აპრილ

იესოშ შეწირულ ხორციქ დო დობუნილ ზისხირქ სარგებელ ქუმომღანინ, საჭირო რე, გიშაჸიდირალიშ რწმენა გეგმიბრჩქინათ. თეშ საშვალება არძას უღჷ (ეფეს. 1:7). „შხვა შხურიშ“ წარმომადგენელეფ ვა ღებულენა დო ვართ ოკო ღებულენდან სიმბოლოეფს გოშინაშ ონჯუაშ დროს (იოან. 10:16). მარა, მუშო ოკო რაგად, იესოშ შეწირულ ხორცის დო ზისხირს იშენით მოუღ ჯგირობუა თინეფშა. თინეფ სიმბოლურ გაგებათ ღებულენა სიცოცხლეშ ქობალს, მუჟამსით რწმენას გიმირჩქინანა იესოშ მსხვერპლიშ მიმართ დო ჯერა, ნამდა თის ჯგირობუაშ მოღალა შეულებ თინეფშა (იოან. 6:53). მარა შხვა შხურიშ გინაწონს, თინეფ, მით სიმბოლოეფს ღებულენა, თეთ ოძირანა, ნამდა ახალ შეთანხმებაშ მონაწილეეფ რენა დო ჯერა, ნამდა ზეციერ სამეფოს მმართველეფ იჸუაფუნა. ვა უღჷ მნიშვნელობა, შხვა შხურს ვოკათუთ დოვარ ცხებულ ვორეთ, მარადიულ სიცოცხლეშ მიოღებელო რწმენაშ გიმორჩქინა რე საჭირო. w24.12 13 ¶14, 16

გოშინაშ ონჯუაშ დაწესებაშ დროს იესოქ მოციქულეფს ცომიშ ეიოჸუნაფალ ვა უღუდუნ ფერ ქობალ გეგნაჭირინუ დო უწუ, ნამდა თინა სიმბოლურო მუშ სხეულს ნიშნენდჷ. უკულ ღვინ ხოლო გეგნაჭირინუ დო უწუ, ნამდა თინა სიმბოლურო მუშ ზისხირს ნიშნენდჷ, ნამდგაშ ჭყოლოფათ შეთანხმება გემშეშ ძალაშა (მარ. 14:22–25; ლუკ. 22:20; 1 კორ. 11:24). იესოშ თე სიტყვეფს მანგარ დიდ მნიშვნელობა უღჷ. თე შეთანხმებაქ არძა ადამიანწკუმა ვარინ, ხვალე „სულიერ ისრაელწკუმა“, ანუ თინეფწკუმა იჸუ დოდვალირქ, მით ქრისტეშ თანამმართველეფ იჸუაფუნა (ებრ. 8:6, 10; 9:15). ყურადღება ქიმიაქცით, ნამდა თიმ ონჯუას, მუჟამსით იესოქ გოშინაშ ონჯუა დარსხუ, იჩუ „ჭიჭე ოჭყიშალიშ“ გურშენ, ნამდგაშ პირველ წევრეფ თიშ ართგურ მოციქულეფ რდესჷ, მით თიმ სერს მუწკუმა ართო ჸუნდჷ. იესოქ თინეფს უწუ, ოჭკუმესკო ქობალ დო გეშვესკო ღვინ. გოშინაშ ონჯუაშ აღნიშნებაშ დროს თენა ოკო აკეთესკო თინეფქ ხოლო, მით თე ჭიჭე ჯგუფის ქიგიაძინუდ. თინეფ იესოწკუმა ართო იჸუაფუნა ზეცას. w24.12 11 ¶9, 10

იესოს ხოლოშიან მეგობარქ უღალატ. უკულ თინა ოჭოფეს, ლანძღუნდეს, ლახუნდეს, ტყურეფ ქეკაწამეს, ბრალ ქიგედვეს დო აწამეს. ბოლოს ჯარიშკოჩეფქ თინა თი ადგილშა ქიმიჸუნეს, სოდეთ ღურათ ოკო დასაჯესკო, დო ძელს ქიმკაჭკადეს. იესოქ ართგურო გურზჷ თეშმანწარა ჭუას, მარა მუშ სქუაშ ტანჯებაშ მიმაჯინუ, ვართ იეჰოვას უტანჯებ ნაკლებო. თის უღუდ ძალა, გეიოჩილითუკო მუშ სქუას თეშმადიდა ჭუა, მარა თენა ვაკეთ. მუშენ ვერსხჷ იეჰოვაქ საჸოროფო სქუა თეცალ ტანჯება დო ღურაშე? თენა ჩქინ ჸოროფაშ გურშენ აკეთ. იესოშ მსხვერპლ თიშ არძაშ უმოს დიდ მტკიცებულება რე, ნამდა იეჰოვას მანგარო უჸორს ადამ დო ევაშ გამნარყ დო უჸორქ სი. თიქ არძაშ უმოს საჸოროფო პიროვნება დათმჷ სქანო დო სასწაულ ჭუას გურზჷ, ნამდა დაირსხუკო ცოდა დო ღურაშე (1 იოან. 4:9, 10). არგამა რე, იეჰოვას ოკო, ქიმმეხვარან, ვებრძოლათ ცოდას დო გივორჯგინათ თის! w24.08 6 ¶13, 14

იეჰოვას მუჭო უჸორთინ თეს ხოლო უმოსო ქობძირუნთ, მუჟამსით დეფიფქრებუთ, ნამდა ჩქი გეგშამჸიდესკონ თიშენ, მუშ საჸოროფო სქუაშ ტანჯებაშა აჸუ ოჯინექ, მუთ მანგარ ნწარე იჸუაფუდ თიშო. სატანა ამტკიცენს, ნამდა ღორონთიშ მსახურეფ, სირთულეეფიშ დროს ვა დოსქიდუნა თიშ ართგურეფ დო ხეთეშე ქურთინუანა ოჭიშის. თინა ტყურას იჩიებუდუნ თიშ დამტკიცებელო, იეჰოვაქ იესოს ვეიოჩილითუ ტანჯება დო წამებულო ღურა (იობ. 2:1–5). იეჰოვა ორწყედ, მუჭო გაძიცანდეს იესოს რელიგიურ წინამძღოლეფ, მუჭო ლახუნდეს ჯარიშკოჩეფ დო მუჭო მიკაჭკადეს ძელს. ბოლოს იეჰოვაქ თინა ხოლო ქიმიძირუ, მუჭო ეშალ შურქ მუშ საჸოროფო სქუას წამებულო (მათ. 27:28–31, 39). იეჰოვას სინამდვილეს უღუდ თიშ ძალა, ნამდა თე ირფელ ეიოჩილითუკო მუშ სქუას. მაგალთო, მუჟამსით იესოშ მოწინააღმდეგეეფ იჩიებუდეს, ღორონთ თის ქიწონუანს-და, იმწკუმა ასე ირსხასია, იეჰოვას მართალო შეულებუდ თეშ კეთება (მათ. 27:42, 43). მარა თეს გაკეთენდ-და, ჩქინო გიშაჸიდირალ ვეჸიდ გაფილ დო უიმენდოთ ქუდოფსქიდუდით. თაშ ნამდა, იეჰოვაქ სასწაულ მსხვერპლშა იდჷ – თიქ დაუშვჷ, მუშ სქუაქ სიცოცხლეშ ბოლო წუთეფშახ იტანჯუკო. w25.01 22 ¶7

