იესოშ ღურა გოლგოთას

უნჩაშ მღვდელეფქ იესო გამგებელ პილატეშ სასახლეშა მიდეჸუნეს. პილატექ უნჩაშ მღვდელეფს კითხჷ: „მუს აბრალუაფუთ თე კოჩის?“. თინეფქ უპასუხეს, თის დუდ მეფეთ მოუღუნია. უკულ პილატექ იესოს კითხჷ: „სი რექო იუდეველეფიშ მეფე?“. იესოქ უპასუხ: „ჩქიმ სამეფო თე ქიანაშ ნაწილ ვა რე“.

თიმწკუმა პილატექ იესო ჰეროდეშა, გალილეაშ მმართველშა, გოუტუ, მუშენდა ქიგეგუკო, მუთუნ ბრალს ქიგედვანდუო ჰეროდე. მარა ჰეროდეს გლახა მუთუნ ვაუხვილუაფ იესოშა დო ათეშენ კინ პილატეშა გოუტუ. თიმწკუმა პილატექ ხალხის უწუ: ვართ მა დო ვართ ჰეროდეს მუთუნ ბრალქ ვეგმადვინეს თე კოჩშა. ათეშენ გუვათავისფალენქ თის. ხალხიქ თენა ქიმირჩქილუნ, ღვარაფ ქიდიჭყეს: დოჸვილ თინა, დოჸვილ! ჯარიშკოჩეფ მართახით ლახუნდეს თის, გაფურტინანდეს დო მიოგანდეს. უკულ დუდის ძიგირიშ გვირგვინ ქიგედგეს დო გაძიცანდეს: „ჯგირობუა, იუდეველეფიშ მეფე!“. პილატექ კინ უწუ ხალხის: თე კოჩშა გლახა მუთუნ ვამხვილუაფ. მარა ხალხ უმოსო ღვარანდჷ: „ძელს ქიმკაჭკად!“. თაშ ნამდა, ბოლოს პილატექ იესო თინეფს გეგნოჩ, ნამდა ღურათ დასაჯესკო.

ჯარიშკოჩეფქ იესო მიდეჸუნეს ადგილშა, ნამდგას „გოლგოთა“ ჯოხოდ დო ძელს ქიმკაჭკადეს. თე დროს იესოქ ილოც დო იეჰოვას უწუ: „მუმა, ქაპატი თინეფს, მუშენდა ვა უჩქუნა, მუს ორთუნა“. ხალხ იესოს გაძიცანდჷ დო ურაგადუდეს: ღორონთიშ სქუა ქორექ-და, გიმილ ძელშე! ირსხჷ სქან დუდ!

ართ უბადოშ მაკეთებელქ, ნამუთ იესოშ გვერდით მიკოჭკადუდ, თის უწუ: „ქუგომშინ, მუჟამსით სქან სამეფოს იჸუაფუქ“. იესოქ თის დეპირ: „ჩქიმწკუმა ართო იჸუაფუქ სამოთხეს“. სოდგარენ ონდღეშ 12 საათშე 3 საათშახ მთელ თი ადგილქ დეუკმელ. იესოშ ნამთინე მოწაფე ძელწკუმა გერდჷ, თინეფ შქას რდჷ მარიამ, იესოშ დიდა. იესოქ იოანეს დავალ, მუშ დიდაცალო ქიმკაჯინუკო მარიამს.

ბოლოს იესოქ თქუ: „შისრულ!“. თიქ დუდის გიმუკინ დო შურქ გეშალ. თე დროს ძალიერ დიხანწალუაქ ქუმოხვად. ტაძარიშ მონკა ფარდაქ, ნამუთ წმინდას დო წმინდაშეწმინდას ართიანშე რთუნდჷ, შქას გოხორცქჷ. თიმწკუმა თეშ მაძირაფ შქურნაფილ ოშიშდუდიქ თქუ: თინა მართალო ღორონთიშ სქუა რდჷ!