იაკობიშ დო ესავიშ შერიგა

იეჰოვაქ იაკობის დეპირ, ნამდა დოთხილანდ თის, მუჭოთ თენა აბრაამიშ დო ისაკიშ შემთხვევას აკეთ. იაკობიქ ხარანს ქიდიხორ, სოდეთ დექორწინ, ბრელ სქუაქ ქაშუ დო მანგარ ქონებიერო გინირთჷ.

ბოლოს იეჰოვაქ იაკობის უწუ, დირთუკო მუშ მხარეშა. თაშ ნამდა იაკობიქ მუშ ოჯახწკუმა ართო დიდ შარას ქიგიოდირთჷ. შარას რდესინ თეშ, მუშ მსახურეფქ ქიმერთეს იაკობშა დო უწუეს, სქან ჯიმა, ესავ 400 კოჩწკუმა ართო სქანჸურე მოურსია. იაკობის აშქურინ, ნამდა ესავ მუს დო მუშ ოჯახის მუდგაინ გლახას ქოღოლანდ. ათეშენ ქილოც დო იეჰოვას უწუ, რთხინქჷ, ჩქიმ ჯიმაშე მირსხია. მაჟია დღას იაკობიქ ესავშა საჩუქარო ქიანაშ შხურ, თხალეფ, ჩხოულეფ, აქლემეფ დო ვირეფ მიდაჯღონ.

თიმ სერს, მუჟამსით იაკობ ხვალე რდჷ, ანგელოზ ქოძირ. ანგელოზიქ დო იაკობიქ ართიანს ერკინეს; თინეფ გოთანაშახ რკინენდეს. მართალ რე, იაკობიქ რკინებაშ დროს მუდგარენ იწყუნუ, მარა იშენ ვემუტებ რკინება. ანგელოზიქ უწუ: გომტე! მარა იაკობიქ უპასუხ: ვარ, ონდო ვა ფხვამანქინ, ვა გოიტენქ!

ბოლოს ანგელოზიქ დოხვამუ იაკობ. ასე უკვე იაკობ დარწმუნებულ რდჷ, ნამდა იეჰოვა ვა დუშვენდჷ, ესავქ თის მუდგაინ გლახა ქოღოლუკო.

თიმ ოჭმარეს იაკობიქ შორშე თოლ ქუმუკინდუ ესავს, ნამუთ 400 კოჩწკუმა ართო მიშჷ. იაკობიქ მუშ ოჯახ უკახალე ქიგიორინუ დო მუქ წოხოლე მიდართჷ ესავიშ ეწაზადინშა. იაკობიქ შქვითშა ქუდუშქვჷ ბირგულ მუშ ჯიმას. ესავქ ირულ იაკობჸურე დო ქახუტოლ. ჟირხოლოს ნგარაქ გეუოლ დო შერიგეს. სქან აზრით, მუს იგინანდჷ იეჰოვა, მუჟამსით ორწყედ, მუჭო გიშანწყუ იაკობიქ თე სიტუაცია?

უკულ ესავქ მუშ ჸუდეშა დირთჷ დო იაკობიქ მუშ შარა გაგრძელ. თის 12 ქომოლსქუა ჸუნდჷ. თინეფს ჯოხოდეს: რეუბენ, სიმონ, ლევი, იუდა, დან, ნაფთალი, გად, აშერ, ისაქარ, ზებულონ, იოსებ დო ბენიამინ. თინეფშე ართ-ართ, იოსებ, იეჰოვაქ მუშ ხალხიშ ორსხებელო გიმირინუ. მუჭო მოხვად თექ? მორთ ქიგებგათ.