რდუ. (იოან. 3:1—10; 7:50—52).

იოსებ იესოშ მოწაფე რდუ, მარა თეს არგამათ ვაცხადენდ. თეს დიდ მნიშვნელობა უღუდ, მუშენდა იესოქ თქუ: „მიდგა შხვეფიშ წოხოლე მაღიარენსინ, მა ხოლო ვაღიარენქ ზეციერ მუმაშ წოხოლე, მარა მით შხვეფიშ წოხოლე ჩქიმ გურშენ ვარიას იჩიებუნ, მა ხოლო ვარიას ქოფთქუანქ თიშ გურშენ ჩქიმ ზეციერ მუმაშ წოხოლე“ (მათ. 10:32, 33). იოსების იესოშ გურშენ ვარია ვა უთქუალ, მარა ვართ გუცხადებ, ნამდა თიშ მოწაფე რდუ. მუშ რაგად შილებე ჩქინ გურშენ?

ბიბლია იოსებშე იჩიებ, ნამდა თიქ იესოშ წინააღმდეგ სინედრიონიშ გეგმას ხუჯ ვა დუკინ (ლუკ. 23:51). ნამთინეშ აზრით, შილებედ იოსები შურო ვასწრუდკო იესოშ სასამართლოს. მუჭოდგა ვარდკონ, იოსების თე უსამართლო განაჩენქ გურ დოჭყვად, მარა თის მუთუნ ვა ქიმნედ!

გაბედულებაშ გიმორჩქინა

იესოშ ღურაშ უკულ იოსებიქ გიორჯგინ შიშის დო გინოჭყვიდ იესოშ მიმაჸუნალეფშა ქელურინუდკო. თენა ჯგირო იძირე მარკოზიშ 15:43 ინოჭარილ სიტყვეფშე: „გაბედულება გეგმირჩქინ, პილატეშა გემნორთ დო ქოთხუ, ქიმეჩკო იესოშ სხეული“.

მუჭოთ იძირენ, იოსებიქ მუშ თოლო ძირ იესოშ ღურა. სოიშახ პილატე თეს გეგენდკონ, იოსების უკვე უჩქუდ თე ამბე. ათეშენ, მუჟამსით თიქ რომაელ მართველშა ქიმერთუნ, „პილატეს ოკოდ თიშ გაგება, დასურო ღურელ რდუ დო ვარ იესო“ (მარ. 15:44). იოსებიქ იესოშ ტანჯება დასურო ქოძირ-და, თენა მანგარო იმოქმედენდ თიშ სინდისშა დო გეგნაჭყვიდრაფუანდ სიმართლეშ მხარეს გერინას. თინა უკვე მზათ რდუ ქიმოქმედკო დო ვა ფულკო, ნამდა იესოშ მოწაფე რდუ.

იესოშ დასაფლება

ებრაელეფიშ კანონით ღურათ დასაჯებულ კათა ბჟაშ ენულაშახ ოკო დასაფლესკო (კან. 21:22, 23). რომაელეფს შხვანერ კანონეფ უღდეს, ათეშენ ღურელ ძელს ოკო მიკიტესკო ვარდა საერთო სასაფლას ინაჸათესკო. მარა იოსების ვაკოდ თაშ მექცისკო იესოს. თი ადგილიშ გოხოლუას, სოდეთ იესო ძელს მიკაჭკადესინ, იოსების კირდეს გიშაკვათილ ოსაფლე უღუდ. თექ მითინ ვა რდუ დიო დასაფლებული. თენა ოძირანდ, ნამდა იოსები არიმათეაშეa იერუსალიმშა ახალ გინნაულა რდუ დო ოკოდ თე აკარდამა მუშიანეფიშ ოსაფლე ჸოფედკო (ლუკ. 23:53; იოან. 19:41). იოსებიქ სიკეთე გიმირჩქინ, მუჟამსით იესო მუშ აკარდამას ქუდასვანჯუ დო თეშნერო შესრულ წინასწარმეტყველებაქ, ნამდა მესია „მდიდარეფწკუმა“ იჸიდ დასაფლებული (ეს. 53:5, 8, 9).

ოთხოლო სახარება იჩიებ, ნამდა ძელშე მიკონწყუმაშ უკულ, იოსებიქ იესოს სელიშ გინაქუნალ ქუგაქუნ დო მუშ აკარდამას ქუდასვანჯუ (მათ. 27:59—61; მარ. 15:46, 47; ლუკ. 23:53, 55; იოან. 19:38—40). ბიბლია იჩიებ, ნამდა იოსების ხვალე ნიკოდემე ოხვარუდ. თიქ სმირნაშ დო ალოეშ აკნაწყორა ქიმიღ, ნამუსით დასაფლებაშ დროს გიმირინუანდეს. იოსებ დო ნიკოდემე გიმორჩქინელ კათა რდეს, ათეშენ შილებე თინეფს იესოშ მიკონწყუმას დო აკარდამას დოსვანჯაფას მუნეფიშ მსახურეფ ოხვარდესკო. თაშ რდუკონ ხოლო, თინეფქ იშენით დიდ საქმე ეჭოფეს მუნეფიშ დუდშა. არძა, მით ღურელს მიკანჭუდუნ, შკვით დღას უწმინდურო ითვალუდ დო ირფელ, მუდგას ხეს მოთხუნდესინ, უწმინდურ იჸუაფუდ (რიცხ. 19:11; ანგ. 2:13). თეცალ ხალხის მითინწკუმა ვაღვენუდეს ურთიერთობაშ უფლება დო ვართ პასექიშ დღახუშ მარას მიაღებედეს მუთუნნერ ცერემონიაშა მონაწილება (რიცხ. 9:6). იესოშ დასაფლება მუშ დუდშა ეჭოფუნ თიშენ, შილებე საბჭოშ წევრეფს გეძიცა ქუდუჭყაფდესკო იოსებშა. თეშ უმკუჯინუო, თინა მზათ რდუ თი შედეგეფშე, მუთ იესოშ ღირსუანო დასაფლებას დო ქრისტეშ მოწაფე რდუნ თიშ გაცხადებას მაჸუნუდ.

მუჭო ითუ იოსებიშ ისტორიაქ?

სახარებეფს იოსებ არიმათეელი იესოშ დასაფლებაშ უკულ სოთინ ვა რე მოშინაფილი. შილებე დემეინტერესან: მუქ აღოლ თის? ბიბლია მუთუნს ვეჩიებ თეშ გურშენ. თე ირფელიშ უკულ, შილებე ფთქუათ, ნამდა იოსებიქ სახალხოთ გაცხად, ქრისტიან რდუნ. თეს გეძინელ, რთულ სიტუაციაშ დროს თის რწმენა ვა უდინუაფ დო გაბედულება გეგმირჩქინ. თენა დასურო ჯგირ მაგალით რე.

თე ისტორია ართ კითხვას წუმოჭკირუნს, ნამუთ არძაქ ოკო დუსვათ ჩქინ დუც: უმოს მნიშვნელოვანო ხომ ვა ფთვალუნთ მდგომარეობას, კარიერას, ქონებას, ოჯახურ ურთიერთობეფს ვარდა ჩქინ თავისუფლებას ვინემ იეჰოვაწკუმა ურთიერთობას?