მუჭო გოსინთუ კინ ბიბლიურ ჭეშმარიტებაქ?

ბიბლიას წინასწარ რდუ რაგადებულ, ნამდა იესოშ ღურაშ უკულ პირველ ქრისტიანეფ შქას კინ გემკორჩქინდუდეს ცრუ მასწავლებელეფი დო ბიბლიურ ჭეშმარიტებაშე გეგნურთანდეს (საქმეები 20:29, 30). თექ მართალო თაშ ქუმოხვად. თინეფქ იესოშ გურაფეფი ცრუ რელიგიაშ გურაფეფით დოთირეს დო თავრეშე მოლართ ცრუ ქრისტიანობაქ (2 ტიმოთე 4:3, 4). მუჭო შემლებნა დებრწმუნათ, ნამდა ზუსტას თინა ბწანა, მუდგას სინამდვილეს ბიბლია ოგურუანს?

ქუდოდირთ დროქ, მუჟამსით იეჰოვაქ ჭეშმარიტება ოკო გაცხადკონ. თიქ წინასწარ თქუ, ნამდა „ბოლო დროს ჭეშმარიტ რჩქინა გევრცელებუდ“ (დანიელი 12:4). 1870 წანას ჭეშმარიტებაშ მაგორალ ჭიჭე ჭგუფიქ ქოძირ, ნამდა ეკლესიაშ ბრელ გურაფა ვათანხმუდ ბიბლიას. ათეშგურშენ, თინეფქ ქიდიჭყეს გიმორკვიება, სინამდვილეს მუს ოგურუანდ ბიბლია დო იეჰოვაქ ხოლო ქიმეჩ თიშ უნარი, ზუსტას ქინანჭესკო ბიბლიურ მუხლეფიშ მნიშვნელობას.

ალალ გურიშ ქომოლკათაქ შურ დო გურით გეგმირკვიეს ბიბლია. ბიბლიაშ მარკვიებელეფქ, მით ჩქინ წოხოლე რდესინ, გიმორკვიებაშ თიცალ მეთოდის მიოგორეს, ნამუსით ამდღა ხოლო გიმიბრინუანთ. თინეფ თემატურო ირკვიენდეს ბიბლიას. მუჟამს ბიბლიაშ ნამთინე მონაკვეთიშ გაგება გუჭირდუდესინ, თინეფ თიშ ეიონწყუმალო შხვა მუხლეფს იხვარუანდეს. მუჟამს ართ დასკვნაშა ქიმიშეს, ნამუთ წმინდა წერილეფიშ შხვა მუხლეფს ხოლო ოთანხმუდუნ, დასკვნეფ ფურცელშა გინმუღუდეს. თინეფ ვეგიგებედუნ ფერ ადგილეფს კინ ბიბლიათ ეთმონწყუნდეს; თეგვარო კარაკანო ქიძირ ჭეშმარიტებაქ ღორონთიშ სახელიშ, სამეფოშ, ღურელეფიშ მდგომარეობაშ დო გათელებაშ გურშენ დო მუ ულამუდ ღორონთის კაცობრიობაშონ თიქ. თეცალ რკვიება დო გორუაშ უკულ თინეფქ ცრუ გურაფეფი დო წესეფი ართ დო სამუდამოთ მიშორეს (იოანე 8:31, 32).

1879 წანას ბიბლიაშ მარკვიებელეფქ ქიმეხვადეს, ნამდა ჭეშმარიტება ბრელ ხალხშა აფუდეს გაცხადებელ. ათეშგურშენ, თიმ წანას ქიდიჭყეს ჟურნალიშ, „საგუშაგო კოშკი — იჩიებ იეჰოვაშ სამეფოშ გურშენ“, გიშაშკუმალა, ნამუთ ამდღარშა ირიათო გიშმურს. ამდღა ბიბლიურ ჭეშმარიტებას 240-შე მეტ ქიანას 750-შე მეტ ნინაშა ქადაგენა. „ჭეშმარიტ რჩქინა“ თაშ დღას ვა ჸოფე გავრცელებულ, მუჭოთ ამდღა რე!

• მუქ მოხვად ქრისტეშ ღურაშ უკულ?

• მუჭო გოსინთუ კინ ჭეშმარიტებაქ ღორონთიშ სიტყვათ?