მუჭო გინოპჭკირათ პრობლემეფი

მუჟამს იქორწინებუთ დო ცხოვრებას მეუღლეწკუმა ართო იჭყანთინ, პრობლემეფი ხოლო მიკორჩქინდუ. პრობლემეფიშ მიზეზი შილებე თინა რდას, ნამდა შხვადოშხვანერო ფიქრენთ, გინაფლენთ დო საკითხიშ გინოჭკირუას ხოლო შხვადოშხვანერო ოცადუთ. პრობლემეფქ შილებე შხვა ფაქტორეფით ვარდა ველუქინ თეშ გემკორჩქინდას.

შილებე თეცალ დროს პრობლემეფშე ნტებას ფიქრნედე, მარა ბიბლია ელამჩანა, ნამდა თოლი გუმანგათ პრობლემეფს (მათე 5:23, 24). ბიბლიურ პრინციპეფს გეგმირინუანთ-და, პრობლემეფს გვალო ჯგირო გეგნოჭკირუნთ.

1 ქიჩით პრობლემაშენ

მუს იჩიებ ბიბლია: „ირფელს მუშ დრო უღუ . . . [რე] რაგადიშ დრო“ (ეკლესიასტე 3:1, 7). დრო გეგმორთით დო ქიჩით პრობლემეფშენ. რდათ ალალი დო ვა უფულათ თქვან მეუღლეს, მუს გინაფლენთ დო მუს ფიქრენთ თე პრობლემაშენ. ირო მართალ რაგადეთ მეუღლეწკუმა (ეფესოელები 4:25). ემოციეფს ვეიაჸუნათ დო ირნერო ეცადით ჩხუპშა ვეგნორთას თქვან რაგადიქ. მშვიდ რაგად მიგეხვარებნა წყნარას იჩუათ პრობლემაშენ დო ჩხუპშა ვეგნორთათინ (იგავები 15:4; 26:20).

შხვა აზრიშ რდათინ ხოლო, გემუან სიტყვეფი უწით ართიანს დო ვაგგოჭყორდან ჸოროფა დო პატიცემაშ გიმორჩქინაქ (კოლოსელები 4:6). ირნერო ქეცადით, მუთ შილებე მალას გეგნოჭკირათ პრობლემა. ვენდურათ ართიანს (ეფესოელები 4:26).

მუ ოკო ქიმინათ:

• დრო გეგმორთით დო ქიჩით პრობლემეფშენ.

• მუჟამს მეუღლეს ურჩქილეთინ, ქეცადით ბოლოშა ქარაგადაფუათ. რაგადიშ საშუალება თქვა ხოლო მიგაჩამუნა.

2 ქუმურჩქილეთ დო ქუგუგით

მუს იჩიებ ბიბლია: „ციცფუფურო მექცით ართიანს. პატიცემას ართიანს ქუწორეთ“ (რომაელები 12:10). მნიშვნელოვან რე თინა, მუსხით ყურადღებიანო ურჩქილეთ თქვან მეუღლეს. ქეცადით, ქუგუგათ თის დო თიშ აზრი გურგოჩამილო დო თანდაბალო გეთვალისწინათ (1 პეტრე 3:8; იაკობი 1:19). თეშ ვაძირუათ დუდი, ითამ ურჩქილედათ. ქორე შეიოლებერ-და, მუდგას ორთუთინ, გეგნოდვით დო მთელ ყურადღება თის დუთმით, ვარდა ქოუწით, ნამდა თე საკითხშენ შხვა დროს ქიჩიებუთ. თქვან მეუღლე თქვან გუნდიშ წევრო ქიმგორჩქუნა დო ვართ ხოლო მონირზეთ-და, ხეთე ვა მუჸონანთ გურს (ეკლესიასტე 7:9).

მუ ოკო ქიმინათ:

• ჭკუაშე ვართ თიმწკუმა გინორთათ, მუჟამს მეუღლე ვა მორწონან ფერ მუდგარენს გირაგადნა.

• სიტყვეფი ვა ჭოფათ, ნარაგადის ქინანჭით. ვართ ტონი დო ჟესტიკულაციაქ გუგოჭყორდან.

3 სიტყვა საქმეთ გინართინეთ

მუს იჩიებ ბიბლია: „არძანერ ხანდა მარგებელ რე, ცარიელ რაგადის უღონობა მოუღ“ (იგავები 14:23). მუდგარენშენ აკორიგა შუროთ ვა ნიშნენს, ნამდა პრობლემაქ გეგნიჭკირუნ. მთავარ რე, მუდგა გინოჭყვიდით თინა, ბოლოშა ქიმიჸონათ. შილებე თეს დიდ ხანდა დო მონდომა ოსაჭირუნ-და, მარა თენა მართალო ღირ თეშა (იგავები 10:4). ართ გუნდი ქიჸუაფუთ-და, ხანდაშ მანგიორო ჯგირობუას მიღენთ (ეკლესიასტე 4:9).

მუ ოკო ქიმინათ:

• დეფიქრით, მუ ნაბიჯეფი ოკო გინოდგათ თითოულქ პრობლემეფიშ გინაჭკირალო.

• კანკალეშა ქიმჯელით, მუ მხარეთ გეუჯგუშითინ.