მუშენ ოკო მუკმოქუნდან კრებაშ შეხვალამეფს სქვამას დო კოხტას?

თე სურათეფშე ალბეთ ორწყეთ, მუნერ სქვამას დო კოხტას მუკაქუნა იეჰოვაშ მოწმეეფს, მუჟამს კრებაშა მეულა. მუშენ ვაქციენთ ყურადღებას ჩქინ მუკოქუნას დო მეჯინას?

მუკოქუნათ პატის ფცენთ ღორონთის. იეჰოვა ხვალე ჩქინ მეჯინას ვარინ, გურით მუნერეფ ვორეთინ თის ხოლო ორწყე (1 სამუელი 16:7). მუჟამს იფშაყარუთ ღორონთიშ თაყვანიშ ოცემებელო, შურ დო გურით მოკონა ღორონთიშ დო და დო ჯიმალეფიშ პატიცემა გიმიფრჩქინათ. სასამართლოს მოსამართლეშ წოხლე მაჸუან გიორინალქი, მუშო ოკო რაგადი, სქვამას დო კოხტას ქიმკიფქუნანდით დო თეთ მოსამართლეშ პატიცემას გეგმოფხანტუნდით. თეშნერო ჩქინ მუკოქუნათ დო მეჯინათ პატი ოკო ფცათ „დედამიწაშ მოსამართლეს“ იეჰოვა ღორონთის დო თი ადგილს, სოდეთ იფშაყარუთ თაყვანიშ ოცემებელო (დაბადება 18:25).

მუკოქუნათ ვოძირანთ, მუ ღირებულებეფით ფცხოვრენთ. ბიბლია ურაგად ქრისტიანეფს, გოქუნილ რდან, მოკრძალებათ დო საღ აზროვნებათ (1 ტიმოთე 2:9, 10). მოკრძალებულ მიკოქუნაშა მიშურს თიცალ ბარგშე ვარიაშ რაგად, ნამუთ თოლს გლახათ მოხვადუ, ნაბეტან ეშაღალირ ვარდა კუნტა რე. საღ აზროვნება თის ხოლო მოხვარუნა, ვემკიფქუნათ ნაბეტან ოჟვაბალაია ვარდა გორწკიპილ ბარგი. მარა თენა თის ვა ნიშნენს, ნამდა ბიბლიურ პრინციპეფი ქრისტიანეფს გასაქანს ვარზენს დო გიშაგორუაშ უფლებას ვა უტენს. ხვალე სიტყვათ ვარინ, ჩქინ სქვამას დო კოხტას მუკოქუნათ ხოლო ფცენთ პატის ჩქინ მარსხებელს დო განვადიდენთ ღორონთის (ტიტე 2:10; 1 პეტრე 2:12). კრებეფს სქვამას დო კოხტას ქუმკმოქუნან-და, თეთ ხოლო ვოძირანთ შხვეფს, მუნერ თაყვანიშცემას იწონუანს იეჰოვა.

თეშ ვემკიქუნათ, ნამდა ონჯღორექ დუგაგურან სამეფო დარბაზის კრებაშ შეხვალამაშ დასწრებაშა. შუროთ ვა რე აუცილებერ, ჩქინ ბარგი ძვირიან დო მოდას რენ ფერ რდას. მთავარ რე, მუკმოქუნდან სუფთას დო კოხტას.

• მუშენ ოკო ვაქციენდათ ყურადღებას ჩქინ მუკაქუნალს ღორონთიშ თაყვანიშცემაშ დროს?

• ნამ ბიბლიურ პრინციპეფს ოკო მივაჸუნათ, მუჟამს გიშაბგორუნთ მუკაქუნალს დო ფიფქრენთ ჩქინ მეჯინაშე?