ახ. Წ. 33 წანაშ 16 ნისან რე. იესოშ მოწაფეეფ განადგურებულ რენა თიშ ღურაშ გურშენ დო შიშ აფუნა ინოჭკირილ. თიშ ჟირ მოწაფე იერუსალიმშე მეურს დო სოფელ ემაუსიშ შარას გიოდირთუ. თე კოჩეფ ღურათებულეფ მეულა, მუშენდა იესო, მიდგას თეზმა ხანს ეკოჸუნდეს დო მესიათ მიორჩქუდეს, დოჸვილეს. ემაუსშა მეულან თეშ, მიდგარენ უჩინებ კოჩ მეურს თე ჟირ მოწაფეშა დო თინეფწკუმა ართო აგრძელენს შარას. გურშეჭირებულ მოწაფეეფ თე კოჩის ეჩიებუნა, მუქ აღოლ იესოს. უკულ თე უჩინებ კოჩ იჭყანს ჩიებას, ნამუთ თე მოციქულეფს დღას ვა გაჭყორდუდეს. თიქ „მოსეშე ქიდიჭყჷ დო არძა წინასწარმეტყველიშ წიგნშე გეუნწყჷ“, მუშენ ოკო იტანჯუკო დო ღურუკო მესიაქ. ემაუსშა ენილესინ, მოწაფეეფქ ქიმეხვადეს, ნამდა თე უჩინებ კოჩ სინამდვილეს, გათელებურ იესო რდჷ (ლუკ. 24:13–35). გათელებაშ უკულ 40 დღაშ დინახალე იესოქ მუშ მოწაფეეფს მუსხირენშა ოძირუ დუდ. შედეგო, გურშეჭირებულ დო შქურნაფილ მოწაფეეფს გურქ ხიოლით ეიაფშეს დო სახიოლო ამბეშ ქადაგებაშ დო შხვეფშა გურაფაშ გაბედულებაქ ქიმიაჩეს. w24.10 12 ¶1–3

ბაღანა დრო მეურსუნ თეშ ირდუ დო თე პროცეს მუშით მეურს, მარა სულიერ რდუალა თაშ მუთუნით ვა მოხვადუ. მაგალთო, კორინთელ და დო ჯიმალეფქ ქიგეგეს სახიოლო ამბე, დინათეს, წმინდა შურ მიღეს დო პავლე მოციქულშე ხოლო ბრელ მუდგარენ დიგურუეს (საქ. 18:8–11). მარა ნათუაშე წანეფიშ მიკულაშ უკულ ხოლო სულიერო ბაღანეფო ქუდოსქიდეს (1 კორ. 3:2). სულიერო მოწიფულეფო გინიფრთათინ, პირველ რიგის საჭირო რე, მთელ გურით მოკოდან თენა. თის, მიდგას შუროთ ვა წუხენს, გამოუცდელ რენ დო უსხუნ, სულიერო „ბაღანათ“ დოსქიდას, დღას ვეშიალებე მოწიფულ ქრისტიანო გინორთა (იგავ. 1:22). ნამთინე ძინათებულ რე, მარა დიდა დო მუმაშ უმშო, მუშით მუთუნ ვეგნაჭყვიდირე. ვა მოკონა, თეცალეფს ვაგურათ. მოკონა, ჩქინ სულიერ რდუალაშე პასუხიშმგებლობა ჩქინ დუდშა გებჭოფათ დო შხვაშ იმენდო ვა ვორდათ. სულიერ მოწიფულობაშა დიო ვა გაფჷ მეჭირნაფილინ ქარწყექ-და, ქილოც დო ქოთხი იეჰოვას, ქიმერჩას „ქოთ სურვილ დო ქოთ მოქმედებაშ ძალა“ (ფილ. 2:13). w24.04 4 ¶9, 10

ბიბლიაშე ბგებულენთ, მუს გინაფლენს იეჰოვა, მუჟამსით ადამიანეფშა განაჩენ გიშუღ (ეზეკ. 33:11). იეჰოვა ახრებულო ვეგნოჭყვიდუნს მითინიშ მარადიულო განადგურებას, თეშ მანგარ სერიოზულ მიზეზ ვა უღუნ-და. თინა ჭყოლოფაშ ეფშა ღორონთ რე დო შურო საშველ ქორენ-და, აპატიენს კოჩის. მიშენ მიჩქუნა ზუსტას, ნამდა ვეგეთელებ? ბიბლია ხვალე მუსხირენ თეცალს მიშინუანს. მაგალთო, იესოშ ნარაგადშე ირწყებე, ნამდა იუდა ისკარიოტელ ვეგეთელებ (მარ. 14:21; იოან. 17:12). იუდას გვალო ჯგირო უჩქუდ, მუს ორთუდ, მარა იშენით შეგნებულო მიდართჷ იეჰოვაშ დო თიშ სქუაშ წინააღმდეგ (მარ. 3:29). იესოქ ნამთინე რელიგიურ ლიდერშე ხოლო, ნამუთ თის ოწინააღმდეგუდ, თქუ, ნამდა ვეგეთელებუდეს (მათ. 23:33; იოან. 19:11). მოციქულ პავლექ ხოლო თქუ, ნამდა ვართ მოუნანიებელ განდგომილეფ გეთელებუდეს (ებრ. 6:4–8; 10:29). w24.05 4 ¶10, 11

