„მთელ დედამიწაშ მოსამართლე“ ირო სამართლიანო იქციებუ

1. მუჭო ოძირუ აბრაამქ, ნამდა დარწმუნებულ რდუ იეჰოვაშ სამართლიანობაშა? (ქოძირით სურათ თე გვერდის)

„მთელ დედამიწაშ მოსამართლე უსამართლოთ მიქციებუნო?!“ (დაბ. 18:25). აბრაამქ თე კითხვაშ დასვებათ ქაძირუ, ნამდა დარწმუნებულ რდუ, მუჭო იეჰოვა სრულყოფილო გეგმირჩქინანდ სამართლიანობას სოდომ დო გომორაწკუმა. აბრაამ დარწმუნებულ რდუ, ნამდა იეჰოვა დღას „ვა განადგურენდ მართალს უბადოწკუმა ართო“. თინა თეცალ მუდგარენს დღას ვე ფიქრენდ. 400 წანაშ უკულ მოსექ იეჰოვაშ გურშენ ჭარ: „კირდე რე თინა დო სრულყოფილ რე თიშ არძა საქმე, მუშენდა სამართლიან რე თიშ ირ შარა. ართგურ ღორონთ რე დო უსამართლობა შორს რე თიშე. მართალ დო სამართლიან რე თინა“ (კან. 31:19; 32:4).

2. მუშენ შემლებუნა თიშ თქუალა, ნამდა იეჰოვას უსამართლოთ ვამაქციებე?

² მუშენ რდუ აბრაამ დარწმუნებულ, ნამდა იეჰოვა ირო სამართლიანო მიქციებუდ? თიშენ ნამდა, იეჰოვა სიმართლეშ დო სამართლიანობაშ განსახიერება რე. ებრაულ სიტყვეფს, ნამუქით ითარგმნუ, მუჭოთ „სამართლიან“ დო „მართალ“, ებრაულ წერილეფს ხშირას ართო შეთმოფხვადუთ. ბრელ სხვაობა ვა რე, სამართლიანობა დო სიმართლე შქას. თიშენ ნამდა, იეჰოვაშ დოდგინელ ნორმეფ სამართლიან რენ, თინა ირფელს სამართლიანო გინოჭყვიდუნს. თეს გეძინელ, ბიბლია იჩიებ: „თის უჸორს სიმართლე დო სამართლიანობა“ (ფსალმ. 33:5).

3. ქიმიჸონით თიშ მაგალითი, მუნერ უსამართლობა რე გავრცელებული ამდღარ მსოფლიოს?

³ ქვეყნიერება უსამართლობათ რე ეფშა, მარა ალალგურიშ ხალხშო გურიშ ემაკინალ რე თიშ რჩქინა, ნამდა იეჰოვა ირო სამართლიანო იქციებ. ბრელ კათას გუმუცადებ უსამართლობა მუშ დუდშა. მაგალთო, ბრელ უსამართლოთ გასამართლეს დო ციხეს ქუდახუნეს. ნამთინე შემთხვევას, საქმეშ დუდშე გინოჯინაშ დო დნმ-შ ანალიზიშ უკულ გეგმიარგამუ, ნამდა ბრელ მიდგა ხედუნ დამნაშავე ვარდ, მარა მუსხირენ წანას იშენით უსამართლოთ აჸუეს ციხეს დახუნალქ. თეცალ უსამართლო დაპატიმრებეფი გურიშ გოტახუაშ დო გურიშ მოულაშ მიზეზი რე, მარა ქრისტიანეფქ შილებე შხვა დიდ უსამართლობას შეხვადან, ნამუშ გინოღალა უმოს რთულ რე.

პრობლემეფ კრებას

4. მუჭო შილებე გიმიცადას ქრისტიანიშ რწმენაქ?

⁴ ქრისტიანეფშო მოულოდნელ ვა რე, მუჟამსით კრებაშ გალე შეთმოხვადნა უსამართლობას. მარა ჩქინ რწმენაქ შილებე თი დროს გეგმიცადას, მუჟამსით კრებას ვორწყეთ ვარდა შეფხვადუთ თიცალ მუდგარენს, მუთ უსამართლობათ მიმორჩქუნა. მუჭო მიქციებუთ, მუჟამსით ფიქრენთ, ნამდა კრებას უსამართლობას ქეშეხვადით ვარდა თანაქრისტიანქ — არასწორო მიგექცის? თენა თქვანო დაბრკოლებაშ მიზეზ ხო ვეჸი?

