იეჰოვაშ ანგელოზიქ დოთხილუ ხიზკია

ასურეთიშ იმპერიაქ ხეშა ქეშეჸოთ ისრაელიშ ვითტომიან სამეფო. ასურეთიშ მეფეს, სინახერიბის, იუდაშ ჟირტომიან სამეფოშ ეშაჸოთამა ხოლო ოკოდ. ათეშენ გემშართჷ იუდაშა დო ართიანიშ მეჸუნელო ეჭოფუნდჷ ქალაქეფს. თის არძაშ უმოსო ართ ქალაქიშ, იერუსალიმიშ, ეჭოფუა ოკოდ. მარა მუ უჩქუდ, ნამდა თე ქალაქის იეჰოვა თხილანდჷ.

იუდაშ მეფე ხიზკიაქ სინახერიბის ქიანაშ ფარა გინუგ, ნამდა იერუსალიმს ვემკანჭუკო. სინახერიბიქ გეჭოფ თე ფარა, მარა მუშ ძალიერ ჯარ იშენით მიდაშქვჷ იერუსალიმიშ ეიოჭოფშა. იერუსალიმიშ მახორუეფქ მანგარო დოშქურდეს, მუშენდა ასურელეფ მონჭაფილ რდესჷ ქალაქშა. ხიზკიაქ ხალხის უწუ: ვა გაშქურინან! მართალ რე, ასურელეფ ძალიერეფ რენა, მარა იეჰოვა თინეფშე ბრელით უმოს ძალიერეფო გინმოშქვანა.

სინახერიბიქ იერუსალიმშა მუშ კოჩ, რაბშაკე, მიდაშქვჷ, ნამდა ხალხის ქიგიაძიცუკო. რაბშაკექ ქალაქიშ გალე ქიგედირთჷ დო იძახუდ: იეჰოვას თქვანდა ვა მახვარებე! დუდ ვა დაღორებაფუათ ხიზკიას. ნამთინ ღორონთის ვარსხებეთ ჩქინ ხეშე!

ხიზკიაქ იეჰოვას ქელაკითხუ, მუჭო მიქცუკო. იეჰოვაქ უპასუხ: ვა დუგოშქურინუას რაბშაკეშ სიტყვეფქ. სინახერიბის ვეიაჭოფე იერუსალიმ. თეშ უკულ ხიზკიაქ სინახერიბშე წერილეფ მიღჷ, სოდეთ ჭარუდ: ტყურათ ვებრძოლათ! იეჰოვას ვეშულებ თქვან რსხება! ხიზკიაქ კინ ილოც: იეჰოვა, რთხინქჷ, დამირსხით, მუშენდა არძაქ ქიგეგას, ნამდა ხვალე სი რექჷ ნამდვილ ღორონთ. იეჰოვაქ უპასუხ: ასურეთიშ მეფეს ვემნართე იერუსალიმშა. მა დოფთხილანქ ჩქიმ ქალაქის.

სინახერიბის თეშით ხოლო ვაეჭვუდ, ნამდა იერუსალიმს მალას ხეშა ქეშეჸოთანდ. მარა იეჰოვაქ მუშ ანგელოზ მიდაშქვჷ თექ, სოდეთ ასურელეფ რდესჷ დაბანაკებულეფ დო თე ანგელოზიქ ართ სერშა 185 000 ჯარიშკოჩ გოჭყვიდ! მეფე სინახერიბიქ არძაშ უმოს ძალიერ ჯარიშკოჩეფ მიოდინუ. თის შხვა შარაქ ვა დასქიდ, ჸუდეშა ხეცარიელო ოკო დირთუკო. იეჰოვაქ შეასრულ მუშ პირობა დო დოთხილუ ხიზკია დო იერუსალიმ. თი დროს იერუსალიმს ქოჸოფედიკო, ქიმიენდებუდიო იეჰოვას?