იოშიას უჸორდჷ ღორონთიშ კანონ

იოშია ბრუო წანერ რდჷ, მუჟამსით იუდაშ მეფეთ გინირთჷ. თიმ დროს ხალხ მაგიურ საქმეეფს ორთუდ დო კერპეფს ცენდჷ თაყვანს. იოშიაქ 16 წანერო გინირთუნ, ეცად, ქიგეგუკო, მუჭო ოკო ცუკო თაყვან ღორონთის თიშ მოსაწონო. 20 წანერ რდუნ თეშ, კერპეფიშ დო ტყურა ღორონთეფიშ სამსხვერპლოეფიშ მოსპუალა ქიდიჭყჷ. 26 წანერო გინირთუნ, თიქ იეჰოვაშ ტაძარიშ აღდგენას ქეშუდირთჷ.

მღვდელმთავარ ხილკიაქ ტაძარს ქოძირ გრაგნილ, სოდეთ იეჰოვაშ კანონეფ ჭარუდ. შილებე თენა გვალო მოსეშ ნაჭარა გრაგნილ ჸოფედუკო. მაჭარალ შაფანქ თე გრაგნილ მეფე იოშიას ქიმუღ დო ხონარმაღალო წუკითხჷ. იოშიაქ კანონ ქიმირჩქილუნ, ქუგოხვად, ნამდა ხალხ ბრელ წანას არასწორო ნოქციებუე იეჰოვაშ წოხოლე. მეფე იოშიაქ ხილკიას უწუ: იეჰოვა მანგარ გურმულირ რე ჩქინდე. მეუ დო ქუდურაგადე თის. იეჰოვა ქომწინა, მუჭო ოკო მიფქცუათ. ღორონთიქ წინასწარმეტყველ ხულდაშ საშვალებათ უპასუხ თინეფს: იუდაშ მახორუეფქ ოჭიშ ქომრთინუეს. თინეფ აუცილებერო დესაჯებუნა, მარა თენა თეიშახ ვა მოხვადუ, სოიშახ მეფე იოშია ცოცხალ რე, მუშენდა თიქ დუდ დემდაბალ ჩქიმ წოხოლე.

მეფე იოშიაქ თე სიტყვეფ ქიმირჩქილუნ, ტაძარშა მიდართჷ, მთელ იუდაშ მახორუეფ გეკოშაყარუ დო იეჰოვაშ კანონ ხონარმაღალო წუკითხჷ. იოშიაქ დო ხალხიქ პირობა დოდვეს, ნამდა იეჰოვას მთელ გურით დემორჩილებუდეს.

ბრელ წანა რდჷ მიკულირ, მუთ იუდეველეფს პასექ ვა აფუდეს ნაზეიმეფ. მარა, მუჟამსით იოშიაქ კანონს წეკითხ, ნამდა პასექ ირ წანას ოკო იზეიმესკო, ხალხის უწუ: ოკო იბზეიმათ პასექ იეჰოვაშო! უკულ იოშიაქ ქიანაშ შესაწირ გახაზირ დო ტაძარს მაბირეეფ ქიგიორინუ. თეშნერო, ისრაელეფქ დიო პასექ აღნიშნეს დო უკულ ქობალიშ დღახუ, ნამუთ შქვით დღას იგრძელებუდ. სამუელიშ დროშე მოჸუნაფილ თეცალ პასექ ვა ჸოფე. არგამა რე, იოშიას მთელ გურით უჸორდჷ ღორონთიშ კანონ. სი ქუმორწონსო იეჰოვაშენ უმოსიშ გაგება?