ᲒᲐᲙᲕᲔᲗᲘᲚ 29
იეჰოვა იესო ნავეშ სქუას გიშეგორუნს
მოსე ბრელ ხანს ეწოჸუნდჷ ისრაელ ერს, მარა ასე თინა უკვე ღურაშ კარს გერდჷ. იეჰოვაქ თის უწუ: სი ვა რექჷ თინა, მით ისრაელ ერს დუნაპირებ დიხაშა მინიჸუნანს, მარა შორშე ქუგოძირანქ თე დიხას. თიმწკუმა მოსექ იეჰოვას თხუ, გეგშეგორუკო ახალ წინამძღოლ, ნამუთ თიშ ხალხშე იზრუნენდ. იეჰოვაქ თის უწუ: მეუ იესო ნავეშ სქუაშა დო ქუწი, ნამდა თე საქმეშო თინა მაფჷ გიშაგორილ.
მოსექ ისრაელეფს უწუ, ნამდა ბრელ დრო ვაღინედ დო მალას დოღურუდ. თინა ხოლო უწუ, ნამდა იეჰოვაქ იესო ნავეშ სქუა გიშაგორ დო თინა გემნიჸუნანდ თინეფს დუნაპირებ დიხაშა. უკულ მოსექ იესო ნავეშ სქუას უწუ: ვა გაშქურინას, იეჰოვა მიგეხვარებ. თეშ უკულ, მოსექ ნებოშ გვალაშ წვანდშა გეკორთჷ, სოდეთ იეჰოვაქ თის ქაძირუ დიხა, ნამუთ აბრაამს, ისაკის დო იაკობის დეპირ. მოსექ 120 წანერ რდუნ თეშ ღურჷ.
იეჰოვაქ იესო ნავეშ სქუას უწუ: გეგნოკვათ მალწყარ იორდანე დო გემნორთჷ ქანაანიშ დიხაშა. სი ხოლო თეშ მიგეხვარებუქ, მუჭოთ მოსეს ვოხვარუდ. ირდღას იკითხ ჩქიმ კანონ. ვა გაშქურინას, გემანგარ! მეუ დო გაკეთ თინა, მუთ გიზოჯ!
იესო ნავეშ სქუაქ ქალაქ იერიხონიშ მათოლიერებშა ჟირ მზვერავ მიდაშქვჷ. უკულიან გაკვეთილს ზუსტას თე ისტორიას გუვარჩიენთ დო ქიგებგენთ, მუქ მოხვად თექ. მზვერავეფქ დირთესინ, ამბე ქიმიღეს, ნამდა ასე ჯგირ დრო რდჷ ქანაანშა მინაულარო. მაჟია დღას, იესო ნავეშ სქუაქ ისრაელეფს უწუ, გეჭოფესკო მუნეფიშ კარავეფ. უკულ წოხოლე მღვდელეფ მიდაშქვჷ, მიდგას მალწყარ იორდანეჸურე შეთანხმებაშ კიდობან მეუღუდეს. მალწყარ მოძინელ რდჷ, მარა მღვდელეფქ კუჩხ ქენაბიჯგუესინ, წყარქ გაჩერდჷ დო მირკჷ! მღვდელეფ შქა მალწყარს გერდეს, სოიშახ ისრაელეფ მალწყარიშ მელე გინიშეს. სქან აზრით, ქუგაშინანდუო თე სასწაულ ისრაელეფს თის, მუთ იეჰოვაქ თინეფშო ჭითა ზღვაწკუმა აკეთ?
თესხი წანაშ უკულ, მუთ იჸუნ, ისრაელეფქ მინილეს დუნაპირებ დიხაშა. თინეფს უკვე შეულებუდეს აშენესკო ჸუდეეფ დო ქალაქეფ, დამუშუესკო დიხეფ, გაშენესკო ბინეხ დო ხეხილ. თექ თიზმა ჯგირ ოჭკუმალ დო ოშუმალ რდჷ, ნამდა თის ბჟა დო თოფურიშ ქიანას უძახუდეს.
„იეჰოვა ირიათო ქეწკაჸუნუ დო მუთუნს ვამგარკენს გოხიკინაფილ დიხას“ (ესაია 58:11).