იეჰოვაწკუმა ხოლოს ქიპჸით-და, სატანას დღას ვა დაშებე ჩქინდა თიცალ მუთუნ, მუთ ჩქინ ღორონთის ვეგშასწორებე (1 იოან. 3:8). იეჰოვა ახალ ქვეყნიერებას ხოლო გაგრძელენს მუშ ართგურ მსახურეფიშ თხილუას. მარა თექ ხვალე სულიერო ვარინ, ფიზიკურო ხოლო თხილერ იპჸუაფუთ, მუშენდა ბიბლიაშე ბგებულენთ, ნამდა „მეტო ვეჸუაფ ღურა“ (გიმოცხ. 21:4). მართალო მანგარ დიდ პატი რე, სტუმარო ვორდათ იეჰოვაშ კარავს, შხვანერო ქოფთქუათინ, მიღუდან თიწკუმა ხოლოშიან ურთიერთობა (ეზეკ. 37:27. მარა მუ ოკო ვაკეთათ, ნამდა თეცალ ურთიერთობაშ საშვალება მარადიულო ქომღუდან? მაგალთო, მიდგაინშა სტუმარო ქიმიშათინ, ალბათ თეშ მიქციებუდით, მუჭოთ მენძელს უსხუნ. შილებე თის ოკოდას, სტუმარეფქ მინულაშახ კუჩხშა გემინწყან. ალბათ, თქვა ხოლო თაშ გაკეთენდით. თეშნერო, იეჰოვაწკუმა ჩქინ ურთიერთობაქ ირიათო გეგრძელასინ ქუმოკონან-და, ოკო ქიგებგათ, მუს თხულენს ჩქინ მენძელ სტუმარეფშე. იეჰოვაშ მიმართ ჸოროფა გინმოჭყვიდირაფუანა, ნამ შემლებუნან ირფელ გუვაკეთათ, ნამდა „ირნერო გურს მოუჰამუათ თის“ (კოლ. 1:10). ირიათო ოკო ფშუდან, მი რე თინა დო თიშ რიდ მიღუდან თენა მიმეხვარებუნა, მუთუნ თიცალ ვა ვაკეთათ, მუთ გურს უწყუნუანდ თის (მიქ. 6:8). w24.06 4 ¶8, 9

ართშა იეჰოვაქ აბრაამს მოთხუ, მუშ ართკაკალია სქუა შეწირუკო ღორონთის. აბრაამშო თეშ უფრაშ მარჩქილაფარ მუთუნ ვეჸიდ. თიშ უმკუჯინუო, ნამდა თის მანგარ ნწარე აჸიდ თეშ კეთება, იშენით მზათ რდჷ, დემორჩილუკო იეჰოვაშ მითითებას. აბრაამქ ისაკ ოკო ჸვილუკონ თიმ მომენტის, ღორონთიქ გაჩერ თინა. მართალ რე, იეჰოვაქ თის ვაჸვილაფუ მუშ სქუა, მარა თინა თეშ ოკეთებელო მზათ რდუნ თენა ოძირანდჷ, მუს გაკეთენდჷ იეჰოვა მომავალს – აბრაამცალო თინა ხოლო მზათ იჸიდ, მუშ სქუას გამასქიდუკო ჩქინო. თეშმანწარას უჸორს თის ადამიანეფ! (დაბ. 22:1–18). საუკუნეეფიშ უკულ ისრაელეფშა მეჩამილ კანონს იეჰოვა ითხინდჷ, ნამდა ცოდეფქ ქეპატუესკონ თიშენ თინეფქ ცხოველეფ შეწირესკო (ლევ. 4:27–29; 17:11). თე შესაწირავეფ ოძირანდჷ, მუს გაკეთენდ იეჰოვა მომავალს – თინა არძაშ უმოს დიდ მსხვერპლის შეწირენდ, ნამუთ საბოლათ დერსხენდ ადამიანეფს ცოდაშე. ღორონთიშ შთაგონებათ წინასწარმეტყველეფქ ჭარეს, ნამდა ქიმიშ დუნაპირებ გამნარყ, ნამუთ დეტანჯებუდ დო თის შესაწირავ შხურცალო დოჸვილუნდეს. თიქ მუშ საჸოროფო სქუა გაწირ, ნამდა მთელ კაცობრიობა დერსხუკო ცოდა დო ღურაშე. თიქ თენა სქანო ხოლო აკეთ! (ეს. 53:1–12). w24.08 4 ¶7, 8

მუჟამსით ბიბლიას კითხულენთ, ირო ქეცადით, ქიფიქრათ, მუჭო გიმირინუათ ნაგურეფ ცხოვრებას. ბიბლიურ მონაკვეთიშ კითხირიშ დროს დეფიქრით: მუჭო შემლებ თე აზრ გიმიბრინუე ასე ვარდა ხოლოჟამო? მაგალთო, წერმიდგინით, ნამდა ბიბლიას კითხულენთ დო ქიმიოდირთით 1 თესალონიკელეფიშ 5-იშ 17 დო 18-ს. ქეცადით, თე ჟირ მუხლიშ კითხირიშ უკულ გაჩენდათ დო დეფიქრათ, მუზმათ ხშირას დო მთელ გურით ლოცულენთ. შეილებუნა დეფიქრათ თიშე ხოლო, მუშ გურშენ აფუთ ღორონთის მარდულ. მაგალთო, შილებე გეგნოჭყვიდათ, ნამდგაინ სუმ საკითხიშ გურშენ უწუათ მადლობა იეჰოვას. ნაკითხირშე ფიქრის მუსხირენ წუთის ვარა გეგმურთუნთ-და, თენა მიგეხვარებუნა, რდათჷ ღორონთიშ სიტყვაშ მარჩქილეეფ დო საქმეთ ხოლო ქაძირუათ, ნამდა მეჸუნთ თის. თეს ირდღას გაკეთენთ დო ბიბლიაშე ნაკითხირს ირდღას გეგმირინუანთ-და, სულიერო მირდუთ დო უმოს მოწონა გაღვენუნა იეჰოვაშ თოლს. w24.09 4, 5 ¶9, 10

იეჰოვაქ თეშ გუმოჭყეს, ნამდა ჩქინდა უმოს ხიოლ შხვეფშა ჯგირიშ კეთებას მოუღ. მოხიოლუნა, და დო ჯიმალეფშა მოხვარაშ საშვალება მიღუნან. თიმწკუმა ხოლო ბღებულენთ ხიოლს, მუჟამსით თეშ გურშენ მადლობას მირაგადუნა. მარა მადლობა ვამწუანინ ხოლო, ჩქი იშენით მიღუნა ხიოლიშ მიზეზ, მუშენდა მიჩქუნა, სწორას იფქციებუთ, ჯგირს ვორთუთინ. დღას ოკო ვაგმოჭყორდან, ნამდა შხვეფს მუდგაზმა ვა უკეთათინ, „იეჰოვას ბრელით უმოსიშ მოჩამა“ შეულებ ჩქინდა (2 მატ. 25:9). თინა ჩქინო ორთუნ თიზმა, დღას ვა მაკეთებენა იშო შხვეფშა. არძაშ უმოს დიდ ხიოლ იეჰოვაშე ჯილდოშ მეღებას მოუღ. ათეშენ მორთ გინოჭყვიდილ მაფუდან, მივაჸუნათ ჩქინ გურხვე ზეციერ მუმაშ, იეჰოვაშ, მაგალითის. w24.09 31 ¶20, 21

