მზათ რდათ, განადიდათ იეჰოვა

1, 2. ა) მუ თქვის ელიფაზიქ დო ბილდადიქ ღორონთიშ მსახურებაშ გურშენ? ბ) მუჭო ოძირუიეჰოვაქ მუშ დამოკიდებულება?

„მუს ერგებ კოჩი ღორონც? ვარდა მუს ერგებ თის ინონჭაფაშ უნარ უღუნ თინა? მუთუნ კმაყოფილებას გინაფლენსო ირფელიშ შემალებე სქან სიმართლეთ ვარდა მუ რე ღორონთშო, ართგურო გილურქ-და?“ (იობ. 22:1—3). დღას ქოიფიქრებნანო თეცალ საკითხეფშენ? მუჟამსით თემანელი ელიფაზიქ იობის პირველო თე კითხვა დუსვუნ, თინა ფიქრენდ, ნამდა პასუხ უარყოფით რდუ. თიშ მეგობარ შუახელი ბილდადიქ, თინა ხოლო თქუ, ნამდა კოჩი დღას ვეჸი მართალ ღორონთიშ წოხოლე (წეკითხით იობიშ 25:4).

² თე ითამ გურიშ ემაკინალეფ იჩიებდეს, ნამდა ჩქინ ართგურ მსახურება იეჰოვაშო მუთუნს ვა ნიშნენს დო ჩქი ღორონთიშ თოლს კიტიტი, მუნტურ დო ჭიაცალ ვორეთ (იობ. 4:19; 25:6). ართ უცფას შილებე იძირედას, ნამდა ელიფაზ დო ბილდად თანდაბლეფი რდეს (იობ. 22:29). მაღალ გვალაშე ვარდა თვითმფრინავშე კოჩის საქმეეფი შილებე უმნიშვნელოთ იძირედას. მარა თაშ უჯინენო იეჰოვა ჩქინ მონდომას, ნამუსით სამეფოშ საქმეშო გიმიფრჩქინანთ? იეჰოვაქ ქაძირუ მუშ დამოკიდებულება, მუჟამსით შენიშვნა მეჩ ელიფაზის, ბილდადის დო ცოფარს ტყურაშ რაგადიშ გურშენ, მარა მიწონუ იობი, ნამუთ „მუშ მსახურო“ მიშინუ (იობ. 42:7, 8). თაშ ნამდა, კოჩის შეულებ გიმადირთას ღორონც.

„მუ მიგაჩინე თიშა?“

3. მუ თქუ ელიჰუქ იეჰოვაშ მსახურებას ჩქინ მონდომაშ გურშენ დო მუს გულისხმენდ თინა?

³ იეჰოვას ელიჰუშა აზროვნება ვეშუსწორებ, მუჟამსით თიქ თქუ: „მართალ რდენ ხოლო, მუ მიგაჩინე თიშა [ღორონთშა], ვარდა მუს მიღენს თინა სქან ხეშე?“ (იობ. 35:7). თის ხომ ვეჩიებ ელიჰუ, ნამდა ჩქინ მონდომას ღორონთიშ მსახურებას აზრი ვა უღ? მუშო ოკო რაგად, ვარ. თინა თის გულისხმენდ, ნამდა იეჰოვა ჩქინ თაყვანიშცემაშა ვარდ დამოკიდებულ. იეჰოვას ირფელ უღ დო მუთუნ ვასაჭირ. ჩქი ვეშემლებნა თინა უმოსო გუვამდიდრათ ვარდა გუვამანგარათ. პირიქით, თიქ მუჩეს ირფელ მუთ მიღუნა — ჯგირობუა, ნიჭი დო ძალა დო თინა ოკვირ, მუჭო გიმიბრინუანთ თის.

4. მუჭო უჯინე იეჰოვა, მუჟამსით შხვეფს ვოხვარუთ?

