გედეონ გიორჯგინანს მიდიანელეფს

დრო-ხანიშ მიკულაშ უკულ ისრაელეფქ კინ ქურთინუეს ოჭიშ იეჰოვას დო ტყურა ღორონთეფს ქუდუჭყეს თაყვანიშცემა. შქვით წანაშ დინახალე მიდიანელეფ ისრაელეფს საქონელს მიოხირანდეს დო ჸვანეფს უსპუნდეს. მიდიანელეფს ენტესკონ, ისრაელეფ ფოთქვეფს დო გვალეფს იტყობუდეს. თინეფ ოხვეწუდეს იეჰოვას, დერსხუკო მიდიანელეფიშ ხეშე. იეჰოვაქ ხოლო მირჩქილუ თინეფიშ ოთხუალ დო ართ ახალგაზრდა კოჩშა, გედეონშა, ანგელოზ მიდაშქვჷ. ანგელოზიქ თის უწუ: იეჰოვაქ გიშარგორ, ნამდა ირსხე ისრაელეფ. გედეონქ კითხჷ: მა მუჭო იბრსხენქ ისრაელს? თეფერ მი ვორექ?!

მუჭო მეხვადუდ გედეონ, ნამდა იეჰოვაქ გიშეგორ თინა? თიქ დიხას მონტყორ ქიგიორჩჷ დო იეჰოვას უწუ: ოჭმარეს თე მონტყორ ცუნდით შოლირ ქიჸი, მარა მთელ დიხა სქირ ქიჸინ-და, მარჩქვენუ, ნამდა მა გაფუქ გიშაგორილ ისრაელიშ ორსხებელო. ქოთ თაშ ქიჸუ, მაჟია ოჭმარეს მონტყორ ცუნდით შვაპილ რდჷ, მარა დიხა – სქირ. გედეონქ კინ თხუ იეჰოვას, ნამდა მაჟია ოჭმარეს ასე უკვე მონტყორ ქოჸოფედუკო სქირ დო დიხა – შოლირ. მართალო თაშ ქუმოხვადუნ, გედეონქ საბოლათ დერწმუნ, ნამდა იეჰოვას მუ აფუდ გიშაგორილ ისრაელიშ ორსხებელო. ათეშენ გედეონქ მუშ ჯარიშკოჩეფ გეკოშაყარუ, ნამდა მიდიანელეფს ქებრძოლუკო.

იეჰოვაქ გედეონს უწუ: მა გივორჯგინაფუანქ ისრაელეფს ნტერეფშა. მარა, რახანს ბრელ ჯარიშკოჩ რჸუნსჷ, შილებე იფიქრე, ნამდა თქვან ძალათ გიორჯგინით მიდიანელეფს. სქან ჯარიშკოჩეფს ქუწი, მიდგას გოშქურუნან, ჸუდეშა დირთით-შო. 22 000 ჯარიშკოჩიქ დირთჷ ჸუდეშა, მარა 10 000-იქ ქუდოსქიდ. უკულ იეჰოვაქ გედეონს უწუ: იშენ ბრელ ჯარიშკოჩ რე. მალწყარშა მიდეჸუნ თინეფ დო ქუწი, ნამდა წყარ გეშვან. მით წყარიშ შუმაშ დროს ყურადღებათ იჸუაფ დო ელ-მოლჸურე აღვენუ თოლ, ხვალე თინეფ ქიდიტე. თეცალქ 300 ჯარიშკოჩიშ მეტიქ ვეჸუ. იეჰოვაქ პირობა დოდვჷ, ნამდა თე აკაბცხა ჯარ გიორჯგინანდჷ მიდიანელეფიშ 135 000 კოჩიან ჯარს.

თიმ სერს იეჰოვაქ გედეონს უწუ: ასე რე დრო, დუდის ქიგიანთხე მიდიანელეფს! გედეონქ მუშ ჯარიშკოჩეფს საყვირეფ დო დიდ ჭკუდეფ ქიმეჩ. თე ჭკუდეფს დაჩხირიშ ოსინთურეფ რდჷ ტყობინაფილ. უკულ ჯარიშკოჩეფს უწუ: ქიდმეკვირით დო ზუსტას თინა გაკეთით, მუდგას მა გუვაკეთენქ. გედეონქ მუშ საყვირს ქინამბარ, მუშ ჭკუდ გოტახ, დაჩხირიშ ოსინთურეფს თევრე-თავრე ირქენდჷ დო იძახუდ: იეჰოვაშ ყამა დო გედეონიშ ყამა! თი 300 ჯარიშკოჩიქ ხოლო თაშ გაკეთ. მიდიანელეფქ მანგარო დოშქურდეს დო უთოლსინთელეთ მინტებუდეს. თე ბუძოლიას მიდიანელეფქ კინ ართიანს ქეშაკათეს. თაშ ნამდა, იეჰოვაქ ხოლო ართშა მეხვარ ისრაელეფს ნტერშა გერჯინას.