5. მუშენ ოკო ვაგუკვირდას ქრისტიანს, მუჟამსით ორწყე ვარდა შითმოხვადუ უსამართლობას კრებას?

⁵ ჩქი არასრულყოფილეფ ვორეთ დო ცოდა ეთოპჸუნა, ათეშგურშენ შილებე შხვეფშე ქეშეფხვადათ უსამართლობას ვარა ჩქი ქიმვექცუათ უსამართლოთ შხვას (1 იოან. 1:8). თეცალ შემთხვევეფ იშვიათო მოხვადუ, მარა უსამართლობაქ დუდ ქირჩქინ-და, ართგურ ქრისტიანეფს ვაგუკვირდუნა დო თენა თინეფს ვადაბრკოლენს. თე მიზეზით იეჰოვაქ მუშ სიტყვაშე, ბიბლიაშე მუჩეს პრაქტიკულ რჩევეფ, ნამდა ქუდოფსკიდათ ართგურეფქ, თიმწკუმა ხოლო, მუჟამსით ქრისტიანეფშე უსამართლობას შეთმოფხვადუთ (ფსალმ. 55:12—14).

6, 7. მუ უსამართლობას შეხვად ართ ჯიმაქ კრებას დო ნამ თვისებეფქ მეხვარ სწორას მოქციებას?

⁶ გუვარჩუათ ვილი დილიშ მაგალითი. 1931 წანაშ დაჭყაფუს, ჯიმა დილი ართგურო მსახურენდ ბეთელს, შვეიცარიაშ ქალაქ ბერნის. 1946 წანას თიქ გალაადიშ სკოლაშ მაბრუო კლასი გამკორთ ნიუ-იორკის. სკოლაშ თებაშ უკულ, თინა რაიონულ ზედამხედველო დანიშნეს შვეიცარიას. მუშ ბიოგრაფიას, ჯიმა დილი იჩიებ: „1949 წანაშ მესის, მა ქეშვოტყვინე შვეიცარიაშ ფილიალს, ნამდა დაოჯახებას ვაპირენდი“. მუ უპასუხეს თინეფქ? ჯიმა დილი აგრძელენს: „პიონერობაშ მეტი არძანერ პასუხიშმგებლობა მომინწყეს. საჯარო მოხსენებაშ კეთებაშ უფლება ვა მღუდ . . .ბრელ და დო ჯიმა დუც მირიდანდეს დო გარიცხულეფცალო მოქცუდეს“.

⁷ მუჭო მიქცუ ჯიმა დილიქ თე სიტუაციას? თინა იჩიებ: „ჩქი მიჩქუდეს, ნამდა ბიბლია დაოჯახებაშ წინააღმდეგ ვარდ, ათეშგურშენ ირიათო ბლოცულენდით დო იეჰოვას მივანდით თე საქმე“. საბოლათ დაოჯახებაშ გურშენ არასწორ გაგებაქ გეგშესწორ, ნამუქით თე უსამართლობა გიმიწუ დო ჯიმა დილის არძა პასუხიშმგებლობაქ დართუ. იეჰოვაქ თიშ ართგურობა აკურთხუ.a ჯგირ იჸუაფ ჩქინ დუც ქოპკითხათ: „გეგმიფრჩქინანდიო თეცალ უსამართლობაშ დროს იგივე სულიერ თოლწონუას? ჩქიმით ვეცადებუდიო თე პრობლემაშ მოგვარებას დო ვარ ქიმიფთვინენდ დო ქუჯინედ იეჰოვას?“ (იგავ. 11:2; წეკითხით მიქაშ 7:7).

8. მუშენ შილებე მიფრჩქინათ, ნამდა ჩქი ვარა კრებაშ შხვა წევრის უსამართლოთ მიმექცის?

⁸ შილებე მიგორჩქუდან, ნამდა თქვა ვარა კრებაშ შხვა წევრის უსამართლოთ მიგექცის, მუშენდა ჩქი სრულყოფილო ვეშემლებნა ქინვაჭათ საკითხეფს ვარდა ირფელ ფაქტეფ ვა მიჩქუნა. არძა შემთხვევას, ჩქი ზუსტ ინფორმაცია მიღუნა დო ვარინ, იეჰოვას იშენით ლოცვათ ოკო მივენდათ დო ართგურეფქ ქუდოფსკიდათ. თაშ ქიმიფქციებუთ-და, თენა მიმეხვარებნა დუდ ეუჩილითუათ „იეჰოვაშა გარისხებას“ (წეკითხით იგავეფიშ 19:3).