იეჰოვა მოჭყოლოფე რე დო მიშურს შხვეფიშ მდგომარეობაშა (ფსალმ. 103:13; ეს. 49:15). თის გურშა მეუღ შხვეფიშ გაჭირება; ჩქინ ჭუა თიშ ჭუა რე (ზაქ. 2:8). იეჰოვა მოხვარუნა, გეფჩინებაფუათ თინა დო თიშ მეგობრეფო გინიბრთათ (ფსალმ. 25:14; საქ. 17:27). იეჰოვა მანგარ თანდაბალ ხოლო რე; თინა „თუდო გიმიკინანს, ნამდა ქიგნაჯინას ცას დო დიხას. გაჭირებულს ტვერშე წუმადგინუანს“ (ფსალმ. 113:6, 7). მუნერო ოკო ვაიჸორდას ღორონთ, ნამდგას თეცალ თვისებეფ უღჷ?! მოკონა, შხვეფქ ხოლო გეჩინებაფუან თინა. სატანა იეჰოვაშ გურშენ ტყურეფს ოსიმუანს დო ხალხშა გონება აფჷ კილერ, ათეშენ ბრელს ვა უჩქჷ, მუნერ ღორონთ რე თინა (2 კორ. 4:4). ეშმაკიქ თინეფს ქუდაჯერუ, ნამდა იეჰოვა უდუნდებელ ღორონთ რე, არძა ართ აფჷ ხალხიშ მდგომარეობა დო თიშ ბრალ რე არძა უბედრობა, მუთ ქოხვადუნ. მარა ჩქი მიჩქუნა სიმართლე ღორონთიშ გურშენ დო მიღუნა პატი, შხვეფს ხოლო ქუგვოგებაფუათ, მუნერ დიდებულ ღორონთ რე თინა, დო თეშნერო თიშ განდიდებას შეუნწყუათ ხე (ეს. 43:10). w25.01 3 ¶6, 7

პირველ საუკუნეს სატანაშ ხალხ ტყურეფს უსიმუანდჷ ღორონთიშ სქუას ხოლო, ნამუთ სრულყოფილ რდჷ დო ბრელ სასწაულს ორთუდ. მაგალთო, რელიგიურ წინამძღოლეფ ხალხის ურაგადუდეს, ნამდა იესოს დემონეფიშ გიშარაჸუაშ ძალა „დემონეფიშ მართველშე“ უღუდ (მარ. 3:22). მუჟამსით იესო ოჭოფეს, რელიგიურ წინამძღოლეფქ თის ეკაწამეს ღორონთის შეურაცხყოფას მიორინუანსია დო ხალხ ახნარეს, თიშ ჸვილუა მითხისკო (მათ. 27:20). უმოს გვიანო, მუჟამსით ქრისტეშ მიმაჸუნალეფ სახიოლო ამბეს ქადაგენდეს, თინეფიშ მოწინააღმდეგეეფქ ქათარაგადუეს ხალხის დო ჯიმალეფიშ წინააღმდეგ ახნარეს, ნამდა თინეფიშ თხოზინ ქიდიჭყესკო (საქ. 14:2, 19). საქმეეფიშ 14:2-იშ გურშენ 1998 წანაშ 1 დეკემბერიშ „გინაჯინალ კოშკის“ ენწყუმილ რე: „იუდეველ მოწინააღმდეგეეფ თის ვეგეჯერდუდეს, ნამდა მუნეფ ვა ღებულენდეს სახიოლო ამბეს; თინეფ ტყურეფს ეკაწამენდეს ქრისტიანეფს, ნამდა ხალხ ახნარესკო თინეფიშ წინააღმდეგ“. თინა ამდღა ხოლო „ოჩილითუანს მთელ მსოფლიოს“. w24.04 11 ¶15, 16

ადამიან მარადიულო ქიცხოვრენს დო ვარ, თიშა ვა რე დამოკიდებულ, მუჟამ ღურუ. იეჰოვა სრულყოფილ მოსამართლე რე დო ირფელს სამართლიანო გინოჭყვიდუნს (ფსალმ. 33:4, 5). ათეშენ შემლებუნა დარწმუნებულ ვორდათ, ნამდა „მთელ დედამიწაშ მოსამართლე“ ირფელს სწორას გაკეთენს. ადამიან მარადიულ სიცოცხლეს მიღენს დო ვარ, ვართ თიშა რე დამოკიდებულ, სო ცხოვრენს თინა. გამორიცხულ რე, იეჰოვაქ მილიონობით ადამიან „თხალეფო“ ხვალე თიშ გურშენ მირჩქინას, ნამდა თიცალ ადგილს ცხოვრენა, სოდეთ დღას ვეშიალებენა სახიოლო ამბეშ მორჩქილაფა (მათ. 25:46). მთელ დედამიწაშ სამართლიან მოსამართლეს ჩქინ უმოსის ოწუხ ადამიანეფიშ ამბე. ჩქი ზუსტას ვა მიჩქუნა, მუჭო იჸონანს იეჰოვა მოვლენეფს „დიდ გაჭირებაშ“ დროს დო მუჭო განწმინდენს მუშ სახელს ხალხეფიშ წოხოლე. შილებე ნამთინეს, მიდგას ვა ნოღვე საშვალება, ქიმირჩქილუკო სახიოლო ამბე, ზუსტას „დიდ გაჭირებაშ“ დროს მოხვალამირ მოვლენეფქ გინაჭყვიდირაფუას, ქირწმუნას იეჰოვა დო თიშ მხარე ქიდეკინას (ეზეკ. 38:16). w24.05 12 ¶14, 15

იეჰოვაშ ხალხის ართმაჟიაშ მანგარ ალარნა უჩქჷ (2 კორ. 8:4) მარა, რე თიცალ სიტუაციეფ, მუჟამსით თეშ კეთებას გაბედულება ოსაჭირ. მაგალთო, მუჟამსით სოდგაინ ომ იჭყაფ, თექიან უხუცესეფ ირფელს ორთუნა, ნამდა ქიზრუნან და დო ჯიმალეფიშ ფიზიკურ დო სულიერ საჭიროებეფშო დო გამანგარან თინეფ. თინეფს მანგარო უჸორა ქრისტეშ შხურ, ათეშენ, მუნეფიშ უსაფრთხოებას რისკენა, ნამდა და დო ჯიმალეფს აუცილებერქ ვემიოკორდან. თეცალ სიტუაციეფს მანგარ მნიშვნელოვან რე მითითებეფიშ მორჩილება, ნამდა ართობაქ ვამდინან. ათეშენ, მიაჸუნით თი ხელმძღვანელობას, ნამდგას თქვან ფილიალშე მიღენთ (ებრ. 13:17). უხუცესეფქ ირიათო ოკო ქიგნაჯინან საგანგებო სიტუაციეფწკუმა დაკავშირებულ ორგანიზაციაშე მეღებულ მითითებეფს დო თი გეგმას, ნამუთ თეცალ სიტუაციაშო მუნეფს აფუნა მოფიქრებულ (1 კორ. 14:33, 40). გეგმირჩქინით გაბედულება, მარა რდათჷ ფრთხილას (იგავ. 22:3). ონდო მუდგაინს გაკეთენდათ, ჯგირო დეფიქრით. ირნერო ქეცადით, საჭირო ვა რენ ფერ რისკშა ვედათ. მიენდით იეჰოვას. თის შეულებ დორთხილუან, მუჟამსით ოხვარუთ თი და დო ჯიმალეფს, მიდგას ელარნა ოსაჭირ. w24.07 4 ¶8; 5 ¶11

