ᲒᲐᲙᲕᲔᲗᲘᲚ 92
იესო მეჩხომეეფს დუდის ოძირანს
იესოქ მოციქულეფს დუდ ოძირუნ თევრეშე ბრელ ხან ვა რდჷ მიკულირ, მუჟამსით პეტრექ გალილეაშ ზღვაშა ოჩხომშა ულა გეგნოჭყვიდ. თომაქ, იაკობიქ, იოანექ დო მუსხირენ მოწაფექ ხოლო ქაჸუნეს თის. თინეფ მთელ სერს ჩხომენდეს, მარა მუთუნქ ვაჭოფეს.
ოჭმარეს ადრე ქოძირეს, ნამდა წყარპიჯის მიდგარენ კოჩ გერდჷ. თიქ ქუდუძახ თინეფს დო კითხჷ, ოჭოფითიაო მუთუნ. თინეფქ უპასუხეს, ვარია. თიმწკუმა თე კოჩიქ უწუ: „ნავიშ მარძგვან მხარეს ქაჸათით ბადე“. თინეფქ ხოლო თაშ მიქცუეს დო ბადექ ჩხომით თეშ გეიფშჷ, ნამდა ნავშა ვეგშაღინეს. იოანექ უცფას ქუგოხვად, ნამდა თე კოჩ იესო რდჷ დო თქუ: „თენა უფალ რე!“. პეტრექ თენა ქიგეგუნ, ხეთე წყარშა ქოსხაპ დო იესოჸურე მიდანჩურ. შხვა მოწაფეეფქ თის ნავით ქეკაჸუნეს.
წყარპიჯშა ქიმერთესინ, ქოძირეს, ნამდა ჩხომ იჭუდ დო ქობალ ხოლო თექ ელუძუდ. იესოქ თინეფს თხუ, ჭიჭე მუნეფიშ ნაჭოფა ჩხომ ხოლო ქიგუძინესკო. უკულ უწუ, მორთით, ართო ოპჭკუმათია.
ჭკუმუა გათუესინ, იესოქ პეტრეს კითხჷ: ჩხომუაშე უმოსო ქოიჸორქო? პეტრექ უპასუხ: ქო, უფალ, სი ხოლო გიჩქჷ, ნამდა მიჸორქ. იესოქ უწუ: იმწკუმა, დადიარე ჩქიმ კირიბეფ. უკულ კინ ქოკითხჷ: პეტრე, ქოიჸორქო? პეტრექ კინ უპასუხ: უფალ, ხომ ქოიჩქ, ნამდა მიჸორქ?! იესოქ უწუ: „დოჭყიშე ჩქიმ ჭიჭე შხურეფ!“. უკულ იესოქ მასმაშა ქოკითხჷ, გიჸორქიაო. პეტრეს გურქ დოჭყორდჷ დო უწუ: „უფალ, სი ირფელ გიჩქჷ; გიჩქჷ, ნამდა მიჸორქ!“. იესოქ უპასუხ: „დადიარე ჩქიმ კირიბეფ!“. უკულ უწუ: „ქეკმაჸუნ!“.
«[იესოქ] უწუ თინეფს: „ქეკმაჸუნით დო ქუდგოგურუანთ ადამიანეფიშ ჩხომუას!“ თინეფქ ხეთეშე ქიდიტუეს ბადეეფ დო ქეკაჸუნეს» (მათე 4:19, 20).