მუჭო ოკო მიმზადათ კრებაშ შეხვალამეფშო?

ართ-ართ იეჰოვაშ მოწმეწკუმა ბიბლიას ქოგურაფლენთ-და, ალბეთ ოცადუთ წინასწარ ქიგნაჯინათ ოგურაფალ მასალას. თქვანო ჯგირ იჸუაფ, კრებაშ შეხვალამეფშო ხოლო წინასწარ მიმზადებუთ-და. გოკონან ფერ მიზანს ქიმიოჭირინუანთ, ჯგირ გრაფიკ ქუგაღვენუნა-და.

გეგნოჭყვიდით, სო დო მუჟამს მიმზადებუთ კრებაშ შეხვალამეფშო. მუ დროს რეთ არძაშ უმოს კურცხას, გურაფა შეილებნან თეშ? ოჭმარეს ადრე, სამუშაშ დოჭყაფაშა დო ვარ ონჯუას გვიანო, მუჟამს ბაღანეფს ქუდარულუანთინ? თი დროს ხოლო, მუჟამს გიჭირა მუდგარენშენ შხირხანს ფიქრი, წინასწარ გიჩქუდან, მუსხი ხანს შეილებნა დრო გეგმურთათ კითხირს, მუთუნქ ვეგეცილანი თეშ. შეილებნა მინწყუათ სიწყნარე რენ ფერ მოხუჯურ ადგილი, გოთიშათ რადიო, ტელევიზორი დო მობილურ ტელეფონი. გურაფაშ დოჭყაფაშა ქილოცით; თენა მიგეხვარებუნა დუდ ვემეჩათ ირდღაშიან ოფიქრებელს დო მთლიანო ღორონთიშ სიტყვაშე იფიქრათ (ფილიპელები 4:6, 7).

მამზადით ოგურაფალ მასალა დო კომენტარეფი. დიო ქიგეგით, მუ რე ოგურაფალ მასალაშ მთავარ აზრი. ქოძირით სტატიაშ სათაურ დო თინა ხოლო, მუჭო ოკავშირ თითოულ ქვესათაურ თემას. ქიდეკვირით სურათეფს დო ომეორებელ კითხვეფს, ნამუთ მთავარ აზრეფს გიმორთუნს. უკულ წეკითხით თითოულ აბზაცი დო დოგორით აბზაციშ ბოლოს მოჩამილ კითხვაშ პასუხი (საქმეები 17:11). მუჟამს კითხვაშ პასუხის დოგორუნთინ, აბზაცის მოჩამილ მთავარ სიტყვეფს დო ფრაზეფს ხაზი ქეთუსვით; თენა პასუხის ქუგგოშინანა. კრებაშ შეხვალამას შეილებნა ხე გეჭოფათ დო თქვან სიტყვეფით გაკეთათ ჭიჭე კომენტარი.

ირ კრებაშ შეხვალამაშო წინასწარ შხვადოშხვა მასალას მამზადენთ-და, თქვან ბიბლიურ რჩქინას ახალ-ახალ აზრეფს ქიმუძინანთ (მათე 13:51, 52).

• მუნერ გრაფიკი ოკო გიღუდან, კრებაშ შეხვალამეფშო მიმზადათინ თიშენ?

• მუჭო შეილებნა მამზადათ კომენტარეფი კრებაშ შეხვალამეფშო?