იოანეშ პირველ წერილ
5 ღორონთიშ სქუა რე არძა, მიდგას წანსჷ, ნამდა იესო რე ქრისტე, დო არძას, მიდგას უჸორს მშობელ, ღორონთ, თიშ სქუალეფ ხოლო უჸორს. 2 ღორონთ ქომიჸორა დო თიშ მცნებეფს ქიმეპჸუნთ-და, გიშურს, ნამდა თიშ სქუალეფ ხოლო მიჸორა. 3 ღორონთიშ ჸოროფა ნიშნენს, მეპჸუნდათ თიშ მცნებეფს; თიშ მცნებეფ მონკა ოღალ ვა რე, 4 მუშენდა ღორონთიშ არძა სქუა გიორჯგინანს თე ქიანას. ჩქი რწმენაშ საშვალებათ შემალებუეს გივორჯგინითკო თე ქიანას.
5 მის შეულებ გიორჯგინას თე ქიანას? თის ვარიო, მიდგას წანსჷ, ნამდა იესო ღორონთიშ სქუა რე?! 6 იესო ქრისტექ წყარ დო ზისხირით მორთჷ, ხვალე წყარით ვარინ, წყარით დო ზისხირით. თეშ გურშენ წმინდა შურ* ამოწმენს, მუშენდა თინა სიმართლეს აცხადენს. 7 მოწმე სუმ რე: 8 წმინდა შურ, წყარ დო ზისხირ, დო სუმხოლო ართის იჩიებ.
9 კოჩშე მოწმობას ქობღებულენთ-და, მუსხით უმოსო ოკო ბღებულენდათ ღორონთშე მოწმობას, ნამუთ ბრელით უმოს დიდ რე. ღორონთ მუშ სქუაშ გურშენ ამოწმენს. 10 თის, მიდგას წანსჷ ღორონთიშ სქუა, მთელ გურით ჯერსჷ თი დამოწმებაშ, ნამუთ ღორონთშე მიღჷ, მარა მიდგას ღორონთიშ ვა წანსჷ, მეტყურეთ გიშმაჸუნს თინა, მუშენდა ვა ჯერსჷ, მუთ ღორონთიქ მუშ სქუაშენ დამოწმჷ. 11 დამოწმება თინა რე, ნამდა ღორონთიქ ულიებ სიცოცხლე მუჩეს დო თე სიცოცხლეს თიშ სქუაშ საშვალებათ ბღებულენთ. 12 მით სქუას ღებულენს, თინა სიცოცხლეს ხოლო ღებულენს, მარა მით ღორონთიშ სქუას ვა ღებულენს, ვართ სიცოცხლეს ღებულენს.
13 თე ირფელს თიშენ რჭარუნთ, ნამდა გიჩქუდან: მიდგას რწანა ღორონთიშ სქუა*, ულიებ სიცოცხლე გიღუნა. 14 ჩქი მტკიცას ბჯერა, ნამდა მუდგა ვა ფთხუათინ, თიშ ნებას ქიმურენ-და, თინა მირჩქილენა. 15 დო, მუდგა ვა ფთხუათინ, მირჩქილენან თენა ქომჩქუნან-და, თინა ხოლო მიჩქუნა, ნამდა მაღვენუნა ირფელ, მუთ ფთხითჷ, მუშენდა თის ფთხითჷ.
16 მითინ ქარწყე, ნამდა მუშ ჯიმა ცოდენს, მარა თე ცოდა ოღურალ ვა რენ-და, ილოცას თიშო დო ღორონთ ქიმეჩანს თის სიცოცხლეს, თის, მით ოღურალ ვა რენ ფერ ცოდას ორთჷ. მარა არსებენს ოღურალ ცოდა ხოლო; თეცალ ცოდაშ მაკეთებელშე ვაირაგადუთ ილოცით-მაქ. 17 არძა უბადობა ცოდა რე, მარა არძა ცოდა ოღურალ ვა რე.
18 მუჭოთ მიჩქუნა, ღორონთიშ სქუალეფშე ნამთინ ვა ცოდენს; ღორონთიშ სქუა* თხილანს თინეფს დო უბადოს ვაცილებე თინეფშა. 19 მიჩქუნა, ნამდა ღორონთშე ვორეთ დო მთელ ქიანა უბადოშ ხეს რე. 20 მარა თინა ხოლო მიჩქუნა, ნამდა ღორონთიშ სქუაქ ქუმორთჷ დო ინონჭაფაშ უნარ ქომუჩეს, მუშენდა მიბღითკო რჩქინა ნამდვილ ღორონთიშ გურშენ. ჩქი თიშ სქუაშ, იესო ქრისტეშ, საშვალებათ ართობას ვორეთ თიწკუმა. თინა რე ნამდვილ ღორონთ დო თიშე მოურს ულიებ სიცოცხლე. 21 სქუალეფ, ვემკანჭათ კერპეფს.