პეტრე ივარიენს, ნამდა იესოს იჩინენს

ბოლო ოსერშეშ დროს, მუჟამსით იესო მუშ მოციქულეფწკუმა ართო ართ-ართ ჸუდეშ ჟინ ოთახის რდჷ, თინეფს უწუ: ამსერ არძა მიმოტენთ. პეტრექ უპასუხ: მა ვარ! არძაქ მიგოტუასინ ხოლო, მა დღას ვემგოტენქ! მარა იესოქ პეტრეს უწუ: მუმულიშ ჸიონშახ სუმშა ივარიენქ, ნამდა მიჩინენქ.

მუჟამსით ჯარიშკოჩეფქ იესო კაიაფაშ ჸუდეშა მიდეჸუნეს, მოციქულეფიშ უმენტაშიქ ინტჷ. მარა ჟირქ ხალხის ქეკაჸუნ. თე ჟირშე ართ პეტრე რდჷ. თიქ კაიაფაშ ჸუდეშ ოზეშა გემნორთჷ დო დაჩხირწკუმა იტიბუანდჷ. დაჩხირიშ სინთეს ართ მოინალე ძღაბიქ ქიჩინ პეტრე დო უწუ: მა სი გიჩინენქ, იესოწკუმა ართო რდი!

პეტრექ უპასუხ: ვარ, ვა ვორდჷ. ვა მიჩქჷ, მუშ ამბეს რექჷ! უკულ კარმინოლჸურე მიდრათჷ, მარა თექ ხოლო ართ მოინალე ძღაბიქ ქოძირ დო ხალხის უწუ, თე კოჩ იესოწკუმა ართო რდუა. პეტრექ თქუ: თეშ ხოლო ვეფჩინენქ იესოს! მარა ართ კოჩიქ უწუ: ქო, ნამდვილო თინეფიშიან რექჷ. სქან რაგადშე ხოლო იჩინებე, ნამდა სი ხოლო გალილეაშე რექჷ. მარა პეტრექ დიფუჩუ, ვეფჩინენქია თის.

თე დროს მუმულქ ხოლო ქიმიოჸიონ. პეტრექ მიკიჯინ დო ქოძირ, ნამდა იესო უჯინედ. თის იესოშ სიტყვეფქ ქუგაშინ, გალე გეგმოლ დო ჩხე ჩილამურით ინგარდჷ.

ეშობას იუდეველეფიშ სასამართლოქ, სინედრიონქ, კაიაფაშ ჸუდეს გეკიშაყარ, ნამდა თექ გასამართლესკო იესო. თინეფს თეიშახ აფუდეს გინოჭყვიდილ იესოშ ჸვილუა დო ასე უბრალოთ მიზეზის გორუნდეს. მარა მუთუნნერ მიზეზიქ ვაგორესინ, კაიაფაქ პირდაპირ კითხჷ იესოს: ღორონთიშ სქუა რექო? იესოქ უპასუხ: ქო, ვორექ. კაიაფაქ თქუ: ღორონთის ლანძღუნს! თეშ უმოს მიზეზ მუ მოკონა?! სინედრიონიშ წევრეფქ ხოლო თქუეს: თე კოჩიქ ოკო დოღურას! თინეფ იესოს სახეს ხეს მიოგანდეს, გაფურტინანდეს, თოლეფს ეუფორუნდეს, მიოგანდეს დო ურაგადუდეს, წინასწარმეტყველ ქორექ-და, ქომწით, მიქ მიგოგუა.

გოთანდუნ, იესო სინედრიონიშ სასამართლო დარბაზშა მიდეჸუნეს დო კინ კითხეს: ღორონთიშ სქუა რექო? იესოქ უპასუხ: თქვან პიჯით იჩიებუთ, ნამდა ვორექ. უკულ თინეფქ იესოს ღორონთიშ ლანძღუას ქიგედვეს ბრალ დო რომაელ გამგებელიშ, პონტიუს პილატეშ, სასახლეშა მიდეჸუნეს. მუქ მოხვად თეშ უკულ? თეს უკულიან დუდშე ქიგებგენთ.