9. მიშ მაგალითეფს გუვარჩიენთ თე დო უკულიან სტატიას?

⁹ მორთ გუვარჩუათ უსამართლო საქციელიშ სუმ შემთხვევა, ნამუქით ჯვეშ დროს მოხვად იეჰოვაშ ხალხწკუმა. თე სტატიას ჩქი გუვარჩიენთ აბრაამიშ მოთაშმოთაშ, იოსებიშ შემთხვევას, მუჟამსით თის მუშ ჯიმალეფქ უსამართლოთ მექცის. უკულიან სტატიას ქობძირუნთ, მუჭო ოქცუდ იეჰოვა ისრაელიშ მეფე ახაბის დო მუ პრობლემეფს შეხვად პეტრე მოციქულქ სირიაშ ანტიოქიას. თე სუმ შემთხვევაშ გარჩიებაშ დროს, დეფიქრით მუჭო შეილებნა სულიერ აზროვნებაშ დო იეჰოვაწკუმა თქვან ურთიერთობაშ შენარჩუნება, განსაკუთრებულო თი დროს, მუჟამსით მიგორჩქუნა, ნამდა უსამართლოთ მიგექცის.

იოსებიქ უსამართლობაშ მსხვერპლიქ ქიჸუ

10, 11. ა) მუ უსამართლობას შეხვად იოსებიქ? ბ) მუშ საშვალებაქ მიაჩუ იოსების ციხეს ხედუნ თინწკუმა?

¹⁰ იეჰოვაშ ართგურ მსახურ იოსებიქ უსამართლობას ხვალე შხვეფშე ვარინ, მუშ ჯიმალეფშე ხოლო შეხვად, ნამუქით ძნელ გინაღალარქ აჸუ. სოდგარენ ეჩ წანერ რდუნ თეშ, თინა ჯიმალეფქ მიტაცეს დო მონათ გეგმოჩეს. იოსებ ძალო მიდეჸონეს ეგვიპტეშა (დაბ. 37:23—28; 42:21). მუსხირენ წანაშ უკულ თის ტყურა ქეკაბრალეს, ითამ შხვაშ ოსურიშ გაუპატიურება ოკოდ დო საქმე ვაგმურკვიებნან თეშ ქუდახუნეს (დაბ. 39:17—20). თინა პატიმრობას დო მონობას დახე 13 წანას ქორდუ. მუშ გურაფა შემლებნა იოსებიშ შემთხვევაშე, მუჟამსით თანაქრისტიანშე უსამართლობაშ შეფხვადუთ?

¹¹ იოსებიქ მუშ ამბე მუწკუმა ხედუნ თი პატიმარს ქეჩუ. თე კოჩ ჭოფუაშახ ფარაონიშ მერიქიფე რდუ. ართო ხედესინ თი დროს თე პატიმარქ სიზმარ ქოძირ, ნამუთ იოსებიქ გეუნწყუ. თიქ უწუ, ნამდა ციხეშე გუტენდეს დო კინ ფარაონიშ მერიქიფეთ დართინუანდეს. მუჟამსით იოსებიქ ღორონთიშ მოხვარათ სიზმარ გენწყუნ, საშვალებაქ ქიმიაჩუ, ნამდა მუშ სიტუაცია ხოლო ქუჩიებინუდკო. ჩქი ბრელ მუთუნიშ გურაფა შემლებნა ხვალე თიშე ვარ, მუთ იოსებიქ თის უწუნ, თიშე ხოლო, მუთ ვა უწუ (დაბ. 40:5—13).

12, 13. ა) მუჭო იძირედ მერიქიფეშა ნარაგად სიტყვეფშე, ნამდა იოსების ირფელიშ იმენდ ვა ფუდ დინაფილ? ბ) მუ ვა უთქუალ იოსების მერიქიფეშა?

¹² წეკითხით დაბადებაშ 40:14, 15. ყურადღება ქიმიაქცით იოსებიშ სიტყვეფს: „მოტაცებულ ვორექ ებრაელეფიშ დიხაშე“. არგამა რდუ, ნამდა თიქ უსამართლობაშ მსხვერპლიქ ქიჸუ. თეს გეძინელ, იოსებიქ თქუ, ნამდა მუთუნ ვადუშებ დო ციხეს უსამართლოთ დახუნეს. თეშ გურშენ თიქ ქოთხუ მერიქიფეს, ფარაონწკუმა ქუმუშინუაფუდკო მუშ სახელ თიშენ, ნამდა უკულ გათავისუფლესკო.

