იოანეშ პირველ წერილ
2 ჩქიმ საჸოროფო სქუალეფ, თე ირფელს თიშენ რჭარუნთ, ნამდა მითინქ ვეშეცოდათ, მარა ნამდგაინ ქეშეცოდენთ-და, პჸუნა თინა, მით ელამდირთუნა მუმაწკუმა – მართალ იესო ქრისტე. 2 თინა შერიგაშ მსხვერპლ რე ჩქინ ცოდეფშო დო ხვალე ჩქინ ცოდეფშო ვარინ, მთელ ქიანაშ ცოდეფშო. 3 თიშ მცნებეფს ქიმეპჸუნთ-და, ვოძირანთ, ნამდა იფჩინენთ თის. 4 თინა, მით იჩიებ, იფჩინენქია თის, მარა თიშ მცნებეფს ვემეჸუნს, მეტყურე რე დო სიმართლე ვა რე თიშ გურს, 5 მარა მით მეჸუნს თიშ სიტყვას, ოძირანს, ნამდა მართალო უჸორს ღორონთ. თეშნერო ფხვადუთ, ნამდა ართობა მიღუნა თიწკუმა. 6 მით იჩიებ, ნამდა ართობას სქიდუ თიწკუმა, ვალდებულ რე თეშ იცხოვრას, მუჭოთ თინა ცხოვრენდჷ.
7 საჸოროფოეფ, ახალ მცნებას ვარინ, ჯვეშის რჭარუნთ, ნამუთ დაჭყაფშე გიღუდეს; თენა თი ჯვეშ მცნება რე, ნამდგაქ გაცხადებულქ იჸუ თქვანდა. 8 მარა თე მცნება, ნამდგას რჭარუნთ, ახალ ხოლო რე. თის ქოთ ქრისტე მეჸუნდჷ დო ქოთ თქვა მეჸუნთ, ათეშენ უკმელა დინუ დო ნამდვილ სინთე სინთანს.
9 მით იჩიებ, ნამდა სინთეს რე, მარა ავრე მუშ ჯიმა ჯოგჷ, დიო ხოლო უკმელას რე. 10 თეშ გინაწონს, მიდგას უჸორს მუშ ჯიმა, სინთეს სქიდუ დო მუთუნს ვეკახაბარკუ*, 11 მარა მიდგას ჯოგჷ მუშ ჯიმა, უკმელას რე დო უკმელას გილურს. თის ვა უჩქჷ, სო მეურს, მუშენდა უკმელას რენ თიშენ მუთუნს ვარწყე.
12 თქვა რჭარუნთ, სქუალეფ, მუშენდა თიშ სახელიშ გურშენ ცოდეფქ გეპატუეს; 13 თქვა რჭარუნთ, მუმალეფ, მუშენდა გეჩინებაფეთ თინა, მით დაჭყაფშე რე; თქვა რჭარუნთ, ახალგაზრდეფ, მუშენდა გიორჯგინით უბადოს; თქვა რჭარუნთ, ბაღანეფ, მუშენდა გეჩინებაფეთ ზეციერ მუმა; 14 თქვა რჭარუნთ, მუმალეფ, მუშენდა გეჩინებაფეთ თინა, მით დაჭყაფშე რე; თქვა რჭარუნთ, ახალგაზრდეფ, მუშენდა მტკიცას გერეთ დო ღორონთიშ სიტყვა სქიდუ თქვან გურეფს; თქვა გიორჯგინით თე ქიანას.
15 ვართ თე ქიანა გიჸორდან დო ვართ თინა, მუთ თე ქიანას რე. მიდგას თე ქიანა უჸორს, თის მუმა ვა უჸორს, 16 მუშენდა ირფელ, მუთ თე ქიანას რე – ცოდამ სხეულს ოკონ თინა, თოლს ოკონ თინა დო ქონებათ ცქვაფა – მუმაშე ვარინ, თე ქიანაშე მოურს. 17 თე ქიანა დო ირფელ, მუთ თის ოკო, მისპუ, მარა თინა, მით ღორონთიშ ნებას ასრულენს, სადღამუშოთ დოსქიდუ.
18 სქუალეფ, ასე ბოლო საათ რე დო, მუჭოთ გიჩქუნა, ანტიქრისტე მოურს; უკვე ქოთ გემკორჩქინდჷ ბრელ ანტიქრისტექ დო თეთ ფხვადუთ, ნამდა ბოლო საათ რე. 19 თინეფ ჩქინწკუმა რდესჷ, მარა ჩქინდე მიდართეს, მუშენდა ჩქინცალეფ ვა რდესჷ; ჩქინცალეფ ქორდესკონ, ჩქინწკუმა ქუდოსქიდუდეს, მარა მიდართეს, მუშენდა გეგმიარგამუკო, ნამდა არძა ვა რე ჩქინცალ. 20 მარა თქვა წმინდაქ გიშარგორეს* დო არძას გიღუნა რჩქინა. 21 სიმართლე ვაიჩქუნან თიშენ ვარინ, გიჩქუნან თიშენ რჭარუნთ, დო თიშენ ხოლო, ნამდა სიმართლეშე ტყურა ვა მოურს.
22 მი რე მეტყურე? თინა ვარიო, მით ივარიენს, ნამდა იესო რე ქრისტე?! მით ვარიას იჩიებ ზეციერ მუმაშე დო თიშ სქუაშე, ანტიქრისტე რე. 23 ზეციერ მუმაშე მოწონა ვა უღჷ მითინს, მით ოჭიშის ურთინუანს თიშ სქუას, მარა ზეციერ მუმაშე მოწონა უღჷ არძას, მით აღიარენს თიშ სქუას. 24 გირაგადუთ: თქვან გურეფს ქუდოსქიდას თიქ, მუთ დუდშე მირჩქილეთ. დუდშე მორჩქილაფირ თქვან გურეფს ქოსქიდუნ-და, ართობას დოსქიდუთ ზეციერ მუმაწკუმა დო თიშ სქუაწკუმა. 25 ხვალე თენა ვარინ, თინა ულიებ სიცოცხლეს მოპირუნა.
26 თე ირფელს თინეფიშ გურშენ რჭარუნთ, მით ოცადუნა, მიგოჩილითუან. 27 მარა თქვა ღორონთიქ გიშარგორეს* მუშ წმინდა შურით*, ნამუთ თქვან შქას სქიდუ. თინა გოგურუანა წმინდა შურით, ნამუთ მართალ რე დო ტყურას ვეჩიებ, ათეშენ შხვა მითინ ვა გოსაჭირუნა მაგურაფალო, ნამდა თიწკუმა ართობას ქუდოსქიდათ. 28 თაშ ნამდა, სქუალეფ, ქუდოსქიდით თიწკუმა ართობას, ნამდა თიშ გიმოცხადებაშ დროს თამამას შემალებუან რაგადიქ დო თიშ მოულაშ* დროს ონჯღორე ვა ბძირათ დო ოტყობინალქ ვა მაჸუან. 29 იესო მართალ რენ თინა ქოიჩქუნან-და, თინა ხოლო გარჩქვენუნა, ნამდა არძა, მით სიმართლეშ საქმეეფს ორთჷ, ღორონთიშ სქუა რე.