⁴ მუჟამსით ღორონთიშ მსახურეფს ჸოროფათ ვოქცუთინ, იეჰოვა თეს მუშა გიმორჩქინელ ჸოროფათ მირჩქინანს. იგავეფიშ 19:17 ჭარ: „მით გაჭირებულშო ჭყოლოფას გიმირჩქინანსინ, სესხის არზენს იეჰოვას, თინა გინუგანს თის მუშ საქმეშო“. თის ხომ ვეჩიებ თე მუხლი, ნამდა იეჰოვა გაჭირებულშო გიმორჩქინელ ირნერ ჭყოლოფას იმახსოვრენს? შემლებნანო ფთქუათ, ნამდა სამყაროშ გუმაჭყაფალ ღორონთი მოვალეთ თვალუნს დუც თი ხალხიშ წოხოლე, მით ჭოლოფას გიმირჩქინანს დო აკურთხენს თინეფს? ღორონთიშ სქუაქ, იესოქ გეგმაარგამ, ნამდა თენა თაშ რე (წეკითხით ლუკაშ 14:13, 14).

5. მუ კითხვეფს გუვარჩიენთ?

⁵ იეჰოვაქ წინასწარმეტყველ ესაიას დავალ, ნამდა მუშ სახელით გუცხადებუდკო, ნამდა თის ოკოდ ართგურ კათას მონაწილება მეუღებდესკო მუშ დიდებულ განზრახვაშ შესრულებაშა (ეს. 6:8—10). ესაიაქ ხიოლით მიღუ თე დავალება. ამდღა ანთასობით ღორონთიშ მსახურ მზათ რე იეჰოვაშ მსახურებას შხვადოშხვა რთულ დავალება შეასრულას დო მუნეფიშ განწყობას გიმოხანტნა თეშ, მუჭოთ ესაიაქ თქუ: „მა ურქ! მა გომტე!“. მარა იშენით შილებე მითინქ ქიკითხას: ქუღუნო ჩქინ მონდობას აზრი? მართალ რე იეჰოვა მარზენს საშვალებას, ნამდა ვემსახურე თის, მარა თინა იშენით ხომ შეასრულენს მუშ განზრახვას ჩქიმ მონდომაშ უმშო ხოლო? მორთ გუვარჩუათ, მუჭო არზენს თე კითხვეფს პასუხის დებორა დო ბარაკიშ დროს მოხვალამირ შემთხვევეფი.

შკურნაფილეფ, მარა ღორნთშე გამანგარებულეფ

6. მუ განსხვავება რდუ ისრაელეფ დო იაბინიშ ჯარ შქას?

⁶ ქანაანიშ მეფე იაბინი 20 წანას უდუნდებელო აჩაგრენდ ისრაელეფს. სოფელიშ მახორუეფს არგამათ გილულაშა ხოლო ოშკურდეს. თინეფს ოჩხუპებელო დო დუდიშ დაცვებელო დასაბაღ იარაღ ვა უღუდეს. თინეფიშ გინაწონს ნტერს 900 სამხედრო ხამუამ ეტლი ჸუნდ (მსაჯ. 4:1—3, 13; 5:6—8).

7, 8. ა) მუ მითითებეფი მეჩ იეჰოვაქ ბარაკის? ბ) მუჭო გიორჯგინ ისრაელქ იაბინიშ ჯარს? (ქოძირით სურათ 28 გვერდის).

⁷ თეშ უკმკუჯინუო, იეჰოვაქ წინასწარმეტყველ დებორაშ პიჯით ბარაკის უწუ: „მეუ დო მიდეჸონი ვით ანთასი კოჩი ნაფთალიშ დო ზებულონიშ სქუალეფშე დო გიფაჩით თაბორიშ გვალას. მა კიშონიშ ხევწკუმა ქუმოიჸონანქ სისერას, იაბინიშ ჯარიშ მეთაურს, თიშ სამხედრო ეტლეფს დო თიშ ხალხის დო ხეშა ქეშაიჸოთანქ“ (მსაჯ. 4:4—7).

⁸ ხონარქ გევრცელ დო მოხალისეფქ თაბორიშ გვალას დიშაყარეს. ბარაკის დრო ვაუდინაუფ დო ხეთეშე ქიმიაჸუნ ღორონთიშ ხემძღვანელობას (წეკითხით მსაჯულეფიშ 4:14—16). თაანახის ჩხუპიშ დროს, უცფას გიმანტირე ჭვემაქ მოლართ დო თექიანობაქ ლეტათ გინირთ. ბარაკიქ სისერაშ ჯარს ხაროშეთშახ 24 კილომეტრ ეკათხოზუ. მინტებუდუნ თეშ, სისერაქ მიოტუ მუშ ეტლი, ნამუთ უკვე მუთუნშა ვარგუდ დო ინტ ცაანანიმშა, ნამუთ შილებე კედეშიშ ხოლოს რდუკონ. თიქ კენიელ ხებერიშ ოსურიშ იაელიშ კარავს დიტყობ. ჩხუპშე გინოშულადირს, ქუდარულ. სისერა უკვე იაელიშ ხეს რდუ, ნამუსით გინოჭყვიდილ აფუდ თიშ ჸვილუა (მსაჯ. 4:17—21). ისრაელქ ნტერს გიორჯგინ!a