მეფე დავით ჯგირო იჩინენდჷ იეჰოვას დო ბოლოშა ონდუდ თის. მუჟამსით მეფე საულ დო შხვა ნტერეფ თის ოჸვილარო თხოზუდეს, დავით ლოცულენდჷ დო იეჰოვას თხინდჷ მოხვარას. თიშ უკულ, მუთ ლოცვაშ პასუხ ქოძირ დო იეჰოვაშ მოხვარა გეგმოცად მუშ დუდშა, თიქ თქუ: „ცოცხალ ღორონთ რე იეჰოვა“ (ფსალმ. 18:46). თეთ დავითის ხვალე თინა ვა უთქუალ, ნამდა ჯერდჷ, ღორონთ არსებენდუნ. მუჭოთ ართ ნაშრომს ჭარჷ, თის თე სიტყვეფით თიშ რაგად ოკოდ, ნამდა იეჰოვა რე ჭეშმარიტ ღორონთ, ნამუთ ირიათო ოხვარ მუშ მსახურეფს. მეფე დავითის ჯერდჷ, ნამდა იეჰოვა ორწყედ თიშ მდგომარეობას დო მზათ რდჷ, ქიმეხვარუკო. თენა არზენდჷ ძალას, გაგრძელუკო თიშ მსახურება (ფსალმ. 18:28, 29, 49). მუჟამსით დარწმუნებულ იპჸით, ნამდა იეჰოვა ცოცხალ ღორონთ რე, შემალებენა უმოს მონდომათ დო ხიოლით ვემსახურათ თის. თეწკუმა ართო, თენა ქომუჩანა ძალას, ქუგურზათ ირნერ სირთულეს დო მუთუნს ვემეფჩანთ საშვალებას, თიწკუმა ურთიერთობა გილამლუან. w24.06 20, 21 ¶3, 4

მუშ გურაფა შემლებუნა თესალონიკელეფშა მეჭარილ პავლეშ სიტყვეფშე? გურიშგოჩამა მოსაჭირუნა, მუჟამსით ბიბლიას ვემურენ ფერ აზრის იბრჩქილუაფუთ ვარდა მუდგარენ მანგარ გასაკვირ ამბეს ბგებულენთ. დეკვირით, მუქ მოხვად საბჭოთა კავშირიშ დროს. ართშა ჯიმალეფქ მთავარ სამმართველოშ სახელით მიღეს წერილ, ნამუთ, სინამდვილეს, მთავრობაშ მიშნაჯღონა რდჷ. თე წერილ ჯიმალეფს ჩქინ ორგანიზაციაშე გიშართუალას დო ცალკე ორგანიზაციაშ ჩამოყალიბებას ელუჩანდჷ. ართ მეჯინათ თეშ იძირედ, ნამდა მუთუნ ვა რდჷ საეჭვო, მარა ართგურ ჯიმალეფქ ვედეღორეს. თინეფქ ქიმეხვადეს, ნამდა თე წერილს ინოჭარილ ვემურდჷ თი ირფელს, მუთ აიშახ აფუდეს ნაგურეფ ორგანიზაციაშე. ამდღა ხოლო ჩქინ ნტერეფ ინტერნეტის დო სოციალურ მედიას ირინუანა, ნამდა ეჭვეფ გომრჩქინან დო აკოფრთან. თეცალ დროს ოკო ვებობრჯათ დო ემოციეფს ვევაჸუნათ. თექ ვა მაღოლანინ, გურ ოკო ქუგუჩათ, ქიმურენ დო ვარ თი ირფელ, მუდგას იბრჩქილეთ ვარდა პკითხულენთ, თი ჭეშმარიტებას, მუთ აიშახ მაფუნა ნაგურეფ (2 თეს. 2:2; 1 იოან. 4:1). w24.07 12 ¶14, 15

არძაშ უმოს მნიშვნელოვან გადაწყვეტილება იეჰოვაშა დუდიშ მეძღვინუა დო თიშ ოჯახიშ წევრო გინორთა რე. იეჰოვას ოკო, არძა ადამიანქ გუვაკეთათ თენა, ოკო, თიშ მეგობრეფ ვორდათ დო მარადიულო იფცხოვრათ (კან. 30:19, 20; გალ. 6:7, 8). მარა იეჰოვა მითინს ვანძალს მუშ მსახურებას, თის ოკო, თე ამბე არძაქ მუშით გინოჭყვიდას. მუჭო ოკო მეუდირთას კრებაქ ნათილ ქრისტიანს, ნამუთ გინურთანს ღორონთიშ კანონს დო სერიოზულო ცოდენს? თეცალ პიროვნება ოკო ვედიტუან კრებას (1 კორ. 5:13). მარა თეშ უკულ ხოლო, იეჰოვას მანგარო ოკო, თე პიროვნებაქ ინარღას დაშებულ დო დართას თის. თიქ ზუსტას თიშენ გინიგ გიშაჸიდირალ, ნამდა დაშებულს ნარღენან ფერ ადამიანეფს ცოდეფქ ეპატუან. თინეფს, მით სერიოზულო აშენა, მოჸოროფე ღორონთ შურ დო გურით ურაგად, ნამდა ინარღან მუნეფიშ საქციელ (ზაქ. 1:3; რომ. 2:4; იაკ. 4:8). w24.08 14 ¶1, 2

მუშ მასმა წერილს მოციქულქ ჭარჷ, მუშმაშხვა ხიოლ მოუღუდ თიშა თიშ ძირაფას, ნამდა და დო ჯიმალეფ ომორჩილუდეს იეჰოვას. თიმ პერიოდის კრებაშა ნამთინეს ტყურა გურაფეფ მიშუღუდ დო ართობას ოცილუდ. მარა რდესჷ თიცალეფ ხოლო, მით სიმართლეშ შარას გეჸუნდეს. თინეფ ომორჩილუდეს იეჰოვას დო მეჸუნდეს ღორონთიშ მცნებეფს (2 იოან. 4, 6). თე ქრისტიანეფ მუნეფიშ ართგურობათ ხვალე მოციქულ იოანეს ვარინ, იეჰოვას ხოლო უხარენდეს გურს (იგავ. 27:11). მუს ბგურაფლენთ თავრეშე? იეჰოვაშ ართგურობას ხიოლ მოუღ (1 იოან. 5:3). მაგალთო, ჩქინდა დიდ ხიოლ მოუღ თიშ რჩქინას, ნამდა ღორონთის უხარენთ გურს. იეჰოვას გურ ხიოლით აფშაფ, მუჟამსით ორწყე, მუჭო გივორჯგინანთ ცდუნებეფს დო გეპჸუნთ ჭეშმარიტებაშ შარას, ჩქინ ართგურობაშ ძირაფა ხვალე იეჰოვას ვარინ, ანგელოზეფს ხოლო მანგარო ოხიოლუნა (ლუკ. 15:10). მუშო ოკო რაგად, ჩქი ხოლო მანგარო მოხიოლუნა, მუჟამსით ვორწყეთ, მუჭო სქიდუნა ჩქინ და დო ჯიმალეფ იეჰოვაშ ართგურეფ (2 თეს. 1:4). მალას, მუჟამსით სატანაშ ქვეყნიერება სადღამუშოთ მისპუ, არძას გურ კმაყოფილებათ მაჸინა ეფშა, მუშენდა შემალებუეს თე უდუნდებელ ქვეყნიერებას იეჰოვაშ ართგურეფქ ქუდოფსქიდითკო. w24.11 12 ¶17, 18

