სამეფოქ გირთჷ

ონდო სოლომონ იეჰოვას ომსახურუდ, ისრაელს მშვიდობა რდჷ. მარა სოლომონქ ბრელ უცხოელ ოსურ ქიმიჸუნ. თინეფ კერპთაყვანიშმცემელეფ რდესჷ. ჭიე-ჭიეთ სოლომონქ დითირ დო თიქ ხოლო გეიაჸუნ კერპთაყვანიშმცემლობას. თექ იეჰოვა მანგარო გარისხჷ დო სოლომონს უწუ: ისრაელიშ სამეფო მიდაღალუაფ სქან ოჯახის დო ჟირო გირთუ. თიშ დიდ ნაწილს სქან ართ-ართ მსახურს ქიმეფჩანქ დო სქან ოჯახ ხვალე ჭიჭე ნაწილშა იმმართველენს.

იეჰოვაქ მუშ გადაწყვეტილება შხვანერო ხოლო გეგმაარგამ. სოლომონიშ ართ-ართ მსახურქ, იერობოამქ, შარას იეჰოვაშ წინასწარმეტყველ ახიას ქეშეხვად. ახიაქ მუშ გინაქუნალ 12 ნოჭკერო გოსოფ დო იერობოამს უწუ: იეჰოვა ისრაელიშ სამეფოს სოლომონიშ ოჯახის გემდუღანს დო ჟირო გორთუნს. გეჭოფ თე ვით ნოჭკერ, მუშენდა სი იჸუაფუქ ვით ტომიშ მმართველ. სოლომონქ თე ირფელიშ გურშენ ქიგეგუნ, იერობოამიშ ჸვილუა მინდომ. ათეშენ იერობოამქ ეგვიპტეშა ინტჷ. დროშ მიკულაშ უკულ, სოლომონქ დოღურუნ, მეფეთ თიშ სქუაქ, რობოამქ, გინირთჷ. რახანს თაშ ქიჸუნ, იერობოამქ იფიქრჷ, ნამდა ისრაელშა დორთა ასე უსაფრთხო იჸუაფუდ.

ისრაელიშ უხუცესეფქ რობოამს უწუეს: ხალხის ჯგირო ქიმექციებუქ-და, თინეფ ხოლო სქან ართგურ იჸუაფუნა. მარა რობოამს მუშ ახალგაზრდა მეგობრეფქ უწუეს: ხალხის მკაცრას ოკო მექცუე. უმოს მონკა სამუშა ქიმეჩ თინეფს! რობოამქ მუშ ახალგაზრდა მეგობრეფს ქუმურჩქილუ. თინა გლახათ ოქცუდ ხალხის, ათეშენ ხალხიქ ებუნტჷ. თინეფქ ვით ტომიშ მეფეთ იერობოამ ქიგიორინეს. თე ტომეფს ისრაელიშ სამეფოქ ქიგიადვჷ დო დოსქილადირ ჟირ ტომს – იუდაშ სამეფოქ, ნამუთ რობოამს ომორჩილუდ. თაშ ნამდა, ისრაელიშ 12 ტომ ასე გორთილ რდჷ.

იერობოამს ვაკოდ მუშ ხალხ ღორონთიშ თაყვანიშოცემებელო იერუსალიმშა გოუტუკო, ნამუთ რობოამიშ სამეფო რდჷ. ქოიჩქუნო მუშენ? იერობოამს ოშქურუდ, ნამდა თინეფ რობოამს დართუდეს დო თის დემორჩილებუდეს. ათეშენ თიქ ჟირ ოქროშ გინ გაკეთ დო მუშ ხალხის უწუ: იერუსალიმ შორს რე, თაყვანიშცემა თაქ ხოლო შეილებუნა. ხალხიქ თე ოქროშ გინეფიშ თაყვანიშცემა ქიდიჭყჷ დო კინ გიჭყოლიდუეს იეჰოვა.