განსხვავებულ დამოკიდებულება ნებაყოფლობით მსახურებაწკუმა

9. მუს ბგებულენთ მსაჯულეფიშ 5:20, 21 მუხლეფშე სისერაწკუმა ჩხუპიშ გურშენ?

⁹ მსაჯულეფიშ 4 დო 5 დუდეფი ართო ოკო გუვარჩუათ, მუშენდა მუთ ართის ვარენ თინა, მაჟიას რე მოჩამილ. მაგალთო მსაჯულეფიშ 5: 20, 21 მუხლეფს ჭარ: „ცაშე მურიცხეფი ჩხუპენდეს, მუნეფიშ შარეფშე ოჩხუპდეს სისერას. კიშონიშ ხევქ მიდეღ თინეფ“. ანგელოზეფიშ მოხვარათ მოხვადუო თექ დო ვარ მანგარ ჭვემაშ გურშენ? ბიბლია ზუსტას ვეჩიებ თეს. მარა აბა მუშა მიჭარე თეცალ მანგარ ჭვემა ზუსტას თე ადგილს დო ზუსტას თე დროს, ნამუქით 900 სამხედრო ეტლი მიდეღ? მსაჯულეფიშ 4:14, 15 მუხლეფს სუმშა რე მოშინაფილ მოგება, ნამუქით იეჰოვაშ ჭყოლოფათ იჸუ შეიოლებერქ. 10 000 ისრაელ მოხალისეშე ნამთინს ვემიაჭარედ თენა მუშ დუდშა.

10, 11. მუ რდუ „მეროზი“ დო მუშენ რდუ თინა ჭყელ?

¹⁰ ისრაელეფიშ მოგებაშ უკულ დებორა დო ბარაკიქ ქიდიჭყეს ბირა, სოდეთ იეჰოვას განადიდენდეს. თინეფ იბირდეს: „დოჭყეთ მეროზი, — თქუ იეჰოვაშ ანგელოზიქ — დოჭყეთ თექიან მოხორუეფ, მუშენდა ვამორთეს იეჰოვაშ მახვარეფშა, იეჰოვაშ მახვარეფშა ძალიერეფწკუმა ართო“ (მსაჯ. 5:23).

¹¹ მეროზი თიშმანწარათ რდუ ჭყელ, ნამდა რთულ რე თიშ რაგად, მუს ნიშნენს თინა სინამდვილეს. თინა ქალაქ ხომ ვა რდუ, ნამუშ მახორეუფქ ვარია თქუეს ჩხუპშა ულაშ გურშენ? სისერა მინტებუდუნ თიმ დროს თე ქალაქ ხომ ვამკორთ დო დუდ ხომ ვეშიკეს თექაინ მოხორუეფქ თიშ ჭოფუაშე? მუჭო შილებედ თინეფს ვაგუგებდესკო, ნამდა იეჰოვა უძახუდ ხალხის ჩხუპშა? თი მხარეშე 10 000 მოხალისექ იშაყარ ჩხუპშა მაულარო. წერმიდგინით, მუჭო ეკაჯინენა მეროზიშ მახორუეფ ირკოჩშო ნაჩინებ მაჩხუპერს, ნამუთ მუნეფიშ ქუჩეფით მინტებუ, ხვალე დო იმენდ დინაფილო. თენა ჯგირ საშვალება რდუ თინეფშო, ნამდა ხე ქეშუნწყუდესკო იეჰოვაშ განზრახვაშ შესრულებაშა დო მეუღებდესკო თიშ კურთხევა. თეცალ კრიტიკულ დროს, მუჟამსით მოქმედება რდუ საჭირონ, თინეფქ უგურეთ ხომ ვემიქცის? მუჭო გენესხვავებდეს თინეფ იაელშე, ნამუქით გაბედულო მიქცუ! (მსაჯ. 5:24—27).