მუზმა ხანს ოკო გეგრძელას დაკვირებაქ? მორწონსინ თი პიროვნებაშა ხეთეშე ქიმურქ-და, შილებე იფიქრას, ნამდა ემოციეფს ეჸუნქ დო უდუფიქრებუო ღებულენქ გადაწყვეტილებეფს (იგავ. 29:20). მარა ვართ ბრელ დროშ ღალა რე ჯგირ, განსაკუთრებულო თიმწკუმა, მუჟამსით მეხვალამირ რე, ნამდა მორწონს, მუშენდა თაშ ქიმიქციებუქ-და, შილებე იფიქრას, ნამდა გიჭირს გადაწყვეტილებეფიშ მეღება (ეკლ. 11:4). ონდო თიშა ქიმურქ დო სქან გრძნობეფიშ გურშენ ეჩიებუქ, აუცილებერ ვა რე, დარწმუნებულ რდე, ნამდა თე პიროვნება იჸუაფ სქან მეუღლე. მთავარ რე, თიშა რდე დარწმუნებულ, ნამდა მზათ რექჷ დაოჯახებაშო დო მიგორჩქუდას, ნამდა თინა ჯგირ მეუღლე იჸუაფ სქანო. მუ ოკო აკეთე, მუჟამსით გინაფლენქ, ნამდა მიდგაინს მოწონქ? თეცალ გრძნობა თიშ მიმართ სი ვაიღუნ-და, სქან საქციელით ქიმიოხვამილე. მანგარ გლახა იჸი, სქან მოქმედებეფით პიროვნებას იმენდ გურჩქინე, მუჟამსით შუროთ ვაილამ თიწკუმა ურთიერთობაშ დოჭყაფა (ეფეს. 4:25). w24.05 22, 23 ¶9, 10

ხვალე ართგურ ცხებულეფს მიაჩამნა იესოშ სამეფოს დოსქილადაშ უფლება. ნამდგაინ ცხებულ სულიერო კურცხას ვა დოსქიდუნ-და, ვეჸუაფ „გიშაგორილეფ“ შქას (მათ. 24:31). მარა ღორონთიშ არძა მსახურქ, ვა უღჷ მნიშვნელობა ზეცას ცხოვრებაშ იმენდ მიღუნა დოვარ დედამიწას, ოკო ალეფრჩქილუათ იესოშ თე გაფრთხილება – კურცხას ვორდათ დო ართგურო ქუდოფსქიდათ. ჩქი იეჰოვა მანგარ ჯგირო მაფუნა გაჩინებაფილ დო ბჯერა, ნამდა თინა ირო ირფელს სამართლიანო ორთჷ. თაშ ნამდა, იეჰოვა ჩქინ დროს ხოლო, გეგშაგორუნს მუშ ნამთინე მსახურს ცხებულო-და, კითხვეფ ვამრჩქინდუნა. ჩქი ფშუნა, მუ თქუ იესოქ მუშ იგავს ბინეხის ომუშებშა მა-11 საათის მოულირ მუშეფიშ გურშენ (მათ. 20:1–16). თინეფს ხოლო, მიდგაქ უმოს გვიანო მორთეს ომუშებშა, თისხი უგეს, მუზმათ უმოს ადრე მოულირეფს. თაშ ნამდა, ვა უღჷ მნიშვნელობა, მუჟამ გიშაგორუნს იეჰოვა მუშ მსახურეფს ცხებულეფო, თინეფ ართგურო ქუდოსქიდუნან-და, არძა მიღენა ზეციურ ჯილდოს. w24.09 24 ¶15–17

იესოქ თიშ სრულყოფილ მაგალით დომტუეს, მუჭო ოკო მიფქცუათ, მუჟამსით უსამართლობას შეფხვადუთ. ქიგიშინით, მუ დო მუ უსამართლობას შეხვად თიქ, იჸიდუო თენა ოჯახიშ წევრეფშე დოვარ შხვეფშე. ნათესეეფ, მიდგას ვა წანდეს თიშ, იჩიებუდეს, ჭკუაშე გინულებუნია. რელიგიურ ლიდერეფ აბრალუაფუდეს, დემონეფიშ საქმეს ორთუნია. ოჭოფესინ თიმწკუმა, რომაელ ჯარიშკოჩეფ გაციგანუდეს თის, აწამენდეს დო ბოლოს გვალო დოჸვილეს (მარ. 3:21, 22; 14:55; 15:16–20, 35–37). მარა იესოქ ირფელ ქიმითვინ დო მანგიორ მითინშა ვეგნუგაფ. მუშ გურაფა შემლებუნა თიშე? (1 პეტ. 2:21–23). იესოქ თიშ სრულყოფილ მაგალით მუჩეს, მუჭო უპასუხათ უსამართლობას. თის უჩქუდ, მუჟამ ოკო იჩუკო დო მუჟამ უჯგუდ, შურო მუთუნ ვა თქუკო (მათ. 26:62–64). თინა ვა პასუხენდჷ არძა ტყურას, ნამდგას ეკაწამენდეს (მათ. 11:19). მარა, მუჟამსით გინოჭყვიდუნდჷ, პასუხ ქიმეჩუკო, შეურაცხყოფას ვემიორინუანდჷ დო ვარცქინანდჷ მოწინააღმდეგეეფს. w24.11 4, 5 ¶9, 10