¹³ იოსებიშ სიტყვეფ თიცალ კოჩიშ სიტყვეფს ხო ვაგუდ, ნამუსით ირფელიშ იმენდ აფუ დინაფილ? შუროთ ვარ. თის ჯგირო უჩქუდ, ნამდა ბრელნერ უსამართლობაშ მსხვერპლი რდუ. მერიქიფეს, ნამუსით შეულებუდ თიშა ქუმუხვარებუდკონ, თიქ გასაგებო გეუნწყ ირფელ. ყურადღება ქიმიაქცით, ბიბლიას სოთინ ვა ჭარ, მუჭო იოსებიქ ფარაონს დო ვარა მითინს უწუ, ნამდა თინა მუშ ჯიმალეფქ მიტაცეს. მუჟამსით თიშ ჯიმალეფქ ეგვიპტეშა ქუმორთეს დო იოსების გერიგესინ, ფარაონქ ჯგირო შეხვად თინეფს დო შეთავაზუ მუშ ქიანაშა ოცხოვრებშა ქუმურთუმდესკო დო ქურგებუაფდესკო „ირფელ ჯგირით ეგვიპტეშ დიხას“ (დაბ. 45:16—20).

14. ნამ თვისება დამცვენა უარყოფითო ჩიებაშე, მუჟამსით უსამართლობას შეთმოფხვადუთ კრებას?

¹⁴ მუჟამსით ქრისტიან ფიქრენს, უსამართლოთ ოქცუნან, ფრთხილას ოკო რდას, ნამდა ჭორეფიშ გავრცელებას დუდ არიდას. მუშო ოკო რაგად, მუჟამსით კრებაშ წევრი სერიოზულო ცოდენსინ, საჭირო რე უხუცესეფშა მეულა დო თეშ რაგად (ლევ. 5:1). მარა ბრელ შემთხვევას, მუჟამსით სერიოზულ დანაშაულწკუმა საქმე ვამღუნან, შილებე პრობლემა თეშ მუვაგვარათ, ნამდა ვართ უხუცესეფს დო ვართ მითინს გუვოგებაფუათ (წეკითხით მათეშ 5:23, 24; 18:15). ბიბლიურ პრინციპეფიშ მეჸუნათ ჩქი თვითონ შემლებნა თეცალ საკითხეფიშ მოგვარება. ნამთინე შემთხვევას ჩქი შილებე ქობძირათ, ნამდა სინამდვილეს უსამართლობაშ მსხვერპლი ვაპჸოფეთ. მუჭომ სახიოლო იჸი, მუჟამსით სიტუაციას ვადაბძაბენთ დო თანაქრისტიანს გლახას ვეკვაბრალენთ! რშუდან, ნამდა მართალ ვორეთ დო ვარ მტყუანინ, უარყოფით რაგადით სიტუაცია დღას ვეგშმანწყუენა. მუჟამსით იეჰოვაშ დო ჯიმალეფიშ ართგურეფ ვორეთინ, ვადუშვენთ თეცალ შეცთომას. ფსალმუნმაბირე, პატიოსან კოჩიშ გურშენ იჩიებ: „ტყურას მითინს ვეკაბრალენს მუშ ნინათ, გლახას მუთუნს ვაუკეთენს მუშ მეგობარს დო მუშ ხოლოშიანს შეურაცხყოფას ვე მიორინუანს“ (ფსალმ. 15:2, 3; იაკ. 3:5).

ქორშუდან არძაშ უმოს მნიშვნელოვან ურთიერთობა

15. მუ კურთხევეფ მოუღ იოსების იეჰოვაშ ართგურობაქ?