12. მუ განსხვავებულ დამოკიდებულება იძირე მსაჯულეფიშ 5:9, 10 მუხლეფშე დო მუჭო ოკო იმოქმედას თექ ჩქინწკუმა?

¹² მსაჯულეფიშ 5:9, 10-შე ვორწყეთ, მუ განსხვავება რდუ მიდგაქ ბარაკის ეკაუნუნ დო მიდგაქ ვეკაუნუნ თინეფ შკას. დებორა დო ბარაკიქ ოცქუეს „ისრაელიშ მეთაურეფს, მიდგაქ მოხალისეფცალო იდ ხალხწკუმა“. მუჭო გენსხვავებუდ თე კათა თინეფშე, მით „მოჭითე ვირეფს გეხედეს“ დო თიშნერ ამაყეფ რდეს, ჩხუპის მონაწილება ვემუღებნა! მუშმადიდა განსხვავება რდუ მით, „მდიდრულ ნოხეფს გეხედეს“, უჸორდეს ფუფნებას ცხოვრება დო, მით „შარას გილეშესინ“ თინეფ შქას. თინეფქ ეფი შარა ისხუნეს თინეფიშ გინაწონს, მიდგაქ თაბორიშ გვალაშა დო კიშონიშ ჭყენჭყ ადგილშა იდეს ოჩხუპეფშა! სიამოვნებაშ მაგორუეფქ ოკო დეფიქრესკო. ნამდვილო, თინეფს გურ ოკო ქუგუჩამდესკო თიშა, ნამდა ხე ვეშუნწყის ღორონთიშ მიზანიშ შესრულებას. თეშე ამდღა ხოლო ოკო დეფიქრას არძაქ, მით სრულაშე ვამსახურ ღორონთის.

13. მუჭო გენესხვავებუდ რეუბენიშ, დანიშ დო აშერიშ ტომეფი ზებულონიშ დო ნაფთალიშ ტომეფშე?

¹³ მოხალისეფქ, მიდგაქ ოჩხუპებშა გიშართესინ, მუნეფიშ თოლით ქოძირეს, მუჭო დამტკიც იეჰოვაქ მუშ უზენაესობა. თინეფს შეულებდეს შხვეფს ეჩისკო „იეჰოვაშ სამართლიან საქმეეფიშ გურშენ“ (მსაჯ. 5:11). თინეფიშ გინაწონს, რეუბენიშ, დანიშ დო აშერიშ ტომეფიშ გურშენ მსაჯულეფიშ 5:15—17 მუხლეფს ჭარ, ნამდა იეჰოვაშ საქმეს მონაწილებაშ მანგიორო, თინეფქ მეტ ყურადღება მუნეფიშ ქონებას მიაქცუეს, ნამდგაშა მიშმეშ შხურეფ, გემეფი დო ნავსადგურეფი. მარა ზუბელონ დო ნაფთალიშ ტომეფქ „ოღურალო გეგნოდვეს დუდი“, ნამდა დებორა დო ბარაკშა ქიმუხვარებდესკო (მსაჯ. 5:18). თე შემთხვევაშე ჩქი მნიშვნელოვან მუდგარენს ბგურაფლენთ.

„განადიდით იეჰოვა“

14. მუჭო შემლებნა ვოძირათ ამდღა, ნამდა იეჰოვაშ უზენაესობაშ მხარეს გივორეთ?

¹⁴ ამდღა ჩხუპშა ვამაფნა ოულარ, მარა შემლებნა გაბედულო მიბღათ მონაწილება ქადაქებაშ საქმეს. იეჰოვაშ ორგანიზაციას მოხალისეფ ასე უმოსო რენა საჭირო, ვინემ აიშახ. მილიონობით ჯიმალეფ, დალეფ დო ახალგაზრდეფ მუნეფიშ ნებათ სრულ დროთ მსახურენა პიონერო, ბეთელს, სამეფო დო საკონგრესო დარბაზეფიშ მშენებლობას. დეფიფქრათ თი უხუცესეფშენ ხოლო, მით მსახურენა სავადმყოფოეფწკუმა თანამშრომლობაშ კომიტეტის ვარდა კონგრესეფიშ ჩატარებას ხემძღვანელენა. დარწმუნებულ რდათ, ნამდა იეჰოვა გაფასენა დო დღას ვეგიჭყოლიდუანს თქვან შრომას (ებრ. 6:10).