წერმიდგინით ნამდა მიდგაინს თიცალ საჩუქარ ქაჩუქით, მუთ ქოთ მანგარ სქვამ რე დო ქოთ გიმადირთუნ ფერ მუდგარენ რე. მუს იგინანდით, თე პიროვნებაქ თქვან საჩუქარ სოდგარენ ქიმკაჩუ დო შურო ქოუღუნ თინა ხოლო ვა შუნ-და? მუშო ოკო რაგად, მანგარო ქელგაჭუდეს გურ. თქვა ალბათ თინა გახიოლედეს, ნამდა გეგმურინუაფუდუკო საჩუქარ დო მარდულ გაფუდესკო თიშო. მუშენ მიპჸუნით თე მაგალით? იეჰოვაქ ხოლო მანგარ დიდ საჩუქარ მიკეთეს – მუშ სქუა გაწირ ჩქინო. წერმიდგინით, მუჭო გეხარებ თის გურ, მუჟამსით დუვაფასენთ თე სასწაულ საჩუქარს დო თი დიდ ჸოროფას, ნამდგაქ თის თე საჩუქარ ოკეთებაფუ ჩქინდა! (იოან. 3:16; რომ. 5:7, 8). დროშ ულაწკუმა ართო, გიშაჸიდირალიშ გურშენ იეჰოვაშ მიმართ მარდულობაქ მემდინეს-და, თენა თიცალ იჸუაფუდ, ნამდა თიშ საჩუქარ სოდგარენ ქიმთვოჩვეთკო დო შურო ვეგიფშინითკო. თექ ვა მოხვადასინ, ხშირას ოკო იფიფქრათ, მუშმაშხვა მუდგარენ მიკეთეს იეჰოვაქ დო იესოქ. w25.01 26 ¶1, 2

ჯიმაქ უხუცესიქ ქიჸუასინ, „ოკო ვა რდასჷ რწმენას ახალ“. მართალ რე, უხუცესო დენიშნენ, აუცილებერ ვა რე, ბრელ წანაშ ნანათა რდე, მარა საჭირო რე, სულიერო მოწიფულ ქრისტიან რდე, მუდგაშ მენჭირნაფას დრო ოსაჭირ. სქან საქმეეფით ქაძირე, ნამდა იესოცალო თანდაბლურო ასრულენქ ირნერ დავალებას დო მოთვინებათ უჯინექ იეჰოვას, მუჟამ მერჩანს უმოს პასუხიშმგებლობეფს კრებას (მათ. 20:23; ფილ. 2:5–8). უხუცესიშ ხოლო ართ მოთხოვნა რე, „რდასჷ ართგურ“. თე მოთხოვნას აკმაყოფილენქინ თეს თით ქაძირანქ, ნამდა მიაჸუნუქ იეჰოვაშ სამართლიან ნორმეფს დო ორგანიზაციაშე მეღებულ ხელმძღვანელობას. წმინდა წერილეფ პირდაპირ იჩიებ, ნამდა ზედამხედველს „ოკო შეულებუდას შხვაშა გურაფა“. ნიშნენსო თენა, ნამდა აუცილებერო ორატორ ოკო რდე დო სასწაულ მოხსენებეფით გიშეშე? ვარ. ბრელ უხუცეს იშენდოიშენ ჯგირ მომხსენებელ ვა რე, მარა თინეფს ჯგირო შეულებუნა ოგურუან შხვეფს მსახურებაშ დროს დო სამწყემსო მონახულებეფს. w24.11 23, 24 ¶14, 15

ბიბლიაშ კითხირიშ დროს ნამდგაინ მონაკვეთის ჯგირო ვეგეგენთ-და, გეგმირკვით თინა. უკულ ქეცადით, მთელ დღაშ დინახალე იფიქრათ თიშე, მუთ იკითხით, დო თიშე ხოლო, მუთ კითხირებულშე დიგურეთ იეჰოვაშ, თიშ სქუაშ დო თინეფიშ ჸოროფაშ გურშენ (ფსალმ. 119:97). ირ კითხირიშ დროს მუდგაინ ახალს ვა ძირუნთ-და, გურქ ვა გოიტირხან. შილებე ირაგადუას, ნამდა მუდგარენნერო მობგენთ თი კათას, მით ოქროს გორუნს. მინშა თინეფ საათეფს დო დღალეფს ხოლო მუშენა, ნამდა ოქროშ აკაბცხა ნოტეხის ვარა ქიმიოგორუან, მარა გურ ვეუოლუნა გორუაშა, მუშენდა თინეფშო ოქროშ გვალო ჭიჭე ნოტეხ ხოლო მანგარ ძვირფას რე. მუშო ოკო რაგად, ოქროშე ბრელით უმოს ძვირფას რე თი ბიბლიურ აზრეფ, ნამდგას გიმორკვიებაშ დროს მივოგორუანთ (იგავ. 8:10). თაშ ნამდა, მოთვინება გეგმირჩქინით დო მიაჸუნით ბიბლიაშ კითხირიშ გეგმას (ფსალმ. 1:2). w25.01 25 ¶14, 15

იეჰოვა ელჷ, ნამდა მზათ იპჸუაფუთ ქუვაპატუათ თინეფს, მიდგაქ მოწყინებაფეს (ფსალმ. 86:5; ლუკ. 17:4; ეფეს. 4:32). შილებე მიდგაინიშ ნარაგადიშ ვარდა საქციელიშ გურშენ მანგარო ქელმაჭვან გურქ, განსაკუთრებულო თიმწკუმა, მუჟამსით მეგობარ ვარდა ოჯახიშ წევრ იქციებ თაშ (ფსალმ. 55:12–14). მინშა შილებე თექ თიცალო მიწყუნუან გურ, ნამდა ხამუშ გეშქუმალაცალქ მაჸუან (იგავ. 12:18). თეცალ დროს შილებე იფიფქრათ, ნამდა შურო ოკო ვემვაქცუათ ყურადღება ჩქინ გრძნობეფს, მარა თეს ქივეცადებუთ-და, თენა თიცალ იჸი, ნამდა ხამ ქუმმოგან დო თინა ნჭყოლირ ადგილს ქინიპტუათ. ოკო ვეფიფქრათ, ნამდა წყენას შურო ყურადღებას ვემვაქციენთ-და, ირფელ მუშით გეგშენწყუაფ. მუჟამსით მოწყინუანა, ჩქინ პირველ რეაქცია გურიშმოულა რე. მუჭოთ ბიბლიას ჭარჷ, მინშა შილებე კოჩიქ მუდგარენშე გერისხას. მარა თინა მაფრთხილენა, ნამდა თე ემოციაქ გვალო ვეპჭოფან ვარდა გურს ვალმოსქიდან წყენაქ (ფსალმ. 4:4; ეფეს. 4:26). მუშენ რე თენა მნიშვნელოვან? მუშენდა გარისხებულ კოჩიშ მოქმედებაქ ჯგირქ მუჭო ოკო იჸუას?! (იაკ. 1:20). ირო ოკო ფშუდან: შილებე გარისხებაშე დუდიქ ვა მაჭოფან, მარა გურმოულირო დოფსქიდუთ დო ვარინ თენა, უკვე ჩქინ ხეს რე. w25.02 15 ¶4–6

