მუშენ ბჯოხონა იეჰოვაშ მოწმეეფი?

ბრელ ფიქრენს, ნამდა ჩქინ რელიგია ახალ რელიგია რე. მარა დიო ხოლო 2 700 წანაშე მეტ ხანიშ წოხოლე ჭეშმარიტ ღორონთიშ მსახურეფს თიშ მოწმეეფი ჯოხოდეს (ესაია 43:10—12). 1931 წანაშახ ჩქი ბიბლიაშ მარკვიებელეფიშ სახელით მიჩინენდეს. აბა, მუშენ ბჯოხონა ამდღა იეჰოვაშ მოწმეეფი?

თე სახელი ღორონთი მი რენ თის მირაგადნა. უჯვეშაშ ხეშნაჭარეფშე ბგებულენთ, ნამდა სახელი იეჰოვა ანთასობით ადგილს რე ბიბლიას მოჩამილ. ბრელ თარგმანს თე სახელი თირელ რე თიცალ ტიტულეფით, მუნერით რე უფალი ვარდა ღორონთი. მარა ჭეშმარიტ ღორონთიქ მოსეს გაუცხად მუშ სახელი იეჰოვა დო უწუ: „თენა რე ჩქიმ სახელი მარადიულო“ (გამოსვლა 3:15). თეგვარო თიქ ქაძირუ, ნამდა ცრუ ღორონთეფცალ ვა რდუ. ჩქი მოამაყუნა, ნამდა ღორონთიშ წმინდა სახელი ბჯოხონა.

თე სახელი ჩქინ საქმიანობაშე ბრელ მუთუნს იჩიებ. ჯვეშ დროშე მოჸუნაფილ ანაყუ ხალხი ამოწმენდ იეჰოვაშ გურშენ, თინეფ შქას მართალ კოჩი აბელი ხოლო რდუ. საუკუნეეფიშ დინახალე ნოექ, აბრაამქ, სარაქ, მოსექ, დავითიქ დო შხვეფქ ქაკათეს „მოწმეეფიშ დიდ მუნაფას“ (ებრაელები 11:4—12:1). მუჭოთ სასამართლოს მოწმეთ გეუდირთუნა ბრალ ვა უღუნ ფერ კოჩისინ თეშ, ჩქი ხოლო მოწმეთ გივორეთ დო ხალხის ჭეშმარიტებას ურაგადუთ ღორონთიშ გურშენ.

ჩქი იესოშ შარას გეპუნთ. ბიბლიას თის „ართგურ დო ჭეშმარიტ“ მოწმე ჯოხო (გამოცხადება 3:14). იესოქ თქუ, ნამდა ღორონთიშ სახელი გაუცხად ხალხის დო დამოწმუ თიშ ჭეშმარიტებაშ გურშენ (იოანე 17:26; 18:37). ათეშგურშენ ქრისტეშ ნამდვილ მიმაჸუნალეფს იეჰოვაშ სახელით ოკო იჩინენდან დო თე სახელიშ გურშენ შხვეფს ეჩიებდან. ზუსტას თეს ორთუნა იეჰოვაშ მოწმეეფი.

• მუშენ ჯოხონა ბიბლიაშ მარკვიებელეფს იეჰოვაშ მოწმეეფი?

• მუ დროშე ჸუნს მოწმეეფი იეჰოვას დედამიწას?

• მი რდუ იეჰოვაშ არძაშ უდიდაშ მოწმე?