15. მუჭო შემლებნა ვოძირათ, ნამდა მონდომა მიღუნა იეჰოვაშ საქმეს?

¹⁵ არძაქ ქოპკითხათ ოკო ჩქინ დუც: კმაყოფილ ხომ ვეპჸიქ თით, ნამდა უმოს საქმე შხვეფქ აკეთან დო მა ნაკლებ? მთელ ყურადღება მატერიალურ ინტერესეფშა ხომ ვაგნომიღ, ნამუთ მეცილებ ხიოლით მსახურებას? ბარაკ, დებორა, იაელ დო 10 000 მოხალისეცალო ქომღუნო რწმენა დო გაბედულება, ნამდა გეგმიბრინუე ირნერ საშვალება იეჰოვაშ არგამა მითითებაშ შეიოსრულებელო? ხომ ვაფიფქრენქ შხვა ქალაქშა ვარდა ქიანაშა გინულაშენ, ნამდა უმოს ფარა ქიფშუენ? თაშ ქორენ-და, ქობლოცულენქო დო ქოფიფქრენქო, მუჭო შილებე თექ იმოქმედას ჩქიმ ოჯახწკუმა ვარდა კრებაშ წევრეფწკუმა?b

16. მუ შემლებნა მეფჩათ იეჰოვას?

¹⁶ იეჰოვაქ ღირსო ჩაფთვალეს, ნამდა ხუჯი ქიდუკინათ თიშ უზენაესობას. სატანაქ დაღორ პირველ კოჩ დო ოსურ დო მუშ მხარეშა გეგნიჸონ, მარა მუჟამსით იეჰოვას ხუჯის უკინენთინ, ეშმაკის ვოძირანთ მიშ მხარეს ვორეთ. რწმენა დო ართგურობაშ გიმორჩქინათ იეჰოვაშ მოსაწონო იფქციებუთ (იგავ. 23:15, 16). თქვან ართგურ ელარნათ იეჰოვა პასუხის არზენს სატანას (იგავ. 27:11). მუთ შემლებნა იეჰოვას მეფჩათინ, თენა რე ჩქინ მორჩილება; თინა მანგარო აფასენს თეს დო ოხიოლ, მუჟამსით თაშ იფქციებუთ.

17. მუს იჩიებ მსაჯულეფიშ 5:31 მომავალიშ გურშენ?

¹⁷ მალას დედამიწა ეიფშაფუ თიცალ კათათ, მიდგა იეჰოვაშ უზენაესობაშ მხარეს გედირთუ. ჩქი მივახიოლანთ თე დღაშ მოულას! ჩქი ხოლო დებორა დო ბარაკცალ განწყობა მიღუნა. თინეფ იბირდეს: „იეჰოვა, თაშ გოჭყორდას არძა სქან ნტერქ, სქან მოჸოროფეეფი ელმალ ბჟაცალ ძალიერეფ ქოჸოფედან“ (მსაჯ. 5:31). თენა შესრულებ, მუჟამსით იეჰოვა განადგურენს სატანაშ ცოდამ ქიანას. მუჟამსით არმაგედონიშ ჩხუპი ქიდიჭყაფუნ, ნტერწკუმა ეწარინალო საჭირო ვეჸი მოხალისეფიშ გორუა. თე დროს ჩქინ დუდშა გეგმოფცადუნთ ათე სიტყვეფს: „ქიგედირთით . . . დო ქოძირით, მუჭო გირსხენა იეჰოვა“ (2 მატ. 20:17). ეშობას ჩქი შემლებნა შხვადოშხვანერ მსახურებათ ხუჯი ქუდუკინათ იეჰოვაშ უზენაესობას გაბედულო დო დუდგინოდვალირო.

18. მუ ჯგირობუა მოუღ ჩქინ მსახურებას შხვეფშო?

¹⁸ „ხალხი ხიოლით მეურს. აკურთხით იეჰოვა!“. დებორაქ დო ბარაკიქ გამარჯვებაშ ობირეშით უზენაეს განადიდეს დო ვართ ხოლო ქმნილებეფი (მსაჯ. 5:1, 2).თაშ ნამდა, მორთ თქვან მსახურებაქ შხვეფს ხოლო გეგნაჭყვიდირაფუას, „განადიდან იეჰოვა!“.