იესოქ ართ იგავით მოძირუეს, ნამდა თიცალ კოჩ, მით ფარას შაყარანს, მარა „ღორონთიშ თოლს ვა რე ქონებიერ“, უჭკუე რე (ლუკ. 12:16–21). მითინს ვა მიჩქუნა, მუ მოხვადუ ჭუმან (იგავ. 23:4, 5; იაკ. 4:13–15). თეწკუმა ართო, ქრისტექ თქუ, ნამდა, მიდგას თიშ მეჸუნა ოკოდ, სირთულეეფ აღვენუდ დო მზათ ოკო რდუკო მთელ მუშ ქონებაშ დათმებელო ხოლო (ლუკ. 14:33). ზუსტას თექ მოხვად პირველ საუკუნეს იუდეას მახორუ ქრისტიანეფიშ შემთხვევას, მარა თინეფქ თენა ხიოლით აკეთეს (ებრ. 10:34). ამდღა ხოლო ბრელ ჩქინ და დო ჯიმა ფინანსურო იზარალებ თიშ გურშენ, ნამდა ნამთინ პოლიტიკურ პარტიას ვა უკინენს ხუჯის (გიმოცხ. 13:16, 17). მუ ოხვარ თინეფს თეცალ მზადყოფნაშ გიმორჩქინას? თე და დო ჯიმალეფს ჯერა იეჰოვაშ დუნაპირებუშ: „დღას ვა დოიტენქ დო დღას ვემგოტენქ“ (ებრ. 13:5). თაშ ნამდა, ჭკვერულო იფქციებუთ, მუჟამსით ფიფქრენთ მომავალშო, მარა, ვეველუთინ ფერ მუდგარენქ ქუმოხვად-და, დარწმუნებულ ვორეთ, ნამდა იეჰოვა ვემმოტენა. w25.03 29 ¶13, 14

იეჰოვა ველჷ, ნამდა ხვალე ჩქინით ქიმვოჭირინუანთ მოწიფულობას. კრებას პჸუნა ჭყიშეფ დო მასწავლებერეფ, მით მომზადებულ რენა, თითოულს ქიმმეხვარან, გინიფრთათ სულიერ გაგებათ „ძინათებულეფო“ დო თიცალ მოწიფულეფო, მუნერით ქრისტე რდჷ (ეფეს. 4:11–13). თეწკუმა ართო, იეჰოვა მარზენა წმინდა შურს, ნამდა „ქრისტეშ აზროვნება“ მიღუდან (1 კორ. 2:14–16). ხოლო ართ, მუდგათ იეჰოვა მოხვარუნა, რე თიშ შთაგონებათ ჭარილ ოთხ სახარება, სოვრეშეთ ბგებულენთ, მუჭო ფიქრენდჷ, იჩიებუდ დო იქციებუდ იესო დედამიწას მსახურებაშ დროს. ქრისტეცალ აზროვნებაშ გავითარება დო თიცალო მოქმედება ქიმმეხვარებუნა, მოწიფულ ქრისტიანეფო გინიფრთათ. სულიერო მოწიფულეფო გინიფრთათინ, ოკო ვეგეფსქიდათ თი რჩქინას, ნამუთ ქრისტეშ გურშენ დაჭყაფუს მიბღით. w24.04 4, 5 ¶11, 12

ირდღას ბღებულენთ გადაწყვეტილებეფს. ნამთინე საკითხ მანგარ ეფ გინაჭყვიდირალ რე, მაგალთო, მუ პჭკუმათ დღაშ დინახალე ვარდა მუჟამ დიბრულუათ. მარა ირო თეშმაეფას ვა რე საქმე. მინშა შილებე გამჭირდან გადაწყვეტილებაშ მეღებაქ თიცალ საკითხწკუმა დაკავშირებით, ნამუთ იმოქმედენს ჩქინ ცხოვრებაშა, ჯანმრთელობაშა, საჸოროფო ადამიანეფშა დო ღორონთიშ მსახურებაშა. მუჭოდგა ვა რდასინ, მოკონა, თიცალ გადაწყვეტილებეფ მიბღათ, მუთ ჯგირობუას მომღანა მუჭოთ ჩქი, თეშ ჩქინ ოჯახის, დო, მუთ არძაშ უმოს მთავარ რე, გურს გუხარენს იეჰოვას (რომ. 12:1, 2). ჭკვერულ გადაწყვეტილებაქ ქიმმაღებუანინ, პირველ რიგის, ოკო ქიგებგათ არძა საჭირო ინფორმაცია. მუშენ რე თეშ კეთება მნიშვნელოვან? წერმიდგინით თეცალ სიტუაცია: მიდგარენს ჯანმრთელობაშ სერიოზულ პრობლემა უღჷ დო ექიმშა მეურს. მუს ქიმინუნს ექიმ? მუთუნს ვა კითხენს დო გამოკვლევეფს ვა ჩუტარენსინ თეშ დუჭყანსო მკურნალობას? მუშო ოკო რაგად, ვარ. თეშნერო, თქვა ხოლო, პირველ რიგის არძა საჭირო ინფორმაციას ქიგეგენთ-და, უმოსო შეგალებენა ჭკვერულ გადაწყვეტილებაშ მეღება. w25.01 14 ¶1–3

მუ მიჩქუნა იეჰოვაშ ჭყოლოფაშ გურშენ? მუჭო ოძირანს თინა, ნამდა მართალო „ვაკო, მითინქ დოღურას?“ (2 პეტ. 3:9). ქიგიფშინათ, მუნერ ჭყოლოფა გიმირჩქინ თიქ ნამთინე ადამიანიშ მიმართ, მიდგაქ სერიოზულო დაშუ. მაგალთო, მეფე დავითის თიცალ სერიოზულ ცოდეფ უღუდ ღორონთიშ წოხოლე, მუნერით რე უზნეობა დო კოჩიშ ჸვილუა, მარა თიქ ინარღჷ მუთ დაშუ, დო იეჰოვაქ ხოლო მთელ გურით ქაპატუ (2 სამ. 12:1–12). მეფე მენაშე ხოლო მუშ ცხოვრებაშ უმენტაშის მანგარ უბადოთ იქციებუდ. მარა იეჰოვაქ თეცალ კოჩწკუმა ხოლო ქოძირ ჭყოლოფაშ გიმორჩქინაშ დო პატიებაშ მიზეზ, მუშენდა თიქ მიკირთჷ იეჰოვაჸურე (2 მატ. 33:9–16). თე მაგალითეფ გუმოშინანა, ნამდა იეჰოვას ჭყოლოფაშ გიმორჩქინაშ შურო აკაბცხა მიზეზ ვარა ქოუღუნ-და, მუთუნით ვა თქუანს თეშე ვარიას; თინა გათელენს თეცალ ადამიანეფს, მუშენდა ქუგოხვადეს, მუშმაშხვა აფუდეს დაშებულ ღორონთიშ წოხოლე დო მთელ გურით ინარღეს. w24.05 4 ¶12