იეჰოვაშ ტაძარ

თიშ უკულ, მუთ სოლომონქ ისრაელიშ მეფეთ გინირთჷ, იეჰოვაქ თის კითხჷ: მუ გოკო, მუ მერჩა? სოლომონქ უპასუხ: ახალგაზრდა ვორექ, გამოცდილება ვა მიღჷ. რთხინქჷ, სიბრძნე ქომუჩ, ნამდა სქან ხალხის ჯგირო ქივემინჯე. იეჰოვაქ უწუ: რახანს სიბრძნე ფთხი, მთელ ქიანას არძაშ უმოს ბრძენ კოჩო გინგოშქვანქ. ჩქიმ მორჩილ ქიჸუაფუქ-და, ბრელ ხანს იცოცხლენქ.

სოლომონქ ტაძარიშ შენება ქიდიჭყჷ. თინა არძაშ უჯგუშ ხარისხიშ ოქროს, ვარჩხილს, ჯაშ მასალას დო ძვირფას ქუალეფს ირინუანდჷ. თე ტაძარიშ შენებას მუნეფიშ საქმე ჯგირო უჩქუდესინ ფერ ვითობით ანთას ოსურკოჩ დო ქომოლკოჩ ღებულენდჷ მონაწილებას. შქვით წანაშ უკულ ტაძარ იეჰოვაშა მეძღვინუაშო მზათ რდჷ. თექ რდჷ სამსხვერპლო დო შესაწირო გამზადებულ მსხვერპლ ხოლო. სოლომონქ სამსხვერპლოშ წოხოლე ბირგულ ქუდაშქვჷ დო ილოც: იეჰოვა, თე ტაძარ სი რხვადუნ ფერ დიდებულ დო სქვამ ვა რე, მარა რთხინქჷ, მიღჷ ჩქინ თაყვანიშცემა დო ქიმირჩქილე ჩქინ ლოცვა. მუს ფიქრენდჷ იეჰოვა თე ტაძარშენ დო სოლომონიშ ლოცვაშენ? სოლომონქ ლოცვა გათუნ, ხეთეშე ცაშე დაჩხირქ გიმილ დო სამსხვერპლოს გეძუდუნ თი მსხვერპლ დოჭვჷ. იეჰოვაქ თეთ ოძირუ, ნამდა მიწონუ ტაძარ. ისრაელეფქ თენა ქოძირესინ, გურქ ხიოლით გეიაფშეს.

მეფე სოლომონს მუშ სიბრძნეშ გურშენ სახელქ ხვალე მთელ ისრაელს ვარინ, შორ ქიანეფს ხოლო გოუოლ. ხალხ სოლომონშა მიშჷ, ნამდა მუნეფიშ პრობლემაშ გინოჭკირუას მეხვარუკო. საბაშ დედოფალქ ხოლო ქიმერთჷ სოლომონშა, ნამდა რთულ კითხვეფით გეგმოცადუკო თინა. დედოფალქ სოლომონიშ პასუხეფ ქიმირჩქილუნ, თქუ: ვა ბჯერდჷ, მუდგას ხალხ მირაგადუდ სქანიშ გურშენ, მარა ასე ვორწყექ, ნამდა თინეფ იჩიებუდესინ თიშე ბრელით უმოს ბრძენ ჸოფექ. სქან ღორონთიშ, იეჰოვაშ, ხვამათ რექჷ ეფშა. ისრაელეფს ჯგირ დროქ ქუდუდირთეს, არძა ბედნერ რდჷ. მარა მალას ირფელ დითირუდ.