ᲒᲐᲙᲕᲔᲗᲘᲚ 25
თაყვანიშცემაშ კარავ
სინაიშ გვალას იეჰოვაქ მოსეს უწუ, ნამდა ქიგედგუკო განსაკუთრებულ კარავ, სოდეთ ისრაელეფს შეიალებედეს, თაყვან ცესკო ღორონთის. თე კარავ თიცალ იჸუაფუდ, ნამდა ხალხის შეიალებედ თიშ ეჭოფუა დო თევრე ღალა, სოდეთ იშეს.
იეჰოვაქ მოსეს უწუ: ხალხის გეგნოჩ, ნამდა მუთ შეულებუნან, ირფელ ქიმიღან კარავიშ გიოდგუმალო. ისრაელეფქ ოქრო, ვარჩხილ, სპილენძ, ძვირფას ქუალეფ დო სამკაულეფ ქიმიღეს. თეს გეძინელ, ქიმიღეს მონტყორ, ნოჭკერეფ, ცხოველეფიშ ტყებ დო ბრელ შხვა ნივთეფ. თინეფქ თიცალ ხვეიანო მიღეს ირფელ, ნამდა მოსეს ორაგადექ აჸუ, დასაბაღ რე, მეტ მუთუნ ვემიღათია.
სამსხვერპლოშ შენებას ბრელ ქომოლკოჩ დო ოსურკოჩ ღებულენდჷ მონაწილებას. იეჰოვაქ თინეფს სიბრძნე ქიმეჩჷ საქმეშ ოკეთებელო. ნამთინე ძაფის გიორთუანდჷ, ნამთინე შანდჷ, ნამთინე ქარგუნდჷ, მინ ძვირფას ქუალეფშე, ოქროშე დოვარ ჯაშე მუშენდჷ.
ხალხიქ ზუსტას თეშ აკეთ კარავ, მუჭოთ იეჰოვას აფუდ რაგადებულ. თინეფქ სქვამ ფარდათ ჟირო გორთეს კარავ. ართ მხარეს რდჷ წმინდა დო მაჟია მხარეს წმინდაშეწმინდა. წმინდაშეწმინდას მილაძუდ შეთანხმებაშ კიდობან, ნამუთ აკაციაშე დო ოქროშე რდჷ კეთებულ. ოთახის, ნამდგას წმინდა ჯოხოდ, მილაძუდ ოქროშ ლამპაშ გიოდგუმალ, სტოლ დო საკმელიშ სამსხვერპლო. ოზეს გედგუდ სპილენძიშ აუზ დო დიდ სამსხვერპლო. შეთანხმებაშ კიდობან, ნამუთ კარავს მილაძუდ, ისრაელეფს გაშინანდჷ ღორონთიშ წოხოლე დოდვალირ შეთანხმებას, ნამდა თიშ მორჩილეფ იჸუაფუდეს. ქოიჩქუნო, მუს ნიშნენს შეთანხმება? შეთანხმება ნიშნენს, ნამდა პირობაშ დუმადვალარეფ აუცილებერო შეასრულენა მუნეფიშ სიტყვას.
იეჰოვაქ კარავს მღვდელეფო აარონ დო თიშ სქუალეფ გიორინუ. თინეფქ ოკო მიკაჯინესკო თექიანობას დო იეჰოვას მსხვერპლ შეწირესკო. წმინდაშეწმინდაშა მინულა ხვალე მღვდელმთავარ აარონს შეულებუდ. თინა თეს წანმოწანაშე ართშა ორთუდ, ნამდა მსხვერპლ შეწირუკო მუშ, მუშ ოჯახიშ დო მთელ ისრაელ ერიშ ცოდეფიშ გურშენ.
ისრაელეფქ კარავიშ გედგუმა ეგვიპტეშ დოტებაშე ართ წანაშა ათუეს. თაშ ნამდა, ასე თინეფს კონკრეტულ ადგილ უღუდეს, სოდეთ შეიალებედეს იეჰოვას ცესკო თაყვან.
იეჰოვაქ კარავ მუშ დიდებათ გეიოფშ დო თიშ დუდის მუნაფა ქიმნარინუ. მუჟამსით თე მუნაფა კარავიშ დუდის მინარდჷ, ისრაელეფ სოთინ ვემიშეს, მარა მუნაფა უმოს ჟი გეიკინანდუნ, ისრაელეფშო თენა თიშ მაძირაფალ რდჷ, ნამდა მალას ოკო ეყარესკო. თაშ ნამდა, კარავ ოკო დოხუესკო, გეჭოფესკო დო მუნაფას ქეკაჸუნესკო.
«ტახტშე ქიგებგონ დიდ ხონარ: „ღორონთიშ კარავ ხალხწკუმა რე! ღორონთ თინეფწკუმა დემკვირდებ, თინეფ თიშ ხალხ იჸუაფუნა დო ღორონთ იჸუაფ თინეფწკუმა“» (გიმოცხადება 21:3).