¹⁵ იეჰოვაწკუმა იოსებიშ ურთიერთობაშე მნიშვნელოვან გაკვეთილს ბგურაფლენთ. თინა 13 წანას ხედ დო თე დროშ დინახალე ქაძირუ, ნამდა იეჰოვაშ თოლით უჯინედ საკითხეფს (დაბ. 45:5—8). თის დღას ვეკუბრალებ იეჰოვაშა მუშ გაჭირება. მართალ რე, თის ვაგოჭყოლად თი უსამართლობა ნამუშ გურშენ იტანჯებუდ, მარა თეშენ ვაგაბოროტებე. არძაშ უმოს მნიშვნელოვან თინა რე, ნამდა არასრულყოფილებაშა დო შხვეფიშ შეცდომეფშა ვემუჩამ საშვალება, მეუტებუდკო იეჰოვა. იოსებიქ ართგურო ქუდოსკიდ დო ქოძირ, მუჭო გიშასწორ იეჰოვაქ თე უსამართლობა დო აკურთხ თინა მუშ ოჯახწკუმა ართო.

16. მუშენ ოკო დევეახლოვათ იეჰოვას ხოლო უმოსო, მუჟამსით კრებას უსამართლობას შეფხვადუთ?

¹⁶ ჩქი ხოლო ოკო დუვაფასათ დო შიმნარჩუნათ იეჰოვაწკუმა ჩქინ ურთიერთობა. ვართ ჩქინ ჯიმალეფიშ არასრულყოფილებას მეფჩათ ოკო თიშ საშვალება, ნამდა დუმაშორან ღორონც, ნამუთ მიჸორა დო თაყვანს ფცენთ (რომ. 8:38, 39). მუჟამსით თანამორწმუნეეფშე შეფხვადუთ უსამართლობასინ, მორთ იოსებცალო უმოსო დევეახლოვათ იეჰოვას დო ქევეცადათ საკითხეფს თიშ თოლით ქუჯინათ. მუჟამსით ბიბლიურ პრინციპეფს პრობლემეფიშ მაგვარებელო გეგმიბრინუანთინ, უკულ იეჰოვას ოკო მივანდათ საქმე დო დარწმუნებულ ვორდათ, ნამდა თინა მუშ დროს საჭირო რენ თეშ მაგვარენს პრობლემას.

ქენდით „მთელ დედამიწაშ“ მოსამართლეს

17. მუჭო შემლებნა ვოძირათ, ნამდა ვონდუთ „მთელ დედამიწაშ მოსამართლეს“?

¹⁷ ონდო თე ქიანას ფცხოვრენთინ, ჩქი უსამართლობას შეფხვადუთ. შილებე ჩქი, ვარდა ჩქინ ნაჩინებუეფქ კრებას ქეშეხვადან, ვარდა ქოძირან უსამართლობა. ვედებრკოლათ თეშ გურშენ (ფსალმ. 119:165). ჩქი ღორონთიშ ართგურ მსახურეფ ვორეთ დო ლოცვათ გიმოფხანტუნთ თიშა მენდებას. თეწკუმა ართო ჩქი თანდაბლურო ვაღიარენთ, ნამდა ირფელ ვამჩქუნა თე საკითხიშ გურშენ. პრობლება თინა ხოლო რე, ნამდა არასრულყოფილებაშ გურშენ ვეშემლებნა ბოლოშა ქინვანჭათ საკითხეფს. მუჭოთ იოსებიშ შემთხვევაშე ბძირითინ, საჭირო რე დუდ ავარიდათ უარყოფითო ჩიებას, მუშენდა თეშნერ საქციელ სიტუაციას ვეგშანწყუნს. საბოლათ, თიშ მანგიორო, ნამდა ვეცადათ პრობლემა ჩქინით მუვაგვარათინ, მორთ ვორდათ ართგურეფ დო მოთვინებათ ქუჯინათ იეჰოვას, თე საკითხიშ გიშასწორებას. თეშნერ საქციელით იოსებცალო ჩქი ხოლო იეჰოვაშ მოწონებას დო კურთხევეფს მიბღენთ. თაშ ნამდა, შემლებნა დარწმუნებულ ვორდათ, მუჭო „მთელ დედამიწაშ მოსამართლე“ სამართლიანო მიქციებუ, მუშენდა „სამართლიან რე თიშ ირ შარა“ (დაბ. 18:25; კან. 32:4).

18. მუს გუვარჩიენთ უკულიან სტატიას?

¹⁸ უკულიან სტატიას გუვარჩიენთ უსამართლო საქციელიშ ჟირ შემთხვევას, ნამუქით ჯვეშ დროს მოხვად. თე მაგალითებშე ჩქი ქიგებგენთ, მუჭო მიმეხვარებნა თანდაბლობა დო პატიებაშ უნარ, ნამდა იეჰოვას მიბაბძათ სამართლიანობაშ გიმორჩქინას.