ადამქ დო ევაქ ვედემორჩილეს ღორონთის

ართ დღას, მუჟამსით ევა ხვალე რდჷ, გვერქ ქიმერთჷ დო უწუ: მართალ რენო, ნამდა ღორონთ ბაღიშ არძა ჯაშე ჭკუმუაშ უფლებას ვა გარზენა? ევაქ უპასუხ: ართიშ მეტ, არძა ჯაშე შემლებუნა პჭკუმათ, მარა თი ართ ჯაშე ოპჭკუმუნთ-და, დობღურუთ. გვერქ უწუ, ვა ღურუთ. პირიქით, ოჭკუმუნთ-და, ღორონთცალეფ იჸუაფუთია. სიმართლე რდუო თენა? ვარ, თენა ტყურა რდჷ, მარა ევაქ ქუდუჯერ გვერს. მუთ უმოს მეტ ხანს უჯინედ ევა თე ჯაშ მიკნაღელს, თით უმოსო ოკოდ თიშ ჭკუმუა. ქოთ ოჭკუმ დო ადამს ხოლო ქიმეჩ. ადამს უჩქუდ, ნამდა ღორონთის ვედემორჩილებუდეს-და, დოღურუდეს, მარა იშენით ოჭკუმ თინა.

თიმ დღას, ჭიჭე ხანშა, იეჰოვაქ ქუდურაგადუ ადამს დო ევას დო კითხჷ, მუშენ ვედემორჩილეს თის. ევაქ გვერს ქეკაბრალ, ადამქ – ევას. დაუმორჩილებლობაშ გურშენ იეჰოვაქ ედემიშ ბაღშე გეგმაჸათ თინეფ. ბაღიშ მინაულარს ღორონთ ანგელოზეფით დო დაჩხირამ ყამათ თხილანდჷ, ნამდა ადამს დო ევას დღას ვემიაჩესკო თექ მინულაშ საშვალებაქ.

იეჰოვაქ თქუ, ნამდა ევა აღორუნ თინა ხოლო დესაჯებუდ. ევაშა მართალო გვერს ვა დურაგადუაფ. იეჰოვას გვერეფ რაგადიშ უნარით ვა გუჭყაფ. სინამდვილეს გვერს უბადო ანგელოზ ორაგადაფუანდჷ, ნამდა ევა მიოჩილითუკო. თე ანგელოზის სატანა ეშმაკ ჯოხო. მომავალს იეჰოვა მოსპუნს სატანას დო თის მეტო ვეშიალებე, მიოჩილითუას ადამიანეფ დო გლახა გაკეთებაფუას თინეფს.